|
قصة: صقر الشجاع
: الجزء الأول ،،،،، : فيه رجال متزوج وعنده بنت والبنت عمرها صغير حول الخمس سنوات عاشت هاذي الفتره مع ابوها وامها وبعدها في فتره ام البنت جاها مرض وماتت ,الله الدايم وصار الرجال وبنته عايشين والرجال عنده غنم وعنده حلال الرجال صار مهموم في تربية بنته وحطها عند اخوه واخوه متزوج وعنده ولد واسمه صقر المهم مشت السنين وفكر الرجال ابو البنت انه يحج وراح مع هاك القافله على ذيدانهم وبعد فتره رجعت القافله بس الرجال ما رجع راح اخوه يم كبيرها وقال اخوي وينه!؟؟ قال اخوك مرض في الروحه وحج معنا وفي الرجعه زاد عليه المرض ومات ،،،،، وانصدم اخوه في وفاة ابو البنت وصار يحب البنت لانها من ريحة اخوه الي مات ربها عمها على احسن تربيه وكان يدلعها من اقصى الحدود واذا البنت بكت يبكي ورها ما يحب انه يشوف البنت حزينه وكان يلبسها ازين الثياب مرت السنين والبنت اكبرت،، وقام عمها وزوجها لولده صقر وعاشت معه سنين قليله وكانت ما تبيه لان صقر فيه خمول ،،، ولاهو فارس ولا هو بخيال،،، والبنات من اول يحبون الولد الفارس والشجاع والي يذكرونه اهل الديره وفيه يوم من الايام راحة البنت لعمها وجلست عنده وقالت يا عم قال سمي قالت انت ابوي والله مدري وش اقول قال يا بنتي وانا ما ودي تزعلين والي تبينه انا اوفيه لك قال يا عم صقر ما عاد لي فيه هواة وهو ما يروح ولا يطلع مع الناس ولا شي قال عمها ايه والله مدري وش اسوي فيه قالة انا ابي اتطلق منه يا عمي والسبب مثل ما قلت لك قال ابشري انا اخليه يطلقك ويوم جاء صقر قال طلق البنت انصدم الولد ولزم عليه ابوه وطلق البنت،،،، : : : : الجزء الثاني ،، : وكان فيه وااحد يجي للديره وتاجر يبيع للبدو ويسمونه ابو بكر العنقري وكان الناس يحترمونه ويقدرونه وله مكانه وسمع بالبنت انها مطلقه وبعد فتره راح ابو بكر لعم البنت وطلبها ووافقت عليه وتزوجها والسالفه صارت في القيض ويوم جاء الوسم وريحة الامطار عزموا اهل الديره انهم يشدون يدورون الربيع ويتبعون حلالهم وتاثرت البنت في شديد اهلها والديره وحزنت على الحياه الجميله وتذكرت مراتع اهلها من اول ومنازلهم القديمه وهي ساكنة في بيت الطين وتغير صقر ولد عمها عقب طلاقها منه فطن لنفسه وصار فارس وخيال والناس ما عندها إلا صقر ،،،، راح صقر رجع صقر وصار شجاع واشتاقت لديار اهلها في البر المهم هاضت مشاعر البنت مثل ما يقولون وما تدري ان ابو بكر يسمعها وتقول... : : : : الجزء الثالث : وتقول... يا شيب عيني من قعودي بقرية ::: ومن بيقرانٍ ربطها في حلوقها- يا عنك ما سيّرت فيها لجارتي ::: ولا سيّرت رجلي لبيعات سوقها- هني بنات البدو يرعن بقفره ::: ريح الخزامى والنفل في غبوقها- شوفي بعيني للبيوت هدمت ::: والزمل شالوا غالي القش فوقها- شفي بهم صقر تباريه عندل ::: ربيقيةٍ در العرابا علوقها- أيضا إلى شدوا تباريه هجمه ::: حم الذرا ما يحلب إلا شنوقها- : : ورد العنقري عليها بسرعه وقال روحي مني إلى صقر عطية :: عطية عنقري ما لها من يعوقها- : : : : الجزء الأخير ،، : : قالت البنت يا بو فلان انا اسلي خاطر وابي اتونس وقلت القصيده بس،،، قال لا وطلقها العنقري عشان يحافظ على كرامته وعلى قصيدتها الي قالتها جت البنت تبي تزين وتعدل لكن ما فيه حل،،، قام يسأل العنقري عن ديار اهلها الي اتجهوا يمها وحصلهم وارسل البنت لهم ،، وبعدها في فتره قام عمها وزوجها صقر مره ثانيه وبعد فتره راح العنقري لديار البنت واخذ معه ناقه جربا يبي يختبر اهل البنت ،(( يرحبون فيه ولا لا يفزعون له ولا لا )) وجا عندهم وكأنه فقير ويوم اقبل على البيت وإلا ينطحه صقر ويرحب فيه .... ويقرب الناقه عند البيت وقال العنقري انا ما عندي غير الناقه هذي يا فلان ،،،، قال صقر ابشر في الابل يا ابو بكر،،، ويوم رجع العنقري لديرته ارسل له صقر كم ناقه ،،، ويوم وصلت ،،، عرف العنقري طيبهم و قام عليها وحملها من أنعام الله عيش وسكر وقهوه وغيرها : وقال للمرسول رجع البل لصقر واشكره عني على طيبه ،،،، : : انتهت |
رد: قصة: صقر الشجاع
مشكورة اختي الفاضلة على القصة والقصيدة سلمتي تحية
|
رد: قصة: صقر الشجاع
قصة ممتعة ورائعة كروعتك شكرا لك انوثة على اتحافنا بها |
رد: قصة: صقر الشجاع
اقتباس:
حياك الله المحارب انرت كُن بخير |
رد: قصة: صقر الشجاع
اقتباس:
الله يسعد خاطرك بنت الاصول شكراً على التواجد الا منقطع لا خلا منك ولا عدم |
رد: قصة: صقر الشجاع
حلو القصه
|
| الساعة الآن 11:26 AM. |
Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ
جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه