العيون والخدود..
..
العيـون مْسكّتـه والـخـدود مْسكّـتـه
ياسلام اليا كشـف وان تغطّـى ياحـرام
لا بغيت اوصّفـه جـت لسانـي عَكّتـه
كلّ عضوٍ من حبيبي يقول: اسكت ونـام
من يشوفه مات و جنّ الهوى مـا فكّتـه
كيف اجل لوهو يشوف اربعٍ حدر اللثام ؟!
جـادلٍ لا شلّـح الثـوب داخـل دكّتـه
ما بقى جدارٍ من البيت ما صلى وصـام
فتنتـه مـن ضحكته,الـف عـام بكّتـه
اقطع من السيف وآرق من ريش النعـام
من توصّت فيـه روس الاسنّـة وكّتـه
وش عليها؟ شيخ والا بعـد تـوّه غـلام
من عذر ثوبه على الردف جـوّد ضكّتـه
حصّل اللي ما حصل لي أنا عشرين عـام
حربـة الردفيـن ثـوبٍ كساهـا شكّتـه
كنّها لا شفتها مـن ورا تضـرب سـلام
دوب بسّ الساق لحظة يمـرّ ب(سكّتـه)
والله ما يمديه يركض قبـل يـوم القيـام
اشهـد انّـي مكّتـه ان بغانـي مكّـتـه
واشهد انّي بيته من الحجر حتـى المقـام
وإكّتي مـا سرّهـا حكمهـا عنـد إكّتـه
واشهد انّه إكّة الحسـن مـا فيهـا كـلام
وين والا كيـف قلبـي تلاشـى تكّتـه؟
والغضي عني مسافة (طميّه) عن (سنـام)
يسقي الله يـوم يقسـم لنـا مـن عُكّتـه
غرب من برّ (الثمامه) وشرقٍ من (خزام)
وسط روضٍ شاة راعي الغنم مـا دكّتـه
صرت أنا والزين مثل المصّلي والإمـام
يا حبيبٍ فيـه كـلّ الوصـوف مسكّتـه
فيك قلبي ميّت, وضربك الميّـت حـرام