|
فضفض بالعامي
السلام عليكم و رحمة الله و بركاته ,,,
هذا المُتصفح ,, هدية للجميع , فضفض بالعامي , بخاطرة , كلمة , نثر ,, بسالفة قصيرة , و أي شئ ,, فمرحبا بالجميع ,,, |
رد: فضفض بالعامي
اخي الكريم موضوع رائع جدا اهنؤك على اختياره بارك الله فيك ويسعدني اخي الكريم ان اكون اول من يشارك فيه يمـــ يمه يمه يمه يمه يمه يمه يمه ــــه يمه ياتاج راسي والفخر في القمه يمه يا جنتي وناري ورجاي بالمعين يمه يا شمعت حياتي ولشمع لمه يمه يا ينبض قلبي شوف ذاك العين يمه انا وليدك انا من هذي الامه بعترف مقصر ولو الغرامه حياتين يمه وليدك حافظه ربي ولاحد سمه وهو على حطت يدينك وين ما تبين تربى على الصدق مايجب بن عمه تربيت يدينك جعلها تقطف بالبساتين لو بغير وش اغير في حياتي يا يمه أنتي سندي انتي عزمي انتي اليمين كل مافي الأمر خذيه مني بعلمه كل المسأله ومافيه جري السنين فيه منهو من قال انت يا ولد قمه فز وتكلم ليش ساكت لذى الحين هذا الشيء الوحيد تجهلين علمه وهو الي يجري ويصير من عامين والي خلقني انا عند الثقه يايمه أنا وليدك أنا كلي لك مثل ما تبين |
رد: فضفض بالعامي
ياسلام , قص شريط يريح النفس , أختنا الفاضلة , الله يجعلة بداية البْركة ,
كثر الله خيرك |
رد: فضفض بالعامي
هذي قصة لأميمتي .. يوم كانت صغيره ...كتبتها بنفس لفظها ولاغيرت فيها شئ ...وأنا أكتبها على لسان أمي : عاد أمي تقولي أكتبي عنوانها
قصة ~ اسمعي ياجاره ~ يوم كنت صغيره كانت مجاوره لنا بنت جيرانا وسطحهم ملاصق لسطحنا وجدارهم قصير ورحنا نزور قصيرتنا اللي جنبنا يوم رجعنا أنا وأمي لقينا بيتنا مسروق وهدومي ماخوذه والهيل والقهوه بعد.. طمرت بنت الجيران مع الجدار وخذت كل شئ وكله عن طريق السطح يوم رجعنا للبيت وشفنا أغراضنا ماخوذه قلت لأمي أبروح لبنت الجيران وأشوف لأني شفت بنفسي آثار رجلينها محوكه بالطين في الجدار وتأكدت بعدين أنها هي ماغيرها بعدين لبست عباتي وغطوتي ورحت لها للبيت لا ومن السنع مصلحه لي من القهوه المسروقه وهي ماعمرها فاح في بيتهم ريحة قهوه وشفت ملابسي في حجرتها منسوفه على الحبل وقلت لها : والله ماادري يمكن أخوي طلع وخلي باب " الشارع " مهجوج ماأدري يمكن أحد دخل وأخذ ملابسي والله أني فاقدتهم دنقنت بنت الجيران واستحت وعرفت أني أقصدها أياكِ اعني واسمعي ياجاره .. رجعت للبيت وقلت لأمي : ترى مارجعت منها شئ ولاقلت لها شئ بس وضحت لها السالفه الين استحست بنت الجيران من فعلتها بدون ماأفشلها بالكلام ... قالت لي أمي : أجل بكيفتس أقعدي بليا هديماتس النقصة عليتس . ~~~~~~~ احتروني بقصة جايه |
رد: فضفض بالعامي
سولافه تدل على الطيبة و الأدب و حسن التعامل مع الجار مهما جار ,
الله يحفظ والدتك بطولة العمر بالصحة و السلامه |
رد: فضفض بالعامي
هلابك شكرن لك استاذنا فيصل على هالهديه عزالله انه هديتن تهبل و ووش زينه تو ماارتحت انا بالهرج اي والله عز الطلب ...انا اشهد عاد تحرون بالقرق الفاضي بس يكون مفيد ان شاء الله <<... والشكر لااخياتي اللي قبلي وسواليفهم تهبل ماشاء الله... الله يخلين لكم ياسدير .... <<<:lol: |
رد: فضفض بالعامي
حياك أختنا الفاضلة عيون عسلية , و ننتظر عامية القصيم اللذيذة.
|
رد: فضفض بالعامي
|
رد: فضفض بالعامي
انا ماعندي لاشعر ولاخاطره عندي سالفتن << وش ملحه مرتن من المرات كنا عند جدتي ام امي وكان ايام عيد ... وتعرفون جمعه ايام العيد وفيه عشا وغدا وكل شي جدتي كان ناقصه اغراض ولاهيب موصيه جدي الله يرحمه كان كبير وتستحي توصيه جت ووصت اخواني وعيال خالي وعيال خالتي طبعا صغيرين<<<يمكن خمسه نفر يجون كيذا تقريبا شلتي <<<< هههي لاني انا اصغر وحده كنت بالعائله << واصدقائي عيال الله لايبلانا بس >>:) اصغر من وهالسالفه يوم كنت انا بالابتدائي يعني هم اصغر من المهم البقاله كانت قريبه من عند جدتي ياصلونه على رجليهم جا خالي الكبير ( المدير ) <<< جدتي تحترمه مره ولزم على جدتي وش تبين اغراض وجت ياحبيله ووصته يجيب نفس الاغراض اللي وصت شلتي يجيبونه هي من الحراره ماتصبر وعجزت بعد تصبر الى يجي خالي جتكم الملقوفه عيووووووون عسليه يوم دخل خالي ياربيه << جايب كل الاغراض اللي وصت العيال يجيبونه يعني خالي جا قبل العيال الصغار <<< ومن لقافتي قلت يمه وراتس قلتي لخالي يجيب اغراض وقلتي للعيال هذاهم جايين معهم الاغراض وياويلي منه قبصتن ذيك القبصه اللي طلعت دموعي <<< عاد انا صيووووووووووووووح حنا كنا بالمطبخ وخالتي كانت تسبع المواعين رحمتن وشافت دموعي تبطبط << هع وجت ووخمتن بقوووه قالت ياحبيلك ومدري ايش تواسين ايقاله انا مااقدر عاد رحت الحمام وانفجرت << ياااااااااااااااااااا اهيئ اهئ وعقبه تركت اللقافه وقلت وش دخلن بهالسالفه صدق درسي لي والله مااهرج ولاعلي من احد << كككك عاد دايم اذكر جدتي بهالسالفه وقالت يابنيتي سامحين والله ناسيه << ودكم اقول لا هع ملاحظه / جدتي تحب خالي هذا وتقدره غير عن خوالي يمكن لانه كان بكره وتحسب له الف مليون حساب هههههي ياربيه .. حتى انا دابتن سالمه دايم بس مدري وش لقفن اكاليوم ياحبيله جدتي الله يخليه لنا ويخلين له <<<نموت ببعض وه بس |
رد: فضفض بالعامي
اقتباس:
وتقول لنا ناظرتوا وشلون قصتي زينه وتنفع لكم . ياحبيلها والله |
رد: فضفض بالعامي
عيون عسلية ,, سالفتن زينه و طيبة مع الجِديّده و أيام الطفوله و شقاوة البزران ,,و زيدينا
الله يعافيك |
رد: فضفض بالعامي
اقتباس:
|
رد: فضفض بالعامي
اقتباس:
اقتباس:
الله مير يسلمك يالمُدرس صيصل << ويعافيك ولاهوب قصور بالقارين << هع عندي سالفتن ثانيه ... ياربيه تضحك حصلت لي مع مصريه ايام المبزره بس مب كاتبته هاللحين << لان بصراحه ودي اكتب مثل اللي يقولون لي عوده تسذا احس اني شي اذا قلته << انا مديرة اعمال ارامكو هالايام عند الوالد اكشخ شي:::superman:انا لامني فضيت كتبته ان شاء الله << وتحملوووون عاد كككككك |
رد: فضفض بالعامي
اقتباس:
