و شخصيه بارزه لها بصمات في الشعر الشعبي
هو الشاعر
عبدالله بن حمود بن سعد بن سبيل الباهلي…انتقلت اسرته مع بني عمهم آل عويويد وآل رشيد من مدينة المذنب إلى (الأثلة) وعمروها واستقروا بها ..
ومن بلدة (الأثلة) انتقل آل سعد بن سبيل إلى (نفي) وعمروه ، واستقروا فيه ، ومازالوا مقيمين فيه إلى هذا العهد .
وقد ولد شاعرنا – الشاعر -عبد الله بن حمود - في بلدة ( نفي ) … ونشأ فيها ......... وفيها توفي عام 1352 هـ …
وكان طويل القامة أبيض وسيما بهي الطلعة وكان هادئا حييا ، ونضم الشعر في وقت مبكر من شبابه وأحرز به شهرة واسعة .
وكانت بلدته بلدة زراعية ، وكان أكثر أهلها يعملون بالزراعة ، فامتهن الزراعة ، وعاش طيلة حياته فلاحا ليوفر لنفسه عيشا كريما وعلى الرغم من عمله في الزراعة فإنه عاش كفافا ، ومن شعره مايدل على أنه كان يستدين في زرعه في قوله يخاطب عامل الزرع ( سائق السواني) :
إصلف عليهن كلما اقبلت وأقفيت
الزرع يبغى الماء وراعيه مديون
ورغم ماتعرض له من اضطهاد وظروف قاسيه فإن شاعريته لم تتأثر بها
مع كونه عاش أميا .. حيث أننا نجد في شعره ثقافة إسلامية لا بأس بها
وقد عاش متزوجا ، وله بنون ، وكان لأسرته مكانة في مجتمعهم غير أنه لقي اضطهادا شديدا
في الفترة التي سبقت حكم الملك عبدالعزيز…
قال عنه – خالد الفرج – كان مضطهدا من آل رشيد….
وقد تعرض وهو في بلدته لطعنات بالرمح في كتفيه وعضديه – تسببت في شلل بعض أصابع يده اليمنى وشلل يده اليسرى ، وبقي بهذا الشلل في يديه إلى أن توفي………
ومنذ ذلك العهد أطيح بمكانته ومكانت أسرته في بلدتهم ، وابعدوا عن إمارتها إلى أن حكم – الملك عبد العزيز – رحمه الله
حيث وفد على - الملك عبد العزيز – في عام 1321هـ عندما أقام بالقرب من عنيزة بعد انتصاراته على سرية حسين بن جراد في فيضة
السر وسرية فهيد السبهان وسرية ماجد الحمود ، وكان هذا أول لقاء له بالملك عبد العزيز حيث أبدى له الملك عبد العزيز شيئا من الحفاوة وعينه بالسنة التي بعدها أميرا على بلدته ...... وبقي بها حتى توفى
وقيل بأن الملك عبد العزيز عينه بعد (يتمته الحربية) التي يقول فيها
قال من غنى وغرهد على روس العدام
وأونس البارد بكبده عقب لفح السموم
ياوجودي وجد من صام بأيام التمام
مشفي ٍ بالشرب والشرب من قبل معدوم
يالطيف الحال عقب السهر عيني تنام
بارحت ماعاد فيها بثار ولا هزوم
قال: خالد الفرج…أما أمارة الحضر في (نفي) لآل سبيل ، وأميرها (شاعرنا) منذ حكم الملك عبد العزيز –وإلى الآن هي في آل سبيل .
وكان الملك عبد العزيز – يبعث له رسائل كغيره من أمراء البلدان تتعلق بالجهاد وغيره من شئون الإدارة ...
