|
رد: من سواليف الأولين>> لاتفوتكم ,,,
ههههههههههههههههههه هههههههههه ههههههههه حلووه .. سريع بديهه الله يضره ههههههههههههههههههههه الف شكر متصفح بطل واعلى تقييم |
رد: من سواليف الأولين>> لاتفوتكم ,,,
نحن نتابع طبتِ وطاب نبض قلمك مشرفتنا |
رد: من سواليف الأولين>> لاتفوتكم ,,,
أختي حتماً سأكون
شكرا لمرورك الجميل وتقييمك حفظك المولى ، ، مراقبنا نور الأصايل شرف لي متابعتك بارك الله فيك لاهنت |
رد: من سواليف الأولين>> لاتفوتكم ,,,
قيل أن فيه رجل قد خطب له فتاة وبعد موافقة أهل الفتاة وعقد القران ، حصل بينه وبين أهل البنت خلاف حيث أدى هذا الخلاف إلى عدم تزويجه الفتاة بعد أن ملك عليها ، وبعد مدة أرسل له مندوب سرى للبنت وقال لهذا الشخص ، رح واسألها هل هي راضية على ما حصل لنا أنا وهي ، بسبب هذا الخلاف ، وقال له : إذا جيت عندها قل لها أنني ارغب في مقابلتها بعد صلاة العشاء ، وسوف أجئ قريب منهم وأعوي في البندقية حيث يكون الصوت شبيه بصوت الذئب ، وتكون إشارة وصولي للمكان . وذهب هذا الشخص اللي أرسله ، وقال لها نفس ما قاله . فقالت – ليس عندي مانع ، ورجع واخبره بموافقتها على هذا ، وجاء على حسب الموعد المذكور ، وهي كذلك جاءت على الموعد ، وتقابلوا وجلسا مع بعض حوالي ثلاث ساعات ، وبعدها الكل راح في طريقه . وبعد مدة تبين بأن الفتاة حامل وقد أصيب أهلها بذهول ومصيبة كبيرة لهذا الحادث الذي سوف يكون فضيحة لهم فلم يصدقوا هذا الكلام ، وظلوا حائرين في مصيبتهم فقال شقيقها الأصغر : أنني سوف اذهب إلى الرجل اللي هو زوجها ، وسوف اعرف الأمر على حقيقته ، ذهب الولد وتنكر حتى لا ينكشف أمره وجاء إلى زوج شقيقته وصار له ضيف ، وقام الرجل بالواجب وهو إكرام الضيف ، وبعد العشاء وبعد أن خف المجلس وذهب كثير من جماعته ، قال الولد الضيف ، هل تسمحوا لي بالغناء على الربابة ، فقالوا : تفضل واسمعنا . واخذ الربابة الضيف وقال هذه الأبيات : ياذيب يااللي تالي الليل عـويت - ثلاث عويات قويات وصـــلاب اسئلك بعدهن ويش سـويت - يوم الثريا ثلجت والقمرغـــــــــاب بعد هذه الأبيات وضع الربابة وسكت عن الغناء ، أما الرجل بعد أن سمع القصيدة عرف الأمر واكتشف بأن هذا الضيف شقيق لزوجته أو من عيال عمها ، وعرف كل ما حصل بينه وبينها في السابق فأخذ الربابة واخذ يغنى عليها هذه الأبيات ، وهي رد على الأبيات التي قالها الضيف ، قال : عز الله اني من قراكم تعشيت - واخذت شاة البيت من بين الاطناب على النقا وألا الردى ما تهقويت - ردوا حلالي ياعربين الأنساب وهو بهذه الأبيات يوضح بما حصل بينه وبين البنت كان من حقه وحقها حيث سبق أن عقد عليها القران ، وهي حلال عليه ، فقال : أنني جيت بالطريقة المشروعة ، وبعد أن سمع كلامه شقيقها ، قال السلام عليك ، وعرفة على نفسه وقال له : سوف تذهب معي وتأخذ زوجتك حيثما تشاء وسلامتكم |
رد: من سواليف الأولين>> لاتفوتكم ,,,
ذكرت عمة ابوي الله يرحمها كانت معروفة بقوة باسها بس أبوها زوّجها واحدن هي ماتبيه ولا قالت ماابيه المهم هالرجال ديرته بعيده عن ديرة أهلها ويوم عرسها شدوا لديرة زوجها وطبعاً زواجهم أول بدري الساعة٨ كل شي خالص يوم وصلوا ديرة زوجها مااش ماجاز لها الوضع ولما نام الرجال شدّي وارجعي لديرتس بنص الليل طبعاً البعد بين الديرتين لانهم يشدون رجلية يعني مشي وهي تمشي بالطريق نامت وقامت على صوت ذيب بس ماشاء الله كملت مشوارها مارجعت ليين وصلت بيت أهلها المهم الرجال صحى من نومته ولا حوله مره وخااف وراح لابوها يقول ان المره مالها أثر وكان خايف من ردة فعل ابو زوجته ويوم وصل الا ابوها يستقبله وهو تسنه مهبول يقول ان بنتك مالقيتها قال الأبو بنتي وعندي وماتبيك رجل لها طلقها وكان مجبور يطلق لان زوجته طلعت مادرا عنها وذي عيبة بزمنهم يعني انت ماحافظت عليها ومنت كفو تاخذها المهم طلقها ورجع ديرته منقول للأمانه |
رد: من سواليف الأولين>> لاتفوتكم ,,,
حكتنا امي عن حياة جدتي و تقول كانت جدتي لأبويا مررررره شقية وعنيدة وشخصيتها قوية ولما كانت تزعل كانت ماتجلس على العشاء ( تسخط الاكل ) وكانت امها تبقيلها حصتها على الكرويته وتغطيها بحلة او غطى الموجود هذاك الوقت ولما ينامو كلهم تروح بشويش وتتعشى وترجع تنام فزودتها وكثر سخطها وكان زمان عيب احد يتاخر على (المتعه ) الوجبة او مايحضرها وفيوم سخطة فقام ابوها وقعد يراقب امها لحد ما نامت وراح ورفع الغطى وشال الاكل وحط بدالة ( حجر ) كبير ورجع الغطى عليه وراح ينام لما قامت جدتي المسكينة ورفعة الغطى لقيت الطامة ( الحجر ) ورجعت نامت على جوعها .. ومن يومها ماعا سخطة وبطلة العادة هذه الله يرحم المتوفين منهم ويبقى الاحياء ويمتهم بالصحة والعافية على طاعته منقول للأمانه |
رد: من سواليف الأولين>> لاتفوتكم ,,,
اللي ماانساه من حكاوي جدتي ذكرت سالفة لجدتي الله يطول بعمرها لما توفى أبوها كان عليه قضاء 3أيام ماصامها لانه تعبان المهم أخوانها وخواتها قالوا بنطلع عنه صدقة وبس لكن هي أصرت قالت ماايصلح لااازم احد مننا يصوم عنه واخوانها تمسكوا برايهم وطلعوا عنه بس هي اببد ماارتاحت ونوت الصيام له وصامت ثلاث أيام ولما خلصت فنفس الليلة شافت أبوها بالحلم واقف عند الباب ويقولها يابنيتي ريحتيني وقضيتي ديني عادها ثلاث مرات الله يرحمه ويتقبل منه ومن جدتي عشان كذا لاتستهينوا بالقضاء بعد رمضااان ، ، وسالفة ثانية جدتي كل سنة تسوي عزيمة برمضان لوالديها وزوجها الله يرحمه المهم اخو زوجها متوفي ولاعنده ولد ولا تلد الله يرحمه المهم حلمت فيه يقولها يا فلانه أنا مالي أحد يذكرني احشريني مع أخوي يقصد ثوبيلي معه ومن بعده صارت تنوي له هو بعد الله يرحمه سبحان الله جدتي عندها رؤى كثيير وتكون صادقة ويوم وفاة عمتي الله يرحمها شافت مثل الشجرة الكبيرة الخضراء سبحان الله هذى من الرؤي الطيبه الله يجزاها خير منقول للأمانه |
رد: من سواليف الأولين>> لاتفوتكم ,,,
يقولها يا فلانه أنا مالي أحد يذكرني احشريني مع أخوي يقصد ثوبيلي معه أظن الكلمة( احشريني ) حتى تكمل المعنى المطلوب تحتاج النقطة على الحاء فتكون ( اخشريني ) من المشاركة كما في اللهجة الدارجة تراني خشيرك أي شريكك مارأيك مشرفتنا المتصفح رائع ويستحق التثبيت |
رد: من سواليف الأولين>> لاتفوتكم ,,,
اقتباس:
هلا فيك مراقبنا نورالأصايل ممكن يكون هذا هو المعنى بارك الله فيك وما انا الا ناقله للموضوع شكراً لتشريفك القيم و تثبيتك للموضوع جزاك ربي الجنه |
رد: من سواليف الأولين>> لاتفوتكم ,,,
قصة مشهورة يتناقلها الرواة ... والتي وقعت بين الشاعر / حنيف بن سعيدان المطيري من أهل الارطاوية ، وأحد شعراء منطقة المجمعة وقيل حرمة حيث تدور أحداث هذه القصة بعد أن سمع هذا الشاعر بموهبة حنيف بن سعيدان الشعرية , وتعطش لمقابلته وبعد مرور وقت من الزمن شاءت الأقدار واتى حنيف إلى بلدة حرمه لقضاء بعض الإشغال وتم اللقاء بين حنيف وبين ذلك الشاعر : واستغرب حنيف من إصرار ذالك الشاعر على دعوته لتناول القهوة عنده. فقال خمسة عشر فنجال لحنيف صبيت http://www.mekshat.com/vb/clear.gifhttp://www.mekshat.com/vb/clear.gifلو إن بطنه قربةٍ قد ملاها بعد هذا البيت تأكد حنيف بن سعيدان أن الدعوة هذه مبيت لها من قبل فأجاب على الفور قائلا: لا تحسب إني من دلالك تقهويت http://www.mekshat.com/vb/clear.gifhttp://www.mekshat.com/vb/clear.gifماينقه الشراب.. من كثر ماها وراك ماسويتها يوم سويت http://www.mekshat.com/vb/clear.gifhttp://www.mekshat.com/vb/clear.gifمثل العميم اللي يزيّن سواها ياموصي الحرمة على صكت البيتhttp://www.mekshat.com/vb/clear.gifhttp://www.mekshat.com/vb/clear.gif تقول ماهو فيه وانته ورآها وآخيبة أمك يوم قالت تظّنيت http://www.mekshat.com/vb/clear.gifhttp://www.mekshat.com/vb/clear.gifياخيبة أمك ياقطيعة رجاها فأصيب ذالك الشاعر بالدهشة من قوة شعر حنيف وفطنته , وقبّل رأسه وطلبه بأن لا يكمل أكثر مما سمع |
رد: من سواليف الأولين>> لاتفوتكم ,,,
هذه القصة تتحدث عن أحد عادات وسلوم العرب وهو الوفاء بحق الخوي والمقصود بالخوي هو الرفيق المصاحب في السفر الذي أوصى به الله في كتابه العزيز .. ( والصاحب بالجنب ) وهذه القصة حدثت في عام 1800 هجري تقريبا أنه كان هناك قافلة متجهة إلى الحج من أهالي المذنب وعنيزة بالقصيم ويتزعم القافلة شخص يدعى ( صالح بن رخيص ) مرت هذه القافلة على بلدة الرس فرافقهم الشاب ( محمد بن منصور الريس من الوهبة من بني تميم ) إلى الحج فلما قضوا مناسكهم وهم عائدون إلى ديارهم أصيب أحد أفراد القافلة بمرض ( الجدري ) وهو مرض خطير مميت ومعدي ،فلما أشتد عليه المرض أصبح جسده متهالك ولا يتحمل الركوب على الراحلة ولا يتحمل الحركة لأن مرض الجدري يذيب الجسم ويمزق اللحم . فتشاور الجميع في حل موضوع هذا المصاب ، فقال بعضهم نضع له مصاليب وهي نعشا ً من العصي كالسلم يوضع على الراحلة ولكن هذا مؤلم لرجل أنهكه المرض ، وقال البعض : نضعه في عدل ونحمله عليه والعدل هو وعاء كالكيس يصنع من الصوف الخشن . وعندها قام الشاب محمد بن منصور الريس التميمي وقال : عندي الحل وهو البقاء عنده حتى يحكم الله له بموت أو حياة ، فقال بن رخيص زعيم القافلة : لا نستطيع البقاء لأن المرض يطول ، والقافلة ليس لديها المئونة الكافية لمدة طويلة وقال لأهل القافلة : إذن أذهبوا أنتم وأنا سوف أمكث مع المصاب فإن مات دفنته وإن شفي أتيت به ، فأخذ كبير وأمير القافلة بن رخيص يشير على الشاب بعدم البقاء في هذه الجبال ( حيث أنهم بالقرب من جبل بلغه المعروف بين القصيم والمدينة المنورة ) الموحشة والصحاري القليلة الماء والكلاء فقال بن ريس مخاطبا ً لابن رخيص : هذا خوينا يا بن رخيص هذا خوينا يا بن رخيص ولما عزم بن رخيص على المغادرة وترك المريض و الشاب محمد بن منصور بن ريس التميمي نظم الشاب الشهم محمد بن منصور بن ريس قصيدته المشهورة وأرسل بها مع بن رخيص وطلب بأن يوصل القصيدة لأمه واللتي راح تسأل عن أبنها اللذي لم يصل ضمن القافلة والقصيدة هي التي أصبحت مشهورة بين الناس والتي قال فيها : قل هيه ألا ياشايبات المحاقيب = وأقفن من عندي إجداد الأثاري أقفن بالرخصة كما يقفي الذيب = لاطالع الشاوي إبليل ٍ غداري ياكن لسب أذيالهن بالعراقيب = رقاصة تبغي إبزينة تماري يابن رخيص كب عنك الزواريب = عمارنا يابن رخيص عواري خوينا ما نصلبه بالمصاليب = ولا يشتكي منا دروب العزاري لزمن تجيك أمي بكبده لواهيب = تبكي ومن كثر البكا ماتداري تنشدك باللي يعلم السر والغيب = وين ابني اللي لك خوي إمباري قله قعد في عاليات المراقيب = في قنة ٍ ماحولها الا الحباري يتنى خويه لين يبدي به الطيب = ولا يجيه إمن الصواديف جاري وإن كان ماقمنا بحق المواجيب = حرم علينا لابسات الخزاري وجلس بن ريس عند رفيقه بجبل فرقين بغار قريب من بلدة بلغة حالياً وهي بين القصيم والمدينة المنورة وقام بالصيد وإشعال النار ثم يقوم بملة رفيقه وبعد خمسين يوماً أو أكثر بدأ خويه يتعافى ولما أصبح قادراً على ركوب الذلول اتجها من بلغة إلى الرس وأستقبل بن ريس في الرس إستقبال الأبطال وجائت والدة محمد بن منصور الريس من بين صفوف المستقبلين يقودها شعور الأمومة لاحتضان ابنها محمد وقيل أنها كانت كاشفة الوجه من شدة فرحها واحتضنت إبنها الشجاع وأخذت تعاتبه من شدة الفرح وتقول له : وين أنت يا أبا الضلعان ؟ جالس بالضلعان وأنا قلبي يتقطع عليك باليوم والليلة ومن هذه الحادثة أطلق عليه الناس أبا الضلعان ولاتزال سلالة المذكور تعرف بـ (الضلعان) إ لى اليوم وهم من ساكني محافظة الرس,,, تغمده الله بواسع رحمته |
رد: من سواليف الأولين>> لاتفوتكم ,,,
ذيك السنه اللي صامت فيها حصّه تقول حصه ... اوّل مرّه صمت فيها رمضان كان عمري ثمان سنين وكنا ساكنين في حي ( الدوبـّيـه ) في الرياض ... وهو حي كان ومازال .. حي منسي ومهوب موجود على خريطة الرياض .. حتى اهل البلديه مايعرفون وينه فيه ؟ وللي مايعرفه ... حي ( الدوبـيّـه ) حي صغينون وسط حي معكال اللي حدوده ... احياء ... الديره ودخنه وسكيرينه وشارع سلام ... وكان بيتنا على شارعين له باب رسمي ماأقدر افتحه من كبره ... كلّـه خشب وش ثقله ... والباب الثاني على السكه الثانيه .. صغيّـر اقدر افتحه مسمينه .. باب النقبه ... نروح له من عند حوش الغنم ... السنه اللي بديت اصوم فيها رمضان كانت في الصيف .. كنت اشوف امي تنوم الظهر في بعض الاحيان ... تحت مقطار القربه ومهفتها في يدها .. .. وجدتي تقول ...: يالله براد الجنه.. كنا نفطر في بطن الحوي ( البيت ) وكانت جدتي ( طرفه ) تطلب مني افرش السماط ( السفره ) الى جا حول المغرب .. وكانوا يفطرون ) عندنا ( لولوه و هيلــه ) بنات عمي ( سعد ) .. كنت اشوفهم حريم كبار ... عشانهم دايم يتوزّون عني ولا يعلموني وش يقولون ؟ في ليله من ليالي رمضان .. كنّا قاعدين نلعب بالسطح ( حبشه ) .. رقت علينا جدتي وامي عقب ماصلّوا التراويح وجابوا معهم القهوه والشاهي و .. الحبّ .. وفرشت لهم .. لولوه .. الحصير .. وجابت هيله ... التريك .. عشان يسفّر علينا ... قالت امي : كان خليتيه محلّه الليله قمرا ... وجلسوا كلهم يسولفون ... ولولوه ... تصب القهوه ... قالت لهم جدتي وهي تاخذ الفنجال من يد لولوه ... : ورا ماناديتي امك تقهوى معنا ؟ هيله : امي اليوم عندها اختها جايبتن ولدها يقرا عليه ابوي . ــ امــي : هـوه .. عسا مهوب مصيخين ؟ لولوه : لا ... بس يقولون ان فيه ضيقه . ـــ جدتي : الله يكفينا شر الضيقه يابنيتي . امي : الله يعافينا كثرت الامراض والصخاين . وفجأه نطّت هيله الملقوفه وقالت : الاّ ... ياخالتي ( تقصد امي ) ورا حصّه ( تقصدني ) ماتصوم ... امي : توّها صغيّره .. ****لله بتصوم المقبله ـــ جدتي : لا مهيب صغيّره .. الاّ حرمتن ماشالله عليها . وتلقفت لولوه : هــاه .. يا حصّه ودّك تصومين باكر ... ؟ جاوبت عني جدتي : ايه بتصوم معد باقين من الشهر الا نصّه ... والى منّها صامته ياعندي لها حقاق ( هديه ) بس مانيب معلّمتها هالحين الين تصومه التفتت علي امي وهي تقشّم الحب وقالت : هـاه ياحصيصه بتصومين باكر ؟ رديت من غير تفكير : ايه ابصوم . ـــ هيله : خلاص اجل لاعاد تنومين الين تسحّرين .. وقعدت ( هيله ولولوه ) يتضاحكون ... وحده تقول : الله من زين الصوم . والثانيه ترد عليها : صوم الدجاجة والديك . نهرتهم جدتي : أها بس .. تعجبكم ****لله . جا وقت السحور .... وانا اقاوم النوم وجلست معهم .. كانت امي حريصتن علي ... اكلتني من المراصيع ... وشرّبتني لبن .. مع ان جدتي تقول لها : خلاص يكفي شرب ( لا تزغّل ) بالفراش ؟ مع اني والله عمري ماسويتها في مرقدي .. لكن الحرص زين على قولت جدتي . ومانسوا يوصوني عقب ماصليت الفجر اني اروح للصهروج ( الحمام ) قبل ما أنصى فراشي .. نمت وقمت الضحى ... و... بحلت بعمري مدري وش اسوي ... العاده آكل شي ثمّن اقعد العب . لكن هالحين ماأعرف العب وانا جايعه طيب البيت كلهم نايمين ... ورا ماآخذ لي شي آكله هم وش يدريهم كلهم نايمين ... وتذكرت الصوغه اللي مواعدتني جدتي .. الصراحه بغيت آكل .. لولا اني سمعت امي تناديني من الحجره : حصه ... حصه .. تعالي ونا امك ... خذتني في حظنها وقعدت تحجي علي الين نمت ثانيه .... قمت عقب العصر .. ودخلت المطبخ ... لقيت امي تصلّح القهوه والشوربه وبنات عمي يلفّون السمبوسه ويصلّحون التطلي ... التفتت علي هيله وهي تحرّك التطلي بالملاّس وقالت لي : حيا الله الصايمين . قالت لولوه : اي هيّن .. الله من الصدق . قالت امي : حرام عليكم بنتي صايمه قالت هيله : اي والله شوفي وجهها اصفر قالت امي : روحي حبيبتي انسدحي بالغرفه الين يذّن المغرب طلعت من المطبخ وقعدت ادور في البيت واناقز .. وعقب ساعة من المطامر ... حسّيت بالظما الشديد .. عوّدت لمّـي وانا ابولع ريقي .. وقلت لها وانا يالله احكي : يمّه معليش اشرب مويه ؟ ــ خلاص وناامك معاد الا خير شوي ويذّن المغرب لكن هالحكي مايطفي ظماي ... وشخصت عيوني على ( الزّيـــر ) وهوينقّط على خيشة الجح اللي تحته ... ورجعت اقول لمّي : بس شوي ولانيب بالعته؟ وامي تشجعني وتصبّرني . نطّت هيله الملقوفه راعيت فكرة الصوم : خالتي خليها تشرب وتفكنا ... عاد من زين صومها هالحين . لكن امي سفهتها وقالت لي عشان تشغلني : روحي افرشي السماط يمّه ..والتفتت على لولوه : عطيها السماط .. مدّت لي لولوه السماط من غير نفس : خذي ياحظي ماصام الا انتي .. الله يبلشك ياهيله انكانك ابلشتينا بهالدبقه. وهيله تضحك وهي تصف صحون التطلي في الصحن الكبير وتغطيها بالشاش جا ابوي من المسجد ... وفي يده مصحفه .. وجلسنا كلنا انا وامي وابوي وجدتي وبنات عمي ... نحتري اذان المغرب .. قالت امي لبوي : ابشرك حصة صايمتن اليوم .. قال ابوي : اوّل خير ... لكن يوم شاف شكلي يالله ارفع عيوني وخشتي وارمه .. قال لمّي : يكفيها اليوم .. يمديها على خير المقبله . ناظرت بنات عمي لقيتهن ساكتات عشان ابوي موجود مسويات انفسهن مئدبات . رمى المدفع واذّن المغرب وبدينا نفطر .. وابدى اقحن ( اشرب ) من التوت وامي تقول لي يابنيتي بسّك من هالتوت وانتفخ بطني وتصبب عرقي وانسدحت معد ادري عن الدنيا .. افطروا اهلي زي العاده .. قهوه وتمر وشوربه وسنبوسه وتوت .. ضفت هيله ولولوه السماط وقاموا كلهم يصلّون المغرب وانا منسدحه وبطني يعوّرني .... جت .. هيله وطمّنت علي : حصه ... حصه .. وشفيك . فتحت عيوني وقلت لها : يلله فارقي .. ردّت هيله : بعد ... هذا جزاي يالشينه وراحت وخلّتني ناديت امي وجت من على سجادتها : وشفيك يابنيتي . توني ابقول لها وديني للصهروج ..( الحمام) ماأمداني ..و .. كل اللي في بطني على الحصير ... ارتاعت امي وفصخت جلال الصلاة وقعدت تمسحني به وتسمي علي وتقول : الله لا يعيد هالتوت . وصاحت تنادي لولوه لكنها ماردت بس سمعتها تخبط على ركبتها .. كانت تصلي .. عودت امي تنادي هيله .. وجت هيله تركض : وشفيك ياخالتي ويوم شافتني قعدت تضحك الين جلست على الارض من الضحك وامي تقول لها : انا مناديتك عشان تضحكين روحي جيبي بادية شوربه لحصّه خلّي كبدها تركد ..... وشربت الشوربه وارتحت ومانستني جدتي من الهديه ( مخنق زري وش زينه ) لكن ماعاد خلتني امي اصوم باقي الشهر ... بس صمت السنه اللي عقبها . ومرّت السنين ... وجلست هيله ولولوه يسولفون مرّه عن شي صار مبطي وهيله تحاول تذكّر لولوه ... ولولوه ناسيه ...و اخيرا لقت هيله علامه بتخلّي لولوه تذكّر ... قالت هيله : ذيك السنه اللي صامت فيها حصّه ؟! وذكرت لولوه مع ان ذيك السنه اللي حطّوها علامه ماصمت فيها الا يوم... الله لايعيده ... خلاص صارت ذيك السنه تاريخ عند هيله ولولوه يعني مثل : سنت السبله وسنت الهدام وسنت الرحمه ... الله يذكركم بالخير يابنات عمي .. وبالاخص هيله اللي بسببها .. صمت ذاك اليوم وقحنت ( شربت ) التوت وصار اللي صار .. هيله اللي حطت لي تاريخ : ذيك السنه اللي صامت فيها حصه ؟ يازيــن سوالف الاوليـــن ببســـاطــتهم ونفوسهـم الحلوه منقول للأمانه |
رد: من سواليف الأولين>> لاتفوتكم ,,,
ههههههههههههههههههه حبيت حصه ..ياملحها ..اتخيلها دبدوبه وشعرها ناعم :) ينطيك العافيه على النقل |
رد: من سواليف الأولين>> لاتفوتكم ,,,
ههههههه
قصص جميله وحكاوي وسوالف اكثر من رائعه دمتي يالغلا على تالقك وما زلنا في انتظار البقيه لا عدمناك |
رد: من سواليف الأولين>> لاتفوتكم ,,,
عزيزاتي
حتماً ساكون بقايا الذكريات اشكر إطلالتكم الحلوه خمائل من الياسمين تعطر مروركم العذب |
رد: من سواليف الأولين>> لاتفوتكم ,,,
هالسالفهـ من جدتي الله يحفظها .. تقول الله يطولنا بعميرها : كنت صغيره توني يعني تقولون عمري 10 سنين او 11 سنه .. ا لمهم .. تقول طبعا من اول كانت البنت عيب تطلع من البيت وعيب الوحده تدرس إلا اللي آبآئهم متثقفين و كانو اغلبهم آبآئهم مدرسين .. فا ماكان التعقيد عندهم مثل آبآئنا .. عاد كان الوالد الله يرحمهـ آمام مسجد و عدل بالمحكمهـ يعني شغله بمحكمة العدل .. وكان رافض اننا ندرس إلا ثنتين من خواتي كانو اصغرنا .. فا هذول الوحيدين لما كبرو درسو .. آما انا وخاوتي الباقيات يعني الكبار . كنا ندرس بس ندرس قرآن .. كنآ نروح عند الكتآب عند وحده تدرسنا .. عاد هالوحده الله يرحمها كانت شديده وكان معآها خيزرانهـ الله لا يوريكم ولاا تذقون منها كانت اللي ماتحفظ تمسطها بهآ لين تقول ربي اللهـ .. وكانت توقفنا في الشمس لو تغلطين بس في آيهـ ما تشوفون إلا غبآرنا .. مرهـ جيت وماحفظت الآيات اللي محددتها .. عاد قامت وطآلعتني ويوم شفت نظراتها قلت اي والله اللي رحت فيها.. ذقت من هالخيزرانهـ وقفت في الشمس لين صرت فحمهـ .. عقبها رجعت للبيت قلت لابوي هذا وجهي ان رحت عندها ابوي حاول يقنعني .. قلت لو اجلس طول عمري مادرست .. مابي اروح عندها وهذآني ماادرست والحمد حآفظهـ كم سورهـ .. بس آنصحكم بالدراسه والله صدق من قال ان العلم نور والجهل ضلالهـ ... منقول للأمانه |