وبخلي نور تكتبها لكمْ~ تضحك هنا ~ وتقولي أفضحتس وأعلمهم أسمتس... قلت لأمي : ماتلاحظين إنك أخذتِ الصفحهـ لكِ قالت لي : على الأقل أزين من هرجتس اللي مافهمه بعض المرات ((( تقصد اللغه العربيه ))) هههههه |
رد: فضفض بالعامي
ودي القصص و السباحين ذات مغزى يفتح لها موضوع بسمها علشان تشاف و تنقري , و اللي هنا فضفض سواليف و خواطر على الماشي ,
أنا قصدت هنا , أقصد في قسم العامي حفظك ربي . |
رد: فضفض بالعامي
جدتي الله يرحمها وأموات المسلمين عاااد قولوا آمييين تحب السويليفات والحكييات وسعة الصدر دايم أبتسامتها على وجهها وأنا صغيّر أكثر ما ألاحظه في حكيّاتها التصغيير وكانت كلماتها لآصقتن في مخّي الرز تسميه رزيزة .. والما .. أموييهه واللحمه .. لحيمه والقدر ..قدير والقطعة الصغيرة من أي شيء تسميه .. قنيمه والى اجتمعنا على القهوة تقول تبي وانا أميمتك فنيجيل قهيوة. خذ من ها التميرة خلها تحلّي رييقك واذا خلصنا القهوة تقول لخالتي الله يطوّل بعمرها لقطي وانا أمك هاالعبيسات وكبيهم في الحويّط اللي جمبنا علشان دور ها السنة نشوفهن انخيلات وش أحليلهن. واذا شافت على أحد من الصغارأو الكبارقل صح تقول : سلامتك ياقليبي جعل اعييناتي ماتبكيك رحمها الله وأسكنها فسيح جنّاته وأموات المسلمين |
رد: فضفض بالعامي
الله يرحم و الديّ و الديك و جديدتك وجميع المسلمين
التصغير دليل على التواضع و السماحة و الرحمة و الحنان و الزهد و العطى اللي ماله حد أشكر لك ما بحت به أخونا الطيب بارك الله لك و فيك لا تبخل علينا من هالزين |
رد: فضفض بالعامي
ياهلا ومسهلا فيكم الله يحيكم زارتنا البركه ... أمي ترحب بكم هنا
جبت لكم سولافه لأميمتي لأن هذا صار مكانها .. في مرة من المرات رحت أنا وأمي بيت أختي في الشميسي كان حزة شتاء ودخلنا بيتهم في الدوانيه وشبينا بالوجار حطب وقعدنا نتدفى وتعتمنا عندهم ومن ثمن جانا النوم وظهرت أختي وعيالها لحجرهم ينامون ونمنا بعدهم والضو شابه وتغطينا بالكنابل تحت الوجار وعلق طرف الكنبل بالضو وانخنقنا من الدخان حسيت بالكتمه وقمت أهج بالدريشه وعيت تنفتح وكان الباب بعيد وحبيت على يديني ورجليني وحاولت أفتح الباب عيا وقمت أرجف فيه وأصايح بنموت انخنقنا ... بعدين جاء رجل أختي وفتح الباب لنا واسعفنا للمستشفى والحمد لله كان لنا مدد بالحياة ونجينا بفضل الله كان موقف صعب مره كل ماتذكرته أقول الحمد لله يارب . |
رد: فضفض بالعامي
سالفة فيها من الكلمات العامية اللذيذة و الوصف للقديم كما كان , الشئ الكثير , حفظ الله والدتك و متعها بالصحة و السلامة و تعطينا أكثر من هالسوالف , و حنا بنتظار سعة الصدر من والدتكم الكريمة , سلمها الله .
|
رد: فضفض بالعامي
بعض الأحيان يستبد بي الحنين لحارتنا يومني صغيره واللي قضيت فيها أيام عمري بحلوها ومرها ..!
