|
معجم الكلمات القديمة
بسم الله الرحمن الرحيم
امس كنت جالس مع واحد قروي قح في مطعم المهم طلبت له عصير كوكتيل وبعد ماخلص قالي والله عصيرهم حانط خخخخخخخخخخخخخخخخخخخخخخخخ انا طبعاً تمزعت تسبدي من الضحك لاني ماسمعت هالكلمة من ثلاثمية الف سنة بعدها طنت في راسي فكرة اللي هي كتابة الكلمات القديمة اللتي اندثرت وكل واحد يكتب الكلمة يكتب معناها مقابلها وانا راح ابتدي بكلمة جخ جخ هذي معناها شي فخم وحلو <--- اقول يازين حانط عندها عموما ارجوا من الاعضاء عدم البخل في المشاركة وتقبلوا تحياتي ،،، |
ولا تنسى الباب المسلوق:D
عسى مافيه اغراب ويمسكون هالكلمة علينا:D |
كنت مسافر أنا وواحد من الشباب السديراويه الله يذكره بالخير وكان يحب هالكلام وفي الغالب فهو يتعمد التلفظ به وكنا في دوله غير عربيه المهم جالسين في بهو الفندق اللي يفتح النفس وإضاءه حلوه وجو رومانسي فطلب مني رفيقي إني أنادي على الويتر ( الجرسون ) وأطلب له عصير على مزاجي فناديته وطلبت له عصير برتقال مع كيوي مع أناناس فسألني رفيقي وش طلبت لي ؟ فقلت له عن المحتويات قام ونادى على الويتر وقال له بالعربيه السديراويه (( أبي البرتقال طاغيًا عليها )) يعني نسبة البرتقال أكثر . .
|
والله يا انكم قروية قح وبصراحة مكانكم الطبيعي الجنادرية :D
|
خذ الكلمة هذي
اصلف اصلف هذي معناها ارفع صوتك وانت تتكلم |
اااااااااالله يالدنيا يا ابوريان صار مكانا الحين في الجنادرية
نسينا يوم انك تدرس على الحصير وسندوتشك كراث وطحينية:D |
والله تسان بودى اشارتس معاكم بس ماش ماعندى ولا حسوه زديمه
اصيرو لين اروح عند جدى واخليه يسولف وانا انقش حسياته واعلمكم ****************************** :p :p :p |
ولا يهون السبعين :D :D :D
|
شايب يقول لولده رح تسالم أخوك وانا باتناك فيذا..
الترجمه..شايب يقول لولده رح ناد أخوك وانا أبحتريك فيذا.. يعني... شايب يقول لولده رح كلم أخوك وانا ابا انتظر هنا.. هاه فهمتوها الحين.. |
اخوي غريب الدار مشكور على المشاركة
بس تكفى لايشوفها واحد من برى مايدري وش معنى هالكلمة زين ويقول وش جاه هالشايب صار gay على غفلة:D اختي ام عبدالله هاه رحتي لجدك والا للحين ترانا ننتظر:) سلام عليكم ،،، |
يا زين هالحتسيات الله لايخلينا منها
ازين الكلمات اللي قلتوها وجازت لي حانط :D طاغين عليه ====> هذي قبل ابوي يقولها لأمي يقول يامره سوي شاهي بالنعناع وخلي الشاهي طاغين على النعناع لا انا ابو هالحتسي كله اوريكم جاك ماتمنى يا سنمار منول وانحن صغيرين انا ودحيم ولد خالي نروح نطافش في الرتسيه اللي في نخلهم وعلينا صراويل مقصمله اللي يقولون عنه مقوصر وفنايل علاق لو يعضها تسلب استغلث وابوي وخالي يهاوشونا ويتنهزرونا لاتجون حول اللزا لاتخبطون فيه وإذا قضينا سابحين رحنا ندابتس في النخل يا ما ندحدر في المنحات يا ما نرقى وحنا نراكض انا معروف بالرفاله والرجاجه كل شوي اعثر في التساله والا زالق في الغرب اللي في السواقي وحالتي حاله تلقون مرافدزي خضر وشهب وبنيه من الطين ثم نروح نلعب مع العنقان والتيوس