أهل البر ، ورونا شطارتكم في الطبخ !

[المولع]

بسم الله الرحمن الرحيم
هذا الموضوع خطر في بالي و انشاء الله انه اول مره يطرح هنا في المنتدى , كيف تقوم بتجهيز الاكل في البر سواء لحم طيور او ارانب او اي شي ينصاد او حتى لحم غنم ؟؟ صراحه عن نفسي ما هنا زود شطاره لاكني اضبط الوضع في بعض الأحيان ;) .

1 _ كبسة القميري في قدر الكاتم (( المضغوط)) :

خذ العدد الكافي من القميري و قم بتنتيفه و تنضيف بطنه .
حط القدر على النار و صب فيه زيت او سمن وقطع البصل و احمسه لين ينحمس زين، ثم حط بهارات الطبخ و حركها شوي مع البصل .
حط الطماط على البصل و احمسه بعد .
جب القميري و حطه مع بصلك و طماطك و قلبه شوي علشان ياخذ لون .
ضع بعض من الليمون الأسود و ( الدارسين ) و حبحر و هيل ( حسب الرغبه ) و بعض الناس يحطون قطع صغيره من الثوم ( كل واحد حسب رغبته ) .
بعد ما تحطها صب مويه مغليه على القميري في القدر و ارفع على النار ، و انتظر شوي و بمجرد انه القدر يفوح حط الملح و قفل غطاء القدر و خل النار على اعلى شي لمدة 20 _ 30 دقيقه ، بعد ذلك اقصر على القدر و افتحه و طلع القميري في قدر ثاني و حط الرز و رجع الغطاء و صكه و ارفع على النار لمدة 15 دقيقه ثم طف عن الرز و بالهناء و العافيه . كثير من الناس بعد استواء القميري يحطون الرز فوقه و يخلونه يطبخ لين يستوي(( و انا اشوف انها اساس عمل القدر الكاتم )) ، والبعض الاخر يطلع القميري بعد الاستواء و يحط الرز يطبخ لحاله في مرقة القميري ..


2_ لحم الغنم على الصاج :
جب حطب و شبه و خله لين يزين جمره ثم جب صاجه و ثبتها فوق الجمر و ذلك بوضع ثلاث إلى اربع من ( الحصى ) تحت الصاجه علشان ترتفع شوي عن النار ..
طبعا اللحم يكون مقطع اوصل و مملح و متبل بالبهارات ، ثم حط قطع من شحم الذبيحه و ميعه على الصاجه قبل انك تحط اللحم علشان ما يلصق في الصاجه و يحترق و ابداء بتحريك اللحم و تقليبه بواسطة ملاس صغير او اسياخ ، حتى تلاحظ انه نضج ثم تقرب الخبز و عليك بالعافيه و لا تنسى المايونيز و الكاتشب و البيبسي


3_ الفطور (( كبده محموسه )) :
طلع كبدة الخروف و كلاويه و القلب و شوي من لحم الصفاق و كل هذا قم بتقطيعه .
قرب لك مقلاة كبيرة و حط فيها من شحم الذبيحه و حركه حتى انه يميع ، حط البصل و احمسه زينه ثم احمس معه شوي طمام و شوي حبحر بارد .
حط الكبده و القلب و الكلاوي ولحم الصفاق عليها و ارفع النار و حرك شوي ثم حط الملح و البهارات و اقعد حرك فيها ( انتبه لا تغفل عن شغلك و يحترق ) و استمر حتى تلاحظ ان الطبخه بدت تستوي و حرك تحريك خفيف حتى تتأكد انه كل شي صار مستوي ، ثم سم بالرحمن و يا جعله عافيه ...

و العذر و السموح يا شباب على هالخبص لاكن الشكوى لله و هذا الي نعرفه

عاد نبي همتكم ......

[محمد الاخوان]

اووووووووووه وش ذا وش ذا يا مووووووووووولع وش ذا

والله بصراحه صكت في مخي حقت القميري بس قدر كاااااتم ماهيب ذيك الطبخه الي بقدر كاتم يامولع احس ان طعمها ماش ...بس ترا انا ماجربتها انا والله القميري ان ماجاك على قدر الاوادم وتحته الحطب مشعلل ولا ماكلت قميري

وبعدين انا عندي تعديل على طبخة القميري واتمنى انك تقبلها:

1_ان القميري مايحتاج له زيت ولا سمن لان دهنه يكفي وزياده وبتشيله بعد من الزود

2_الهيل راح يدخل طعم غير مرغوب فيه للقميري لان القميري مايحتاج انك تشيل زفره ولا طعمه لان ماله ريحة زفر ولا ريحه او طعم كريه

3_القميري مايحمس مع البصل والطماط لانك تحمس الطماط والبصل مع شحمة قميريه وحده ولا ثنتين لمدة دقيقه بس او دقيقتين ..

وهذا انا الي اسشويه وكل واحد ومزاجه
واتمنى انك ماتاخذ على خاطرك ياعيوني مولع وانا حبيت اطرح هالتغيرات عشان نشوف ويشوفون الشباب تعدد انواع الطبخ ...
ومشكور يااخوي مولع على الصيد ...

وتقبل تحيات اخوك
محمد الاخوان

[مفتون صيد]

هاه نقلط يالربع ...... انا مهنا بخص في الاكل ولكن كل اللي جبتوه هو الاشياء او الاطباق الرئيسية اللي في البر وانا ما اعرف الا الكبسه اللي قلتوها ...... ويقولون احلى شي في القميري المرقه وباقي الطيور افضل شي فيها الشوي ... والارانب الكبسه ... شباب لايفوتكم التمر المعبوط مع السمن البري في الفجر مع القهوة وخصوصاً في الشتاء تراه اقلاع حتى الظياع ;) ..... والله ما تشيل يدك منه

[المولع]

اخوي محمد : صراحه الناس تختلف عن بعض حتى في طبخ الاكل ، و كل واحد له طريقته . و صدقني انا ما عندي اي مشكله في طريقة طبخ القميري و سبق و جربته على القدر العادي و طعمه ممتاز ، لاكن اخوياي حقين البر خربوني و خلوني اطيح في قدر الكاتم ;) .
اما مسئلة ( الهيل ) تراني كاتب كل واحد حسب رغبته ، و في البر الشباب تلقى بعض الشباب حط هيل و كثر الحبحر و ناس ثانيين العكس
اشوف انه ما يضر انك تقلب القميري شوي مع الحمسه ..
و ترى عادي لا اخذت في خاطري و لا شي بالعكس هذا الي ودي انكم تكتبونه >>>>>>>>>>> نقاشات ساخنه ;)

مفتون صيد : اجل تنصح بالتمر المعبوط مع السمن ، أجل خذ هذي الإضافه من عندي و حط معه ( مضير ، اقط ..... كل واحد و تسميته ) وشف يا شيخ تجلس لك يوم ما عاد تبي أكل .

[أبو عبد الله]

يا شباب الله يمسيكم بالخير جميعا او يصبحكم بالخير كل حسب قرايته
طيب انا عندي لكم شي جديد يمكن بعضكم يعرفه ويمكن ما تعرفونه كلكم وهو ( الخواضه )( السويق ) وهو دقيق الدخن مع السمن البري يخلط جيدا مع بضها ومن ثم ادمك فيه لين تشبع بالتمر وبعدين قابلني اذا اكلت ذاك اليوم شي يخبل وعلى قولة ابو عبد الله مفتون صيد اقلاع حتى الضياع



فيه شي ثاني يمكن تدعون لي ولا تدعون علي
جب اللحم وجب قصدير وبس وجب حطب وجب غصون كثيره من البشام ( وهو الشجره اللي تطلع مساويك ماهي الراك شجره ثانيه تطلع مساويك البدو)
الطريقه :
احفر حفره على قد صحن الاكل وحط الحطب فيها وشب النار لين تجمر بس على شرط الجمر لا زم يكون من الجمر الكبار ثم حط غصون البشام على الجمر وبعدين حط اللحم على غصون البشام وفرق اللحم مزبوط ثم غط الحفره كلها بالقصدير زين وجب الصحن واقلبه علي الحفره لين ينكتم ثم غطه بالقصدير زيييييييييييين ولازم يكون القصدير اكبر من الصحن بكثير عشان ما يدخل التراب على الصحن بعد الدفن وادفن علي الصحن بالتراب وانتبه للتراب لا تختلط بالطبخه ثم تنعدم وخله يقعد ساعه وربع ثم شيل التراب زييييييييين وشيل القصدير وشيل الصحن بشويش عشان التراب اللي عليه وطلع اللحم وحطه بصحن وملحه وهو حار ثم سم بالله
الملاحظات :
1_ الحفره لازم تكون على قد الصحن وهو مقلوب لكي تغطي اللحم زين
2_ تغطيه بالقصدير زيييييييييين حتى لا تدخل تراب
وترى هاذي الملاحضات مهمه والا تخرب الطبخه وتقعدبها
بس ترى مالي صلاح احد يدخل المستشفى لا تقولون ابو عبد الله ترى ما اعرفك ولا قلت شي ههههههههههه

[المولع]

اما بالنسبه للدخن مع السمن فهو معروف عندنا لاكن غير مشهور اكله لدى سكان المنطقه الوسطى لاكنه زي ما قلت لك معروف ..

اما طبختك الثانيه الله يستر منها ما اعرفها ، لاكنها تشبه لطريقتنا في وضع اللحم على الجمر بواسطة القصدير فقط مع الملح و البهارات و البصل ....

و يعطيك العافيه .....

[أبو عبد الله]

اخوي المولع العفو حبيبي لا جرب الطبخه الثانيه وادعيلي ترى جنان ما تشبع منها من حلاتها وتراني امزح وانت جرب وشف تجوز لك والا لا؟
القف تحياتي
اخوك ابو عبد الله

[مفتون صيد]

مشكور المولع على النصيحه والله لازم نجرب ....... بس اخاف عقبها افقد تراني الحين على وشك الفقده واخاف مع ذي اضيع المعلومات كلها حتى اسمي

ابو عبدالله احلى سمي والله انك شوقتنا عن الاكل اللي تسونه والله شكلي ايت يوم ابطب عليك وتسويلي هاللي قلته ...... الله يكرمك السعبوله قامت تقطر

[أبو عبد الله]

اعتبره وعد يا مفتون
الله مير انه يحييك يا سمي انت تعال والله غير اخليك تبنشر عندنا وتنسى الدنيا وما فيها عندنا الصيد ترى متعه مالها وصف واللي متضايق عندنا وصاكه عليه الدنيا يروح للبر والمقناص بالرغم من التعب الللي في صيدنا عشان ديرتنا كلبوها ضلعان
على العموم الله انه يحييك ويحيي الربع جميع في اي وقت ما نصيت الا اخوك وانا يشرفني زيارتكم
القف تحياتي
ابو عبد الله

[المولع]

قول و فعل يا ابو عبدالله ...

[داير حدعش]

يا سلام عليكم يالربع انا ارشح طريقة محمد الاخوان الكل و طريقته لكن الطيور المهاجرة و خاصة القميري لا تحط غير ملح و شوي بهارات . دهنه و منه ( الشحمة اللي في البنطن ) احمس بها البصل و قابلني .
و لا عليك بالمثلوثه ما مثلها عند مطاعم الاجداد موصي بها الحكيم .

[مفتون صيد]

قول وفعل ابو عبدالله وما تقصر وهاذي عوايدكم الطيبه ولاهي غريبه منكم


---------
داير حدعش ...... نور المنتدى بعودتك القويه ومثل ما تعودنا عليك حريص على الافاده

[أبو عبد الله]

اخوي المولع ومفتون صيد ونعم والله فيكم وهاذي عوايد البدو اهل الكرم والجود وانت ساس البدو وساس الكرم والجود والنخوه
الله يسلمكم وياجعل اعماركم طويله ان شاء الله