من تزوجت مدة 25 سنه وأنا اذا اشتقت لطفولتي أطلب من ابو الشباب يوديني وماقصر الله يعطيه العافيه .. أجلس أتأمل بيتنا من برآ لأننا بايعينه ..أراقب تطوراته ..حتى أنه يومنه هدم حسيت وكأنه قطع من قلبي .. صار ارض بيضاء تمنيت أطق خيمه واجلس فيه ... وكل مره نجي نلف الحاره أقعد أقول لعيالي هذا بيت جيراننا الفلآن وهذا بيت الفلآن ..!اللي بنتهم فلآنه .. ..هنآ أماكن لعبنا ..!هذي مدرستنا ... لين حفظوهم ..وكل مره أكرر نفس الكلام لأني أحس بمتعته وأتحمس أكثر ..! وكأنها أول مررره .. الله يآخذ ابليس حنيت لها .. غدين أروح العصر ..!! |
رد: فضفض بالعامي
أوه , بيتنا مابعناه , و لا نفرط فيه , و نرمم فيه دايم , و مسكنين فيه ناس بس يحافظون عليه من الهجران , أيام لايمكن الواحد يفرّط فيها , ذكرتيني بأحلى أيام العمر , عطاك ربي ,أنتي من يقرا و من ماقرا , , الصحة و السلامة .
خاطرة و لا أجمل,,, |
رد: فضفض بالعامي
ابقولكم السالفه اللي هكاليوم واعدتكم به مدري تجوز لكم والالا.......:to_keep_order: السالفه طبعا يوم كنت بالابتدائي كان العصر وكنت رايحه لتحفيظ القران... وكانت معنا مصريه بالتحفيظ <<<< طبعا مكان المركز اللي حنا به هو نفس مدرستي اللي ادرس به الصبح ونفس الفصل بعد عاد انا وش ملحي محافظه على طاولتي << نظيفهه ومابه شخابيط <<و الله صدز ولاجا العصر سنترت عنده ماابي احد يااخذه ....... واكاليوم جيت وجلست << ومدري وش اللي سلط علي هكالمصريه اللي ابحلتن > هع المهم وبدت تعيط <<<<<<<<<<<< الطرابيزه بتعتي << اي ياما الطربيزه الطربيزه بتعتي بتعتي<< تقصد الطاوله.. >>> لاحول ولاقوة الابالله والله كنت هاديه انا وماافك عشاي من البس وانا قصيره عنده>> من جبارته ماشاء الله المهم ام دميعه اللي هي انا مامسكت نفسي وصياح والظاهر معطت لي قروني وقناصيعي الى جت معلمتنا حقت التحفيظ وفكت بينناااا خخ حلوه ذي >> ودخلت مديره المركز بالسالفه وصادفت جيت امي جايه بتطلعن بنروح لخوالي >>> وتفشلت عند امي وابوي <<< وابوي يقول وراك ياابوي وش سويتي وراهم << .....:nhl_checking:.... الخ لاني كنت هاديه مره مستغربين المهم حطو ادارة المركز كل الغلط علي وياشين اللي ماياخذ حقه .......... ابد اللي ماياخذ حقه يلهم له تراااااب .................. |
في سواليف العصر
زمان يازمان في سواليف العصر قبل المغرب ,
كانفيه رجالن في قريّتن من القرى , يجلس في مشراق العاير . و حريمته دايمن في الطاقه تسمع حكياته و نصايحه , كان يعتبرونه أهل القريه حكيمهم كلن يجي يشاوره , و يفتي له في أمور حياتهم , مالكم بالطويله , جاه مرتن واحد و استشاره في عطيت الفقير الجوعان , باللغة العربية الفصحى ," هل يمكن إني أعطيه غداي او عشاي و انا اشبعُ منه ؟ " أي أكثر منه شبع " أكيد , تستطيع أن تتحمل فترتن وجيزتن و هو لا يستطيع , أفعل " في هذا الوقت و هو يُكمل فتواه , طق الباب فقير جوعان , ركضت الحريمة الى المطبخ و اعطته الأكل كله , خلص الحكيم جلسته , دخل البيت يطلب الأكل , الغدي , جاوبته الحريمه " سمعت كلامك الطيب للي جا يشاورك , فحن قلبي على فقيرين طق الباب و عطيته إياه " رد عليها مقهوراً " يابنت ....... هذاك الكلام مهوب لك , هذا الكلام لهم يامال .. " منيب قايل أثرهم مخططين على هالحكيم اللي قاعد يقول مالا يفعل , وسلامتكم |
رد: فضفض بالعامي