تسني بيتر بينهن ولا نقرب الرخال والتيوس الكبار لأنها تعس ومره ولد خالي عسه تيس وطااااااار في الهوا ثم مصط على وجهه والله يا انا تمددت عليه من الضحتس قبل يقول لي ابوي لاتجون عند حوش البقر والا تبطحون في السيسان ترى تجيكم القوام والعدزارب وبالأخص في القيظ يكثر الخشاش يازين ذيك الأيام ذكرت دحيم وهاك العصادزيل اللي عليه تسنها محاريث رماد ابد تسني انا وياه اخوان من يوم نجي لمهم في سدير يمسكني الناس يسلمون ويقولون وشلونك عساك طيب وهو ينشدني تبي تمرحون عندنا والله الدلخ اشين شي عندهم فراش دحيم اللي يخلوني ارقد معه فيه كله خرايط وريحته حلبه واذا اصبحنا نشرت امه ثيابه وفراشه جميع مدري ليش وما دزد جا في بالي انشده ليش ابادق عليه بعد شوي انشده دحيم مع انه دلخ الا انه قذره يبلش البنات ويجرجرهن مع شوشهن متوذيات منه الجدايل تصدقون من خباله ينتف حواجبه ويدعي قدام البزران مسويها حركه وكان احسن واحد يتزوكا وراسه مايلمس الأرض عليه حركات الله يغربله :D باتركم الحين عشان اعطيكم فرصه واعود بعدين اكمل لكم قصصي انا ودحيم يوم جدتي تسبحن علينا ويوم يكوفنه ابوه عشانه عاض اذن البربري الا يا سنمار لاتتفلسف وتقول قي ومسويلي فيها كلنا عارفين معناها معناها بوابه ;) ياخزياه |
هههههههههههههههههههههههههههههههههههههههههههههههههه ههههه
الله يرجك يارحال انت وهالسواليف والله رهيييييييبه اما سالفة دحيم هو وعصاقيله اللي كنها محاريث رماد خخخخخخخخخخخخخ والله ضحكت عليها من جد شف يارحال هذي خمسة الاف ريال كاش اذا جبت لي مصري وفهم اول سطرين بس خخخخخخخخخخخخخخخخخخخخخخخ تكفى كثر من هالسوالف الله يعطيك العافية:D |
اجل جازت لك سواليفه هو ويا دحيم يا ابا المحاريث :D :D :D :D
تصدق يا سنمار يافيه شطحات على الكيف يبي فنيجل وسويلفات في الصاير ولو تسدم الباب شوي وخل ابتويايتس معه واذا مافيه احد في الطايه ابصب مويه مع خفوس الطرمه والوعد بيت المذن :D :D :D |
ايييييه اطلع اطلع يا ابوريان على حقيقتك الحين اثبت انك شايب من حئ وحئيئي:D
|
يالله حيهم تحية المطر
عسى ما صيفت عليكم ابد ابوي صايدز وتوزيت عند جدتي في حجرتا لين راح يسير على عمي مصخنته هايضن عليه مر ووجهه اصفر بس تقول جدتي ان حنتسه وارم وشاكين ان اللي فيه ابوكعب زودن على المر المراد ما اطول عليكم امي تصوت لي محميتن عشاي تبيني افنكه قبل يجي ابوي ايه دحيم وما ادراكم ما دحيم كانو يدلعونه عيال حارتهم السوسة النخره بلاه والله مفسد اشد من الجرذي إذا حارشته يحب المطامر والتزوكي ومع هذا ينشب في البنات إذا جن يلعبن خطه وإلا حبله وإلا صقله الا يلعب والا يبي يخرب فيه عياره يزعل منها وانا ما احب اناديه الا بها بس إذا صرنا لحالنا والا تسان يصول علي عيارته الهليمه حتى يوم تسبر صارت له مواقف مالها داعي تطيح وجهه جاني مره مسير علي في الرياض ===> للعلم دحيم قبل ما يجي للرياض لازم يفصل ثوب جديد وإلا يشتري الدفه بس مايجي للرياض الا بثوب اول لبسه له ولا زم كبك ويزر زرته جاني مره وصجني يبينا نروح لأسواق المملكه انا