وهذه الوثيقة من رسائل الملك عبد العزيز –إلى الأمير الشاعر عبد الله بن سبيل ... رحمهما الله تعالى
وهنا البعض من قصائده:
يوم الركايب عقبن خشم أبانات
ذكرت ملهوف الحشا من عنايه
ليته رديف لي على الهجن هيهات
إما معي ولا رديف اخويا يه
أخذت لي في ماضي العمر سجات
يوم الهوى قايم وأنا اتبع هوايه
يوم إن لي مع تلع الأرقاب صرفات
أبيع واشري بينهن بالسعايه
الليل نجدع به وعاعيد وأضوات
ولا خاشر الوعاد راع الضوايه
واليوم شبت وتبت عن كل مافات
وطويت عن كل الموارد رشايه
إلا إلى مرت خطات الخوندات
اللي جدايلها تعدى الحضايه
إتجازي الهراج بغضاي وسكات
ولا هيب تبدي له سريره وغايه
تصد عما قال من غير مجفاة
وتعرض بخد ن كن فيه المرايه
طرالي الهاجوس هاجوس الأفات
وعرض لي المبعد على كل رايه
ومن ان في قلبي جروح ن خفيات
وأنا خبر مابي سببها منايه
آية هوى ماهي بطب المداواة
أنا طبيب الروح مابي غوايه
ماهيب بدعه يلحق الرجل شرهات
ناس ٍ عدوا قدمي وناس ٍ ورايه
لولاي أوسع خاطري بالتنهات
وأبصر بحالي من خلاي بخلايه
لأغدي كما المذهب وارمّي بالأصوات
خبل على ماقال راع الروايه
بأهل الهوى من شارب الخمر شارات
وبهم من اللي يطرد الصيد شايه
شارات راع الخمر فاقه وسكرات
والصيد ولعه ماعلى الله كمايه
ولو اتمنى لي من المال غلات
وانفد الغله واحصل منايه
مير المقل ضعيف مافيه نوهات
وراع التمني مثل زراع طايه
*
*
*
وش خانة المقطان لو قيل محلاه
صيور ماجا بالليالي غدت به
يا من لقلب ٍ من شديد العرب باه
بوهة غرير ٍ بالمضامي رمت به
لا والله إلا صار للبدو نوناه
وثور عسام الجو مما عفت به
والبيت هدّن الخدم زين مبناه
طوّن ذراه وقينة الزمل جت به
وشالوا على اللي بالمبارك مثناه
ماحط فوق ظهورها زوعت به
مظهورهم كن الطماميع تشعاه
يتلي سلف خيال من قربت به
ياقرب مسراحه وما أبعد معشاه
له شدة ٍ راعي الغنم تشتمت يه
لو صوت الرجال ما تسمع نداه
من لجة المرحول مايلتفت به
مقطانهم أمست خلي ٍ ركاياه
تقنب سباعه والذواري بنت به
وردوا على عد ٍ حللهم بمنداه
لين إن كل ٍ من مديده لفت به
يوم اسخالو نوض برق ٍ بمنشاه
يذكر لهم من راح سيله نبت به
ياعيني اللي في نظرها مشقاه
تاصل إلى مشرافهم واشرفت به
والعين سبر القلب والرجل مغراه
والي ومر قلبي لرجلي مشتبه
رجلي على كثر التراديد مشهاه
مامورة ٍ والا إنها مستعت به
قلبي ربيعه جية البدو ومناه
ولا حسب البيعات وش صرفت به
العصر يوم ان القصر مالت إفيّاه
في سوقنا الثوب الحمر وقفت به
يجر ثوب البز وآعضم بلواه
لوكان قلبي ممحل ٍ ربعت به
ياتل قلبي تلة الغرب لرشاه
على زعاع ٍ حايل ٍ صدرت به
*
*
*
ياعين وين أحبابك اللي تودين
اللي إلى طاب الوطن ربعوا به
أهل البيوت اللي على الجو طوفين
عد ٍ خلا ماكنهم وقفوا به
منزالهم تذري عليه المعاطين
تذري عليه امن الذواري هبوبه
عهدي بهم باقي من السبع ثنتين
قبل الشاء والقيظ زل امحسوبه
قلت جهامتهم من الجو قسمين
الزمل حدر والظعن سندوا به
يبون مصفار ٍ من النير ويمين
الله لايجزي طروش ٍ حكبوه