اقتباس:
مسكينه والله على نيآأإتهآأإ ضعيفة الله أذكـر أن خآلآتي قآلولنآ قصص عن ألأولين يوم كآأنَ في سدير بقـول أمي تقولي وأنقله لكم ^^ |
رد: فضفض بالعامي
اقتباس:
نحتري سواليف الاميمه و لا ننطق حياك الله على كل حال و شرفتينا اختنا الطيبه |
رد: فضفض بالعامي
حياكم الله
سواليف حلوة و فيها عِبر. عاميتي خارج الحدود الخليجية فسيصعب علي المشاركة لكني أبيت أن ادلي بمشاركة تشجيعية للجميع على هذا الكم اللذيذ من قصص الزمان. الله يرحم الأمهات أموات كانوا أم أحياء. أختي عيون عسلية سواليفك حلوة و نشيطة مثلك. أختي نور الحب الله يخليلك أمك و يديم عليها الصحة. أخي نور الاصيل كان في جدتي نفس الذي ذكرته عن جدتك الله يرحمهما . رغم البعد بين الاماكن لكن كان التصغير مشترك. لم أكن أفهم لماذا لكن الأخ فيصل الله يكرمه شرح السبب. سبحان الله التواضع حتى في ذلك؟ كم أحترم ذاك الجيل. إن استطعت انت حبس دموعك فقد خانتني دموعي. موتها حديث لم يتعدى سبعة اشهر و لا زلت احن إليها. يعطيكم الصحة. هذه عاميتي. السلام عليكم. اقتباس:
لسنا كاملين نُداري عيوبنا ليس استكبارًا و لكن خجلاً و نَرجو من الله أن يسترنا و ينر دربنا بالإيمان. قصتك جميلة جدًا . |
رد: فضفض بالعامي
عدت لكم بالجزء الثاني من حكيّات جديدتي الراوي أميمتي جعلهم في جنات النعيم واموات المسلمين ومن المشتركين في الروايه محاكيكم بسم الله نبدأ في بداية الإجازات الصيفية كنا نغادر والعائلة الرياض الى الحبيبة سدير ماعدا الوالد رحمه الله تعالي كان يومان ثم يعوّد للرياض لانشغاله وكنت ساعتها طفلا مشاكسا [ ماهوب دايم] في صباح يوم ربيعي استيقظت على صوت الغنيمات بالحوش وكنا نايمين بالطاية[ السطح] لقيت الجد والجدة والوالدة والخالة يتقهوون قهوت الصباح جيت عند الوالدة وحبيت راسها وقرّبت من أذنها علشان ابدي لها رغبتي في الفطور بعد ما صبّحت على الجميع تدرون وش قلت لها مشتهي صبيبات على ها الصبح ردت علي أها بس اعقل ماهنا صبيبات اليوم رحت لخالتي وقبل ما أكلمها وانا خلتك الصبيبات يبيلها تجهيز ان شاء الله باكر بعد هذا الرد بدأت الدموع تسقط وعلا الصياح مني [يحق لي مدلّع] وكان الرد من جديدتي وراكم عليه .. وش فيكم ضيقتوا صدر الضعيف مامهنتكم الا الهواش والطق ردت أمي الله يرحمهم جميع والله انه ياميمتي مالمس ولا طقّه أحد بس تعرفين الدلع يبي صبيبات قلنا له باكر ردت جديدتي :بس صبيبات غالي والطلب رخيص ردت خالتي : بس يبيلها تجهيز ان شاء الله باكر. ردت جديدتي : وراه باكر إلا اليوم وشوله اليوم إلا هالحين. تبين وليدي يجيه ضيقة صدر؟ صدز مانتوب كفو للعيلان. تعال ياوليدي أخذتني واحضنتني وقبلتني وبيديها مسحت الدموع من عيني وهي تبكي ابشر وأنا أمك بالصبيبات اللي مرقولة على طماط وبصل ومسكت يدي واتجهت بي للمطبخ البسيط وقامت بإعداد الوجبة والعرق يتصبب منها يوم خلّصت قدمت لي الوجبة في صحن غضار أحمر وهي تقول خذ وأنا أمك هالصحين وكل بالعافية الين تشبع وان اشتهيت شي .. علمني وانا أصلحه لك كم عندي من محمد؟ 8 8 وانتهت القصة طبعا تفاصيلها من الوالدة الله يرحمها وأموات المسلمين لاني لا أتذكر منها الا القليل أرجوا أن لا أكون قد أطلت عليكم ولكنها ذكريات حلوه في القلب أحببت أن تشاركوني فيها أخوكم نور الأصايل |
رد: فضفض بالعامي
