~ قصه لوراءالكواليس + بعض الاعضاء~

[عاشقة سديـــر]

اهلين ...

كتبت لكم قصه متواضعه .....وهي من بطولة بعض الاعضاء <<استوحيت الفكره من السبعين

ماراح اطول عليكم ......وأرجوا ان تتحملوا طول القصه <<لاني حطيتها مره وحده بدون تقسيم ..

.................................................. ..................
اليوم هو يوم تخريج دفعة (1424ه ) من طلاب جامعة الملك سعود ...

ومن بين الخريجين ....ترون ابتسامه ترتسم على شفاه احدهم ...ابتسامه تدل على رضاء صاحبها على

تقديره ((الامتياز )) ومعدله المرتفع ...

- اخيرا خلصت من دراسة الطب ...الحمدلله ..قدرت اثبت جدارتي ومحبتي لهذا التخصص رغم صعوبته ..
قدرت اجيب معدل مرتفع ....الحين ...احس الدنيا منوره قدامي ...

- وراءالكواليس ...ألف مبرووووك ..وش هالحركات ..معدلك رائع ..ماشاءالله عليك ..
- الله يبارك فيك ...وتسلم .

- isz ..قم الله يهديك ...شف ولدك وراءالكواليس ينتظرك ..مسكين خليته يتأخر ...يالله قم تكفى .

- وش فيتس يالصحراويه ...خلاص قمت روحي جهزي الفطور لين أجي ..

- طيب ..بس انهج (اسرع ) ترى الولد قايم من صباح الله وقاعد يحتريك تروح معه تدورون وظيفه له ..

* ذهبت الصحراويه ..وجهزت الافطار ...ثم عادت للغرفه ..

- isz ... إلا الحين ماقمت !! ..قم جعل القوام اللي تقرص العدو ...يوم انك تحب النوم وراك تقول للولد لا تروح الا وانا معك ..

- خلاص ...قمت ..قمت .....ماتخلون احد ينام ويرتاح ...قبلكم تقومون في الواحد لاشفتوه نايم ...

- هاه يا يبه ...وش رايك ...وين نروح ..

- شف يا ولدي ...خلنا نروح لمستشفى سنع وقريب ....عشان مايصير المشوار بعيد عليك كل ما بغيت تداوم ..

- طيب ..وش رايك في المستشفى الفلاني ...فخم ..ويعطون مرتبات حلوه ..

- على راحتك يا وليدي ..

* وبعدما وصلوا للمستشفى الفلاني ...لم يجد وراءالكواليس وظيفه له ...بحجة ان المستشفى مليء بأطباء
من جنسيات مختلفه ...

صدم وراءالكواليس ووالده بذلك ...ولكن لم يدب اليأس في قلوبهم بعد ...فقرروا الذهاب لمستشفى آخر ...

فوجدوا نفس النتيجه ((لا وظائف في الوقت الحالي ...فالمستشفى مليء بالأطباء )) ...وكرروا المحاوله

عدة مرات وفي كل مره ...يجدون نفس النتيجه ....

...... (( يتبـــــــــــــــع ))......

[عاشقة سديـــر]

....وهذي التتــــــــــــمه ....

* حزن وراءالكواليس كثيرا ....وشعر بأن الدنيا أظلمت في وجهه ...

- ليش ما ألقى وظيفه ...ومعدلي مرتفع ...والمستشفيات عندنا اكثر من النمل ...ليــــــــــــــــــش !!

هل الاجانب احق مني بالوظيفه ....اذا كان عشان دراستهم أفضل ...ليش احنا نكون ضحيه لضعف المناهج

الطبيه عندنا ....ليش ....ودمعت عيناه حزنا ...

* وبعد ان عادوا للمنزل ....

- هـــاه بشروا ...بأي مستشفى توظف ...لا يكون مستشفى بعيد

- أي وظيفه يالصحراويه ...تورمت رجولنا واحنا ندور بين هالمستشفيات ...ومالقينا له وظيفه ..

