[عبدالرحمن الفهد]

رسالتك وصلت فلا ترسليها


ادري بكلّ اللي نويتي تقوليه



لا تتعبي نفسك ولا تشغليها



قلبي دليلي فاهمٍ ما بغيتيه



ما دام روحي معْك لو تسأليها



تعطيك سرٍّ في المحبه ذهلتيه



الروح لا حبّت فلا تجهليها



تذوب في حبٍّ تعزّه وتغليه



ولوه ابتعد عن ديرةٍ تنزليها



حسّه يصل لك سامعٍ من يناديه



تدرين نار الحب لو يصطليها



وتدرين ما يخفي ولو ما سألتيه



وأنا عرفت بنيتّك فا امهليها



ياعلّ يطلع فجر نفرح بتاليه



دام الزمن باحلامنا مبتليها



وصارت سرابٍ مبعدات هقاويه



لا تيئسي والنفس لا تعذليها



فالحب سقم الروح ان ما فهمتيه



قولي احبك شامخه واعتليها



وقولي لضيم الوقت خابت مساعيه



بسمة أمل تشرق فلا تقتليها



وندفع ثمنها عمرنا اللي بديتيه



وان ما قدرتي دربنا تكمليها



وحكم الزمن يفرض علينا تجافيه



فقولي بامان الله لا تزمليها



تكفيني الذكرى فغيرك فلا ابيه



روحي امانه معك لا تهمليها



حتى نلاقى من نخافه ونرجيه .