ياويلي منك انت و هالسواليف اللي تقطع القلب يامحمد , شئ و لا في الخيال الحين , الله يرحم والدي و الديك و جميع المسلمين
الله يحفظك ,فيني شئ يقول و قف و فيني شئ اطعم يقول هات حفظك ربي |
رد: فضفض بالعامي
تعجبني أحيانا أساليب الأطفال يوم يعبرون عن حبهم للشخص
تذكرت ولد أخوي ابو خمس سنوات يوم أزورهم في الرياض من وناسته بي طبعا بعد المناقز من الفرحة قالي متى تروحين يبي يتأكد .. قلتله بعد يومين أو ثلاثة قال عمه لاتروحين ( أقعدي عندنا مليوووووووون يوم ) يقولها من قلب ... يالبى روحه بس .!قلتله من غير شر . و مره كان ابوهم عنده مذاكره يحضر رسالة الماجستير ..وعشان ألهيهم ومايزعجون أبوهم أختكم تحولت طفله وجلست ألعب معه وهو أخته ( الغميمه ) يوم خلصنا لعب.. قال عمه ( ودي آكلتس وأحطتس ببطني ) !! وكثير من عبارات الحب البريئه الصادقه يبادلني اياها نسيتها والله ..!! بس أكثر شيء كنت أتمنى أكون مثل قلوب الأطفال بنقاوتها وبراءتها .. |
رد: فضفض بالعامي
اللعب مع الأطفال و الإنسجام معهم ينسيك واقعك الموجع و يخليك تحس إن الدعوى بسيطه , تشوف همه انه يستمر باللعب و لا يبيك توقف و تنحرج من أنك مليت و هو مامل , تجيبك أفكارك و تنكد عليك , ليش ؟ لأننا كبار و فاهمين الحياة صح !
أمحق من فهم و أمحق من كبر . زاوية من زوايا الحياة التي أمامنا , ممتعة و أحق أن تكون هي الأصل , و لا نراها أو نحسها , و يأخذنا العقل و الحكمة الى بربسة الحياة اللي مافيها غير لاشئ , شكرًا على هالزاوية الرائعة أختنا , إحتياج |
رد: فضفض بالعامي
إذا ما تراه ينقصك هو الحريه ؛ فأنت ضعيف بُني . 17 / 5 / 1427 هـ رحمة الله عليك . مرات كثيرة كنت أجالس بها جدي أتبادل أنا و هو كلمات تسلي لنا جلستنا التي أعتدنها و الناس نيام في الصباح الباكر , في يوماً من الأيام أتيت ولكن بصمت الهدوء وهذا ليس من عادتي جلست متكئاً على الجدار رافعاً رأسي إلى السماء و أغمضت عيني بهدوء و أنا أعلم بأن جدي يراقبني و هو يعرف أنني كتوم فتنحنح وقال ما أعرف سر يخليك إلى هالدرجة تنسى من حولك , أأساء إليك من تحب بُني ؟! قلت : ودي أصير حر في تفكيري و إختياراتي حتى ديني أبي أختار اللي أبيـه , طفشت تتبع ما قاله من في زمن أول أو من هو أكبر مني , أبي أصير حر يبـه . قال : طيب وش تبي مني أسوي . سكت أنا ! وقال يابوك أنت حر محد يملي عليك أفعالك و هذاني أحذرك تسمح لواحد يقولك وش تسوي . قلت يعني أنت مع كلامي قال كلامك هو ما ربيتك عليه أكيد أنا معك وأنت أصلاً حر و إذا ما تراه ينقصك هو الحريه ؛ فأنت ضعيف بُني . فكرة الحرية شلها من راسك خل الحرية هي طريقتك نفذها ولا تفكر فيها . .... و مع مرور الزمن عرفت أن للحرية قوانين لسلوك الدرب الصواب . و أقول الآن ليتني كتبت ما دار بيني و بينه حرفياً على ورقة لأحفظها فلهجتنا البدوية تحمل معاني حكيمة وذات عمق يجبرالسامع على التفكر بالحديث . شاركتكم بما لدي و أتمنى يلقى فائدة بينكم |
رد: فضفض بالعامي
سالفة صايره لها قناعه خاصة للي يقرا , الله يبارك فيك على هلحكمة الطيبة , بس خلها كلها عامي و ببدويتك الاصيله الاصليه عاد انتوم اهل القصص و السواليف , , ترانا نستانس على الحكيات اللي تذكرنا بالطين و بيوت الشعر و الوناسه الاوله , عافاك ربي لواء العز لا تحرمنا
|
رد: فضفض بالعامي
يـووووووه . . > معليشش جآيه اركـض خلوني أخـذ نفس يووه . . !