رد: من سواليف الأولين>> لاتفوتكم ,,,
هذا سلمكم الله واحدن من زملانا أول ويقال له محمد ( مبطي ما شفته من 15 سنه ) عيار ملعون خير ولا تامنه ابد ابد .. ابوه الله يرحمه ويغفر له رجل مهوب بسيط ومن الرجال المعروفين وشجاع الله يغفر له .. بس مشكلته انه ينام في السطح .. الله يرحمه .. ومحمد هذا موذي ابوه كل يوم مشكله وكل يوم احد شاكيه وهالابو بلش في هالولد .. وكان محمد كل شوي ناط لأبوه .. يبوي ابي اعرس .. يقول له كل تراب .. اذا عقلت زوجناك .. ومحمد عارف انه مهوب عاقل ابد .. المهم تكررت هالمحاولات لمدة سنه تقريبا والابو ما عنده الا كلمة .. كل تراب .. اذا عقلت زوجناك . أييييييييييييييه .. محمد فكر .. ثم فكر .. ثم قرر .. ابوه هو ضحيته القادمه .. بس كيف ؟ أخذ يتابع ابوه ويرصد تحركاته بشكل دقيق .. فوجد ان ابوه ماعنده خرابيط .. من البيت للمسجد ومن المسجد للبيت واذا بغا ينوم طلع السطح .. طلع محمد للسطح ورصد المكان وحدد مكان نوم الشايب ( ابو محمد ) .. ولقى ثغرة بسيطة ابوه الله يغفر له ينام جمب المشعاب .. فتفتق ذهن ابو حميد ( محمد ) عن فكرة جهنمية .. فراح للسوق وشرا له لي حق كهرب ( ذاك البرتقالي البلاستيك ) بس طويل .. ومده من غرفته تحت الين المثعاب اللي جمب راس ابوه .. وفي الليل .. راح ابو محمد يرقد وذهب محمد يتابع ابوه اللي كان يسمع الراديو حتى طفى ابو محمد الرادو وحط راسه ونعس .. ونزل محمد لغرفته وانتظر شوي حتى يغرق ابوه في النوم .. وبعد شوي .. مسك اللي وبدأ يتكلم في اللي مناديا ابوه .. وابوه بالمناسبة اسمه علي .. يا علي .. يا علي .. زوج ابنك محمد يا علي .. يا علي .. زوج ابنك محمد يا علي .. يا علي .. زوج ابنك محمد وسكت ... في الصباح .. قام ابو محمد وقابل ولده وقال له ما ودك تعرس ؟ فسألته ام محمد .. خير يبو محمد ؟ انت قبل كم يوم طارد الولد .. فقال لها الله يرحمه سمعت هاتفا يناديني في المنام ويقول يا علي زوج محمد ولدك .. ولعها خيره انشاء الله محمد خطب .. وأعرس واقام عند ابوه .. وكان معه هوندا عنابية والله ما انساها ولكنه على ما يبدوا مل من الهوندا وكان يبغى كابرس ( شفر ) .. فقرر استخدام نفس الخطة فجهّز اللي ولما نام ابوه سوى نفس الشي .. وبدأ يتكلم في اللي ويقول .. يا علي .. يا علي .. اشتر لولدك محمد كابرس أحمر يا علي .. يا علي .. اشتر لولدك محمد كابرس أحمر يا علي .. يا علي .. اشتر لولدك محمد كابرس أحمر وفي الصباح قام ابو محمد ونادى محمد وراحوا يشترون لمحمد الكابرس الأحمر وبعد هذا الموضوع بشهرين او ثلاثه اراد محمد ان يروح مع صديق له لا يقل عيارة عنه الى مصر وكان بحاجة عشرين الف ذاك الحين .. فقرر استخدام نفس الخطه .. وفي الليل .. مد اللي وعندما بدأ في الكلام قائلا .. يا علي .. يا علي .. عط ولدك محمد عشرين الف دف محمد اللّي بشكل غير مقصود .. فضرب في جبهة ابوه اللي قام وانتبه للي وحاول يسحبه الا ان محمد كان انشط وتل اللي لكن هذا لم يمنع ابوه ان ياخذ النعال وينزل يفرش محمد عند مرته جل هاتف في المنام يقول عطه كابرس .. ومن وقتها توقف محمد عن المقالب العائلية وانهبل في المقالب على الناس .. و يقول شايبنا كنت اذا شفت ابوه الله يغفر له في المسجد ذاك الحين او قابلته صدفة كنت اتماسك عشان لا اطيح من الضحك عنده لا يفرشني مثل ولده .. رحم الله الوالد علي .. والله يهدي محمد اللي مازالت مقالبه محل التندر منقول للأمانه |
رد: من سواليف الأولين>> لاتفوتكم ,,,
فيه واحد .. من جماعتنا مات لله يغفر له دايم ينصح عياله يقول لهم .. (( ترى اخوياكم واصدقاكم الي تمشون معهم رخوم ومافيهم خير لنفسهم .. ريحتهم تتن وكلامهم كلام الدشير انتبهو وارفعو نفسكم عن الخمام )) ويكرر لهم الموال هذا دايم .. والعيال يقولون دفاعً عن اصدقائهم : اخويانا طيبين و رجاجيل ويحبون الطيب .. في يوم من الايام حب الاب ان يختبر عياله اختبار .. لكن مو اي اختبار .. اختبار في اختيارهم لـ اصدقائهم . ...... قام الشايب الصباح وراح لسوق الغنم واشترى هذاك الطلي وذبحه ودخله البيت وقال لـ ام عياله .. زيني العشاء عندي ضيوف الليله .. ولا يدرون العيال عن العشاء لاتعلمينهم !! الشايب يوم ذبح الطلي كان معه ثوب في سيارته خذا الثوب هذا وكب عليه من دم الطلي (( الخروف )) >> لاتوضح معروف .. وصار على الثوب اثار الدم وشكله يروع .. لبس الثوب وراح الشايب وقوم عياله من النوم وقال لهم : انا ذبحت رجال والجثه مقفل عليها فالملحق .. ابي واحد من اصدقاكم الي كل يوم وانتم معه وتعزون عليه ..نبيه يشيل و يعاونا ويدفن الجثه معنا !!! انصدمو العيال في ابوهم .. قالو وش لون ذبحته وكيف ووشلون ؟؟ رد عليهم : انا ذبحته وبس اخلصو علي شوفو لي واحد من اخوياكم يسنعني والا ترى الحكومه بيمسوكني ويقصون رقبتي .. راحو لواحد من اخوياهم الي دائماًً معهم وطقو الباب عليه وقالو له ابونا ذبح رجال ونبيك تساعدنا على دفنه والتخلص منه رد عليهم : واااحد ميت .. مذبوح.. ادفنه ؟؟ .. ؟؟؟ اقول اقول ... لا عاد اشوفك معتب لبيتنا ولا اشوف رقعه وجهك . راحو للثاني .. راحو للثالث ... نفس الجواب ونفس الرد ... ! قال الشايب : شفتو اخوياكم وشلون باعوكم في دقيقه تخلو عنكم في الشده وين الفزعه وين الصداقه ؟؟ انا الحين بروح لواحد من ربعي ومن اخوياي وهو الي بيسنعني وانا عارف انه مزبن للرفيق .. يوم وصل لبيت رفيقه ونزل وناداه .... تكفى يا ابو محمد انا داخل على الله ثم عليك انا ذبحت لي رجال ولا ادري وش اسوي به ولا ادري وش اسوي بعمري .. طلع عليه ابو محمد ورحب به وقلطه وخذى منه السالفه ولبس مسدسه ابو محمد وركب معهم فالموتر رايحين لبيت الشايب عشان يشوفون الجثه ويشوفون حل مع اهل المذبوح .. يوم وصلو وقلط ابو محمد وعياله فالملحق مالقو لا جثه ولا شئ .. قال الشايب : انا بس حبيت اعلمكم وش الفرق بين صداقة الرخوم وبين صداقة ابو محمد .. .. رجع الدم لعروق ابو محمد .. استفادو العيال من اختبار ابوهم .. اقام العشاء .. عزم الجيران على العشى وكان العشى على شرف ابو محمد وتقديره لمعنى (( الصداقه )) .. منقول للأمانة |
رد: من سواليف الأولين>> لاتفوتكم ,,,
كان فيه بنت تحب ولد عمها وامها وخواتها يدرون وفي يوم جاء ولد العم يخطب منهم ومعاه ابوه اللي هو عمها طارت البنيه من الفرحه وما صدقت الا جت امها وقالت انه يـــــبي اختها اللي اكبر منها وحزنت حزن وطبعا اختها رفضت وماوافقت لكن البنت قالت وهي زعلانه ( للي يبيه تسوونه ) واختها اصرت ورفضت لكن بعد خناق ومهاوش وافقت انها تتزوجه لانها خايفه على اختها لا تسوي بنفسها شي (ايه هين نصابه اثاريها حاطه عينها عليه)المهم تزوجت الاخت من ولد عمها وبعدين ومرت سنين جابو عيال لكن مره كانو اهل البنت مسويين عزيمه وهذي البنت عندها اخو متزوج وعنده ولد اسمه نفس اسم ولد عمها اللي تحبه وهي قاعده بالعزيمه نادو ولد اخوها وفزت عبالها ولد عمها وبعدها قالت هذي القصيده نادو سميه وفز قلبي لطاريه ويوم نظرته قلت ليته بداله قالوا علامك قلت يا ناس مافيه قالوا يعجبك قلت طاغي بجماله هم يحسبوني مادح له واطريه ما دروا عن قلبي واللي جراله تذكرت الحبيب اللي فؤادي هاويه للي سحرني في حلاه ودلاه كنه ملاك سبحان ربي مسويه مسكنه عيني وبوسط قلبي لحاله هو الوحيد اللي من الناس اغليه وهو اللي تمنيته ولا فكرت بداله خنقتني العبره وما قدرت ابكيه وبعدت عن ناسي بشوفت خياله جلست بوحدتي ابكي الحظ وابغيه وابكي حبيب شح الزمن بوصاله ليه يا زمن تبعده عن عيون مغليه وتتركه بحيرته من يعرف وش جراله رغم الفراق للحين ماني بناسيه وشلون انسى من حياتي فداله ليتكم يا ناس ما حييتو طاريه ولا شفت سميه ولا تذكرت خلي وجماله الله يرحم حالها المسكينه |
