خــذها نـصـيـحـة
المشكله لاصرت طيب مع الناس
ثم يحسبون الطيب خوف ومذله
يبدا يضيع الحق بيدين الانجاس
تسكن خفوقك الف مليون عله
ثم يلعب الشيطان في فكر واحساس
ناوي المضره هي جزا كل زله
واليا نويت الشر مع قوة الباس
خيري ينادي خله اليوم خله
غبنه وحرقه ساكنه بين الانفاس
طالبك ربي صبري يبقى محله
ويااللي سقاني بالخطا مر ذا الكاس
احذر خطاك اليوم ترجع تعله
ترا الشديد بحكمته يملك الفاس
رقاب الفاسقه منوةٍ له
وانته ضعيفٍ تذبحك قوة عطاس
سيفك لسانك يوم سيفي اسله
اركد تمتع في صفا كل نساس
خلك عزيزٍ قبل تاجك اشله
اللي من اول ماخبرته على الراس
تاجك رخيص ودرب عمك تدله
خذها نصيحه قدرها مثل الالماس
اللي يقدر قده واعترف له
تملك رجالٍ طيبها خير نوماس
اكبر شرف من ياخذك صاحبٍ له
تكسب لك النوماس تضرب لك اجراس
شانك رفيع وعزتك خير مله
وان كان ودك تاخذ الكبر لك ساس
لابد لك في يوم تزهق تمله
تبقى وحيد وحالتك دوم محتاس
والدمع في عينك تضيق وتهله
عطيتك الثنتين مالك معي ياس
بيدك تدل الدرب ولا تضله