41) سعد الله يرحمه كانو يتعشون سمك ومعهم صغار (أطفال)قال واحد لسعد انتبه ترى به شوك قال سعد للصغار قومو البسو نعالكم
42) جيت مره في وقت متأخر من الليل للبقاله الشهيره وانا ابدخل لقيت سعد ياكل حب قرع ((الفصفص الابيض)) والظاهر انه من بعد العشاء وهو يفصفص ومالي الرصيف الي قدامه قشور حب القرع ...
المهم قلت هلا ابومحمد وش دعوه كل ذا الحب انت الي اكله؟؟...
قال انت تشوف يابو فلان تقل ضاربتنا برديه .....!!!! برديه ((غيمه مليئه بالبرد ))
43) اتذكر موقف او تعليق قاله لي عند البقاله المشهورة
كنت امر عليه احيان مع واحد من حارته اصغير مني بالعمر لكن ضخم الجسم
وجيت عنده وكنت وحدي وسأته يابومحمد ماشفت فلان ؟؟
قال لا .. وبعدين التفت علي فجأة وكأنه يفكر بشي وقالي ::
حنا نعرف الأم اذا بغت ترضع ولدها تحطه بحجرها بس مع فلان ........ يقصد صديقي
اذا بغت أمه ترضعه تجلس هي بحجرهـ
44) مره كان صاحب البقالة عنده شغل , طلب من سعد يقعد بالبقالة الي ما يجي , فعلاً قعد , دخل عليه واحد قال : بس يابو محمد (يقصد دخان ابو بس) رد عليه : معك خيشه ؟!
45) مرة كان سعد -الله يرحمه- بالمدرسة , وكانت المادة رياضيات
وكان المدرس يقول للطلاب : المستقيمان المتوازيان لا يتقاطعان
أبداً , رفع سعد ايده وقال : الا يا استاد ! , قال له : وشلون
؟ قال : الى صارن بــ(سوق سد) !!
معاني الكلمات :
سوق سد : اييييييييييه وشلون نشرح , هذا سلمكم الله البيوت
القديمة كانت طبعاً من دون تخطيط ولا شي , فكان دايماً يصير
فيه شارع يدخل بين البيوت وبعدين ينقطع فجأة أما بسور أو
باب يعني لازم ترجع , الشوارع أو (السوقه : جمع سوق) اللي
تسذا يسمى الواحد منهن (سوق سد) .
46) يسولف علي عبد الله الجلالي وهو من ربع سعد الله يرحمه يقول : كنت موظف قبل اكثر من 30 سنه براتب 400 ريال المهم يقول لي ان واحد من تجار عنيزه قال له ابيك تجيب لي واحد يعاونا بالمزرعه ويصب ومن هالامور .. يقول قلت له سم ورحت لسعد وقلت له ما عندك مانع تشتغل عند فلان قال سعد ميخالف .. راحواسعد والجلالي للرجال يقول الجلالي : قاله الرجل ابيك تشتغل عندي ولك 600 بالشهر .. يقول الجلالي شف وشلون هالحين انا اللي واسطته وراتبي يبي يصير اقل منه .. المهم بدا الرجال يعلم سعد بالشغل ويقوله وكان فيه دلة قهوه وبريق شاهي .. قال لسعد شف هذولي ابيهن كل يوم اول ما تطلع الشمس معبيات وجاهزات .. قال سعد : طيب ان تسان هي مغيمه
47) كان واحد من اهل عنيزه يحب عنيزه بشكل كبير ومن زود حبه جته عين وصار ما يقدر يطب عنيزة كل ما جاء لعنيزه تجيه ضيقة صدر غير طبيعيه المهم قالوا مره لسعد ان فلان معيون ( به عين ) ما يقدر يجي لعنيزه .. قال زين اجل اطلعوا به من جهة بريدة الى ما يستاسع صدره عشان نعرف حدود عنيزة
48) مرة سعد دخل القهوة مع واحد من ربعه , أومير يمر من عند مجموعة شيش
وإلى بينهن وحدة طويلة طول بيّن .. قال سعد : أكيد هذي مرضعينه المغاولة !
49) يقولون سعد الخويطر الله يرحمه كان جالس بمطعم وبجنبه طاوله.. جاء بسّ (قط) ورقاء فوق الطاوله
ويوم شافه سعد ويصوت للنـاس اليّ بالمطعم ويقولهم (ياجماعه من هو اليّ طالبن بسّ !!) ..
50) يقولون أنه كان سعد وسليمان العايد يدرسهم أحد الطلبة المجتهدين في المعهد العلمي مادة النحو فسأل هذا الطالب سعد وقال له مثل بجملة فيها فاعل . قال سعد : زمَ سليمان منارة فقال سليمان : شم سعد بلاعة ... فضحك الجميع
يتبع