ياحزة الضيق صدري منك ماضاقي
لقيت معك العلاج وهانت العله
إليا رميتي بدلوك داخل أعماقي
قريت لك ماتيسر من كتاب الله
أطوي حبالك وأنا واقف على ساقي
عليك راسي طويل ولا قصر ظله
كم راح من ضيقه وكم من حزن باقي
جاريت كشف الهموم وجات منسله
وأنا لو إني زعلت وشانت أخلاقي
لازلت من فضل ربي من هل المله
مخلوق قانع وراضي بأمر خلاقي
مثلت لامره وأنا خاضع من الذله
بكيت يوم المدامع تحرق إحراقي
لكن هانت بعد جف البكا كله
أخاف من يوم تشخص فيه الأحداقي
وتميل بي كفة التقصير والزله
يارب عفوك وأنا للعفو تواقي
كم لي وقلبي يفوح ولا برد غله
لو راحة البال تعرض وسط الاسواقي
ماكان نصف الخلايق صابها خله