دبـجـــــــــــــــات
يقول كاتب المقال
هذي دبجتين مانسيتهم في حياتي مواقف واقعيه
دبجة ابو طامي
كنت العب كوره وقت الضحى مع عيال حارتنا وحاطيني انا ودجتي حارس ( امحق حارس )
والكوره من البلاستك بريالين وراعي الكوره اسمه سعدنه و سعدنه ذا عير عيره
والله يالعضلات انها تزاحم في جسمه حتى انها ظاهرتن في خشمه من كثرها
وكان البيت اللي ورى الباب اللي انا ماسكن حارس مرمى عليه بيت من دور واحد لابوطامي
وذولا عاد ماعندهم وقت الكوره اللي تسطح عندهم والمين لها بسكاكينهم على طول يشقونها
ثمن يذبونها باك علينا
المراد وحنا نلعب سعدنه شات الكوره انا ماشفتها من قوتها الا وهي ضاربتن قمه راسي
وطارت فوووووق وطاحت فوق سطح بيتك يابوطامي
وجاني سعدنه وقالي : شف اذا شقوا الكوره شقيت لك راسك يامدرعم
قلت : بس انا ماشت الكوره طيب
وانبصي ياعيون سعدنه وهو اللي يلقطني برقبتي وينفضني نفضتين بس استدارت الدنيا
في راسي احولت عيوني واذاني من قوة الهزه جلست تومي يجي عشر دقايق
وخذت لي شوي لين اركدت اذاني
وقلت : زين خلاص لاتهز ثمن يطيح شي من وجهي الكوره وبجيبها لك
وانا اقمز على الجدار ثمن فوق الكراج ومنه اتعلق على ماصوره لين قمزت فوق السطح
واخذ الكوره وانا اللي اذبها على سعدنه
جيت عاد ابي انزل ماعرفت بحلت فوق السطح وش الحيله وش الدبره وانا اللي انزل
مع الدرجه الا انا وسط بيتهم وابوطامي هو وعياله جالسين يتغدون في الصاله
وتصارخ ام طامي حرامي حرامي ويطمر علي ابوطامي ويمسكني بشوشتي
ويرجدني في الجدار وهو يقول وش جابك من فوق السطح
انا ماعاد عرفت اتكلم قمت اتعتع واقط خيط وخيط وقلت :
سعدنه هو اللي شاتني فوق سطحكم يبيني افر الأنتل حقكم على محطة البحرين
قال بحرين هاه بحرين وهات يادبج من ابوطامي وام طامي وعيالهم حتى شغالتهم
خذت قسمها دبجتني
من تالي عرفت انهم مايحبون يتفرجون على البحرين لو اني قايل ابي افر الأنتل
على محطة قطر كان يمكن اني سلمت من دبجهم بس يالله وشو عقبه
اييييييييييييييييييه ( طالعه من قلب ) صدق المثل اللي يقول:
نحشنا من سعدنه وطحنا في ابوطامينه
دبجة الزيران
ليله عيد ومخباتي مليانه طرطعان ( شراخيات ) ومعي عليان الذروووق وكان قدام بيتنا
نخيل ونشوف في وسط النخيل نار ونسمع طبول وصوت ناس تغني سامري
وانا اللي ادرعم مع عليان عليهم ونوقف نتفرج عليهم وكانوا مسوين دويره كبيره
حول النار ويغنون ( يانجمه الصبح هلي حاموا عليكي النشامى عاشوووووووووا )
وفيه أثنين طابين زيران وكان واحد قصير ومدربح ويدينه كانها كبن معه طاره
وياهو عليه صقل صدقوني هو اللي مطلع الزيران منهم وانا ادعس يدي في مخباتي
واظهر دسته طرطعان وانا اللي اذبها وسط النار وقامت النار تدهر بالطرطعان
طاااااااااااااع والجمر يتطاير فوق روسهم وطبولهم قامت تطير فوق وبعضهم تصافق مع بعض
واللي فيه زار طلع زاره من جد ماعاد هوب لعب وانا فاغر اثمي اضحك عليهم
المراد الذروووق عليان انحاش وشافوه وهم يلحقونه ويمسكونه ويعلمهم على طول
إنه أنا اللي ذاب الطرطعان واشوفه من بعيد ياشر علي وانا اللي انحاش
بس كان معهم واحد حشى ماهوب ادمي سلقه من سرعته انا اركض خطوه هو عشر خطوات
وهو يطمر علي ويمسكني ويفتشني ويلقى الجيب مليان من الطرطعان
وهم يتجمعون علي اهل الزيران وهات يادبج الصراحه دبجهم بكوووم ودبج الدب المدربح كوووم
هو مع يده الكبنه ياهو قام يصقل صقل في دميجتي
من قوه الصقل الأثنين طبوا مره ثانيه زيران
...........................