الشاعر راشد ابن الذيب
هيض ابن الذيب من هاجوس باله
*************** كلمةً يلعبها والبال زيني
هيضه يومه طراله ماطراله
************** من هواجيسً تشيب المرضعيني
غرني بعض الرجال بكثر ماله
************** مادرى ان الموت في حبل الوتيني
كيف ينفعني وابا الفلات خاله
************** مايقوم البيت دام الساس طيني
ناس وين اللي عوايده الشكاله
************** مثل ابن ظافر حمد ذرب اليميني
الثناء والجود دايم في خياله
************** علمه ظافر اسلوم الطيبيني
جوُد العليا وقبضها اعياله(او اعواله)
************** وادركو من علمته دنيا وديني
واهني من باع حظه واشتراله
************** سار في درب النبي واخزى اللعيني
موقفه ماكل رجالً يناله
************** من بغى ممشاه يقعد مرتيني
وكم ذبح من حايلً من حر ماله
************** وعادته لطمة اخشوم العايليني
حالفً مااخذ على الطرقي ارياله
************** وبالثلاث محرُم انها ماتجيني
لالقيت اللي على الرسته الحاله
************** يلتفت ويقول وين المستحيني
ياقف الموتر حيا وابغي الجماله
************** يوم ولد اللاش وجهه مايليني
الطمع في كروة الرجلي رزاله
************** خصبه وان جاء مجال الغانميني
والردي في حالة ماهي بحاله
************** ياعوينه من كلام الطيبيني
الردي كوبان مايذكر مجاله
************** مايعد اللاش مقصور اليميني
اركبه لعيون من زين دلاله
************* ماتحاكو في قفاه الرامسيني
مابغا غيري وانا ماابغا بداله
************* قاعدً لي في الرجاء مدة اسنيني
الولد ان طاب قالو من خواله
************* وبالخوال يسال قبل الوالديني
واشرب الفنجال واكب البياله
************* تابعً سلمي اسلوم الاوليني
وماقعدنا في العمل نبغي الرزاله
************* ناخذ العليا طريق الفايزيني