تعليم الرمي طيار ورمي المراجل.
 

السلام عليكم ورحمة الله وبركاته... وبعد:
اخواني اعضاء المنتدى . بما انه هذي اول مشاركه لي بالمنتدى. فحبيت طرح موضوع يخص تعليم الرمي طيار.
انتم تعرفون ان الصيد مايحلى الا بالرمي طيار. وهذا معروف عند الجميع واصلا فيه بعض الطيور ماتقدر تلحق ترميها وهي بالارض مثل النحم مثلا كنه طياره من اول ماتقبل الا هو طاير. واصلا متعة الصيد ماتحلى الا بالطيار.
والغرض من طرحي للموضوع هو فيه البعض مايعرف يرمي طيار. فحبيت انا اضع بعد النقاط الي تعلمتها بنفسي من رميي للطيار بالمزرعه.
-----------------------------
اذا صار الطير جايك على جنب يعني معطيك احد جنوبه (( مثلا يصير جناح الطير اليمين من جهتك)):
وين تحط البندق!!!!
تحطها ياطويل العمر قدام الطير شوي على حسب مسافة الطير الي يبعدها عنك مثلا كان قريب جنبك شوي شبرها عنه شوي واذا صار بعيد شبرها زياده عنه.

اذا صار الطير مقبل عليك(((وهذي اسميها مصادر يعني معطيك صدره))):
حطها قدام راسه بشوي . واذا صار بعيد عنك قدمها زياده عنه.
-------------------------------
هذي الطرق اللي رمية فيها انا بالمزرعه وتعلمت عليها .
وفيه بعض الاسئله عندي بخصوص الطيار وهي الي ماعرفة اطرح الطير فيها:( :( !!
اذا صار الطير معطيك قفاه يعني مقفي وين احط البندق فيه؟
اذا صار فيه جول وبعيد شوي عنك وين احط البندق؟
ونصيحه مني لالي يبي يتعلم على الطيار يتعلم اول شي على الخضاري والقوقسي((على الطير الي ماهوب سريع طياره مره))) همن على الطيور الاسرع منها يعني بالتدريج. حتى يتقن باذن الله الرمي طيار.
----------------------------------------
هذي بخصوص الرمي طيار.
==============================
رمي المراجل
طبعا معروف القصد بالمراجل. وهو انك تطرح اكثر من طير بوقت واحد. وهذا الي يتمناه اغلب الصياده.
انا على حسب تجربتي في المزرعه . جربت على القوقسي كان فيه ثنتين بالاثل وحده قدام ووحده ورى الي قدام كانت مرتفعه شوي عن الي ورى. انا حطيت البندق على الي قدام ويوم رميت ورحت اجيبهن لقيت الثنتين متسدحات.
وفيه الكثير من الناس اذا سألته وقلتله اذا صار فيه طيرين جنب بعض وبينهم مسافه قليله وين تحط البندق. طبعا الجواب معروف راح يقولك حطها بالوسط!!!
ويوم سألت عن هالشي قالوا لي بعض الصياده ياما سوينا كذا ورحنا فيها!!!
وهذي بعض الاسئله للرمي مراجل.
اذا صار فيه طيرين جنب بعض وبينهم مسافه وين احط البندق!!!
اذا صار فيه 10طيور مثلا((او مجموعه من الطيور ماهوب شرط تحديد العدد)) جنب بعض على غصن من غصون الشجره وين احط البندق!!!
----------------------------------------------------
هذي بخصوص المراجل .
==============================
والي عنده اسئله ويحب يضيفها يتفضل. وايضا الي عنده معلومات اضافيه لايبخل علينا فيها .
======================
مع تمنياتي لجميع الصياده الاستفاده من هذا الموضوع والتمتع بالرمي طيار وتجربته للذي لم يجربه
من قبل ومع تمنياتي بالصيد الوفير لجميع الصياده .

هلا اخوي >نجمة سهيل<
والله الموضوع حلو وكايف .....وشوقتني اني اجرب مطيار والمراجل

واسح لي ايتفلسف عليك في الاسئله مع اني ماجربة الى الان

اذا صار الطير معطيك قفاه يعني مقفي وين احط البندق فيه؟
انا اقول انك تحطها قدام راسه والا انك تنتفه هو وذنبته وتريح:D

اذا صار فيه جول وبعيد شوي عنك وين احط البندق؟
عاد هاذي عجزت اتفلسف عليك فيها اخاف افقش عليك يالحتسي وتصير كبيره:p

اذا صار فيه طيرين جنب بعض وبينهم مسافه وين احط البندق!!!
انا اتوقع اذاكانت معطياتك وجههن تحطها بينهم من فوق بحيث انهن ما يهجن على طول:cool:

اذا صار فيه 10طيور مثلا((او مجموعه من الطيور ماهوب شرط تحديد العدد)) جنب بعض على غصن من غصون الشجره وين احط البندق!!!
هاذي طال عمرك دواها ام خمس:D

والله اني داري اني من جنبها ..... لاني ما عمري رميت بهطريقه
ومشكور على الموضوع ........ والله يخلي الواحد يتحمس انه يجرب

وعليكم السلام ورحمة الله وبركاته
ما شا الله عليك أخي >نجمة سهيل< على اختيارك الموفق والرائع فعلاً في عرض هذه النقاط والإرشادات لأعضاء المنتدى
والصراحة أنا معجب بالفعل بإجاباتك البليغة ونصائحك الرشيدة..
أثابكِ الله عليها وجازاكِ خير الجزاء