* حزنت الام لذلك كثيرا ....فاتصلت على أخيها وادي ابا المياه ...وشكت له حال إبنها ...وانه لم يجد وظيفه

في المستشفيات ....ولا تتوقع ان توجد له وظيفه في غير المستشفيات لان تخصصه لا يسمح ..

_ خلاص ياوخيتي ...لا يضيق صدرك ...راح اوظفه اي وظيفه مؤقته ...لين نلقى مستشفى
عنده نقص اطباء !!

* وظف الخال وادي ابا المياه ابن اخته وراءالكواليس (( بستاني )) في مزرعة صديق الخال ((س ق م ))
وبعد مرور شهـــــــــــــــــر ......

- شف يا أبا المويات ....انت صديقي ولك معزتك عندي ..لكن اسمح لي ...ولد اختك خرب مزرعتي ..

كل يوم قاطعن له شجره ...قال أيش ...اسوي لها عمليه جراحيه ..
مزرعتي صارت خرابه ماعد هي مزرعه ...

* وهكذا قام (س ق م ) بفصل وراءالكواليس من وظيفته واصبح الآن بلا وظيفـــــــــــــــه

- الصحراويه ...قولي لأخوتس يحاول يوظف الولد ...والله اني خايفن عليه ..قبله قاعد في ذا الغرفه ...

حتى الأكل ماعد يأكل ...وكل ما جاني ضيف جاب ولدتس سماعة الدكاتره وحطها على صدرالضيف ....
فشلنــــــــــــــــي

* اتصلت الصحراويه بأخيها وشرحت له حالة ابنها ثم اردفت قائله ...

- ابا المياه ...واللي يعافيك ..دور للولد وظيفه ...ضايقن صدري عليه ...

- شوفي وانا أخوتس ...انا ما عندي الا وظيفه وحده هي اللي بتناسب له ...تمـــــــــــام التمـــــــــــــام ..

- الله يبشرك بالخير ...وش الوظيفه عشان أبشر isz ضايقن صدره ...

- الوظيفه الله يسلمتس في مستشفى .......بس ماراح أوظفه طبيب ...لا ....راح أوظفه ............

مريض في مستشفى شهــــــــــــار .....ويخب عليه بعد ...

...............................................

أتمنى ان القصه تعجبكم <<والله تعبت فيها ...

تحيــــــــــــــــــــاتي ......

[هرمنا]

رووووووووووووووووووووووووعة

(((* حزن وراءالكواليس كثيرا ....وشعر بأن الدنيا أظلمت في وجهه ...

- ليش ما ألقى وظيفه ...ومعدلي مرتفع ...والمستشفيات عندنا اكثر من النمل ...ليــــــــــــــــــش !!

هل الاجانب احق مني بالوظيفه ....اذا كان عشان دراستهم أفضل ...ليش احنا نكون ضحيه لضعف المناهج

الطبيه عندنا ....ليش ....ودمعت عيناه حزنا ... ))





والنتيجة ((مستشفى شهــــــــــــار .....ويخب عليه بعد ))





تسلمين عاشقة سدير على القصة هذي وفي انتظار المزيد

[بن جعيثن]

ولا لقيت إلا وراء الكواليس...

هاللي في حاله...

الله يصلحس بس...

مشكورة...

تقبلي أجمل تحياتي...

[عاشقة سديـــر]

مشكوووورين على التشجيع والتعقيبات الحلوه ...

وادي ابا المياه ...

هــــــــــــــاه وش رايك في التتمه ...واللي انت احد ابطالها ....!!

انتظر رايك <<شكلك بتكفخني << مشكووور ((وادي...... )) عالتعقيب الجميل

تصدق حركه (وادي ) سريعه في الكتابه <<الله يعينك بنشب فيها ;) <<ولا ما يكون الجزاء من جنس العمل ...;)

السبعين ...

