اتمنى ان تحوز على اعحابكم
ولكم التحيه
مقبل عليك بحب واشواق وشجون
وبداخلي كل الأحاسيس تختال
مجنونه فيني أو انا فيك مجنون
ماعاد تفرق دامنا خبال فخبال
خل العذارى في هوانا يغنـّون
للصـّبح لين يجرنا الصبح موال
ودي تعرف الناس وشكثر مفتون
باللي هواها يشرح الصدر والحال
يابنت نجد ليتني كنت فرعون
واغرق في حبك وابقى للحب تمثال
ولا أكون اللي بغيتي لك يكون
مغرم متيم شاعر الحب خيّال
مهووس حبك؟ لا .. أنا فيك مسكون
جنـّيتك دايم معي فكل الاحوال
لو خيـّروني بينك ومال قارون
لاختارك انتي مابها شكّ وجدال
دامك تمونين .. ايعقب غيرك يمون
راسي لجل راسك من المتن ينشال
مانيب احبك رمش وخدود وعيون
حبيتك اخلاق وأحاسيس وافعال
فكري بناته من غلاتك يفزّون
ماهو بتواضع مير تقدير واجلال
اهيم واهديك بشعر حب موزون
واسعى مابين الحب والشعر رحال
اشباه ليلى خلف سورك يصفـّون
والقلب حارس والمعاليق الاقفال
انتي سحابة شوق تمطرني مزون
وان جفّ ماها قلت تكفيني ظلال
مالك لوا .. ما اخون والله ما اخون
عمرك سمعتي الطيش قد خان الاطفال؟؟
!!
ولا سمعتي ابليس وابليس ملعون
صام رمضان وزاده بست شوال ؟؟
ماخونك الا لا غدى القبح مزيون
ولا أشوف الذل بقلوب الأبطال
هذاك وقت ٍ كل شي ٍ به يهون
حتى المشاعر فيه بالصدر تغتال
وشكثر احبك؟؟ وشكثر؟؟ كثر هالكون؟
مدري ..!! ترى ما شفت للحب مثقال ..
يمكن احبك ألف ألفين مليون
ولا أحبــكـ موت وامـوت بالحــال
ماللمحبه عــد ّ أو طــعــم أو لــون
ولاهي قصايد لا سرى الليل تنقال
هي الجواب اللي به الناس يلقون
تفسير فورة دم حرمه ورجال
وانا اشهد ان دمـّي ودمـّك يفورون
فورة مشاعر جيل من عرض الاجيال
منتي((...........)) ... إنتي الــدرّ مكـنون
من وسط قاع البحر شفتك على الجال
وقلتي : أحبك طيـش واحبك جنون
ورديت : احبك لكن بعقـــل وخبـال
وسلامتكم
26-02-2008, 07:26 AM
العرض العادي
