[مطلبي الجنان]

يا خالق الدنيا عليك التياسير ××× استلهمك و استرشدك و استعينك

و ابدا بذكرك يا ولي التدابير ××× و اسجد رضاً لك و العطا في يدينك

و اخلاف ذا يا سامعي ما بها غير ××× علم ٍ يفيدك في بقايا سنينك

سطرتها بالنصح و الخير تسطير ×××و اعلنتها ما قلت بيني و بينك

ثنتين يعطنّك معزه و تقدير ×××دينك و فعل البر في والدينك

و ثنتين منهن يكثرن المخاسير ××× درب الضياع و صحبةٍ ما تعينك

و ثنتين عنهن ما تجوز المعاذير ××× سترك لاهل بيتك و مكسب يمينك

و ثنتين لو طال الزمن ما بهن خير ××× هرج القفا و مجاملة من يهينك

و ثنتين يطلقن الوجيه المسافير ××× ترديد ترحيبك و ضحكة جبينك

و ثنتين يسون التعب و المشاوير ××× مواصل ارحامك و فزعة قرينك

و ثنتين نار و عار معنى و تفسير ××× ترضى الخنا و تخون مستامنينك

و ثنتين لا تقبل بهن الاشاوير ××× الجار و الصاحب ليا قال وينك

و ثنتين يشرن بالذهب و الدنانير ××× حشمة ابن عمك و نصرة عوينك

و ثنتين جنبهن و احذرك تحذير ××× فعلٍ يشنّع بك و هرجٍ يدينك