قالوا من الوسمي نباته إلى الحين
ومن تالي الكنه تملت دعوبه
شيالة الكايد على العسر واللين
والى وطاهم موجب ٍ رحبوا به
زاد الصيف معهم بليا مواعين
وان شافو الضيف المطرق عدوا به
والى تريض يذبحون الخرافين
ومن زاد بيت الله تفرش عصوبه
والى عطوا يعطون روس البعارين
وان فات منهم شي ما حسبوابه
ماهم بربع بالمحاضر قصيين
لو الحصيل حمار تخاشروابه
يذبون مال فاختته الحوارين
يشدي تراطين الدول يوم جوبه
والى تعلوا فوق مثل الشياهين
صاروا علىبعض القبائل عقوبه
لا تلها الراكب غدا الحبل ثنوين
مثل المعشر راسها عند ثوبه
عقب النكايف كنهن السراجين
ماقيل يسعل قينها واضروا به
وإن قيل عند اقطيهم ياهل الدين
فالمرمس اللي من قديم ادعوابه
ردوا عليهم ردة تعجب العين
كل يبا النوماس قدم محبوبه
هذا طريح وذا شنيع االاكاوين
واللي تعديه السهوم ارجلوابه
ولحدودهم بمطرق الحد حامين
وقب تبدأ في براير كسوبه
كم عزلوا ذيدان بدوٍ عزين
لو مالهم سبارهم ورثعوا به
ولحقوا بعيدن المساريح عجلين
وقالوا لرعيان الأخيذ ابشروابه
وتوقفوا مثل المظاهير مرزين
بالماقف اللي بايعوا واشتروا به
*
*
*
لا تمحنون القلب يا عاذلينه
الأمر لله؛ والحكي مايثيبي
لاخِبِر عن باسه ولا عالمينه
يعلم به اللي للدعا يستجيبي
عامين أكنه؛يوم أنا مستهينه
ولاودي أبدي للعرب ويش غيبي
واليوم ؛ يوم إنه تبيح كنينه
فأنا محب ووجعتي من حبيبي
قالوا مرض هاتوا طبيب المدينه
قلت الشفا بشفا طبيب قريبي
لعقة عسل بين الزرار زجبينه
وحرف القران إلى تلاه الخطيبي
إن كان هو يرحم؛ والإسلم دينه
وله في نهار البعث حظ ونصيبي
يرش قلبي قبل ذوبه بحينه
عن ميتتي من سبته؛ وش يبي بي
ماهوب يرحم لارحم مبغضينه
كيه صبر ياربي إنك حسيبي
ماهو نصف كي الضنين لضنينه
بالماقع اللي ماكواه الطبيبي
عرقى على كبدي وسيمة مزينه
وأركى على قلبي ثلاث المغيبي
كان الجروح قصاص: واشيب عينه
كويت قلبه كية ماتطيبي
لاعاد عرفٍ صار بيني وبينه
أبي المروفة منه وأذهب ذهيبي
أنا له ألجا من حدا والدينه
وأطوع من العبد المليك الأديبي
*
*
*
ياالله يااللي تسجد الناس لرضاه
ياوامر ٍ خلقه على حج بيته
تفرج لمن سده على الناس ما ابداه
راضي على مقسومك اللي عطيته
من شي يسل الحال والجسم يبراه
والناس مايشفونه ان ما شفيته
قلت آه واجرحاه من علتي آه
وان حملوني حمل غي ٍ قويته
قالو سفا بالحال ويش اللي اغواه
قلت آه ويش المنكر اللي وطيته
قالو جهلت وبان علمك لمنهاه
قلت اه علمي ياملا ماكميته
قالو طلبنا لك من الله معافاه
قلت آه وحدته وعفوه رجيته
قالو هله واحباب عينه نصحناه
قلت آه هذا واردٍ مابغيته
قالو ندور لك من البيض حلياه
قلت آه لو غيره بكفي رميته
قالو نشاش العُود مالك بلاماه
قلت آه عُود الموز بيدي لويته
قالو تزوج كود تدله وتنساه
قلت آه لو خذت اربع ٍ مانسيته
قالو من اقصى الناس وين انت وياه
قلت آه ما انسى يوم جاني وجيته
قالو نشوفه عند هذا وهذاه
قلت آه عمره ماعقب حجر بيته
قالو عليل وناقل ٍ داه برداه
قلت آه باقرابي وروحي فديته
قالو نشير ولا نفع ماحكيناه
