في موضوعي انت المعني

[عبدالله الشويمان-الرعد]

السلام عليكم ورحمة الله وبركاته ..

هذا النص ليس جديدا وانما قلته العام الماضي بمناسبة اسبوع المرور..
اتمنى ان يلاقي نوع من الاعجاب.والقبول..

[poem=font="Arial,6,,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
يا سايق ودي تسمعنـي=والى سمعـت فطاوعنـي
في موضوعي انت المعني=ولا به شـك ولا جـدال
السـلامـه ودك فيـهـا=لكـن تكفـا لا تخطيهـا
في كـل دروبٍ تمشيهـا=إنتبـه يابـن الـحـلال
دامـك راكـب بالسيـاره=عاين للـدرب ومسـاره
تسلم من انواع اضـراره=ماهي صعبه يـا رجـال
ان صال بنغمـه جوالـك=خله لا يجي فـي بالـك
تراه من اقشـر حلالـك=جيد فـي تبذيـر المـال
ليته على المـال وبـس=يمكن باسبابـه ترفـس
ثمِّن توضع وسط الـرس=كله مـن سـو الافعـال
الله يحـمـاك ويفـكـك=من واحد مسرع يصكـك
وانت بطريقـك متلكـك=لاهـي اتكلـم بالجـوال
كانه كلامٍ فهـو اشـوى=لكـن الرسالـه اقــوى
خوفـي تحـدك للبلـوى=تكتبهـا ردن بالـحـال
تستقبل وترسـل نكتـه=واللي من حولك ما شفته
ما تسمح حتى في لفتـه=يميـنـك ولا شـمــال
لا تشغل غيرك بافعالـك=اللـي وراك ويبـرالـك
منتب بالسكـه بلحالـك=ولا بالصحـراء هـمـال
ومنتـب تـراك معـذور=ولاحدن بفعلـك مسـرور
ولو شافك رجل المـرور=يمكـن يربطـك بأغـلال
كانك هاوي قرق وجـازم=وقف جنب وقم بالـلازم
أكتب واحـزم بالمحـازم=وارسل لين ايطيب الفـال
هذي نصيحـه يالسايـق=خذها وبالك خلـه رايـق
لا تصير إلخلق الله عايق=وتحدحدهم علـى الجـال
واختم كلامـي وانهيـه=يا جعلـه كلـن راضيـه
مـن أولـه الـى تاليـه=حـقـق يالله الآمـــال
[/poem]
وسلامتكم
عبدالله الشويمان-الرعد

[برق الجنوب]

صح لسانك وعلا شانك

قصيدة رائعة .. وأسلوب رائع لجذب القارء لإكمال القصيدة

ألف شكر على هذا النص الجميل

تحياتي

[أبو حمـد]

وعليكم السلام ورحمة الله وبركاته ،،


صبحك الله بالخير أخوي أبو بدر ،،


وصح الله لسانك ،، لهذه القصيدة المعبرة ،، والتي تحمل معانى سامية ،، الا وهي النصح والإرشاد بأسلوب بديع آخاذ ،، والأمر الأخر مشاركة المجتمع في مناسباته ،،


ما أقول ،، غير بيض الله وجهك ،، وأمر ماهو مستغرب من قامة مثلك ،،


شكراً لك ،،

[عبدالله بن سعود]

الشاعر .... عبدالله الشويمان _ الرعد

نصيحة من القلب
ووصلت الى القلب

وباسلوب شعري جميل
وطرق جميبل

صح لسانك
ابا بدر

[عبدالله الشويمان-الرعد]

المشاركة الأصلية كتبت بواسطة برق الجنوب   صح لسانك وعلا شانك قصيدة رائعة .. وأسلوب رائع لجذب القارء لإكمال القصيدة ألف شكر على هذا النص الجميل تحياتي

صح بدنك اخوي برق الجنوب

واشكرك على الاطلاع

دمت بخير وصحه وسلامه

[أبوإبراهيم الشويعر]

[align=center]
نص رائع يزدهي سموًا ... ويفوح توجيهًا ونصحًا ...
بارك الله فيك شاعرنا المبدع عبدالله الشويمان .
[/align]

[ذياب العصيمي]

الشويمان الرعــــــد صح لسانك وماشاء الله عليك غطيت على بن فويز الشيباني

واصل وفقك الله..

[قلم رصـــاص]

وعليكم السلام و رحمة الله و بركاته ,,

ماشـاء الله

صح لسانك أخوي عبدالله

على القصيدة الجزله ولاهي غريبه منك ياشاعرنا المتميز

لاتحرمنـا من إبداعك ,, شكراً لك