مشكووور عالتعقيب الرائع ...بس اكيد قصتي ماتجي شيء عند روعة قصصك ...;)

فارس الظلام ...

مشكووور عالتعقيب الحلو ....

*** ملاحظه بالثلاث نجمات لاهميتها ...

ترى القصه من نسج الخيال ....واختيار الاعضاء جاء معي كذا ...يعني بالفصيح الرجاء عدم الزعل ...
القصه مزح ....

تحياتي ...

[ربى الجنان]

المشاركة الأصلية كتبت بواسطة   باقتباس من مشاركة عاشقة سديـــر *** ملاحظه بالثلاث نجمات لاهميتها ... ترى القصه من نسج الخيال ....واختيار الاعضاء جاء معي كذا ...يعني بالفصيح الرجاء عدم الزعل ... القصه مزح .... تحياتي ...

خخخخخخخخخخ كله كوووووووووووم وسالفه كله من نسج الخيال كووووووووووووووم

تسلمووووووووون يامبدعين ..

[عاشقة سديـــر]

ربى الجنان...

مشكووووره عالتعقيب ...ومشكوووره على المدح المبالغ فيه ...

وادي ابا المياه <<ودها تكتب ( وادي )....بس ما تعودت ...

تصدق عاد والله ماعرفت هالمستشفى الا منك ....<< كانت تحسبه مستشفى اسنان ..

ومشكووور عالتعقيب الرائع ...<<اكيد بيصير رائع دام نصفه مدح ;)

تحياتي ....

[الصحراوية]

عاشقة سديـــر
يا ويلتس من ربي حاطتني ام لوراء الكواليس يعني عمري طاقن في الستين انتي وخشتس
بس تبين الصدز...........من جد رحمته

لا وكله كوم وها الخال اللله يفشله كوم ثاني يقالك يعاون يوم حطه بستاني <<امحق مساعده


عاشقه سدير المبدعه تسلمين والله علئ ها القصه اللي تلامس الواقع ;)

[وراءالكواليس]

تسنه ممشوط بحرّاثه....


واثركم مستلميني تسني بنقه(كورة تنس)



ما ادري ليش توني احس بالمعاناة.....


تخيلوا 8 سنين في الطب....(عشاني سنة تزاعلة مع الوالد (اسز) وما رحنا نصيف في جزر المالديف) <<<< قصدة الشرقيه

وهذيك السنة سويت اضراب عن الدراسة....

(طبعا اكيد اخذنا حقنا من عسيب النخل)<<< كناية عن التمحيط<<< منتب عاقل يا كناية..... اسكت بس لا يسمعك المتنبي يحقد على الشعر من بعدك

واخرتها يشغلون هندي في مزرعة ...قلت ....مالت عليك يهالخال الدلخ.....


ما لقيتا الا حويط هالسقيم.... قصدي س ق م

من زينه كل الي عنده نخلتين وكلهن فحال.....

واثلة ومنكسرة بعد.....


وشرب كراث..... (لزوم شاهي الضحى للوالده...(الصحراويه) ....)<<< ترى ام عبود تسير علينا...وتحب الخس محشي كراث....<<< الله يحوم تسبدها على هالمزاج المخيس


والله عائلة ما تدري وين الله حاطها فيها...


اجل ها الابو .....امحق ابو


يمشي وما منه منفعه....<<<< منقهر عشانه ما عنده واسطه


والا الوالده(الله يخليها لنا....) ... بصراحة عداها العيب... بس لو انها ما تدربيها ورا ابو المويات هذا انتسان تطلع ...مسكته


كل ما توهقات دقت عليه....


وهو .... اقول سقها بس يا خال...




والشرهه مهيب عليهم الشرهه على الي يدور من وراهم....


وظايف....
<<<<<< قلت الخاتمه

>>>>>>>>>>>>>> ما اخطوا يوم ودوك شهار يالدرو ....