أما بخصوص أسئله رمي الطيار

ـ اذا صار الطير معطيك قفاه لا ترمه لأنك تتضيع الفشق وتهجهج الطير لأن غالباً رمي الطير مع الظهر أو الذنب غير قاتله أو ماتطيحه والأفضل أنك تحط البندق على ستفك وتلاحقه إلين يوقع ثاني مرة

ـ اذا صار فيه جول وبعيد فهذا راجع إلى نوع السلاح الذي معك وهل هو يهفي فوق وإلى تحت ونوع الفشق هل هو يسوق لبعيد وإلى لا


كذلك بخصوص أسئله رمي المراجل

ـ اذا صار فيه طيرين جنب بعض وكانت المسافه بينهم أقل من 30سم فحط البندق بينهم أما إذا كانت المسافة أكثر من ذلك فالأفضل أن ترمي الطير الواضح والمضمون صيدة لأن الطمع ضيع ماجمع

ـ اذا صار فيه مجموعه من الطيور جنب بعض على غصن ولا تقدر تجمعهم في فشقه واحدة فالأفضل أنك تطيرهن من الشجرة وخلك مستعد لأنهن بيطيراً في وقت واحد وغالباً في إتجاة واحد فسم بأسم الله وأرمهن


وفي الأخير عندي سؤال : وشهي الطريقه التي أقدر أبعد فيها القوقسي عن القميري علشان مايطير معه ويهجهجه ؟


وتقبلو تحيات أخوكم أبوشذى

السلام عليكم و رحمة الله و بركاته
 

تسلم أخوي نجم سهيل.

الموضوع رائع.

و تقبل تحياتي،،

ابوعمر

كيف تبعد القوقسي عن القميري
 

أصلا القوقسي شكله مميز عن القميري و بعدين القوقسي حذر و يهج عنك بمسافه بعيده اما القميري اذا كانك جايه قبل طلوع الشمس فصدقني انك تجي تحت الشجره و لا يحس فيك بدون مبالغه و هذا الشي صار معي الموسم الماضي كنت نازل للشعيب قبل طلوع الشمس وجيت تحت الشجره بالضبط و القميريه فيها .. لاكن مو كل القميري زي بعض يمكن ذي القميريه مخلص البنزين عليها :D و توها جايه من طريق طويل ...

شكرا لكم.
 

اخواني:
مفتون صيدhttp://www.mekshat.com/vb/images/smilies/heart.gif
اتيكاhttp://www.mekshat.com/vb/images/smilies/heart.gif
ابو عمرhttp://www.mekshat.com/vb/images/smilies/heart.gif
المولعhttp://www.mekshat.com/vb/images/smilies/heart.gif مشكورين على تجاوبكم السريع. وماقصرتوا والله يعطيكم العافيه.

أنا معك أخوي المولع أن القوقسي شكله مختلف عن القميري وأن القوقسي حذر وأن القميري على نياته يطير من الشجرة ويعود ألها مرة ثانيه وأنت جالس تحتها

بس أنا قصدي إذا القيت فرق حمام قميري وصارات معه واحدة أو ثنتين قوقسي تلقاه مايركد القميري

كلما طار القوقسي طار القميري معه ولا يركد

أنا مجرب طريقه وهي أني إذا أقبلت على الشجرة وأنا خابر أن فيها قميري ومعه قوقسي أطفي موتري قبل الطلحه مسافه حوالي 100 متر

ثمين أصبر شوي وأنا خابر أن القوقسيه على أعصابها تتلفت وبعد شوي تطير وتخلي القميري في الشجرة نايم لأنه ماحس بالخطر مثل القوقسيه

بس هذة الطريقه لا تنجح في كل المرات

اشكر الاخوان على تفاعلهم في الموضوع ...........
انا اوفق الرأي مع اخو ي المولع ........ اذا كان توه جاي القميري بدون مبالغه يمكن تمسكها بيدك.... لكن اذا رميت وخوفت هين يا جالسه لك

وكلام اخوي اتيكا صح لان القوقسي ما يركد من يوم يشوفك مقبل على الشعيب وهو طاير فلذلك وقف بعيد وانتظر شوي
نبغى اراء ومشاركات اكثر ;)

مشكورين اخواني على تفاعلكم في الموضوع.

السلام عليكم و رحمة الله و بركاته
اخوي نجمة سهيل اشكرك على طرح هذا الموضوع الممتع و المفيد .. و احب اشارككم بما اعرف .
بالنسبة لرمي الطيار يختلف الرمي بين البنادق يعني فيه بنادق تزم ( ترتفع ) و فيه بنادق تهفي ( تطمن ) يعني لا صار معك من البنادق اللي ترتفع عن المرمى شوي و جاك طير من فوقك بغض النظر عن سرعته و ارتفاعة حطها في بطنة لأن البندق تبي تسفيك و تسبقله عنك و لو كان بعد توه طاير من الارض باتجاه شبه عمودي و هذه البندقية ممتازة لكن احسب حسابها في المجانب يعني طمن و سبق و في الفروق تقدر تحكم في المجامل ( المراجل ) يعني تشوف الفرق واضح قدامك و ترمي على كيفك اما اللي تطمن هذي مالها طب يبي لك تعود عليها عشر سنين يعني صعبة شوي و كل هذه الميزات لا تعيب البندقية و لكن عليك معرفة نوعية رمي بندقيتك و آخر شي ما فيه مثل البندق اللي رميها في مكانه و لكن تختلف الرغبات حسب الاسخاص .

مشكور اخوي داير حدعش . على ردك الطيب والله يعطيك العافيه.

عطيكم العافيه :)


طيب يازين رمي الطيار

نقول هذي ماصورتها طويله (س)

وهذي قصيرة كم طول الماسورة وكم مداها تقريبا شكرا :)