رد: من سواليف الأولين>> لاتفوتكم ,,,
يقلون في هاك الرجال اللي نازلن في الرياض واهله في حدا هاالدير اللي بعيدتن عن الرياض ولاه مايسقم عن اهله ومتعودن كل ربوع يروح لمهم ومن يوم يطلع من شغيله يركض ومايلحقه ثويبه من العجله! ويدق سلف على اميمته وابيه واخيانه الله يخلي هم له وفي طريدزه ( قبله ) يوزف على دربه عند ذيك الديرة الصغينونه اللي فيها( شيشة)(اي محطة بنزيم) يعبي مويتره بنزيم ويدخل الدكيكين ياخذ له قويطي ببسي واميهه وبسيكيتات و(حبيبات) (اي فصفص)ثم يتوكل على ربن خلقه المهم وهو على هاالحال الا مرتن من المرات يوم وقف مثل كل مره الا وهو يشوف ناسن شايلين لهم نعش وفوقه جنازه >>اجل ظنكم فوقه تبسي ؟اللهم يا كافي وقال في نفيسته وش يضرني؟ لو صليت معهم على ها لميت؟ مالي إلا اجر ويطفي مويتره ويروح معهم للمسجد والاهم مامن كثر يجي لهم سبعه او تسعه >>قال صفوا صفين قال حنا ماغير اثنين المهم كبر معهم واثر الميت تسنه تحرك وخوينا بعد مليزيفن الله يصلحه ناضره بعيينته واثر الميت غمز بعيينته لرفيزنا تقل يغازله اللهم يكافي الا وخوينا طارت بويهته ثم الميت طلع لسينه عقبها خوينا طار عقيله وهج من المسجد (والميت) يادافع البلا قام وراه يركض يبي يشده لكن اشوى رفيزنا ركب مويتره ونحاش وكل الدرب وهو يسمي على رويحته ويقرى المعوذات والورد>> تخبرون الى منه خاف قام يستغفر ويهل يا الله لاتعادزبنايا الله! والحمدلله اللي ستر على الرجال ولا اندفق عقيله وصار مهوب صويحي عاد في هذيك الحزة يمكن ان اميمته داعية له والحمدلله وصل بييتهم وهو بخير ولا جسر يعلم احد بسالفته.. يقول في نفسه (وشوله) ؟ اعلم محدن مصدقني وبصيرماغير علتس بحلوز الناس واصير مطنازتن لهم ومن عقب هاالسالفه وهو مستحيل يوزف عند هالديره ومن قبل ما (يدزقبل ) عليها الا وهو مشغل اذاعة القران الكريم وخذ له مدة مهيب شويه وهو على هالمنوال الين جاء ذاك اليوم اللي مدري وين حاطن رفيزنا عقيله فيه اثره نسى يعبي بنزين وهذي لمبة البنزين والعه ولاه حول هالديرة اللي صارت فيها سالفة الجنازة وماله إلا إنه غصب يعبي منها بنزيم قال الشكوى لله ويوقف وهو متوجش وطاقته النفاظه بس مسوي رويحته إنه عادي ولاهوب خايف ويقول في نفسه يا الله سترك ياالله إنك تعديها على خير وقام يطقق باصيبعاته من الزمل ويوم جا ء يحاسب الا هذا اللي يحط بدبته على تستفه؟ رويمسك مفيتيح مويتره وياخذه معه وقال له وين رايح؟ ويوم رفع رفيزنا رويسه! إلا بسم لله الرحمن الرحيم يا الله لاتبلانا عسى مهيب عقوبة! هذا هونفسه اللي كان مكفن (يحيي العظام وهي رميم) امنت بالله رفيزنا تصبت رجيلاته وطقته (أم الركب )وقام يتنافظ وصار يقول (بببببببسسسسسسسمممم الله ععععععلي انسسسي وووولا من اههههل بسسمم الله رد عليه قال بسم الله عليك الرحمن الرحيم اصبر خل اعلمك السالفه انا ياوخيي رجالن ماشاء الله علي نظول وكل يوم والاي ماغير مسدحن خلق الله اما سادحن لي رجال والا بزير والاحريمه (هها عن النية يقصد ناظل ) والا مكينة مزرعةوالاغنم او بعارين >>ماله تخصص معين ماشاء الله عليه وانا غصبن علي انظل اجل فيه واحدن ينطل وليده المهم ملوا جماعتي مني وقالوا مالنا إلا نصلي عليك صلاة الميت لأنه جايهم علم إن النظول اذا صلوا عليه يخزيه الله ولا عاد يقدر ينظل ! ويوم قالوا لي وش رايك؟ قلت لهم انا عصاكم اللي ماتعصاكم سووبي اللي تبون ثم عقبها كفنوني وشالوني على النعش ثم وهم يصلون علي ألا وانا اشوفك انت يا الإجنبي صافن تصلي معهم ويوم شفتك تناظرني مادريت عن نفسي إلا وأنا غامز لك ويوم خربت الدعوةعقبها قلت خل امزح معه ثم شفتني مطلع لسيني عليك ويوم شفتك منحاش وخايف قلت خل الحقه واعلمه بسالفهتي لايندفق عقله بس انت الله يهاديك (فشقه) عجزت اصيدك واحمد ربك اني معد صرت انظل سان هالحين انت محرول :ohmy: |
رد: من سواليف الأولين>> لاتفوتكم ,,,
بسم الله علينه وحبايبنا والمسلمين
حشا عينوه ارض ارض هههه ليتوه ينظل بشار وجماعتوه ويريح المسلمين من شرورهم.. اختي فقيدة امها مشكوووووورة والله يعطيك الف عافيه |
رد: من سواليف الأولين>> لاتفوتكم ,,,
ههههههههههههه
اضحك الله سنك اخي الكريم ابو الوردتين بشارواعوانه له الله سبحانه يمهل ولا يهمل اسعدني تشريف الجميل الف شكر لك |
رد: من سواليف الأولين>> لاتفوتكم ,,,
هذه قصه جرت على الشاعر عيادة بن منيس الخريصي الشمري كان الرجال متزوج ومن زو جه عطاها الله جمال وحسن خلق ودين وعفه المهم ان مره من المرات ارادت الزوجة انها تحج مع ابوها وكلمت زوجها وقال توكلي على الله يا بنت والله يسهل دربك ويرجعكم بالسلامه وما تشوفون شر والله يوم راحت الزوجه مع ابوها ويوم انتهوا من اداء فريضه الحج وخلصوا طلعوا من مكه متجهين لديارهم وهم بالطريق صاب الزوجه مرض ولعل هالمرض مستعصي وأدى هالمرض اللي فيها الى وافتها قبل الوصول الى ديارهم وصلوا على الزوجه وادفنوها وهذا قدر الله ويوم رجعوا لديرتهم استقبلهم الزوج اللي هو عياده وقالهم وين فلانه ؟؟ يقصد زوجته قال ابوها تطلبك الحلّ وادع لها با الرحمه تكدر حال عيادة وصابه الحزن وتضايق وهو يحبها ويعشقها ومن بعد ما سمع هالخبر وهو ما غير يدور في البر ويتمشى الحاله المهم وهو في البر جالس يكلم نفسه جاء له صديقن يقاله فريج وقال يا عيادة وانا اخوك هذي حال الدنيا لا تحزن والمثل يقول من ماتت زوجته جدد فراشه ومن مات ابوه ملك امره ومن مات اخوة انقصم ظهره وقال عياده لصديقه فريج يا فريج تعال باتسر ابيك قال فريج ابشر ويوم جاء باتسر جاء فريج لعيادة وقال آمر قال عيادة اسمع يا فريج : أمس الضحى نطيت راس الجبالـي ودليت اجيب ابيوتنـا مـن مغنـه وزعجت انا صوت الضحى من هبالي بصوت طويـل وترفعـه راس قنـه يا فريج انا ادري ينقدون الرجالـي يا فريج ما يقـدر ضميـري يكنـه يـا لايمـي بموادعـه كـل غالـي عساك ما تلفي علـى بـاب الجنـه يـا لايمـي مالـت عليـك الليالـي تاخـذ عجـوز راقـط مستجـنـه والحب جرح غير ملموس لا يمكن علاجه كما قال الشاعر خالد السديري : جرح قلبي عطيب ما يطيب =ـيدوك حالي كما عود الخلالـي اداوي ولافــاد الطبيـب =ـيمن مضاريب خطوات الغزالي |
رد: من سواليف الأولين>> لاتفوتكم ,,,
الله المستعان