قلت آه هراّج النمايم عصيته
قالو كثر شيبك وقلبك بعمياه
قلت آه لوقلبي غرير ٍ نهيته
مطاوع ٍ قلبي بعجفاه وقداه
والى عطى منهاج درب ٍ عطيته
ياناس خلو كل وادي ومجراه
قلتو كثير وقولكم ما لقيته
*
*
*
من روائع الشاعر/ عبد الله بن حمود بن سبيل رحمه الله
هذه القصيدة وهي موجهة
للشاعر والفارس الشيخ/ ذعار بن ربيعان من شيوخ الروقة من عتيبة :
ياذعار أنا قلبي هذا اليوم حوله
من العام ينقص مابقى إلا قليله
مثل الشعيب اللي تقافت محوله
مسنٍ جنابه يابسٍ حنظليله
ربيع قلبي جية البدو حوله
وتقيرب المقطان واحبني له
والسوق يعجبني إلى شفت ضوله
مثل النظيم المختلف عن مثيله
ذولا لهم حاجة وذولا بدوا له
يلهون راعي الواردة عن قبيله
وش خانة المقطان في كل جوله
حز الربيع إلى تزايد نزيله
ربيعهم قول العسوس ارحلوا له
عشب جديد ولابعد جف سيله
والصبح سمحين الوجيه احقلوا له
وعطّ السلف واستجنبوا كل اصيله
وكلٍّ لأهل بيته ينوخ ذلوله
ونوّخ خفيف الزمل وأقبل ثقيله
والبيت يبنى فارقه كبر زوله
لابد شرّاب الحشايش يجي له
في روضةٍ صكت عليها نزوله
والفقع قدم البيت ما ينعني له
تلوة نهار وكلّهم سيروا له
والخيل من تاعي لها ترعوي له
ماقيل يارعي الحصان اقهروا له
باطرته النعمة مديمٍ صهيله
وباغٍ إلى ماوقف العلم طوله
وتنافضت بين العميل وعميله
نيه على اطراف العرب واجمعوا له
نمرا تصهرج مثل نو الرفيله
والسبر روّح وردها في حلوله
ودرهم عليه الشيخ واشتال شيله
وشافوا عياله يوم هم قربوا له
صفرا تكف الخيل عن كل عيله
قالوا مطالع قال الآخر يقوله
وتعايلت قدام يومي شليله
وفاضوا على طرشٍ وساعٍ خلوله
من دنة الغارة تزايد جفيله
حوّوا ودوّوا بأوله واقهروا له
ماعنده إلا من يحلب بصميله
يوم اوسعوا لحق الطلب وارجحوا له
كل أبلج يأخذ عليهم دبيله
كم مايقٍ برماحهم سبقوا له
مطغيته الدنيا يحسبه طويله
وهود وعود كاثراتٍ عذوله
كلٍّ بقلبه واهجٍ من غليله
يمشون مشي اللي ثقال حموله
زمل من الوزمة رخيٍّ لكيله
يتلون شيخٍ ماضياتٍ فعوله
يسري وغب سراه مايندري له
*
*
*
ولم تخلوا روائع ابن سبيّل من الحكم التي راحت أمثالاً بين الناس كقوله:
لا تأخذ الدنيا خراصٍ وهقوات
يقطعك من شيل الصميل البرادي
لك شوفةٍ وحده وللناس شوفات
ولا وادي(ن) سيله يحدر لوادي
*
*
*
وقوله أيضاً في البدو حين وجد مكانهم خالياً بعد رحيلهم:
يا عين وين أحبابك اللي تودين
اللي ليا جوا بالوطن ربعوا به
أهل البيوت اللي على الجو طوفين
عدٍ خلا مكانهم وقفوا به
منزالهم تذري عليه المعاطين
تذري عليه من الذواري هبوبه
قلَّت جهامتهم مع الجو قسمين
الزمل حدر والضغن سندوا به
*
*
*
يالله يا عالم جميع الغيوبي
ياللي إلى ضاقت علي الناس نادوه
أشكي عليك البدو عوج الدروبي
اللي إلى هموا لهم مربع جوه
البدو هم وظعونهم هبلوا بي
هني قلب لا عرفهم ولا جوه
شدوا وخلوني على الدار اهوبي
مثل البعير اللي عن السرح ردوه
شدوا ومدوا بالغزال العجوبي
ياليتهم من جملة الحضر خلوه
مركوبه الاشقح عريض الجنوبي
دمث المناكب للمحاويل عفوه