يازين يومني طفل ماعرف شي
اكبر طموحي علك والا حلاوه
العب والى مني تعبت ارقد شوي
والى صحيت اصير كلي شقاوه
ألهى مدام ان العابيب بيدي
واصيح لامني سمعت القطاوه
مبهذل امي بس ودي وجيبي
وابوي اصجه بالطلب والرضاوه
والى زعق بي جدي وقال ياصبي
حسيت كن بيني وبينه عداوه
وان جا يطل بوجهي وقال لي (دي)
زادت غلاته وسط قلبي غلاوه
وافرح الى لعبني (ياحدي يابدي)
وتعال شف ذاك العقل والهداوه
ويومن كبرت وصرت فاهم بكل شي
صارت حياتي مالها اية حلاوه
الهم واجد وان فرحت افرح شوي
والعمر كله صار غم وشقاوه