[أسد نجد]

الـسـروال

يوم جمعه وماعندي دوام وعزوبي, ويوم الجمعه عندي هو يوم النظافه
قمت الصبح بدري انظف الشقه الله واكبر عاد يالشقه ماغير غريفه وبلكونه وفي الدور الثالث
وغسلت المواعين ( كلها صحنين ) وغسلت ثوبي وسروال السنه وانشرهم على حبل في البلكونه

وانا احط راسي اخذ لي غفوه قبل صلاه الجمعه
قمت استعد للصلاه واكوي شماغي وافتح البلكونه ابي اجيب الثوب من على حبل الغسيل اكويه
لقيت الثوب والسروال مالقيته هقوتي انه طار مع الهوا ويتكدر خاطري
شي صعب انك تفقد غالي وعزيز عليك وخاصه اذا كان سروال لك معه عشره وكاتم سرك
وسروالي اللي طاح غالي عندي بالحيل له معي يجي فوق العشرة اشهر سروال ابو بطه الأصلي
واناظر مع البلكونه مادري وين طاح هو طاح في حوش بيت بن طخيس ولا في حوش بيت بن قعيس
المشكله هالحين ماعندي سروال سنه غيره وعندي سروال اخر طويل سروال بجامه اللي انا لابسه
ولونه بني غامق على اخضر و شاريه من العام والصراحه كان سروال لونه ابيض عادي
بس يوم تغير لونه غيرت اسمه لسروال بجامة
وانا البس ثوبي فوق سروال البجامه وانا انزل واطق الباب على بن طخيس واعلمه ويدور وماحصله على كلامه
وادرعم على بيت بن قعيس واسأله ويدور وماحصله
انا بصراحه شاك ان واحد من هالشيبان طامع بالسروال اكيد ينطمع فيه سروال ابوبطه ومغسول
واجلس في راس الشارع اراقبهم واشوف بن طخيس معه العصا رايح المسجد
وانا اللي امشي وراه وهو يدخل المسجد ونصلي وعقب الصلاة يقوم ابن طخيس ويكبر يتسنن
وانا اوقف وراه يوم سجد بن طخيس وانا انزل راسي في الأرض اويق من حدر ثوبه ابي اشوف سرواله هو سروالي
واشوف خيط يتدودل من حدر ثوبه وانا اللي اسحب الخيط الا يوم انقطع في يدي وخفت انه يسلم ويشوف الخيط في يدي
ثّمن وش يفكني من بن طخيس والتفت يمين ويسار ماحد حولي واشوف بن حويل العميان جالس يسبح ويهلل وانا اللي احط الخيط فوق راسه
ويسلم بن طخيس يوم وقف وهو اللي ينصل سرواله اثر سرواله من نوع اللي يربط بالخيط
وهو يتلفت ويشوف الخيط فوق راسك يابن حويل ويطمر وياخذ خيطه من فوق راس بن حويل وهو اللي يقمع بن حويل على راسه بالعصى
ويدخل يده من حدر ثوبه ويربط سرواله ويقعد الشويب بن حويل يتخبط بيده لايشوف ولايدري وش السالفه
وانا اتسنن واطلع من المسجد وفي بالي هالحين بن قعيس واشوفه يمشي قدامي
و بن قعيس كل جمعه امتعود يسير على بنته متزوجه ولد عمها وساكنين في الدور الثاني في العماره اللي انا ساكنها
وانا اللي اسبقه واجلس حدر الدرجه ويدخل بن قعيس مع باب العماره وهو اللي يطلع على الدرجه ماسكن الدرابزين
وانا تحت اويق من حدر ثوبه ابي اشوف هو لابس سروالي واناظر وافرك عيوني وش اشوف بن قعيس ماعليه سروال لابس وزار
وانا اطلع الغرفه واسبقه وانا اسلم عليه كيف حالك يابو وزره الله يستر عليك
وانا ادخل شقتي وبالي مشغول مع السروال مادري وش وضعه بعدي
ماخذيت الا جرس باب شقتي يرن !!
قلت : من عند الباب ؟
قال : افتح الباب ياولدي انا ابن قعيس !!
قلت : ادخل من حدر الباب ههههههه الله يستر عليك
وانا افتح الباب واقلطه
وعيا يدخل ابركها من ساعه وقال انه عازمني على الشااليه حقه !!
قلت : وش شاليه هههههه ماتخلي سوالفك قل انك تبيني اوصلك زريبه الغنم حقتك
ابشر الله يستر عليك
ضحك بن قعيس وقال : وش عندك من اليوم وانت تقول لي الله يستر عليك
قلت : ايه من اللي شفته نصيحه مني لك يابن قعيس اذا بغيت تطلع درج لاتطلع من جهه الدرابزين
خلك بعيد من جهه الجدار حتى ماحد يقول لك الله يستر عليك غيري يابو وزره
وحنا نطلع من الشقه ونركب موتري
وصلنا شاليه بن قعيس اللي هي الزريبه ويقعد يعلف الغنم ويسقيها مويه ويناديني امسك له وحده من الغنم يبي يحلبها
واقمز وامسك له العنز وانا اناظره وهو يحلب وانا ارجف بن قعيس هو مع سحلته من اللي شفته !!!

!
!
!
!
!
!
!
!
!
!
!
!
!
!
!

شفت سروالي السّنه ملّبسه عنزه شمالة