الملك وبناته التلات
كان يا ما كان في قديم الزمان ملك عنده ثلاث بنات حب في يوم من الايام انه
يختبر حبهم اله . جاب الكبيرة ( وجه البكسة ) . وقالها : يابا يا حبيبتي قديش
بتحبي ابوك الملك .
البنت من غير تفكير : بحبك قد ما السمك بحب البحر .
الملك فكر وقال في باله : ايهو السمك بقدر يعيش بدون بحر . هاي البنت بتحبني
كتير . وقال الها : انا كنت عارف انك بتحبيني بس مش لهدرجة . وقام اعطاها قصر
كبير ومجوهرات .
جاب البنت التانية ( واسطة العقد ) وسألها نفس السؤال . فقالتله : بحبك قد ما
الطير بحب السما . انبسط الزلمة وكيف . واعطاها قصر جنب اختها ومجوهرات
وميمعة .
بعدين جاب البنت الصغيرة ( اخر العنقود اللي بموت فيها ) وسألها نفس السؤال .
قامت جاوبته : بحبك قد ما الدقة بتحب الشطة .
الزلمة زعل وعصب وقام لفحها كف خلا ايديها ورجيلها اربعة . ومسكها من شعرها
وزتها برة القصر . وما رضي يسمعمنها ولا نص كلمة . البنت دارت بالحواري وعلى
ارصفة الطرقات وتسمع كلمة من هاد وكلمتين من هداك . لغاية ما ربنا حن عليها
واجاها مزارع مسكين على باب الله حبها وحبته وراحوا سكنوا بالكوخ تبعه اللي
بنص الغابة . طبعا اول اشي تزوجوابلاش مخكم يروح لبعيد عارفكم انا .
ودارت الايام ومرت الايام ما بين بعاد وخصام . وفي يوم من الايام كان الملك
قاعد بتصيد بالغابة ونسي حاله وسرح وضاع بالغابة . دور على المرافقين . ولا
هم هون . طب الحرس . فص ملح وداب . وين الشباب ؟؟؟؟؟؟؟؟ لا حياة لمن تنادي .
ضل الملك يمشي ويمشي ..لغاية ما لقي هالكوخ لصغير . قال يلا بفوت برتاح
وباكلي لقمة . دق على الباب فتحلوا صاحب البيت وهو مش عارفه . دخلوا جوا وهو
شايفه تعبان . وصار يحكي مع الزلمة مرته مش خافي عليها الصوت . قام الزلمة
بيقول للمرةاذبحيلنا جاجتين خلينا نتعشى ونعشي الضيف . المرة مين طبعا
؟؟؟؟؟؟؟؟؟ واضحة بنت الملك المقصوفة الصغيرة . بدت تشتغل بالجاجات وخطر على
بالها فكرة . نادت جوزها وقالتله خود شوية الدقة هاي مع صحن زيت سلكو فيهم
على بين ما يخلص الاكل شكله الزلمة ميت جوع . والله الزلمة عجبته الفكرة وقام
حطالزيت والدقة قدام الملك وقاله : اتفضل يا عمي على بين ما يجهز الاكل .
الملك ميت جوع وهو بحب الدقة كتير . ما بلع اول لقمة ولا صار بده يستفرغ .
وصاح بالزلمة : ولكو هاد دقة من غير شطة ؟؟؟ كيف ! بتاكلوها هاي ؟؟؟؟؟؟؟؟؟؟؟
وفجأة اتذكر بنته الصغيرة وصار يعيط زي الهبايل . قاله الزلمة : ول . شو مالك
يا زلمة
انت العاقل . كل هاد مشان شوية دقة هسة الجاج بخلص . قلعطتني .. شو هالعالم
هاي . راح الملك حكى للزلمة القصة . وهو خلص من هون نطت البنت وقالت : بخ
.كيفك بابا .؟ عرفت اديش بحبك يا فصيح ... ؟؟؟؟؟؟؟
وهيك عرف الملك قديش بتحبه بنته . وجابتله دقة بشطة . طبعا ما اكل منها ولا
لقمة لانه نزل بالجاج جرد !!!!!!!وحش !
واعطاها قصرين ومجوهرات وشغل جوزها عنده .
وتوته توته خلصت الحتوتة
المعاني والعبر
• الدقة بلا شطة ولا تسوى
• اذا شفت الجاج بلا دقة بلا هم
13-02-2006, 09:50 PM
العرض العادي
