نسيتي

[عنقود]

نسيتي المزح بالقبة = ونسيتي لعبنا الطبة

نسيتي كشختي دايم = بثوب دوبلين خـبة

نسيتي غترة الململ = تغطيني تقل جبة

نسيتي الركض بالطاية = لاصار بدارنا شبة

لاجابوا فضلة القرصان = نتسابق ودنا نلبه

نسيتي إزعاجنا لمك = وهي بالحوش منكبة

نسيتي معلف ام العوف = تظفينه وانا اكبه

نسيتي ثوبك الترتر = وغيظك لأنقطع حبه

نسيتي بسطة عزيز = ايلاجاء العصر بالقبه

نسيتي خرطه الماصل = يجيب الحكي من عبه

نسيتي القربة الشنه = وماها البارد نقبه

نسيتي قولك معصقل = وانا اعيرك يالدبه

نسيتي نعالنا التليك = هي الموتر ونلعب به

نسيتي موعد الحنا = ايلا جاء صابكن خبه

نسيتي طيحتك بالليل = وهي ظلماء وانا السبه

نسيتي اكلنا الهبود = نتناقر والسبب حبه

وامك لاتهاوشنا = وتحط بعيوننا شبه

نسيتي ثوبك الكرته = ننكت فية ونشبه

نسيتي كحة المذن = قبل يذن يبي ينبه

نسيتي تريكنا المصنق = نغسلة قبل ما نشبه

وندعى ربنا يكود العنز = تجيب وليد نلعب به

نسيتي كيف اوصف = لك زمان يعلمه ربه

حلو رغم الفقر بالحيل = زمان راح ونحبه

نسيتي ليه ما ادري = دخلتي الوقت من جبه

لك الفديو لك التلفاز = لك المكياج ما احبه

لك الدنيا بزخارفها = وعطيني حظار مع قربه

ومعهن مسفع بالي = وثوب اللس والطبه

هذه قصيدة للشاعر احمد الناصر الشايع

[نهآية حلم]

صح لسآن قآيلهآ
وتسلم اخوي على النقل

[خفوق إنسانة]

صح لسانه ..

تسلم ع الإختيار

لاتحرمنا جديدك .. بإنتظارك ..

[نورالشمس]

سلام يا عنقود
نعم كنت احب ان اقول صح لسانك كما قالوا
لكن هل تستغربين اذا قلت لك لم افهم اي شيء؟؟
واذا لم اكن بنت هذه اللهجه هل لي نصيب بفهمها ؟؟؟
عفوا لا اقصد سوى ان افهم وليس الا
مشكوره جدا

[عبدالرحمن الفهد]

حياك الله يا العنقود
طليت علينا وذكرتنا بأيام اول ايام البعة والدنان والمصاقيل والطزق واعظيم لاح وحققونا بققونايازين ذيك الايام يوم البنيات يركضن وهن لابسات المخاطيم والحجول ويوم العيد ما تشم الا ريحة الورد الي ممشوط به الشعر والهامه فوق الراس تلمع وحبة العيد مابه منه
الله يطول بعمرك وتسولفهن على عيال اعيالك .

[عنقود]

وسام البراءة

خفوق أنسانة

نور الشمس

عبدالرحمن الفهد

أشكر لكم مروركم

ويا زين سواليفك
يا عبدالرحمن