[c]شـــــبيه الــريــح [/c]
[c]
شبية الريح
وش باقي من الآلام والتجريح
وش باقي من الأحلام
وش باقي من الأوهام
غير إني .. ألاقي في هجيرك فيّ
ألاقي في ظلامك ضيّ
وأوقد شمعتي في الريح
شبية الريح
إذا تسمح بغيب شوي
ابجمع همي الباقي
وأدفن صبري الذابل في أوراقي
و برجع لك إذا باقي بنفسك شي
شبية الريح
أنا مقدر أكدر صفوك العاصف
شبية الريح
أنا من لي سوى إحساسك الجارف
بقايا زيف أشواقي
سما أمطار أحداقي
شبية الريح وش باقي
أبي أعرف
متى تسكن رياحك
وأبي أعرف
غرورك هو متى يطلق سراحك
وأبي أعرف
متى تعصف
متى تعطف
متى تنزف جراحك
وأبي أعرف
إذا باقي في بحرك موج ..
أكسّر فيه مجدافي
وأبي أعرف
إذا باقي في همّـك هم ..
ماشالته أكتافي
وأبي أعرف
إذا باقي في هالدنيا حزن
مامرني واستوطن أطرافي
وابي أعرف
إذا باقي من المعجز في هالدنيا
سوى العنقاء
والا الغول
والا خلك الوافي
بقايا زيف أشواقي
سما أمطار أحداقي
شبية الريح وش باقي ؟!
سنيني يم
وقلبي المركب المتعب
وإنت الريح
مجاديفي عذاب وهم
وزادي الوجد والتبريح
وصبري صبر بحّارة
بغوا في اليم محّارة
غشاهم موج كان من الغضب أغضب
وكانوا للهلاك أقرب
لولا كثروا التسبيح
شبية الريح
حبيبي الأصدق الأكذب
عجزت أوصل شواطي طبعك الأعذب
تعبت أنطر في وسط العاصفة
قلب وشعور وعاطفة
تعبت أجمع ألم كل الموادع
في المواني وأحضن أطيافك
تعبت السهد في ليل الشوارع
والثواني تنطر انصافك
تعبت الظلم واجحافك
شبية الريح
أنا ودي أكدر صفوك العاصف
شبية الريح
أنا كني نسيت إحساسك الجارف
بقايا زيف أشواقي
سما أمطار أحداقي
شبية الريح
كيف أسألك : وش باقي ؟
وأنا الباقي من إحساسي
ذرته الريح
[/c]