فيه رجال وقالو انهم يحبون زوجاتهم ما كمل شهر وتزوج يعافيك ربي على جميل ما تجلبين لنا يالغلا |
رد: من سواليف الأولين>> لاتفوتكم ,,,
الله يسعدك يالغلا والله جلست كل هالمده اقراها من جد شيء اول مره اشوفها
دمتي متالقه |
رد: من سواليف الأولين>> لاتفوتكم ,,,
اقتباس:
اسعدني هذا الحضور الجميل منك يالغاليه مرورك هنا اكثر من راائع فكوني بالقرب دوما حفظك المولى |
رد: من سواليف الأولين>> لاتفوتكم ,,,
اقتباس:
وماكلماتك إلا وسام وشرف اعتز بها شكراً لك ولا تفي بحجم هذا الحضور الراقي ي الغاليه |
رد: من سواليف الأولين>> لاتفوتكم ,,,
هذه قصة لفايز بن بخيت رحمه الله قالها لي مرة كان وهو راعي زمان وكانت تسرح معة وحدة اسما فزة وكان يحبها وقد اعطوه عواله تيس وهو بعد صغير فرباه الى ان كبر التيس وغدا مثل الحسيل وكان بالناس عدم هذاك الوقت جا عنده ابو عبدالله بن بخيت الله يرحمه قال يافايز اعطنى التيس ونبيعه وناخذ لنا مقضى من السوق ونبدله لك بواحد غيره فقال فايز اذبحوني ولاتقولون الكلام فرد عليه الشايب الكلام مرة ثانية فقال فايز بأعطيكمياه لكن بشرط انك تسويلي نشيدة في صديقتي فزة الى تسرح معي ؛قال الشايب ان كان مابك الا النشيدة فمالك هم لكن انت تعطينا التيس ام انت تعيي عليه قال لاوالله ان كان اني فقهتا وعرفتها فوالله يالتيس انه لكم فيقول الشايب: يفزَ قلبي يوم نسمع بفزة فز المطوع يوم يسمع الاذاني من مهرة واي لهاعلى الركض فزة ماركبها في ركضها كل داني ياليتني ما ملَهى كل حزة حتى يكيدبها محب وشاني اشكي على ظافر ونزحة وفزة من حب مجمول بروحه رعاني ان كان يبغى المال فالفين عده ومن حسَب المال فالمال فاني فأعجبته القصيدة وراح فاعطاها صديقته واخذوا التيس وباعوه بثمانية ريال واشتروا قهوة وحواية وملح وقاز ونيلة الله الحب يصنع المعجزات الله يرحمهم جميعاً منقول للأمانه |
رد: من سواليف الأولين>> لاتفوتكم ,,,
قصة قديمة جرت على بنت عندما جاء اخوها فى نصف الليل قصدة ان يسرق ابل زوج اختة وعندما قرب من منزلهم قلد صوت الذيب وقام يعوي ،وسمعتة أختة ولكنها لم تستطيع ان تذهب علية خوفا من حماتها اخت زوجها فقالت هذة الأبيات يا ذيب ياللي جرصوت عوا به مدري طرب وإلا من الجوع يا ذيب يا ذيب لاتقهرك عنها المهابه يا مجفل الغزلان حنا المعازيب البوش كلة يم خشم اللهابه في فيضة السرداح والبل عوازيب فسمعتها حماتها فظنت انها تناجي عشيقها وانشدت الحماة الذيب لا يجرح صوابك بنابه يقذلك من بد البني الرعابيب تراك مثل اللي جلب له جلابة لادارها السوام يلقى عذاريب فردت البنت بهذة القصيدة موضحة الأمر لحماتها وحياة جلاب المطر من سحابة اني عذية مادخل عرضي العيب انا كما عد قليل شرابة مادوجت علية حرش العراقيب الذيب اخوي اللي يشيل الكسابة يوم ان نجوم الليل مثل المشاهيب واللي ظلمني جعلها في شبابة وتحدرة من عاليات المراقيب |
رد: من سواليف الأولين>> لاتفوتكم ,,,
مشكوووووورةوالله يعطيك الف عافيه
قصة جميله عن المروءة والعفة |
رد: من سواليف الأولين>> لاتفوتكم ,,,
كلنا نعرف ان اذا قلت قلة الامطارفي شمال الجزيره العربيه تستمر سنوات عديده وعشان كذا هاجرت اكثر القبائل الى الشام والعراق وهي سنة شته وقبيلة الفهيقات هاجر بعضهم مع من هاجر وبعضهم لم يعد الى يومنا هذا وبعضهم عاد ففي طريقهم الى الشام مرض زوج الشاعره بصرى في حمى الشام وهذا المرض نادر مايشفى منه احد إلا باذن الله ولما مرض طلب من زوجته ان تعاهده اذا اتى من يطلبها لزواج ان لاترفض بعد موته لان هو ليلة زواجه تعاهد معها اذا مات احدهم مايتزوج الثاني ويبقى مخلص وعايش على الذكرى وعشانهم ما أنجبوا اطفال طلب منها ذالك شفقه ورحمه وتوفي بعد ساعات من طلبه لها ومرت السنين وتزوجت بصرى وهذه سنة الحياه وعندما كانوا في عودتهم الى تيماء شاهدت قبر زوجها فحزنت حزننا شديدا وقالت هذه الابيات : يابكرتي مري على دمنـة الـدار ومنازل تبنـي علـى الكبـد غلـي والبيـض عساهـن حقيقـات لنـار وكله على عصري عهدهن يقلي والبارحه عيني عن النوم خطار وده بـلاد الشـام كـيـف استـدلـي واغـدي يولبـه مــول بالامـطـار واغديه نابت بين لحـدن وضلـي |
رد: من سواليف الأولين>> لاتفوتكم ,,,
هذه القصة جرت على احدى القبائل العربية في الزمن السابق اختفى رجل من قبيلتهم ولا يدرون وين مكانه ... بحثوا عنه في كل مكان ولا لقوا له اثر ... وبعد مده ... قرابة الشهر او الشهرين ... كان واحد من هذي القبيلة ابن عم للمفقود مفلّيٍ اباعرة في الخلا ... واسمه علي ... وقريب منه رضم كبار ( صخور كبيرة) ... ويوم شاف البل رتعت وبعضها برّك ... انسدح وحط راسه على الارض ... وما أثاره إلا صوت رجال ينشد ويغني... هو استغرب من الصوت... أنصت على لصوت المغني ... والصوت مهوب غريب عنه ... كنه صوت ولد عمه المفقود ... المهم تثبت الرجال منه ... وكان الصوت يجي من يم الرضم ... قام يتوحي في قصيدته اللي يغنيها ... لينه يقصده بالكلام ويقول: يا علي صحت بالصوت العليّ يا علـي لا تحمّلنـي مـلام يا علي لا بليـت بمقعـدي بين صدعين في غدرىً ظلام آآه يا ونتي عند ولـد التنـي عند ثـلاّم مـردوع الوشـام قام علي مسرع وركب الذلول ... وتوجه يم العرب يصيح ... انتبهوا الناس له ... وجوه من كل مكان ... أنت علامك يا ولد ... أباعرك اخذتها القوم( يقصدون يعني حلاله اذا اغتصبه منه احد) ... قال انا اوحيت حس فلان ( المفقود) يغني في الرضم ... ويقول كذا وكذا فزعوا العالم له وقاموا يفتشون الرضم حصاة حصاة ... ويوم جوا عند هاك الصدع الكبير بين رضمتين ... لقوا الرجال المفقود ميت... فعلاً بين صدعين في غدرى ظلام... لكن منهو اللي قال القصيده اللي سمعها على ؟! الرجال لقوه ميت من مبطي !!! طبعا القوم قاموا يتفهمون القصيدة اللي حفظها علي واكتشفوا ان سبب قتله كان عند عرض اخت (ولد التني) ... وكان ولد التني هذا يعرفونه من اقصى الجماعة ... وقاموا وطلبوا منه الدية ... ودفعها لهم ولد التني. |
رد: من سواليف الأولين>> لاتفوتكم ,,,
(الجني العاشق) بسم الله الرحمن الرحيم هذي القصة قريبة نسبياً .... يعني قبل حوالي ثلاثين سنه كان فيه بنت مع اهلها ... وتسرح في الغنم .... وعلى هذي الحالة طول الزمان ... وفي يوم من الايام ... يوم ضوت الغنم على اهلها ... البنت ما ضوت معها ... راحوا اهلها يدورونها في الليل ... يا الله اني دخيلك من الهجاد ... وما لقوها ... ويوم اصبح الصبح وهم يروحون يدورونها في مفلا الغنم امس ... ويلقونها طايحة على الارض مريضة ... ويشيلونها ويودونها للبيت ... ويوم جت في البيت وهم يعطونها عيشة .... وتاكل ... وهي تقوم تهرج لين ما بها غير العافية... أخذت لها أيام على هذا الحال ... ولكنها مرضت من جديد ... واهلها ما يدرون وش فيها ... راحوا يعالجونها في كل مكان . وما لقوا لها علاج . جاهم واحد من ربعهم وقال (ترى فيه واحد في الكويت يعالج مثل هالحالات ) . عزموا اهلها انهم يعالجونها في الكويت ... وقالوا لواحد من اخوانها ... يا فلان اسرح في الغنم ... وحنا نبي نروح نعالج اختك في الكويت ... طبعا هي تركت السرحة من زمان بسبب وجعها . ويوم راحوا للكويت ... واخوها سارح في الغنم ... وكان قريب من احد الجبال الصغيرة ... سمع له صوت واحد يغني ورى الضلع ويقول: هذي مفالـي خـويٍ لـي اللـي قرونـه شعافيـلـي وامضللاته عـن الشمسـي وخويتماتـه تفـاريـزي ومفرقاتٍ علـى الخمسـي ويوم رجعوا من الكويت علمهم باللي سمع ... واكتشفوا ان اللي فيها جني .. وراحوا يعالجونها عند مطوع ... واخرج الجني منها ... واشفاها الله. |
