( يــآذيـب انا بوصيك لا تـآكل الذيــب ) شـالح بن هـدلان وابنه ذيـب :

[مااارد]

السلام عليكم ورحمة الله وبركاته
انقل لكم قصه من اجمل قصص الباديه اللي ما امل من سماعها : ( قصة شالح بن هدلان وابنـــه ذيب )
كان لشالح بن هدلان اخو اسمه الفديع , وكان شديد البر به , قدر الله وتوفى الفديع مقتول
وبعد حزن شالح على أخوه .. اعاضه الله بأبنه ذيــب, اللي برز واصبح مضرب المثل بشجاعته بين قبائل الجزيره العربيه واتجهت له جميع الانظار ...
فادرك شالح ان ذيب بشجاعته وحبه له لابد يوم يفارقــه , فقال شالح هالابيات :
ما ذكـر به حيٍ بكـى حي يا ذيـب .. واليـوم أنـا ببكيـك لو كنـت حيـا
يا ذيب يبكـونك هل الفطـر الشيـب = إن لايعتـهم مثـل خيـل المحيــا
وتبكيـك قطعـانٍ عليـها الكواليـب = شيـال حمـل اللـي يبـون الكفيـا
وتبكيـك وضـحٍ علقـوها دباديـب = إن رددت مـن يمـة الخـوف عيـا
ويبكيـك من صكـت عليه المغاليـب = إن صاح بأعلى صوت يا هل الحميـا
ننزل بك الحـزم المطـوف لياهيـب = إن رددوهــن نـاقليـن العصيــا
أنا أشهـد إنك بينـنا منقـع الطيـب = والطيـب عسـرٍ مطلبـه مـا تهيـا

وفي ليله كان ذيب جالس مع والده , فكان شالح يمازح ولده فانشدله هالابيات:
يا ذيب أنا يابوك حالي تردّى ... وأنا عليك من المواجيب يا ذيب
تكسب لي إللي لاقِحٍ عِقب عدّا ... طويله النسنوس حرشا عراقيب
تجر ذيلٍ مثل حبل المعــــــــدا ... وتبري لحيران ٍ صغار ٍ حباحيب
وأشري لك إللي ركضها ما تقدا ... ماحدٍ لقى فيها عيوب وعذاريب
قبا على خيل المعادي تحــدى ... مثل الفهد توثب عليهم تواثــــيب
أنا أشهد أنك باللوازم تِســدا ... لو حال من دونه عيال ٍ معاطيب
ليث ٍ على درب المراجل مقـدّى ... ما فيك يا ذيب السبايا عذاريب

وبعد ماسمع ذيب قصيدة والده عزم على الغزو ومعه شباب من قبيلة قحطان نحو عتيبه ويوم وصلوا منهل يرتاده عتيبه ... لمحه احد الرماه هو وربعه فاطلق عليه النار وتوفي ذيب بن شالح , فلما وصل ابوه هالخبر .. قال هذه القصيده المشهوره :
يا ربعنا ياللي على الفطّر الشيب ... عز الله أنه ضاع منكم وداعه
رحتوا على الطوعات مثل العياسيب...جيتوا وخليتوا لقلبي بضاعه
خليتوا النادر بدار الأجانيب...وضاقت بي الآفاق عقب إتساعه
تكدرن لي صافيات المشاريب...وبالعون شفت الذل عقب الشجاعه
يا ذيب أنا بوصيك لا تاكل الذيب...كم ليلةٍ عشـّـاك عقب المجاعه
كم ليلةٍ عشـّـاك حِرش العراقيب...وكم شيخ قوم ٍ كزته لك ذراعه
كفه بعدوانه شنيع المضاريب...ويسقي عدوه بالوغى سِم ساعه
ويضحك ليا صَكّت عليه المغاليب...ويلكد على جمع العدو باندفاعه
وبيته لجيرانه يشيّـد على الطيب...و للضيف يبني في طويل الرفاعه
جرحي عطيب ولا بقى لي مقاضيب...وأفخت حبل الوصل عقب إنقطاعه
كني بعد فقده بحامي اللواهيب...وكني غريب الدار مالي جماعه
من عقب ذيب الخيل عِرج ٍ مهاليب...ياهل الرمك ما عاد فيهن طماعه
قالوا تطيب وقلت:وش لون أبا طيب...وطلبت من عندالكريم الشفاعه

ثم اتبعها بقصيده على نفس القافيه :
ذيبٍ عوى وأنا على صوته أجيب ... ومن ونتي جضت ضواري سباعه
عز الله إني جاهل ٍ ما أعلم الغيب ... والغيب يعلم به حفيظ الوداعه
يالله يا رزّاق عِكف المخاليب ... يا محصي خلقه ببحره وقاعه
تفرج لمن صابه جروح ٍ معاطيب ... وقلبه من اللوعات غادٍ ولاعه
إن ضاق صدري لذت فوق المصاليب ... مانيب من يشمت فعايل ذراعه
صار السبب مني على منقع الطيب ... ونجمي طِمَن بالقاع عقب إرتفاعه
يا طول ما هجيتهن معْ لواهيب ... ولاني برادي كسرها من ضلاعه
ويا طول ما نوختها تصرخ النيب ... وزن البيوت إللي كبار ٍ رباعه
وأضوي عليهم كنهم لي معازيب ... إليا رمى زين الوسايد قناعه
أضوي عليهم واتخطى الأطاتيب ... وآخذ مهاويه الجمل باندفاعه
أبا أنذر إللي من ربوعي يبا الطيب ... لا ياخذ إلاّ من بيوت الشجاعه
يجي ولدها مذرب كنـّـه الذيب ... عِز لِبُوه وكل ما قال طاعه
وبنت الردي ياتي ولدها كما الهيب ... غبنٍ لبُوه وفاشله بالجماعه
يا كبر زوله عند بيت المعازيب ... متحرّي ٍ متى يقدّم متاعه

وفي ليله كان رجل من قبيلة قحطان يقاله الهويدي ضاع منه طيره .. ويبحث عنه ويسأل بصوت مرتفع
(من عين الطير؟!) فقــآل شالح هالقصيــده :
إن كان تنشد يالهويدي عن الطير ... الطير والله يالهويدي غدا لي
طيري عذاب معسكرات المسامير ... إن حل عند قطيهن الجفالي
إن جا نهار فيه شر بلا خير ... وغدا لهن عند الطريح اجتوالي
إن دبرن خيل وخيل مناحير ... وغدن مثل مخزمات الجمالي
على الرمك صيده عيال مناعير ... وشره على نشر الحريب الموالي
يضحك ليا صكت عليه الطوابير ... طير السعد قلبه من الخوف خالي
خيالنا وإن عرجدن المظاهير ... وزويزوم عيرات طواها الحيالي
غيث لنا وإن جت ليالي المعاسير ... وبالشح ريف للضعوف الهزالي
يسقي ثراه من الوايح مزابير ... تمطر على قبر سكن فيه غالي