معليشش يَ جمآعه أسفه جداً على تأخير > ترآ والله مآسحبت عليكم بس خبركم أنظآم في الأجآزه ماشاء الله الموهيم سألت أمي عن حيآتهآ قلت لي . . مره رحنآ لبيت عم أبوي هي واختهآ الكبيره . . عآد كآنت جدتي الله يرحمهآ وأموآت المسلمين ان شاء الله . . تعطيهم أكل أو ملآبس مثل كـذآ يعني تقول أذآ جينآ عندهم تقولنآ (( متى الموت يجينآ انى في تسعين وذآ شآيب في 100 )) >> لآ اله إلآ الله معمرين ماشاء الله >< الله يرحمهم بس ^__^ وكآنت فيهآ غده كبييييره في حلقهآ وكنت تجيب شآأهي بأإآآأإآأإآأإآأإآأإآأإرد ! تقول أمي نتغصب وأنآ وأختي الكبيره نشربه عآد عند الأولين يعني فشيله الوآحد يردهم ولمآ شآهي يرفض انه يصب > مدري وش كآنت برقآنهم أول ؟ كنت تنفخ فييه عشآأإن ينزل أشآأهي ههههههههههههههههههههههههه والله حيآتهم كآأإنت كآنت توسـع الصـدر طبعاً ورتني بيتهم > اقصد بيت العجوز وشآيب بس نسيت اصوره >< لـي عوده بـإذن الله . . =) |
رد: فضفض بالعامي
أيه كانوا ينفخون فتحة الصب لأن ورق الشاهي أول عريض فيسد الفتحة, أول كلش راهي , أو مع البطى تمدد , و ثمن الشاهي البارد هذا شرب الخوجات , يسمونه أيس تي , يعني شاهي مثلّج , يحطون معه ثلج بعد ,
عودة حميدة , وكل هذا يسجل لك و للأخوات و الإخوان في هذا المتصفح , على الأقل نلحق شوي عن اللي صار أول و يوثق على قد حالنا فيذا . شكرًا الله يعافيك |
رد: فضفض بالعامي
ساآلفه يقولها عمي صارت بقريتنا عن حب زوج لزوجته وأم عياله
كان كل ماجاء ورآح وكل مادخل البيت يقولها (عساتس ماتذقين حزني ولا أذوق حزنك ) سبحان الله .. استجاب الله دعاآه ..في يوم من الأياآم كانوا جالسين في المشرآق تحت جدار طاآح الجدار عليهم و ماتوا جميع .. فعلا ( لم يذق حزنها ولم تذق هي حزنه ) . سالفة تذكرتها ومعجبتني وحبيت أنقلها لكم .. |
رد: فضفض بالعامي
رحمهم الله تعالى جميعا وأسأله تعالى كما جمعهم أزواج بالدنيا أن يجمعهم بالآخره . |
رد: فضفض بالعامي
إختنا إحتياج , كسرتي قلوبنا بهالسالفة القصيرة جداً ,
|
رد: فضفض بالعامي
كانفيه رجالن كبير بالسن , يغلط دايم في حكيه , مرتن ينادي على ولده :
" يامحمد , يامحمد " " سم " " خل العنز تحلب أمك " و لا : " خل أمك تحط الضو على الما " |
رد: فضفض بالعامي
أضحك الله سنك أخوي فيصل .. والله بعض الأحيان نطلع بلاوي بالحتسي خاصتن اذا استعجلنا بالكلام
|
رد: فضفض بالعامي
يصـلح أقـول عن مشغبآتي وانآ صغيـره ولآ مـآيصـلح ؟ =/
|
| الساعة الآن 04:56 AM. |
Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ
جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه