سباحين جدتي..!

[إحساس]

أعزائي أعضاء منتدى سدير..
أغلبنا قد قصت عليه جدته سبحونه وهي مفرد سباحين أي القصة التي كان يتداولها الأولين وهي مصدر الترفيه الوحيد في ذلك الزمان حيث لا راديو ولا تلفزيون ولا حتى رسايل جوال..!
وتشتهر السباحين في شهر رمضان حيث يسهر الناس ( الله أكبر على السهر ما يتعدون الساعة 10) ولا يوجد ما يقطع الوقت عليهم حتى يحين وقت السحور.. فيجتمعون على السراج وكبير العائلة هو من يقص عليهم السبحونة.. والسبحونة غالباً تحمل عظة وعبرة أو تسلية وضحك ..أو شيء من هذا القبيل..!
وفي بعض السباحين تكون هناك مقاطع لا تقال لصغار السن والمراهقين حيث تكون فيها مقاطع غير لائقة..< جدتي تسميها دشوش منول..! وبعض المرات وهي تقص تقول لا ذيك السبحونة مانيب قايلتا مشفره..ايه حتى جدتي تعرف التشفير!
وفي هذا الموضوع أحببت أن أضع بين أيديكم قصة تحمل معنى جميل سمعتها من جدتي ..

صلوا على النبي..
كان هناك الواحد والواحد الله..
شاب في العشرينات..متزوج وحدة عمرها ما يتعدى 14 سنة كعادتهم منول.. وساكن مع أمه.. ويشتغل في مزرعته..
السالفة إنه كل ماجاء من صلاة العشاء وجاء يرقد وهو يرقى الدرج ينادي حرمته ويقول: كوه خن ننام يا كومة عظام.
زوجته الضعيفة تحسبه يمدحها تبتسم وتطمن راسها وهي مستحية..
وكل يوم على هالحالة.. لما حامت كبد أمه منه.. وقالت في نفسها..لازم أخذ حق الله من ولدي لهاالضعيفة..وأخليه يستادب.. أجل يقول لها يا كومة عظام وهي مستانسة!..المهم ..نادت البنية وقالت لها اسمعي وأنا أمتس إن جاء فلان الليلة عقب صلاة العشاء وقالتس كوه خن ننام ياكومة عظام روحي معه..
وإن رقدتي في فراشتس قولي : آآآه يابطني آآه ياراسي.. وبيقولتس وش فيتس قولي: آه يابطني آه ياراسي توسد*الردي بفراشي!
مرة الولد ما تعصى خالتها أم رجلها .. لو تقولها طبي في القليب طبت <-- منول..!!
قالت طيب.. وسوت اللي قالت عليه..
يوم سمع الولد من زوجته وهي تقول توسد الردي في فراشي .. أنهبل.. وقعد يلافط ويزبد ويرعد.. ويقول .. يالردية أطلعي لا عاد أشوفتس روحي لأهلتس وشوتها..
البنت راحت لخالتها .. وقالت لها طردني وقالي روحي لأهلتس..قالت تعالي وأنا أمتس ووزتها في بيت الدرج.. وراحت لباب البيت وفتحته وصكته بقوه ..كأن البنت طالعة وصاكة الباب عشان يسمع الولد وينزل..!
< إن كيدهن عظيم..!!
الأم .. تسوي روحها ماتدري..وش فيك وأنا أمك وش بلاك ؟
الولد: فلانة لابارك الله فيها تقول عني ردي الردية؟
الأم : هوّ ! < حقت الإستغراب.
الولد: إيه..وطردتها لبيت أهلها..
الأم: أحسن تستاهل..خلها تستادب..
الولد : والله لأخليها عند أهلها 20 سنة لاهيب المتزوجة ولا المطلقه.!
الأم : ما يخالف وأناأمك بس رح أرقد ولا يضيق صدرك..
الولد وهو يطل من الدرج:يمه..
الأم: نعم..
الولد: مايسد خمستعشر سنة..
الأم: ما يخالف..
الولد وكل ماله ينقص كم سنة.. إلين قال ..
يمه بكره نروح نجيبها..
الأم:إن شاء الله..
الولد : يمه .. خن نجيبها ألحين..!
الأم: هوّ وأنا أمك .. وش يقولون أهلها طردوها وجو يلحقونها.. ياخزياه..
الولد: إلا يمه تكفين إلا.. <واضح مدلل..
الأم: مايصلح الله يهديك ياوليدي..
الولد نشب في حلق أمه..ليييييييييين قالت..
أسمع وأنا أمك .. بجيب لك حرمتك بس بشرط إنك ما عاد تزربها ..و لا عاد عمرك أسمعك تقول ياكومة عظام..وشرحت له الخطه..وطلعت حريمته له من تحت الدرج ..
وعقبها عاشوا بسلاام وخلفوا صبيان وبنات..
.. خلصت وملصت وجت الدجاجة وعنفصت..

*توسد: معناها وضع رأسه على الوسادة..

أتمنى أن تكون أعجبتكم السبحونة ..واللي عنده سبحونه يقصها علينا الله لا يهينه..

[miss sudeer]

هههههههههههههههههههههههههههههههههه

رهيــــــــــــــــــــــــــــبه <----------------- تموت بالسباحين


وعلى كثر اللي سمعت ما زد سمعت ذي !


بحاول اتذكر سبحونه (صالحه للنشر) واحطها إن شاءالله
جداتي توفن الله يرحمهن وموتى المسلمين <------------- ماعندها مراجع



يعطيك العافيه احساس فكره تجنن
وياليت اللي يذكر سبحونه يحطها



تشكرات

[ذيب سدير]

سبحونه ولا احسن منهاااااا ..احساس ...كثر لنااا من هذي السباحين ههههههههه
شكراااا

[إحساس]

هههههههههههههههههههههههههههههههههههههه
ميس سدير عساتس إستانستي بس.. هو كله للوناسة..!

المشاركة الأصلية كتبت بواسطة   وعلى كثر اللي سمعت ما زد سمعت ذي !

ياليت تسمعينا وأنا أخوتس..!

المشاركة الأصلية كتبت بواسطة   جداتي توفن الله يرحمهن وموتى المسلمين <------------- ماعندها مراجع

الله يغفر لهن ويرحمهن.. ويسكنهن فسيح جناته.. اللهم آمين..
طيب إعتبريني مرجع.. خخخخخخخخخخخ إحساس الشايب..خخخخخخخخخخ يصلح؟
ويعطيك العافية.. وهاتي سبحونة كان عندتس!

[إحساس]

ما أدري ما أشوف تفاعل ليه..؟
على العموم قاعد أشتغل في سبحونه جديدة..

[miss sudeer]

هالقصه من سباحين الاولين كانت جدتي الله يرحمها تقصها علينا منول..



كان فيه حرمه عندها بنت رفلااااااااااااا (يعني ماتدبر شئ ,مافيها سنع) وضايق صدر هالام من بنتها ورفالتها..
يوم من الايام جاء واحد يخطب هالبنت وطااااااارت الام من الفرحه .. بس خافت ان هالرجل لو عرف عن قل سنعها يعافها ..

قامت هالام فكرت وفكرت ووصلت لخطه قامت جابت صندوق وحطت فيه جراده وصكت عليها ولا احد يدري وش داخلها

نادت الخطيب وعطته هالصندوق وقالت له: اسمع ترا هالصندوق فيه كل ظفاره و(سنع) بنتي
لو فتحته وطارت ظفارتها .. ترا ماعلينا منك

وصدق الرجال!!

يوم تزوج البنت وراحوا لبيتهم .. والا الرجال فيه لقافه على ذا الصندوق وده يشوف ظفارة حرمته هاللي داخله وش لونها قايله !!

قام وماصبر فتح الصندوق ومير تطيـــــــــــــــــــــــــر منه الجراده !!


يوم انهبل الرجال وقام يقول :


طارت ظفارة حرمتي
طارت ظفارة حرمتي

[إحساس]

المشاركة الأصلية كتبت بواسطة   سبحونه ولا احسن منهاااااا ..احساس ...كثر لنااا من هذي السباحين ههههههههه شكراااا

ذيب سدير .. مرورك الأروع.. بنكثر لك من هالسباحين بس ما نشوف تفاعل..

الشر لمرورك أخي الكريم..

[سلطان العضيدان]

[align=center]يا زين سواليف منول ... وخاصه سباحين العَجز

الله يحفظهم ان شاء الله

...
...
...
...
...

احساس ... والله يا هالعجوز أنها ذهينه عرفت وش لون تستادب ولدها
والخبل يقول لأمه خلهيا عشرين سنه خخخخخخخخخخخخخخخخخخخخ

تسلم على اتحافنا بهالقصة الزينه ولا تبطي علينااااااا


برايفت miss sudeer
===============
أجل طارت الظفاره ههههههههههههههههههههههههههه
هذا فايدة اللقافة [/align]

[السنبلة]

[frame="2 80"]الله الله روووووووووووووعة.. يا حبي لها القصص..


==========

بقولكم قصتي مع هالقصة..

يوم قريتها طبعتها.. ورحت أقول لأمي تقراها..

كانت أمي تزيّن القهوة (على طاري تزين.. مره قلت لزميلتي مصرية:

تصدقين أختي ما تعرف تزين القهوة؟!! قالت: أوه حتى القهوة تزينوها!!!)..

المهم نرجع للسالفة الأولى.. أعطيت أمي الورقة.. مسكتها بيد.. وقعدت تصب القهوة

من الدلة للزمزمية بيد..

ورجعت للفرن بتاخذ المويه بتصبها بزمزمية الشاهي..

واثرها صابة القهوة بزمزمية الشاهي وحاطة فيها الليبتون!!! خخخخخخخخخ

ما انتهت السالفة هنا..

قالت: تعالي عقاباً لك لأنك أنتِ السبب.. تعالي زيني لنا قهوة ثانية..

رحت اسم الله علي .. لقيت بالبريق ماء على النار.. خذيته.. وحطيت البن في الدلة.. وصبيت الماء عليه..

ورحت باملأ البريق مويه للشاهي..

أمي شافتني ماسكة ابريق فاضي.. قالت: وين الماء اللي فيه؟!!!!

-صبيته على القهوة..

أمي ما تمالكت نفسها من الضحك.. وسحبتني ببلوزتي وقالت: فارقي والله العالم إنك متأثرة بالبنت الظفرة.. وودك تصيرين مثلها..

أثر الماء فيه سكر للشاهي.. خخخخخخخخخخخخخ

وللمرة الثالثة رحنا نسوي القهوة..

وكله يهون في سبيل فنجال المغرب..

==========


ونبي مزيد من هالسباحين لا عدمتوا جداتكم.. [/frame]

[إحساس]

الراااااااااااااااااااااااااااااااائعة ميس سدير..!





أختي الكريمة ....... عمري ما سمعت قصة ( الظفارة الطائرة ) الرائعة..!
هع هع هع هع هع هع هع هع هع

تسلم يدياتس وخيتي

[سديراوي مقلع]

الله يرجكم يالمقرقعين الحين ماتقولولي وش جاب السباحين لكم )) على باله هو لحاله يسمع السباحين انا عندي سبحونه ((مفرد سباحين
ولكن اخاف ماتدخل عقولكم من قوتاااااا ههههههه شكرا احساس

[سعد القاسم]

والله الشغل حامي..؟؟؟
سباحين وسواليف يعطيكم العافيه يالربع ,,,..
مكشووور احساس على امتاعنا بهالقصه ..

[إحساس]

راعي الغاط..
يسلم لي هالنور..ياهلا وغلا..

ا

المشاركة الأصلية كتبت بواسطة   حساس ... والله يا هالعجوز أنها ذهينه عرفت وش لون تستادب ولدها والخبل يقول لأمه خلهيا عشرين سنه خخخخخخخخخخخخخخخخخخخخ

شفت الحريم شاطرات... كيدهن عظيم,, بس هو خبل قاعد يتطنز على حرمته وهو ما يقدر يستغني عنها..
لو تغيب يوم راح وطي..هع هع هع هع


تشكرااااااااات على المرور...

[إحساس]

المشاركة الأصلية كتبت بواسطة   الله الله روووووووووووووعة.. يا حبي لها القصص..

الروعة بمرورك سنبلتنا الكريمة..
(على طاري تزين.. مره قلت لزميلتي مصرية:

المشاركة الأصلية كتبت بواسطة   تصدقين أختي ما تعرف تزين القهوة؟!! قالت: أوه حتى القهوة تزينوها!!!)..

هع هع هع هع هع الله يرج عدوك..!

المشاركة الأصلية كتبت بواسطة   أمي ما تمالكت نفسها من الضحك.. وسحبتني ببلوزتي وقالت: فارقي والله العالم إنك متأثرة بالبنت الظفرة.. وودك تصيرين مثلها..

أجل متأثرة بسبحونة ميس سدير.......... الله يرزقكن الظفارة غير الطائرة خخخخخخخخخخخخخخخخ

المشاركة الأصلية كتبت بواسطة   وكله يهون في سبيل فنجال المغرب..

ترا يقولون يا ما حلا الفنجال مع سيحة البال..

وانا اقول يا ماحلا الفنجال مع سبحونتن هبال ........ < ما يمديتس..!

المشاركة الأصلية كتبت بواسطة   ونبي مزيد من هالسباحين لا عدمتوا جداتكم..