والله ما طبيتها ولا ودي اطبها بس صجني يبي يروح لسدير يجخ عليهم المراد يوم رحنا وهو على باله يزمر على الناس واقف في سيب من اسيابهم وجته وحده وش زين كشختها وريحتها تعايط اطياب ويوم قربت عنده قالت له لوسمحت يا اخوي التفت عليها وهو زامر ورازن خشمه وعلى طول رد عليها : الله يعطيتس قامت تصايح وتزاعق طول بطنها ياللي ماتستحي على وجهك يالخكيري متزاين نفسك عشان تقول لي الكلام هذا يالطرار يوم طاح وجهه وراح ناصين باب المملكه يبي يطلع وهي ترجمه بخشمه واذانه وعيونه عقب ما طاح وجهه تسني طلعت من الموضوع نرجع لي انا وياه يوم انحن مبزره اذا عطانا ابوي قروش نروح نشري انا وياه من دكيكين حولهم انا اشري بسكوت السعاده ومينو وهو اللهم عافنا يشري تسيسة برميت ====> مدمن برميت وحلاو عسل ثمين عاد معه تسيسه ولا يعطي احد ولا يجي بين عشوين الا ويهره بطنه والا قعد يزوع اجل زارطن كل البرميت هالبحام وإذا قال له احد عطني دحيم برميته وحده بس قام يهوش ويناذخ ولسانه يلوط اذانه تسن الناس في السنه نوبة من النوبات راحو ابوه وامه لمكه يحجون ودلى يصيح صياح تسنه بزر وجابنا ابوي عندهم الله لايعيدها مانيب انام من حلومه يحتسي في الحلم ويرجف ويصيح وإذا اصبحنا جا ابوي يقومني من الفجر ولا عاد يخليني اصفر هالصبحيه وإذا قلت له باقوم دحيم قال لا . دحيم مسيكين اهله ماهمب فيه وإذا قومته يبي يبلشنا بالصياح ويبي يقلبها مناحه واقعد بها انا ما انام لا في الليل ولا في النهار وهو مجخي ولا يرده الا اذان الظهر شرالي ابوي سيكل وجو لمنا في الرياض وشافه وانا خايف انه يشوفه وتذبحه الغاريه عاد هو يغار وإذا صار ما يقدر يحصل الشي قال : ايه ما عليه حليو هذا إذا صار ما وده يضيق صدرك والا تسان يقول : ماهوب من زينه يحوم التسبد نوبة من النوبات قاعد ينقش في مناخره وفاق اثمه من التتنيحه وقزه خالي وصفق مرفقه بقوه وإلى اصبعه طاقن في هامته يوم اللهم عافنا قام خشمه يرعف وهو يصيح من وجعها واختلطت دموعه مع الدم اللي ارعف مع ....... الله يذكر ذيك الأيام بالخير تصدقون انه مقلع كان ينحاش من المدرسه وهو في رابع وطاح في التتن وهو في خامس ما شالله عليه علمته الدنيا قبلنا الحين ماشالله عليه احسن واحد يرقع سياكل ويزين نباطات الا على طاري المملكه مره سرق دنانة ولد جيرانهم سعيد وجا يركض عاضن ثوبه من قوي النحشه ناصين بيتهم وهو ملتفت يناظر عليان لايوصله والله مار وهو اللي يصمخ هاك الصمخه في عاير بيتهم وينزلغ وجهه عاد وجهه من كبره صغير ومثلث تسنه قاعة متسوى ===> اللي يتسوون بها الثياب ويقعد يصيح وتختلط كالعاده دموعه مع سعابيله مع .......... والله يا هو طمل وملغن وموصخ من وصاخته كل اسبوعين يطيح مصخن ودايم يصج ابوه عشان يوديه للصحيه عشان ينومونه وياكل من اكلهم يقول ازين من حواق امه اباخليكم الحين واعود لكم اية حزه جعل ما يعقبنا عليكم الا العفو والعافيه |
| الساعة الآن 12:57 AM. |
Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ
جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه