سلمت لك مفتـاح قلبـي وقفيـت
حتى عيونـي جتـك منـي هديـه
احفظ قليبي كان اناعنكـم ابطيـت
تراه مثـل الشهـد وسـط الخليـه
لا تجرحه ياطيب الذكـر والصيـت
قلبـي رقيّـق مـا يحـب الاذيـه
لا تخبره باني عنه يـوم صديـت
ولا ترتكب في حق قلبـي خطيـه
هو منوتي بين البشـر لا تمنيـت
عاش بقفص صدري سنينـا مديـه
ماقال انا من جـور الايـام مليـت
صابرعلى الطعنات صبح وعشيـه
كم مرهٍ في حقه اجحفت واخطيـت
وانـا فـؤداي يغفـر الذنـب ليـه
وكم ليلةٍ من زفرة القلـب ونيـت
ومن زفرتي هلت دموعـي عليـه
انا اعترف باني مع القلب موفيـت
غلطة وصارت بعد شهر الضحيـه
مدري وش اللي صابني يوم زليـت
شيطان مـارد فربـك العقـل ليـه
في لحظة استسلام جاني ولا اوعيت
الا ونـا معطيـه كـل القضـيـه
قلب حياتي في شهـر مـا تعديـت
اصارع احزانـي وقلبـي ضحيـه
فقدت طعم الانُس ساعـة تجنيـت
وش حيلتي ياناس مـن ذا البليـه
كيف استعيد اللي ذهب يوم جنيـت
هل تسمح اضروفـه يسلـم عليـه
آخر أمل في سجدتي يـوم صليـت
دعـوه تخالطهـا دموعـاً جريـه
اغفر ذنوبي قبل ما فـارق البيـت
واللي رحـل يهنـأ بعيشـه هنيـه