رد: من سواليف الأولين>> لاتفوتكم ,,,
هاذي قصه العجوز البدويه مع احد رجال الباديه من اغرب القصص التي حد ثت لاحد رجال الباديه ... حينما تزوج للمره الثانيه من امراه كان لد يه من قبلها زوجه واولاد .وبعد فتره من زواجه ولم يكن هذا الشك مبنيا الا على اوهام من وحي خياله.صورها له شعوره من ان هذ ه الزوجه لا تميل له .وقد كانت المراة لا تحد ثه الا ناد را ,كما انه لم يرها تضحك او تبتسم أمامه مطلقا . على هذ ا الاحساس اعتقد ان لها رغبه برجل غيره من قبل ان ترتبط به. وقد سبب له هذ ا الشك قلقا وحيره.لم يتبد د ا الا بعد اللجوء الى امراه عجوز .اخبرها بامر زوجته .وخوفه الا تكون تحبه ,طالبا منها طريقه يتاكد بها من مشاعر زوجته ..قالت العجوز عليك ان تصطاد افعى ,وتخيط فمها وتضعها فوق صد رك اثناء نومك ,وعند ما تحاول زوجتك ايقاظك ,اصطنع الموت ,وفعل مثلما امرت به العجوز ,حينما جاءت زوجته لتوقظه من النوم لم ينهض او حتى يتحرك ,وعند ما رفعت الغطاء ورات الافعى ظنت انها لدغته وقد توفي,فاخذ ت تصرخ.. وتنادي على ابنه من زوجته الاولى واسمه (زيد) ويقال انها اثناء حاله الذهول التي اصابتها قالت هذه القصيده : يازيد.. رد الزمل باهل عبــرتي .....على ابوك عيني مايبطل هميلها اعليت كم من سابق قد عثرتها .....بعـود القـنا والخيل عجل جفيلهـا واعليت كم من هجمه قد شعيتها .......صباح.. والا شعتها من مقيلهـــا واعليت كم من خفره في غيا الصبا .....تمناك ياوافي الخصايل حليلهــا سقاي ذود الجار لاغاب جارد .....واخو جارته لاغاب عنها حليلها لامرخى عينه يطالع لزولها .....ولاسايل عنها ولا مستسيلهـا بعد ان سمع الزوج هذ ه القصيد ه , تاكد من مشاعر زوجته , وعرف مد ى الحب الذ ي تخفيه حياء لااكثر نهض من فراشه فرحا ليبشرها بانه لم يمت ..لكن الزوجه توارت حياء لا نها كشفت عن مشاعرها ..وكامراة بهذ ه بدويه_عاده_تخجل من البوح بمشاعرها بهذه الباشره وهكذا حين عرفت ان الامر ليس اكثر من خد عه لاختبارها ..فقد اقسمت بالا تعود اليه الابشروط (ان يكلم الحجر الحجر,وان يكلم العود العود)!!..وهي تقصد استحاله ان تعود اليه مره اخرى ..وقد اسقط بيده ..واصبح في حيره اكبر او مثلما نقول (بغى يكحلها عماها ) ولم يجد امامه الا العجوز صاحبه الفكره الاولى ربما تجد له مخرجا من ورطته . وبالفعل كانت العجوز من الذ كاء بحيث قالت له: احضر(الرحى)والرحى معروفه تستعمل في طحن الحبوب الحنطه وغيرها, وهي تطلق صوتاْ عند استخد امها وعاده ماتجاوبها النساء بالغناء ,هذا عن الحجر,اما العود فذكرت له الربابه واضافت اذا كان لزوجتك رغبه بك فستعود اليك وفعلاْ عادت له زوجته بهذه الطريقه. يقال في الحب الصمت ابلغ من الكلام في احيان كثيرة |
رد: من سواليف الأولين>> لاتفوتكم ,,,
قصة رائعه وقديمه قصه حقيقه حصلت في قريه قريبة من مدينة الرياض في السعوديه قبل ان تسمى الرياض. كان هناك شاب اسمه عايش يعيش في هذه القريه وكان يحب بنت اسمها نوره وفي يوم من الايام ذهب عايش لكي يخطب نوره ولكن ابو نوره رفض لأن عايش كان على قد حاله وما عنده حلال ولا عنده فلوس كثيره, فشاف عايش نوره بعد ما طلع من عند ابوها وقالها :نوره انا راح يصير عندي فلوس وراح اشتغل وراح ارجع اخطبك واتزوجك, ونوره كانت تحب عايش فوافقت انها تنتظره.سافر عايش الى منطقه مرموقه في السعوديه وصار يشتغل في التجاره ومرت الايام وصار عنده فلوس ورجع لقريته عشان يطلب يد نوره من جديد ويتزوجها ولكن لما رجع القريه تفاجى ان نوره تزوجت لان ابوها اصر عليها انها تتزوج وكان عندهم البنيه لازم تتزوج اذا جاها شاب قادر على الزواج. وتفاجى ايضا انها مو بس تزوجت بل هاجرت الى مكان ثاني مع زوجها ولا احد من القريه يعرف المكان. فقام صاحبنا عايش وقال بيت شعر (ابنشدك عن نور القمر وشلون نوره) وقرر يسافر ويدور على نوره. ومر على القريه الاولى وراح وسلم على امير القريه وقاله انا عندي لغز واللي يجاوب عليه بعطيه كل حلالي فقاله الامير وشو اللغز قال( ابنشدك عن نور القمر وشلون نوره؟) احد الجالسين قال له ابيض واحد ثاني قاله اصفر وكل الاجوبه غلط محد عرف حل اللغز. فسافر الى قريه ثانيه وطرح عليهم نفس اللغز ومحد عرف الجواب راح للقريه الثالثه وكان تعبان من السفر فقالهم انا عندي لغز واللي يعرف يحله بعطيه كل حلالي قالهم (ابنشدك عن نور القمر وشلون نوره؟) محد عرف الجواب فقالهم انا اليوم بنام عندكم لاني تعبان واللي يعرف الجواب يقوله لي الصبح ومن بين الحضور كان زوج نوره موجود فرجع للبيت وقالها :نوره !! قالت له :سم ؟ قال: جانا اليوم واحد خبل يقول عندي لغز واللي يحله بعطيه مالي وحلالي كله, فقالت له: قولي وشو اللغز يمكن احله قالها (ابنشدك عن نور القمر وشلون نوره؟) فبتسمت نوره وقالت له : عرفت الجواب قال لها :صدق؟ قالت له :قوله (مثل السمك في البحر وشلون عايش؟) فقام الصبح رجل نوره وراح وقاله: انا عرفت الجواب فقاله :وشو الجواب قاله (مثل السمك في البحر وشلون عايش؟) فبتسم عايش وقاله هذا مالي وحلالي وسلملي على نوره |
رد: من سواليف الأولين>> لاتفوتكم ,,,
هذه تحكي قصة رجل لديه من الأولاد تسعة ، وعندما أنجبت زوجته لعاشر مرة فاذا هي بنت ، لكنه والعياذ بالله عندما بُشّر بالبنت حزن حزناً شديداً لعدم رغبته بالبنات ، وقال قولته المشهوره : ( يا ليلي الأسود ) . المهم مرت السنبن والأيام وكبر الأب وأصيب بالعمى وتزوج الأبناء الذكور وانشغلوا بحياتهم مع أُسرهم ،وأصحابهم ونسوا أبيهم المريض الضرير ، ما عدا ابنته لم تنساه يوماً ، فقد كانت بارّةً بوالدها ، وتقوم برعايته على أكمل وجه ، وفي يومٍ من الأيام دخلت على أبيها لتعطيه الدواء ، فسألها : من أنتي . فقالت : ( أنا ليلك الأسود يا أبوي ) . فرد عليها نادماً ومتأسفاً على ما بدر منه في حقها : ( ليت الليالي كلها سود ) ............ ولقد أعجبت هذه القصة أحدهم وتأثر بها كثيراً ، فكتب هذه الأبيات لتجسد حال هذا الأب . -------------------- ليت الليالي كلها سود دام الهنا بسود الليالي لو الزمان بعمري يعود لا احبها اول وتالي ماغيرها يبرني ويعود ينشد عن سواتي وحالي والا أبد ماعني منشود لولاها واعزي لحالي تسعه رجالٍ كِنهُم فهود محدٍ تعنى لي وجالي كن الغلا والبِر مفقود كلٍ غدا بدنياه سالي ماغير ريح المسك والعود بنتي بكل يومٍ قبالي ماشفت منها نقص ومنقود تسوى قدر عشرة رجالُ يارب يامالك يامعبود تقسم لها الرزق الحلالي صرت بسبايب ليلي محسود اثرى الهنا بسود الليالي والقصة مثال واضح وعبرة لكل من يتشاءم اذا بشروه بأنثى |
