من اروع القصائد التي كنا نسمعها في الفترة الماضيه للشاعر الكبير ابن ريفه القرقاح القحطاني جد الشاعر الكبير فلاح بن محمد القرقاح .
اليكم القصيده
قال ابن ريفه بدافي المرقـب العالـي
واعلا المراقيب تومي بـه هبايبهـا
يامرقبي جاك مـن الاسبـار همالـي
انصوب مزن من المنشا يهـل ابهـا
ما يدهله كون صافي الريش ولوالـي
ولا الولع يوم يفتـك فـي عجايبهـا
انـا ولـد طارفـه مانيـب كسالـي
اخاف من خبـرة باحـت مزاهبهـا
عليك يا مرقب جيتـه وانـا سالـي
هيض على القلب ديارنٍ شطيت ابها
هيض عليه شدوق (الثفن) لا سالـي
عطفة (طريب) ليا زافـت عجايبهـا
لامن غدا الفيض كنـه زرع عمالـي
سيله مـن القـدم للبطنـان ناهبهـا
كم مرة قـد نزلنـا عشبـه المالـي
بيوتنـا لاوزا المجـرم يلـوذ بهـا
تنزلـه ببيـوت عـراف وجهـالـي
وانا جا النذر من خفيـف مانزهبهـا
ربعي (عبيدة) الياجاء هوش وقتالـي
هل هية في الضحى تشعـا كسايبهـا
انشد (عبيده) هل الطولات عن حالي
وانشد الاجانيب يـوم انـا نقربهـا
منهو يقلط علـى فـرش وفنجالـي
سعد ابن عمـه لياجاتـه مكاربهـا؟!
لامـن غـدا بيـن نقـاض وفتالـي
وصفت الاجانيب واذاته بطلايبهـا ؟!
ثم جيتها ثم لفحت بهم على الجالـي
لفح الدلـي للمعـدي يـوم يجذبهـا
ياركب ميمونه في مشيهـا ارمالـي
مايشتحن من هل العيـرات راكبهـا
تزهي السفايف وتزهي الخرج وحبالي
ومجرب لاسرى في الليـل صالبهـا
دنوا ذلولـي ترانـي ضايـق بالـي
ذلولـي اللـي مديـد العصريطربهـا
أبـا اتنحـر عليهـا واحـد غالـي
لولاه ما جيت مـن بـرزان راكبهـا
ملفاك من يلبسون الجـوخ والشالـي
ربعي ودرعي وضد اللـي يحاربهـا
ملفاك شيخ القبيلـة حامـي التالـي
عند (ابن شفلوت) يالمنجوب قربهـا
قل له على طالت المدة وانا (جالـي)
عشر(سنوات) مضت بحساب مقطبها
فان كان ربعي نسوني مانيب غالـي
باعيش في ديرة قفـرا جوانبهـا !!
في ايدي قرار تكف الجمـع لاهالـي
طويلـة ناحـل مقضـب خشايبـهـا
لي بندق ما صنعها الصانـع التالـي
من دقة (المـارت) نحـال مقاضبهـا
شريتها بالثمن يوم ارخـص المالـي
إميه وعشرين مـا يمهـل بغايبهـا
الله يرحمك يـا عـود شراهـا لـي
من واحـد جابهـا للسـوق جالبهـا
حديدهـا واذكـر الله كنـه ريـالـي
كـن الحيايـا تطوافـي مقاضبـهـا
اقف بها بين ربعـي وامنـع التالـي
لا خف ولد الردي ما احتال يزهبهـا
عط الطويلة عريب الجـد والخالـي
ولد الردي لا تلخونه يـزول بهـا !!
واللـي رفيـع وللشوفـات حمالـي
ارفـع نواصيـه ياربـي وقطبـهـا
وانا من الخبرة اللي شورهـم عالـي
واهل سلوك الـردي يـارب تذهبهـا
بنت غراها زبـاد فـي ايـد دلالـي
ولا طمـوح هواهـا مـن يلاعبهـا
كم مرة قـد ضربنـا منجـم خالـي
وكـم جملـة فرقتهـا مـن ربايبهـا
وليا لفونا مـن المقنـاص زعالـي
أحد مـدح بندقـة واحـد يعذربهـا
بشرتهم العشا مـن عقـب مقيالـي
القايدة مـع مـرد الكـوع ضاربهـا
اضرب بها الوعل لاجا لـه تهنفالـي
ابو حنيـة كبيـر الـراس شايبهـا
ذبحت عشرة بها والظـل مـا مالـي
والحاديه روحـت تثلـغ مضاربهـا
ويالله انا طالبك حمـرا هـوى بالـي
لا روح الجيـش طفـاح جنايبـهـا
لا روح الجيش حاديه اشهب اللالـي
لا هي تورد وسيـع صـدر راكبهـا
اللي على كورهـا واللـي بالاحبالـي
واللي على عيزهـا واللـي بغاربهـا
لا روحت مع سباريت الخلا الخالـي
كن الذيابه تنهـش مـن ترايبهـا!!
تمت وصلـوا عـدد ماهـل همالـي
على نبـي شـروع الحـق رتبهـا
اغفـر ذنـوب الفتـى يالله ياوالـي
لا جيت فـي حفـرة رزوا نصايبهـا