هذره عن هذره تفرق
اول شيء ابداء بالسلام عليكم
واسمحو لي امدد رجولي يعني بالعربي البساط احمدي ندخل ونسولف ونحط الزعل او الوقفه على اي كلمه عند الباب الموضوع ببساطه كنت افكر فيه وحطيته من وقت وكنت بستمر بس كان جاء بغير وقته قبل كم اسبوع والبارحه طلبت مني نور عيوني فقيده موضوع نسولف فيه والحين انفذ لها طلبها المهم الحين جبته وهو هذره عن هذره تفرق يعني نهذر نسولف نمزح مع بعض ننتف بعض على قولتهم بس من غير زعل والحين بسمح للكل يدخل من غير يجيب شيء معه لان اليوم الافتتاح بس بعد كذا من جاء ينفذ طلب الي قبله يعني يجيب له الي يبي يالله الحين ولو انها قهوه متاخره بس ما احب ابداء اي شيء الا بذكر الله ومن ثم القهوه والشاهي رمز الكرم والجود يالله حييهم https://encrypted-tbn0.gstatic.com/i...7qFIuDvtg9OP8w |
رد: هذره عن هذره تفرق
تبلت الدجاج وجلست اتقهوى شكل مافي احد من البنات تجي تشوي
طيب وين الشنبات وين العيال اقول شكلي بحطه في الثلاجه واسكر الباب :happy: http://www.mekshat.com/pix/upload/im...206_236665.jpg |
رد: هذره عن هذره تفرق
وعليكم السلام
خذي راحتس وانا أختس والله يغنيس ويكثر خيرس فديت الناس الطيبه انا وجلع عيونس ماتشوف شر ولا بأس ايه الحين نقدر نسولف ونأخذ راحتنا في بيتس قصدي في متصقحس من امس وانا ودي اهثر ملينا واحنا ع الصامت وربي ماتعودت الا أسولف انا ابي اجي اشوي معس افتي الباب لي يالله بسرعه |
رد: هذره عن هذره تفرق
http://media.indypgh.org/uploads/2009/11/open-door.jpg هو من الي مسكر الباب مخليته موارب يمكن الهواء ولا ما تعودنا نسكر البيبان < الله من الهياط وين الحراميه عنكم هلا وغلا بالنور كله وملح المنتدى زينه قصيده ذي ولا ترحيب تعالي اجلسي جنبي واهذري الين تتعبين ومن قال لك اسكتي علميني بس |
رد: هذره عن هذره تفرق
|
رد: هذره عن هذره تفرق
جعله مايسكر من عدمس يا الغاليه ان شاء الله
طيب افحسي لي شوي محد قال بس قوليلي من اسولف معه مع جدران المنتدى فيني صيحه بعدين تراني ابي اتكلم بلغه اهل سدير وابي اذب الكاف وراي خليتها للمتمدنين عشان اخذ راحتي بالحسي v: |
رد: هذره عن هذره تفرق
اقتباس:
وايتس يالغلا بعدين عادي خذي راحاتس بس انا مو متمدنه بس ما اعرف بالسين ماعليش بس انتي ما عليتس بعدين وين رحت انا تحاكين جدران المنتدى واسم الله عليك من الصيحه تعالي اجلسي حاطه لك مكان بجنبي عند الوجار |
رد: هذره عن هذره تفرق
اقتباس:
انتي بسم الله علس هاليومين كنتي تعبانه االله لا يعيد الشر ويشفيس ربي من عنده ولا بحيت اوجع رأسس بالحسي شابه نار واحنا بعز الحر هههههههه |
رد: هذره عن هذره تفرق
الحين فاحسه هالحين كل هالمكان ما ياخذكي
واللهم امين وما تشوفين الشر حياتي انتي وبعدين لا يهمك سولفي اهذري ما علي يمكن سوالفك وكلامك يعالجني من بعد ربي ايه الا وش رايك نذبح قعود ولا كمن ذبيحه علشان الاداره الجديده ولا نخليها الين ناخذ رايهم بعدين ما شبيت ضو انا جالسه عند الوجار للكشخه اذا جيت اصور الجلسه للاستقرام رقعي الله يهديك مهوب تكبين العفش |
رد: هذره عن هذره تفرق
اقتباس:
هم اللي يعشونا مو انا ويحطون لنا قعود بعد مو ذبيحه هههههههههه هم كرماء ونحن تستاهل اقول بس لا تفتحين علينا بيبان مسكره :nsleep: فلوسي كلها في الاسهم ماعندي شيء احطها لهم http://sudeer.com/vb/images/icons/ico10.gif |
رد: هذره عن هذره تفرق
موضوع حلو بيخلينا نجي نريح هنا شوي و نمدد الرجلين في مجلس الرجال و لا تبي نسمع حسيكم
الا على فكرة ترا استبدال الكاف بالسين لغة عربية و العلم في هذا الموضوع طويل عن اللهجة النجدية نقلته من فترة و لا ادري وين راح بعدما غيروا في الاقسام الشاهد هذا الجزء اللي يهم المقصود : 4 - حرف الكاف : غالباً ماينطق في اللهجة النجدية على هذا النحو (تس) مثلاً : تسذا = كذا، يتسذب = يكذب، وإذا أبدلت كاف المخاطبة في نهاية الكلام بالنحو السابق فهي تكون موجهة للنساء. مثلاً : وين ألقاتس؟ = أين ألقاكِ؟ وهذا نطق فصيح قديم لقبيله بكر بن وائل يقابله في بعض الدول العربيه نطق بعضهم الكاف تش على طريقه فصيحه أيضا وقديمه هي لهجه بعض القبائل القحطانيه. |
رد: هذره عن هذره تفرق
الله يحييكم ومباركين جميعاً على المنصب الجديد
بس مافيه شاي ولا قهوة ولا عشاء كلن يخدم نفسه بنفسه ههههههه وربي ما افي احلا من لهجتنا السداراويه بس خربنها بالكاف بعدين موضوعك رح شفه في الارشيف بما أنك صرت عضوء مجلس الاداره ماشاء الله دوره وراح تلقاه ولا تبيني ادوره لك دورته مثل ام صعرور ههههه |
رد: هذره عن هذره تفرق
ما استغني عنك
و جبتي أم صعرور فعلاً نبي نحطك مديرة البحث و التقصي :) |
رد: هذره عن هذره تفرق
هلا وغلا بالاداره وخزياه فقيده
حطي القهوه والشاهي في المجلس وتعالي اقصري صوتتس يقول ما يبغى يسمع صوت وخلينا عند الدريشه يمكن فيه اجتماع نسمع وش يقولون وبعدين عن الذبايح شكله مافيه الله يستر القعدان يقولون فيها الكروونا والغنم يمكن وش يدرينا شكله مافي الا الدجاج المتبل |
رد: هذره عن هذره تفرق
هههههههههههه بس وش راح يكون لوني
لا تقول أحمر وش كثر لون الاحمر الحين << امزح عادي اتقصى لك بدون لون بس وش تبي اجيب لك موضوع اللهجة النجدية عاد وين راح القاها فيه مع هالحوسه وربي ابتلشت |
الساعة الآن 01:51 AM. |
Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ
جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه