بسم الله الرحمن الرحيم
السلام عليكم ورحمة الله وبركاته
نقلت لكم سالفه وقصيده عساها تنال اعجابكم إن شاء الله
وهي منقوله من روايات ،، الراوية المحبوب // محمد الشرهان .
وانا نقلتها لكم كما رواها بـ اسلوبه الشيق والمثير .
يقول الشرهان :
[frame="7 80"]هاذي سالفةٍ لـ الشاعر // عبدالله بن علي بن دويرج .
وهو من شعراء السر من أهل بلدة جفن توفي عام 1356
هالشاعر يوم كان شباب كان يشتغل في النخيل وبعد ما كبر صار يشتغل في البناء والطين
هذا الشاعر عاش في منطقة ( السر )
و تزوج في أول شبابه وجاه ولد ولا قعد عنده ,
راح يشتغل في المنطقة الشرقية واستقر هناك ,
و بعد ذلك توفت حرمته ، و جلس هالرجال فتره ما عنده حرمه ولا احد ٍ يواليه
الى هاك الحرمة الصالحة الدينه اللي متوفي عنها رجلها
و تقدم لها عبدالله بن دويرج و خذها وهو على كبر
و يوم خذها ولاها حرمة ذربه وفيها دين وضفره بالحيل
وبعد فتره ..
رزقه الله هاك البنية من هالمره
وبدت البنية تكبر ودائماَ البنت لها حنان خاص من أبوها
والبنت دائماَ الطف واحنّ من الولد ،المهم كبرت البنت ,
الحاصل يالربع أن هالرجال في هالبيت عنده هالمره مدللته وماشاء الله عليها ضفره وسنعه
تسوي قرصان وجريش ، هالجريش اللي ما شاء الله
تقول كأنه (( دماغ جربوع )) .. عاد من فيكم شاف دماغ الجربوع !!!؟
هذولي الحريم الضفرات اللي يطبخن قبل كذا عاد وين تلقونهن ذا الحين
( ما عاد فيه إلا بنات يقولن برجر << هذي السنعه فيهم ، الله يخلف بس )
المهم يالربع ما لكم بالطويلة البنت الحين كبرت وصار عمرها 13 سنة
مربيتها أمها على الضفاره والذرابه صارت هي اللي تقابل أبوها إذا جاء وهي اللي تقهويه
و فيها جمال يهبل هاك المبسم اللي يالله تدخل معه العنبه !!!!
عاد كثرو الشباب اللي يتسنعون ويتميلحون عند أبوها
( حركاتكم يا الشباب اذا حطيتو عينكم على أحد )
اللي يسلم عليه في المسجد واللي يحب رأسه
واللي يقول : تأمر شي ياعم أنا ولدك اللي ما تعبت عليه
و يا كثر هاللي يحببون رأسه والله ياجبهته أنحفرت من التحبيب !!!!!؟
كل ٍ قام يتكلم ما شاء الله تبارك الله يابنت ٍ عند عبدالله بن دويرج
تقول : للقمر زيح وانا اجي مكانك .
المهم .. يالربع كبرت البنت وصار عمرها 16
وصارت هي اللي تقهوي أبوها و تطيبه اذا بغا يروح المسجد وتولم بشته
عاد صار أبوها معتمد عليها في كل شي ,
الحاصل يوم جاء يوم من الأيام الله لا يعيد الشر
ولاها أيام شتاء جاء هو بعد صلاة العشاء
ولا حرمته شابة ٍ الجمر وحاطه عليه مركب جنبه الدله وبريق الحليب
قالن : تبي نصب لك قهوة وإلا حليب قال اللي تبون ,
قامت الأم وصبت له حليب يوم رشف الحليب ..
قال : كأنه بارد قالت !!؟
قلت الحرمه : ابشر نسخنه هالحين .
قال الابو لـ بنته : قومي وأنا أبوك روحي جيبي لنا حطب
عويدات رمث ولا تجيبين طوال مره جيبي عويدات تدخل تحت المركب
قامت البنت وخذت السراج وراحت للحوش تبي تلقط حطب
و قامت تلقط عويدات على قول أبوها تدخل تحت المركب والى توها ملقطةٍ ثلاث أو أربع
وتلقى هاك العود طويل بالحيل جت تبي تكسره على ركبتها
وطق السراج وينجعف وينكب قازه ويطفي !!
قامت هي تلمس في الحطب يوم تلمست يا دافع البلاء وتقرصها حيه مع أصبعها
وتجي معوده و تصبر وتألم ماتبي تبين لابوها وأمها
ماتبي تزعجهم << ( والله لوها من بنات اليوم كان تفضح الدنيا بالسانها )
المهم راح أول الليل ولا يوم كاد عليها الوجع وقامت تقلب وتسدح مع الألم
وتفزع الأم ويحطون هاك التمرة وعجين تمر يبغونه يفيد
يوم .. يومين .. ويوم جاء نهار ثالث وهي توفى !! الله يرحمها .
ولا يوم أنحشت كبد الأبو وقعد أربعة أشهر مثل الجرح قاطب على صدره
كل ما ذكرها يتزفر هاك الزفرة الله يجيركم
... أن ناظر الباب هذا تذكرها يوم أنها واقفه عنده
... وتذكريومها تقلط له الغداء
... ويومها تقهويه
وتغورق عيونه من الدموع ، ويتهيض ويقول هالابيات ، وهي من قصيد الرثاء .[/frame]
....
[poem=font="Simplified Arabic,5,white,bold,normal" bkcolor="sienna" bkimage="" border="solid,4,white" type=1 line=0 align=center use=sp num="0,black"]
عفى الله عن عين ٍ حلى النوم جافيها = كراهــا قليل وذارف الدمـع محفيهــــا
إلى قلت : الا ياعيـن هيــدي و هـــــــودي = جرى دمعها الصافي وهلت عباريهــا
تبين فــروع الصبــح ما ذاقت الكــــرى = ولا لوم عين ٍ فارقت شوف غاليها !!
ولا زل يـــــوم أو ليـــــله ما تعبــــــرت = على النـــوح أعزيها ولاني بقاويهــــا
وأنا في زجا ، جزل العطـــا ، عالم الخفـــى = يلطف بحـــال ٍ خافي الهم باريهـــا
على نـــور عينـي لب قلبـــي ومهجتــــي = تحن الضمــــاير كل ما حلّ طاريهــــا
حنين الخلـــوج اللي عن الظــير فـــاختت = إلى غاب عنها ساعة ٍ ما يباريهـــا
وأنا كيف ما أبكي طفلة ٍ غضة الصبا = حورية ٍ سبحان رب ٍ مسويهـــا
نشت بالهـــدى والدين والحــــق والبهـــــا = و لــو طالت الأيــــام ما نيب ناسيهــــا
فيهــــا طــــبــوع ٍ كامـــلات حميــــده = حنون على الجيـــران و صار عانيهــا
عفيفــــة نظيفـــة جيب ما داست الخطـــــا = ولا هوجست بالمـذهب اللي يرديهــــا
حشـــــا ما بهـــا من خافــي العيــب ذارب = سـوى حشمــــة الوالد فهذا فهو فيهــــا !!
كمل عمرها ثنتـيــن مع عشــــر وأربـــــع = سـوى محترمهـا تسفهه لو يحاكيهـــــا
خذت هجنـــة ٍ فالبــيت عنــــدى قليــــله = أمانـــه و خذهـا الخيــر اللي عطانيهــا
فـــلا نيب جــــــزاع فـــــلا شك ولعـــــــه = ( أعرف الأمانــــة ما لها غير راعيهـــا )
فيا ســامــع دعـــــواي في مظلم الدجـــــى = تمحــــي خطاياهـــا وتثبت حسانيهــــا
وتجعــــل لهـا في مجنـــة الخلـــد منـــــزل = وتقطــف جنا جنـــات طيبة وتجنيهــــا
وتعـــــوضها فيمـــــا قصــــر من شبابهــــا =برضــاك ياخــلاقهـــا وأنت واليهــــــا
ألهـــــــي ودودي دعـــوتـــي تستجيبهـــــا = على النـــفس كلها من غــلاها نبديهــــا
ألا وتـكــــدر خاطــــــري من فــراقهــــــا = ولــــو لا غــلاها ما تكلفــت راثيهــــــا
سمية دمــع المــــزن في غبــــــة البحـــــر= سوى البنــك ما يدرك ثمنهـا ويشريهـــا (1)
صلــــو على من لافتـــرى سيد الـــــــورى =وأن مابــي إلايــــوم يطــــري سميهـــــا
صلـــو على من لافتــــرى سيد الـــــــورى= عدد ما جرى من رايح المزن واديهـــــا[/poem]
....
اللهم صلي وسلم وبارك على عبدك ونبيك محمد
1) يقول الشاعر هنا ..
[poem=font="Simplified Arabic,5,darkred,bold,normal" bkcolor="transparent" bkimage="" border="double,4,black" type=1 line=0 align=center use=ex num="0,black"]
سمية دمــع المــــزن في غبــــــة البحـــــر= سوى البنــك ما يدرك ثمنهـا ويشريهـــا[/poem]
# وهذا هو اسم البنت ، رحمها الله
وقد قاله الشاعر بـ طريقة غير مباشرة ،