النظافة النظافة النظافة :
كانت امــــي (احلى كلمها نطقها فمي) مبهذلتني يوم اني صغير بالترويش والنظافة وكانت تروشني (تسبحني) بصابون التايد بس وماتعترف بالشامبو ات ..
وكان صابون تايد هو الدواء للجروح من يوم ينجرح اصبعي والا رجلي بسرعة تجيب امي علبة التايد وتحطه على الجرح وتربطه بخرقة ….
حتى اسناني كانت امي تفركها بصابون تايد وانا احترق من حرارة التايد في ثمي ولساني وببرائة طفولية اقول لها : يمــه فيه معجون سنون ينظفون به الناس سنونهم.
تقول لي امي وهي تفرك سنوني بالتايد وبطرف اصبعها : ذاك حق الخكاريه ياوليدي شف سنونك بيضاء وش زينها تقل ورق A4 اللي مابعد طبعوا عليه شي < === احلى يمه تعرفين الاي فور …..
وفي صبحية من الصبحيات قاعدن مع امي توني جايبب تميس حار وهي تجهز الفطور ومعها مفك صلصة تفتح به علبة جبن كرافت قلت لها :: يمــه جارنا ابو مشعل بطنه يعوره وراح المستشفي ..
فعفطت امي قصيصة غطاء الجبن وبدت تقطع بها الجبن كرافت وهي تقول:: ايه ياوليدي قالت لي ام مشعل انه جايه ريح(ن في بطنه الله يكفي شرها ..
قلت وانا امعط قطعة خبز حارة واكلها : يمــه مهوب ريح طلع عنده الكلى تعبانه يقولون ..
اخذت امي علبة مربى الحبحب تفتحها بمفك الصلصة وقالت: طيب بيسون له عملية ..
قلت وانا افرش السماط واطلع الخبز من الكرتون : والله يمه يقولون انه تعبان ولازم يسوي غسيل كلى
رفعت بصرها الى السماء قائلة وهي تتنهد :: الحمدلله يوم انها صارت غسيل!!! ارخص مارخص ربي صابون التااااايد!!!!! هماها غسيل بس !!!!!!! وانا والله اقول انه ذا التايد دواء لكلش ( ورفعت يداها مبتهلة) :: يالله انك تدفع عنا البلى .
هذا ما اذكره من معاناة فترة طفولتي التى كانت كلها معقدة (كتعقد اسلاك كمبيوتر احدكم حين يريد ان يفككها ليصلح جهازه عند المحل اللى في الحوطة (زحمة زلا يعرفون)منيب ذاكر اسم المحل علشان مايزعل السلمان)
واللة الفضيحة
المرااااااااااهقة ::
كنت فاهم(ن المراااهقة هي ان الواحد يتعب ويرهق بسرعة اذا كان عمره خمسطعش سنة وحواليها ، حتى اذا قال لي ابوي نزل كيسة الرز من السيارة كنت اقول ميد ابوي : ما اقدر انزلها ماتدري اني مراااااهق واتعب بسرررررعة!!!!!
ويوم كبرت صرت اعتمد على نفسي بالترويش وبطلت اصلا من شي اسمه ترويش وصابون تايد وكرهت كل المنظفات وصرت اخيس واحد في العالم ..
بوادر الاشراف على العالم:
صارت غرفتي مخيسة ومروحة وهربت منها كل الحشرات ((صايرن مبيد حشري فتاك ))))
((وجتني فترة امسك دكة الصروال (الربدزة) من عند المغاط واحس بشي لين كنه قطنه وصرت اسمع صوت اذا رصيت عليه قلت لازم افصخ واشوف وش ذا ؟؟؟؟؟؟؟؟ وبعدين لقيت حبل اسود واسحبه طلع ذيل فار !!!!!!!! ويطلع لي فار؟؟
ويقعد الفار يصيح ويقول : اه اه اه باموت ياغويمض
قلت له وانا معصب : جعلك المووووت وش جايبك بدكة صروالي يافار قريح ….
