.
مشيت دربك طول الايام رحال
يوم المسافه مالها غير شاعرك
وجيتك .. اسوق الشوق غايات وآمال
ماهمني ياكود صادق مشاعرك
ولو اليالي كلها فيك غربال
تهون في عيني على شان خاطرك !!
غلاك باقي ماتغيّر ولازال
( نبض الخفوق ) اللي على طول يذكرك
عديت من شانك على راس ماطال
وبنجوم ليلي في غيابك .. اسامرك
وجريت باسمك ياغلا الروح موال
وطوّحت صوتي يوم لجّت .. منابرك
وبدعت في وصفك مع الناس الامثال
بالله قلي .. وش كتبت بدفاترك !!
فيني من اسباب الوله فيك زلزال
تطيح ماتاصل مدآآآه بمحابرك
لو شفت كيف الحب يقضي على الحال
ماكان جفّت بالمحبه عبايرك !!
ولو الهوى دايم يجيلك على البال
بقيت في قلبي ( وعقّلت اباعرك )
شلت الحمول اللي عصت كل رجال
ودست المخاطر .. لو تبيني اذكّرك
ضحيت لجلك ما شكيتك للاحوال
ليتك ولو مرة .. تجيني من آخرك
ماقد عصيتك يابعد كل الازوال
حققت ما تطلب .. ولبيت اوآمرك
ادري بك انك ماتعمدت تحتال
حبيبك اللي لو قسى الوقت عاذرك
قدر المعزة داخلي عز واجلال
اسال عيوني عن حضورك وتخبرك
هذا شعوري وسط الاعماق يجتال
يهيم في ماضي زمانك وحاضرك
ومدام دربك لو غدا عمري اهبال
بمشيه لو ماته من الشوق .. شاعرك