ولا عدمناتس.....ولا عدمنا أمتس..!

[إحساس]

يالله عاد خذوا ذا السبحونة بس تراها طويلة وبنقسمها على قسمين .. اليوم وحدة وإن شاء الله باتسر الجمعة نكملها..
عشان تستانسون هالعطلة..!
وبنخلي الردود تالي الموضوع ... < يحتك بالسبعين..

أقول .. السبحونة ..........خلاص هدووووووووووووووووووووء...!


كان هناك الواحد والواحد الله.. رجال كامل الرجولة وشيخ حمولة ...وتاجر وصاحب سلطة...... ساكن في قصر كبير.. وعنده حرس.....
وجنب بيته ... جدار بجدار عجيز حافظة للقرآن.. ساكنة لحالها... يجون عندها كل ضحوية بنيات القرية يدرسون عندها .. تقريهم .. يعني ( مطوعة ) < لغير الناطقين بالسديراوية مدرسة..!

والرجال ذا بنسميه .. أمم الشيخ ظامي ... لا جا عقب صلاة الظهر ... متغدي وقاضي .. يقعد عند باب قصره ويا أخوياه يتقهوون.. ويشوف البنيات وهن طالعات من بيت المطوعة راجعات لبيوتهن....... وفي وحدة من البنيات جايزتن له مررررررررررررررررررررررره.. وعاشقها.. وكل يوم يترصد لها يشوفها...
الرجال .. ميت على البنت..عمرها 8 يمكن 9 في ذا الحراوي ما تتعدى.. المهم الرجال طاف له يحب البنت ( يبوسها ) وراح وقال للمطوعة : البنت جايزتن لي وبس بحبها حبة وحدة ولتس اللي تبين..!
المطوعة عيت عليه ..... وقالت : هوّ يا خزياة.. والرجال مصمم..وكل يوم يقولها .. وهددها.. ويقول تراني شيخ وانت عجيز ومالتس ولي .. < يعني بتوطا في بطنتس..
المطوعة : البنية تميز .. وبتروح تقول لأهلها لو حبيتها .. وبتفضحني وتفضحك..!
أبوظامي .. ما يأس .. يفكر له .. في وسيلة تمكنه من حبة البنت .. قام .. وراح للمطوعة واتفق وياها .. إنه تمرحّ * البنت عندها ..ويجي هو في الليل ويحبها.. ووعد المطوعة بريال كامل..!
المطوعة .. قالت .. ما يطيعون أهلها أنها تنام عندي...... قالها شوفي لتس صرفة..!
المطوعة راحت لأهل البنت وقالت لهم بنتكم شاطرة وتحفظ القرآن بسرعة.. خلوها تنام عندي كم يوم أحفظها زود ..!
وأنتم خابرين أني وحيدة وما عندي أحد وبنتكم ما عليها إلا العافية وعين لحاف وعين فراش ... ومن ذا الحتسي لين طاعوا..تمرح عندها أسبوع..
المهم نامت البنت عند المطوعة.. وهي نايمة ..جاء أبو ظامي .. وحبها حبة .. وعطا المطوعة ريال..!
وكل ليلة على هالحالة لين خلص الأسبوع..!
البنت في آخر يوم حست في أبو ظامي.. وسمعت صوته وميزت أنه رجال .. بس ماتعرفه....بلعتها سكتت ولا قالت شيء..!

]يوم جاء اليوم اللي بترجع فيه البنت لأهلها ..مرت من عند أبو ظامي ...... الرجال يوم شافها تنهد وقال :[ الله من حبتن حبيناه وريالن نقدناه! < أيه كم من حبة (بوسة ) حبيناها (بسناها ) وريال أعطيناه.. < للي ما يعرفون..

البنت عرفت أنه هو اللي جاها في الليل وحبها.. وبرضة سكتت..!

صار أبو ظامي كل ما شاف البنت وهي تمر من السكة يقول لها : آآآآه الله من حبتن حبيناها وريالن نقدناه..!
راحت الأيام والبنت كبرت ...... بس في قلبها غصة وقهر .. من ذا الشايب اللي قهرها.. وكل يوم يذب عليها ذا الجمله..
البنت عزمت أنها تنتقم منه.. وتأخذ حق الله منه ؟

ماذا ستفعل البنت للإنتقام من أبو ظامي .. هذا ما سنراه في الحلقة القادمة.. تابعونا... نفس الحزة..!<أخس عدنان ولينا..!
*تمرح: تنام.. تبيت..لغير الناطقين بالسديراوي..