أخذ الفار يتنفس الصعداء ((الصعداء = يعني كنه يتنفس وهو يصعد ويرقى درجة عمارة عشرة ادوار)) وقال : ياغويمض جيت ابلغك رسالة انك بتصير ازبط واسنع واحد بالعالم وانك بتحكمهم كل ابوهم !!!!!!!!! لكن انعمت عيوني من ريحتك ودخلت بدكة المغاط حق الصروال عشان تكمل معي وانحبست خخخخ .
وانا اللي اقعد افكر بكلام الفار هو معقول والا لا وقلت لنفسي ((ذا الفار الملعون خلاني افصخ الصروال واغيره وهو مابعد تقطع)) <<== يعني ماتغير الصراول الا لين يتقطع خخخخ .
الاختبارااااااات (ياعيال طفو التلفزون ورحوا ذاكرو) ::
كان عندنا اختبار انقليزي وبصراحة انا متعود اكتب قطعة التعبير على صراولي عشان اغش منها. وكان الصروال وصخ بزيادة له مدة طويلة ماغيرته ، المهم شافني الاستاد وانا رافعن الثوب واغش !!!!!!!!،
اخذوني عند المدير والوكيل واعطوني ترنق رياضة وقالو:: حط صروالك بالظرف هذا عشان يكون دليل اثبات مع محظر الغش اللي بتوقع عليه ، وافصخ صروالي واحطه بالظرف واعطيه المدير ويوم فتح المدير الظرف وهو اللي يدوخ !!!!!!!!! وينصرع الوكيل بعد !!!!!!!! وراعي الوايت حق شفط البيارات اللي بالشارع انصرع بعد !!!!!!!!!!!
…
تذكرت الفار وكلامه وانا اللي تنقز براسي فكره خطيرة والقط صروالي من الظرف وبسرعة طيراااان على البيت عند امي وطلبتها فلوس وقلت لها: انا الحين باملك العالم كله يمــــه ..
جتني امي ومعها طقم ذهب تعطيني اياه وقالت بصوت خافت يشوبه الحزن العميق : هذا ياوليدي الطقم عطانيه ابوك يوم عرسنا خذه بعه واملك على العالم ((ياحليلك يــمه تحسبني باعرس على العالم))
جيت ااخذ الطقم وانااااا فرحااااااااان مررررررره !!!!!!!
وما ادري الا وامي شالختن راسي بزاوية طقم الذهب وقالت وهي تصكر الطقم : وجع(ن يوجعك يالخاااايب حسبتك هالحين بتقعد على ركبتك وتبوس ايديني وتقول مستحيل تبيعي صيغتك ياماااماااا وتسوي زي المصاريااااا بالمسلسلات ، لكنك والله ماتستاهل من يعطيك وجه والا يجاملك ياغويمض الكلاب )))<<<== امي متأثرة بكريمة مختار .
واطلع للحوش حق البيت والقط اسطوانة الغاز واروح ابيعها بالحراج وطيران على سوق الحمام واشتري شروخ وصواريخ باتريوت وعلى قهوة ابو هيثم بالثمامة هناك واطلع صروال وفنيلية كنت لابسهن مابعد انغسلت واقطع بالسكين قطعه صغيره من الصروال وقطعة فنيلة ويوم تجتمعت طلعت مفاعلات قوية جدا حتى الخنافس اللي بالقهوة طلعت مسرعة نزوح وهجرة سكان جماعية . واحطها في بلاستيك واربطها بصواريخ باتريوت واكتب على الصاروخ وقع فوق البيت الابيض والامم المتحدة ويطير الصاروخ هنا ك وزززززززززززززز طااااااااع
خبر عاجل خبر عاجل:::
واقعد افرفر القنوات بالقهوة ويطلع خبر عاجل (( صاروخ محمل باسلحة نووية او جرثومية يسقط في نيو يورك والسكان يتناقزون من المدنية ويخلونها هذا واصبحت نيويورك عاصمة دمار ينعق فيها البوم وتنبح فيها الكلاب))) . ودلو الامريكان يروحون الكنائس ويدعون ويقنتون ويطلبون ماعند الله وتطقهم النفاضة وام الركب .
