بيت القصيد للتعمير

[بنت الاصول]

العين تسهر والعرب مرجهنين
وعينٍ حربت النوم وشو دواها



تشوف الجنف وتشوف شي ٍ من الشَين
والسهر ياجا تالي الليل جاها



وتشوف ناس ٍ كنها الهزم بالعين
اضحك بسني كن صيدي غلاها



اضحك لهم ماتقل أنا خابر ٍ شين
راحت ديون ٍ ماتهيا وفاها



ياما غدا من الدَين وطلابة الدَين
وكثيرٍ اللي حاجته ماقضاها



ولا قدار وصاطي الحكم واطين
ورجلي عن النوهات قصرن خطاها



عيّا لنا شلق الجدود القديمين
غيد ٍ ليا جا الضيف نطلع نماها



ولا نذخره ياكود ماعندنا شين
والله ليا خبر حوال كفاها



قالوا لي اصبر قلت أنا الصبر ياوين
وقالوا تزين وقلت زينه متاها



تبي تقزينا لك الله جلامين
قبل ٍ من النيران يوخذ عشاها



الامرة فزوا له سراد ٍ مساكين
تستاهل الخرية سواعد لحاها



الخرية عند ذقونهم له مقامين
خلط ٍ ولا دونه ولاهي وراها



مالكم امارة ياقلوب البعارين
ثَمِّنْوَها من راس وش مشتراها



ياصرت أمير ولا انت أميرٍ على شِين
ودك تخضب لحيتك من خراها



مثل السلوقي ياسمع حس موحين
ياصاد الأرنب قالوا ارمه رماها



الامرة ماتوخذ وتعطى بلا شين
ياناس هذي قبلكم من لقاها



يستاهل الامرة صعوط المجانين
مثل اخو صلفة شيمته مارماها



ولا ظالت لمحمد صطام الغلامين
بالسيف عيا به على من بغاها



عيوا بها غوش ٍ على الحرب عاصين
شبوا بها نار ٍ توقد سناها



عيا به اللي يشطب الراس راسين
عتّب على حايل ليا ما ولاها



لو يبي ينطي منطيه لابو شرين
مار ان قلبه ماحكى في عطاها



فتله نقض فتل الشيوخ القديمين
ياجوه بالحيلة يجي من وراها



خلا كثير الناس تمشي سيادين
عسّف مصاعيبه وشيّل هداها



خلا السبع والذيب يمشي مع الضين
لو هو توطاه الغنم ما شظاها



وخلا العرب تبني وتسكن من الطين
نتف شواربها ونتف لحاها



وعساه امام عادل ينصر الدين
مادام نفسه مانقطع به رشاها



ومادام ابن مقرن عزيز عزيزين
مثل الزمول ممسدات ٍ خصاها


شلاش بن مناور الضوي