ليت الليال تعود والشمل يلتم
يلتم عقب البعد شمل الرفاقة
اللي زميل لي وصديق وابن عم
وكل غالي بيني وبينه علاقة
ربع دواخلهم كما صافي الجم
ربع على الناموس فيهم شفاقة
وقت الشدايد لوتبي فزعة ازهم
لاضامتك دنياك وإن جتك فاقة
واحدهم اليا جاك قال آمر وسم
لوتطلبه دمه على طول ساقه
ماهو على حسب المخاسير يهتم
في نفعة اصحابه تجيه انطلاقه
وجه سميح وذرب لامن تكلم
ولا جيت له تلقى بوجهه طلاقه
لايسمع العوجا ولا يسمع النم
ولا يغير منهجه هرج عاقة
لكن ظروف الوقت ما عاد ترحم
دنيا تجمعها سريع فراقه
وارجع اقول يالله عسى الشمل يلتم
وإلا الصبر ما عاد لي فيه طاقة