|
يوم انك تظهر ياصالح امس الصبح وقبل البارح
سعد الحافي يوم انك تظهر يا صالح امس الصبح وقبل البارح حيثك فطن وقلبك صاحي خبري بك رجالٍ فالح ماشفت العنز المسروقه اللي وخذت مني بوقه تالي ثمنتها مفهوقه مشراي إلها قبل البارح دورها كودك تلقاها تراني مسقم ببلاها وهي ضاعت في مفلاها لجل الشاوي خبلٍ سايح العنز الربشا الماسومه عليها المطرق ورقومه ما نرحصها بأول سومه واللي تمسي عنده رابح حوا عطر مدامعها أذانيها تشرب معها يا حظك ياللي طامعها ياقط واللي غيره قامح تجي حلبتها وقيه والاخرى ملي الشاميه بكر بالديد او ثنيه وشلون الى صارت قارح ما حلبناه الا مره حلوه لكن نضحة مره ما باقي منها الا الجره نهار ان الشاوي سارح انا من المغرب رحت انزي بلشانٍ في دورة عنزي واثر الشاوي قلبه جنزي ضربني بالموس الجارح يقول العنز مخليها بالبر ابك هو علمي فيها قلت اقمح توي شاريها لوني داري صاح الصايح عسى الله ما يرعى الراعي اثره عكروك طماعي ضيع عنزي واكل صاعي وانا قلبي مثل الفايح والله ما دون يدورها ولا ينقل خسايرها وان عيا حيثه خابرها تليته للقاضي صالح انا وياه وشرع الله يرضينا كنا خلق الله اللي يرضون بحكم الله نرضا به والخاطر سامح اما حصلناها شرعا ولا خل الدرعا ترعا كنه بقر راعي القرعا يشرونه والفايت رايح حفيت رجلي من الدوره وهي بالديره مذكوره عليها راس الباكوره فراق العذب من المالح اتبعت الصيحه بالصيحه كني ماخوذ التصبيحه قل لاعادت من تسريحه ما طاوعت الشور الناصح يقول احفظها في دارك ولا يدري عنها جارك ترا الحكمة كتم اسرارك والتنشيد العيب الفاضح ربح الجالب قبل الحالب غلبني وامر الله غالب هذي امقطعة الطلايب لو قيل ان العنز اتمانح ليت الله ناهيني عنها قبل اشرب قرطوع منها اخلفها واخلف ثمنها يا رب الصالح والطالح الشاعر: هو سليمان بن ناصر بن شريم من بني زيد شاعر مجيد أجاد فن المحاورة والنظم على البحور الطويلة توفي رحمه الله عام 1363ه. مناسبة النص: من سياق النص يبدو أن الشاعر أشترى أنثى ماعز ذات مواصفات جيدة (مزايين) فدفع فيها ثمناً غالياً تبقي منه مؤخر، ثم جعلها مع راعٍ يخرج بأغنام القرية وعند المساء عاد الراعي بأغنام القرية ولم تعد عنز الشاعر. |
رد: يوم انك تظهر ياصالح امس الصبح وقبل البارح
ابيات جميلة صح لسان قايلها
|
رد: يوم انك تظهر ياصالح امس الصبح وقبل البارح
اقتباس:
ومرورك اجمل اخي الفاضل صياد دمشق شكرا لك وبارك الله فيك |
| الساعة الآن 08:50 PM. |
Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ
جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه