أنا شاعر وأهوجس وألحق الهوجاس بالهوجاس
هواجيس الشعر وبيوتها دايم على بالي
بيوت الشعر يحفظها القلم والحبر والقرطاس
وأنا شاعر وإلي قدري وتقديري ومنزالي
واقول أكبر خسارة لو فقدنا الطيب والنوماس
عسى فال الكرم والطيب والنوماس من فالي
أشوف الوقت متغير واشوف الناس عكس الناس
ابنشدكم صحيح العلم والا انا يورالي
تهاويلٍ يشيب الرمش منها قبل شيب الراس
ولا شيب شعر رمشي وراسي غير الأهوالي
تمر الاوله والثانيه والثالثه لا باس
لكن الرابعه يتعب بها رجلي وخيالي
وانا رجال أحس ودايم الرجال فيه إحساس
من العصر القديم وباقيه في وقتنا الحالي
صقور الجو فيها الحر والشيهان والقرناس
وانا مبداي مبدا الصقر راس المرقب العالي
أدوس الموت ما اخشى الموت والرخمه عساه يداس
عسى الله لا يبقي للرخوم أول ولا تالي
وجيه اهل الفلس ياليت من يكتب عليها افلاس
ويكتب في وجيه الطيبين الطيب الغالي
صحيح ان البشر ماهي سوا والله خلقها اجناس
خلق فيها البخيل وفيه من للضيف مدهالي
وبيت البخل مالي فيه لا لده ولا مجلاس
أعيش بعيد عن بيت البخيل اخير واشوا لي
يا طارق قوم وانا بوك جيب البن والمحماس
وقدم لي من البن المهيل نص فنجالي
تراك من الرجال أهل الوفا اللي يرفعون الراس
وانا رجال وانته صير مثل ابوك رجالي
وعزَّ الدين وانا بوك ترا الدين عزَّ الساس
وما يبنى بليا ساس فاقرب وقت ينهالي
واخذ عبرة وشوف اللي حصل لكليب من جساس
غدربه واطعنه بالرمح واليا الدم شلالي
نهاية من عقد صحبه مع انذال البشر ينحاس
ما يلقى الا النذالة والردى في دروب الأنذالي
وفيهم من يشب النار ويشب الفتن مقباس
يلالي والمهبل من غباها مثله تلالي
وانا اقيس العلوم وفيه بعض علوم ما تنقاس
حقيقه ما تغير ثابته ومسجل اقوالي
مسجلها وباعلنها وتنشرها وكالت واس
عبر كل الصحف تنشر خبر علمي ومبتالي
ويازين الصاحب اللي صحبته مثل الذهب والماس
عساها من نصيب عيال قوم الطيب وعيالي
وبختمها بذكر الله عدد ما ذعذع النسناس
وعدد ما لاح برَّاق الحيا وانهل همالي
على خير العباد محمد المختار خير الناس
شفيع الخلق يوم الحشر بامر الخالق الوالي