سقها الله يصلحك بس



وتسلمي يالعاشقة على هالموضوع....


وترى استلقيت من الضحك عليه


looooooooooooooooooool






















همسة في اذن الوالده

( ترى انا اصغر من السبعين.....)

لا يهمك شكلي....

توني متعدي سن المراهقه.... قبل عشر دقايق... الى ساعة الا ربع بالكثير

[سديراوية وأفتخر]

خخخخخخخخخخخخخخخخخخخخخخخخخخخ

عليك قصة فضيعة واللة



بس شسمة ويني انا هاه

اقول سلامات يأم الشباب وش تبين بضبط انتي توك مسجلة ولاتبينهم يقرون الفنجال بجيتك >>>>>>>>>>>>>>>>>>>>>

مشكوووووووووورة اختي على القصة الخنفشا1رية

واقول لوراء الكواليس تبي واو ماراح تجيك حتى في الكوابيس يا ابو الكواليس

حركة كوابيس وكواليس في نفس الساقية مدري القافية

اقول اخمدي اصرف>>>>>>>>>>>>>>>

واو = واسطة<<<<<<<<<< بس مشفرة

اخس يالتشفير الي تعرفينة انتي وخشيشتك >>>>>>>>>>>>

بس لا تصدق عاد ;) ترا ماعندي الا الضعوي

طحياطي:
Dodi

[ابو عبد العزيز]

عاشقة سديـــر اول شئ اشكرتس على هذا الخيال الواسع واللذي يقرب كثيرا للحقيقة اصبحت الوظائف من الصعب ان تجدها مهما كان تخصصك الا القليل النادر ومع الواسطه بعد والمشكله ان الشباب الله يهديهم ما يبون الا وظيفه وجلسه على الكرسي ما درو ان الاعمال الحرة احسن من الوظائف بكثير بس تبي صبر والا ياهي فيها فلوس مثل كهربائي والا مكانيكي او مصلح كمبيوتر ترى هذا من الاشياء البسيطه على الشباب لان اكثر المهندسين الآن ما غير يبدلو قطع جديدة وبس وخاصة الكمبيوتر .والشباب عندنا ولله الحمد والمنه ما عليه نقص بالذكاء بس يبون احد ياخذ بيديهم والسلام ,

[عاشقة سديـــر]

مشكووووورين عالتعقيبات الرائعه ...

الصحراويه ...
تصدقين عاد ....شخصيتك اللي في القصه عاجبتني ....احسها أم حنونه لاخر درجه يا حبي لها بس ..<<تراني مندمجه بقووووه مع القصه

ومشكووووره عالتعقيب الحلووو...


وراءالكواليس ...

وش ذا الفضايح اللي طلعتها عن أسرتك ....

بس تستاهل التمحيط بالعسيب ....اجل فيه احد يضيع سنه عشان ماراح الشرقيه ...

بعدين لا تلوم ابا المياه على توظيفك هندي في مزرعة س ق م ....هذي الوظيفه طالبتها امك الله يحفظها <<سامعه الحريم يمدحون في كراث مزرعة س ق م ...ومالقت طريقه تذوق هالكراث بها الا انها توظفك في هالمزرعه ...والله ذكيه هالام وانا متساهله فيها ...

اشكرك عالتعقيب الجميل والاضافه الرائعه ....;)

سديراويه ...

أشكرك حبيبتي على مرورك وتعقيبك على قصتي ....وكلي فخر ان القصه اعجبتك ....;)

isz ...

فعلا فيه وظائف كثيره ومربحه...مسيطر عليها الاجانب من العماله الوافده بمختلف الجنسيات ...مع ان ابناء بلدنا احق فيها ...بس وين اللي يسمع ....

اشكرك على تعقيبك ...واضافتك الجميله ....<< كنت زمله منك ...احس اني قطعت جلدك شوي بالقصه
بس الحمدلله مرت على خير ... ;)

تحياتي للجميع ...