صدر الحزين يطاوع الضيق..ويضيق
من كل صوب..وتصبح العين ديمـه
ينزل مطر .. و يلوح براق . و تفيـق
كل الجروح .. المبطيـات .. القديمـه
و أنا .. على الدنيـا قليـل التوافيـق
ما غيـر أساوقهـا بـراي و عزيمـه
يا فوح قلبـي مثـل فـوح الاباريـق
عليك ياللـي لـك عروقـي محيمـه
أقبلت لي و الحب .. حـظ و توافيـق
و أقفيت عنـي .. و النتايـج وخيمـه
علقت نفسـك فـي زوايـا المعاليـق
و حطيت لك بين الحنايـا .. وسيمـه
و أصبحت عندي فوق كل المخاليـق
تخطي و لا لك غيـر قدر و حشيمـه
و انا و ربـي مـا نقضـت المواثيـق
لا زلت أشوفك راس مـال و غنيمـه
دونك سحاب الدمع و مشارق الريـق
و عقبك ضياع و جرح قلب وهزيمـه
فأن بعتني فالسـوق بيـع الصناديـق
عـز الله انـك بعتنـي دون قيـمـه
ليتك تشـوف ابـواب قلبـي مغاليـق
ما هيب لا و الله .. و عـادة حـليمـه
ما همني و النـاس جمـع و تفاريـق
ما دمت منتـب فيـه روحـي يتيمـه
{يا صاحبـي تبكـي عليـك الطواريـق
جزل البيوت .. الفـاردات .. العديمـه******
أرحل .. و طيبك فوق روس الشواهيق
لا تلتفـت لـي يـا قـوي الشـكيمـه
و أنا على خبـرك وريـث المطاليـق
راعي مواجيب و شجاعـه و شـيمـه
مثل الجبل و أقرب مثل عندك..طويق
شامخ .. لو ان الريح تنحت صـميمـه
يالله عسـى فالـك معـزه و توفيـق
ياللي جعلت أهداف عمـري عظيمـه
عقبك لي الله ثـم شمـس المشـاريق
و الشرقي و هبّـة هـواه و نسـيمـه
و الشوق و هموم الجـروح المفاتيـق
و البرد و الحزن و شـوارع مغيمه
يالغالـي اللـي كنـك بقلبـي اتويـق
جرحك كريـم .. و ذكرياتـك كريمـه
أنت و انا .. نشبه حضارات الأغريـق
القوم راحـوا .. و الحضـاره مقيـمه