واعلن بوش استسلامه وصرح للاعلاميين قائلا : صقطت علينا صواريخ محملة بروائح الله لايوريكم بس ؟؟؟ مهيب نووية ولا جرثومية وعلى المسئول عن العميلة تقديم طلباته وانا والله مامنيش اقاوم ذا الخياس!!!!!!!.
وادق جوال على القنوات :: معكم غويمض انا المسئول عن العملية عطوني بوش اكلمه على القناة الاولى الحين <<< === ما اعرف غير قناتنا الاولى .
ويكلمني بوش: هلا ياطويل العمر امر انت وتدلل وش تبي ياغموض( يدلعني)
عدلت جلستي على المراكي وانا اكل فصفص مالح : وش أبي ؟؟؟ وش هقوتك يعني يابوش ؟ ابي براد شاهي !!!!!!
اشرت اليه بالسبابة ((سموها سبابه عشانها دايم تسب)) وقلت :: اسمع يابوش انا ابي اصير المشرف على العالم كل ابوه (بنز 561 ترى ابن ماضي والمتوكل على اللة مهوب احسن مني يوم تحطونهم مشرفين على منتديات سدير))
قال بوش : خلاص انت المشرف وانا مواطن عندك وتحت امرك بس عطنا كلمة للشعب وعطنا الدستور وانت الرئيس حق مجلس الامن الدولي .
كلمة الشعب :: ياشعب تروني انا المشرف على العالم كل ابوه ومانيب مهملكم تروني قررت أشيك على الرعية اول باول ، ومانيب مطول الكلمة عليكم ((أدري انكم تحترون الاخبار تنتهي عشان تشوفون المسلسل)) < == اعجبكم ….. هاه
الدستور ::: الله الله بالركادة والعلوم الزينة .((ورطت ماعرفت وش معنى الدرستور))
وانتم يابوش : ابيكم تحطون جمب مجلس الامن الدولي مقلط الامن الدولي لان مافيه مجلس الا وجمبه مقلط والا وش ظنك يعني ؟؟؟ نحط تباسي الرز بالمجلس والشغالات يرصون صحون السلطة والفاكهة قدام الرجاجيل …. !!!!! ((ومن زين طبايع ذا الشغالات اللي مايزين لهن مسح السراميك الا اذا صار وراها رجال ماشي في حاله))
امضيت العصر الذهبي في حياتي ، وانا بقهوة ابو هيثم متكي راسي على مركى ورجولي على مركى اكل فصفص واشرب ببسي ((لاني محترم ومااشرب شيشة في القهاوي <<< == والا في غير القهاوي تشرب ))) واحكم العالم وما احد يدري عن سلاح الدمار الشامل حقي
علشان كذا يابن ماضي افسح الطريق والا ارسلت لك العلوج يدمرونك انت ومنتداك تراي من تنظيم مقلط الكونجرس العربي
تايد تايد تايد :
بعدين فجاة اشتغلت طشاشات الموية اللي بالقهوة وريحتها صابون تايد وطحت مغمي علي من الريحة وعرفوا الامريكان اني ماتروشت من عشرين سنة (مافيه شي الا عرفوه ذا الامريكان نعنبو بليسهم يالله )..
ويمسكوني الامريكان ويلبسوني فنيلة برتقالية وامشي معتقل مع بوليس الـ FIB ومدنق راسي (كني لعــيبة النصر يوم يهزمهم الهلال بالبطولة العربية اللي هم نظموها )
تمت ,,,,,,,,,,, (تراي نصراوي بس قاهرتني الهزيمة)
اللة يعيني يبي يفتشوني العلوج كم مرة ويبي يفتشون جمهورية التويم الاشتراكية البعثية واخواني غميص واغيمص والغامض وكل الروائح الكريهة واسلحة النبابيط طقتها شموس سديرالحارقة
فوائد ::
الله الله في النظافة والعلوم الزينة
لاتدخلون قهوة ابو هيثم ترون ملابسي اللي فصختها خليتها هناك يوم لبست البدلة البرتقالية
لاحد يغش في الاختبارات عشانها على الابواب الحين (ابواب ولا درايش خخخخ)
31-05-2003, 11:29 PM
العرض العادي
