[بنت الاصول]

يالله طلبتك ياعزيز الجلالي
يارب يارحمان ياخير معبود
يامسير الافلاك مرسي الجبالي
رزقك يعم الناس ماهوب محدود
ياعالم بالغيب منشي الخيالي
ياعالم عن خافي البيض والسود
أنت الذي يارب تعلم بحالي
تخلق وتفني ونت يارب موجود
تفرج لمن شال الحمول الثقالي
لاحل حبل صادفه حبل معقود
حملي ثقيل مثل حمل الجبالي
يارب ساعدني على النقص والزود
إن ماسعيت لطيب محدن سعالي
والطيب عند اهله ترى ماله حدود
والله مالوم الوقت لو ماصفالي
هذي سوات الوقت قاصد ومقصود
وقتن شربت المربه شرب حالي
والحال مني ناحلن كنه العود
الله من وقت يهين الرجالي
وقتن به اللي يفعل الطيب منقود
والطيب مايقواه بعض العيالي
كم واحدن يطري له الطيب ويكود
الطيب لاهل الطيب باول وتالي
معروف مايبغي له إثبات وشهود
هذا ونا اعبر عن اللي طرالي
شي يحس البال والفكر مشدود
شي يخلي القلب فيه إشتعالي
والفكر كن بداخله برق ورعود
تمت وصلو عد طلع الهلالي
على شفيع للملا دوم موجود