[أسد نجد]

هذه قصيده قالها الشاعر قبل 51 عام على لسان جدته فرحا بعودة إبنها من أبها والذي يكون خال شاعرنا
1381/3/8 هـ


يا مرحبا بك عد ماهل وأمطر ... وبل الحيا وعداد ما طاير ناح

على غصون من ثمرها تهصر ... الخوخ والرمان وغصون تفاح

وعداد ما صاح اليتيم وتعبر ... وعداد ما هبت عواصيف الأرياح

وعداد ما هاض المتيم وسطر ... في اللي لها وجهن كما البدر وضاح

زين المثايل يوم دمعه تحدر ... يشبه غزير الدمع في جال مصفاح

ترحيبة من قلبي اللي تفطر ... وأنا أتحرا لك صباح ومرواح

يا عين لا تبكين جانا الغظنفر ... دمع الفرح هليه من عقب الأتراح

مشكور يا رب على الخير يشكر ... ما هبت الشرقي وما بارق لاح

نشكرك يا ربي على الخير والشر ... والشكر للتوفيق يا رب مفتاح

لازم ترى سود الليالي تغير ... والقلب عقب الهم والغم يرتاح

يالله عسى رزقه كثير يذكر ... وعسى زمانه دايم كله أفراح

وصلوا على سيد الملا عد ما أزهر ... الورد والياسمين وعداد ما فاح