رد: من سواليف الأولين>> لاتفوتكم ,,,
شاعره غنيه عن التعريف من أشهر شاعرات الجزيرة العربية موضي البرازي وهي من قبيلة ( مطير ) من فخذ البرزان كانت معروفه عند الجميع في مناطق واسعه من نجد معروفه بحكمتها وحياتها مليانه بالمواقف والطرائف وقتها كان في عهد الامير وطبان بن محمد الدويش المطيري ، ثم من بعده ولده الامير حسين بن وطبان الدويش ، تقول الشاعرة مويضي البرازية ، قصيدة قيلت في عهد الامير وطبان الدويش .. قلبي يخايل بين ناصر ووطبان وظلت هواجيسن بقلبي تدوسه ناصر من أل حبيش ذربين الايمان الى وطا نجد عفا رموسه ووطبان من الدوشان بالضيق شجعان كم سابق بأطراف رمحه يهوسه وهالموقف من بعض مواقفها .. بيوم من الايام كانت تغني عند بعض الحريم توسع صدرها ومر احد رجال الامام فيصل بن تركي ال سعود وهي تغني بصوت واضح راح للأمام وقاله ان المويضي تغني بين الرجال بصوت واضح وهذا عيب ارسل الامير احد عبيده واسمه ( سلامه ) وقال له خذ هاالعصا واضرب مويضي جزاء على الغناء راح العبد ونفذ كلام الامير وكسر عليها العصا ومرضت بعدها وبعد ايام طلعت من البيت وسمعت طير يغني بصوت عذب قالت هالأبيات تحذر فيها الحمامه من ان يسمعها سلامه ويكسر عظامها وتنصحها تروح لـ (الفرعه) وهي بلد الوداعين من الدواسر لأنهم يحمون الدخيل > الدخيل يعني اللي يجيهم ويطلب الفزعه منهم قالت : ياسّعد عينك بالطرب يالحمامــه اللي على خضر الجرايد تغــنـــين عزي لعينك وان دراى بك سلامه خلّاك مثلي يا لحمامه تـــونــــــين كسّر عظامي كسّر الله عظــامه شوفي مضارب شوحـطه بالجاجـين وأن كان ودك بالطرب والسلامـه عليك بالفرعه ديار الوداعـــيــــــن وهاذي قصه طريفه لها هي واختها محاوره بينهم وكانت اختها شاعره اسمها بنا > بتشديد النون كانو يرعون غنم اهلهم وقالت بنتسلى بالشعر قالت اختها ابيات تفتخر بزوجها وأنه أفضل من زوج مويضي و أكثر كرم وشجاعه , شوقي غلب شوقك على هبة الريح ومحصّلٍ فخر الكرم والشجاعه ركاب شوقي كل يومً مشاويــح واذا لفى صكوا عليه الجمــــــاعه يالبيض شومن للرجال المفاليــح ولاتقربن راعي الردى والدنــــاعه فردت مويضي على أختها.. ما هوب خافيني رجال الشجاعــه ودي بهم مير المناعير صلفــــين اريد مـنّـدسٍ بوسط الجماعـــــه يرعى غنمهم والبهم والبعــارين وإذا نــزرته راح قلبه رعاعــــــه يقول ياهافي الحشا ويش تبغـين وان قلت له هات الحطب قال طاعه وعجّل يجيب القدر هو والمواعيـن لو اضربه مشــتدةٍ في كراعــــه ماهوب شاكيني ولا الناس داريــن لو اضربه مشــتدةٍ في كراعــــه ماهوب شاكيني ولا الناس داريــن يقولون ان زوجها طلقها واخذها ولد عمها , من بعض امثالها .. اللي يتيه الليـــل يرجي النهارا واللي يتيه القايــله من يقديــه تقول اللي يتيه بالليل يقدر ينتظر الصباح وإذا أصبح ييشوف طريق اتجاهه لكن المشكله بالي يضيع بالنهار شلون بيلقى طريقه .. هاذي نبذه مختصره لشاعره لها بين الشموخ مكانه وبين الاصالة قيـّـمه الله يرحم مويضي البرازيه واموتنا وجميع اموات المسلمين .. |
رد: من سواليف الأولين>> لاتفوتكم ,,,
مكر بعض الحريم يحكى انه فيه شاب تزوج وطبعا ايام اول العيال مايطلعون من بيت اهاليهم يعني كل العيله متكدسه في بيت واحد العيال وحريم العيال وام العيال ...... الاخ هذا جاب حرمته للبيت ويوم كملت كم يوم كان لازم تشارك بمهام ومسئوليات البيت ... حريم الاخوان اللي قبل مسكوها يعلمونها قالوا بنتقاسم شغل البيت يعني وحده عليها الطبخ ووحده عليها التنظيف والثالثه تشيل الخاله(( أم الزوج وبعض الاحيان يسمونها العمه )) وتدور فيها بالحوش لين تغيب الشمس <===خاله نشبه العروس طبعا انصدمت ...قالت اشيل خالتي وشلون يعني شغل البيت والطبخ مقبول بس اشيل خالتي مو معقول طبعا الحريم ماصدقوا يجي يومين يرتاحون من الدوران بالحوش وعلى ظهورهم هالعجوز قالوا هذا اللي ماشي عندنا اذا انتي شاريه الرجال تتحملين امه وتشيلينها فوق راسك البنت سكتت وقالت معليش لأجل عين تكرم الف عين .... وبدأ المشوار في حمل الخاله والدوران فيها لين تغيب الشمس أو ينقطع النفس <=== بذمتكم هذي عيشه مره ومرتين وثلاث والبنت حامت كبدها قالت مو حاله هذي يوم كد في هالبيت ويوم نسف في هالمطبخ ويوم اشقل هالعجوز <===هنا بدأ الشيطان بالوسوسه ودوريلك حل يابنت الناس طبعا البنت لقت الحل وجمعت حريم العيال وسألتهم تبون اريحكم من هالعجوز ؟؟ قالوا ياريت وبندعيلك <==ياشين الحاقدين قالت عندي خطه بس كل شي اسويه تمشون عليه ... قالوا تامرين أمر ... قالت لهم اذا جا يومي في الدوران بهالعجوز ((شانت الاخلاق وصارت الخاله عجوز )) ابي وحده تجي ركض وتقولي يافلانه امك ماتت وخلو الباقي علي .... وجا اليوم الموعود واثناء ماهي تدور في الحوش بالخاله جت وحده من المشاركات بالخطه وقالت يافلانه امك ماتت البنت مثلت دور المفجوعه بأمها وتمسك الخاله من رجلينها وتمحط فيها الجدار وهي تصارخ أمي ماتت وكل ماقالت آه يايمه صبخت بالعجوز بهالجدران والعجوز ياحياتي مالها حيله و تقولها ( حطيني وانعي امتس والبنت معطيه طناش تصيح وتصبخ بالمره المسكينه بالجدران والعجوز تردد جملتها الوحيده (( حطيني وانعي امتس )) لين قاربت العجوز على لفظ انفاسها الاخيره ويدخلون العيال من النخل ويشوفون المره تصيح ويقولون يافلانه عسى ماشر وترد تقول خالتي طاحت وتنازع <===الشر ياناس وش يسوي ويتراكضون الشباب حول الام وهي تأشر على البنت ومافيها حيله تتكلم والبنت تقول وش تقولين ياخاله الذهب كله لي ؟؟؟ ماابيه ياخاله ماابي الا سلامتك والعجوز تبي توصل لعيالها ان الشريره هذي ذبحتني بس مع الخبط اللي على الجدران انقطع الصوت والبنت تقول سلامتك ياخاله وش تقولين ((والانات من العجوز طالعه)) مفاتيح المخازن تبينها معي ياخاله قومي لنا ومابي شي طبعا العجوز من اللي جاها ومن القهر ماتت والعيال قالوا وصية امنا تتنفذ ويعطون الزوجه الذهب ومفاتيح المخازن وحريم العيال الباقين مافتحوا فمهم يكفيهم فكتهم من هالعجوز . صدق ان كيدهن عظيم |
السلام عليكم و رحمة الله و بركاته.
كانت العجز يسمونها ( سباحين ) ،،،، عاد مدري تعرفين هذه الكلمة أو لا ،،،
قرأت قصة مكر بعض الحريم ،،، شدني العنوان ، لم أستغربه و لكن شدني ، ههههههه لي عودة كلما راق الوقت إن شاء الله لأخذها بالتسلسل ،،، جهدٌ رائع مشرفتنا القديرة. تحيّة تشبهكِ و سلام. |
رد: السلام عليكم و رحمة الله و بركاته.
اقتباس:
هههههههه أكيد شدك واكيد مراح تقول غير كذا وحياك الله وبياك في أي وقت أستاذ رحال فـ متصفحي يزهو بك وبـ أمثالك الرائعين وتحيه مثلها لك وسلام |
| الساعة الآن 12:39 AM. |
Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ
جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه