[align=center] السلام عليكم بدايةً كانت الرحلة يوم السبت بتاريخ 23/06/2007 الاقلاع الساعة 10.50 صباحا... على طائرة الخطوط السعودية بوينج 777 ، انا وزوجتي الغالية ام عبدالاله الوجهات : فيينا - زيلامسي - ميونخ أبدأ بهذي المفاجأة يوم رحت اقص البوردنق وادخل الشنقط قالي الموظف: رح لآخر كاونتر وخذ الشهادة ؟؟؟ قلت: شهادة !!!..... شهادة ايش؟؟ ،،،، قال رح وتشوف .... يوم رحت الا موظف ثاني قالي طالع على فيينا .. قلت: ان شاء الله ... قال عطني البوردنق . قلت: سم... بعد شوي عطاني هذي الشهادة طبعا جاني شعور غريب اكيد انكم حسيتو فيه المهم دخلنا ورحنا للبوابة رقم ... وكالعادة لازم تأخير ساعة واقلعنا الساعة 12.00... بس يازين طياراتنا اقل حاجة يكفيك دعاء السفر .... استغرقت الرحلة 4 ساعات و45دقيقة على ما اعتقد.. ويوم وصلنا مطار فيينا كانت المفاجأة استقبلونا بالورود والشوكولاتة عشانها اول رحلة بين البلدين... ونفس الشعور جاني انا وام عبدالاله ... بس القهر مع الخبصة ما صورت مطار فيينا ... الغريبة انهم مافتشو الشناط ولا فتشونا حنا بعد علطول ختمنا الجوزات واخذنا الشناط وسيده على صالة الاستقبال ومن هناك اخذنا تاكسي الى فندق المريديان ب 32.5 يورو من مكتب التكاسي ... على فكرة في مكتبين اعتقد واحد احمر والثاني اخضر بس مافي فرق الا اللون ... فيينا من المطار الى فيينا تقريبا 20 دقيقة ... ويوم وصلنا الى فندق الميريديان الرائع لقينا واحد مصري اسمه سامح وهو اللي يشيل الشنط شوفوه في الصورة ودخلنا الفندق وكان اللوبي بهذا الشكل طبعا سوينا التشيك ان وطلعنا الى الغرفة رقم (((((((ملاحظة)))))))) ( الوقت اللي في الصور على الرياض نسيت اعدلة يعني في فيينا 6:28) وكانت الغرفة حلوووووووة مرة .. على فكرة الغرفة كانت ديلوكس وهذي صور لها وهذة صور للميني بار ودورة المياه ( اعزكم الله ) احلى شي في غرف الديلوكس انو النت مجانا والميني بار برضو مجانا ويعبونه لك في اي وقت .... المهم بعد ما ارحتنا شوي نزلنا نتمشى ورحنا للكارتنر وهذي صورة لمدخل الكارتنر من جهة الاوبرا للي ساكن في المريديان وساخير وبريستول وجراند وهذي صورة للمقاهي وسط الكارتنر وهذي صورة لساحة ستيفنز وصورة للكنيسة ( أسأل الله الثبات على الدين ) وعربات الخيول ولما تكمل مشي من ورا الكنيسة وتجي الخيول على يمينك في شارع للسيارات رايح بس .. مو رايح جاي هذا الشارع ينتهي الى شارع رئيسي على نهر الدانوب فيه بعض المطاعم والمحلات وفيه مطعم للبيتزا اكلنا فيه حلو وجلساته حلوة وقطعة البيتزا مثلثة بس اكبر بشوي من اللي عندنا وسعرها 2.5 يورو والكولا عادة سهرها 2 يورو اكبر بشوى من الكولا ام ريال حقتنا وهذي صورت المطعم وبعدين جلسنا في احد المقاهي وأخذنا لاتيه الواحد 3.5 يورو ... وبعهدها رحنا لحديقة ستاد بارك اللي مقابل الماريوت وهذي صور منها ... وهذي صورة من داخل الحديقة لفندق الأنتر وبعد الحديقة قالت لي ام عبدالاله وش رايك نرجع الفندق انا مدروخة من بعد السفر ... وبكذا انتهى اليوم الاول من فيينا ... انا متأكد اني نسيت بعض المعلومات بسبب الحوسه اللي انا فيها لكن ان شاء الله اذا ذكرت شي بقوله.. والمرة الجاية راح أسرد باقي رحلة فيينا في رد واحد ... لاني ودي اعطي ( حبيبتي زيلامسي ) حقها ... لان زيلامسي هي رحلتي الحقيقية وصورها كثيييييييييييرة والحكي عنها راح يطووووول ... ان شاء الله قدرت ارضيكم بتقريري المتواضع وسامحوني عالتقصير اوعدكم ان شاء الله اني اكمل بأسرع وقت .... وانا جاهز للأسئلة تحياتي لكم ابو عبدالاله[/align]