جزء 2 / من 3
للإطلاع على الجزء الاول
http://www.sudeer.com/vb/showthread.php?t=110906
مساكم الله بالخيرات والمسرات
اليوم نكمل لكم الجزء الثاني من رحلتنا للفلبين وهو بركان تال
توجهنا لمدينة تقي تاي من مدينة مانيلا وجلسنا في الطريق تقريبا ساعتين
وصلنا لمدينة تقي تاي وانطلقنا بالقارب الى جزيرة البركان وجلسنا قرابة الساعه في القارب
وصلنا للجزيرة ولازم تاخذ خيل عشان توصل لفوهة البركان لانه بعيد وفي جبال والجزيرة صغيرة ومافيه اي سبل مواصلات يعني اذا بتمشي على رجليك بتتعب ,,
وركبنا 4 خيول وتوجهنا نحو البركان وجلسنا تقريبا اكثر من 30 دقيقة
نبدأ التقرير ,,
هذه صورة وحنا في طريقنا لمدينة تقي تاي
وصلنا لمدينة تقي تاي ونزلنا مع عقبه وجبال خضر وجلسنا تقريبا اكثر من 20 دقيقة في العقبة
طبعا اول ماوصلنا للعقبة لقينا راعي دباب وقال بوصلكم يعني بدلكم قلنا يالله توكلنا على الله
وهذي صور العقبة
بيبلشكم راعي الدباب في الصور بس الشكوى لله
منظر البحيرة من فوق
قلنا بنصور ونوقف ولاحظوا بيبان السيارة مفتوحه كننا ماصدقنا خبر انه يوقف هههههه
كملنا مسيرتنا المصونه نحو البحيرة
تتعب وانت تصور احيانا تستمتع بالاجواء الحلوه وتنسى الكاميرا
بدت تخرب الاخلاق ويضيق الشارع ماتفقنا كذا
قربنا للبحيره
وصلنا للبحيرة ودخلنا نستأجر قارب عشان نروح للجزيرة
صورة للقارب اللي تنقل للجزيرة
صورة لمحدثكم مع الاخ راشد التمامي
[
المهم وحنا نستاجر القارب لقيناهم شابين على اللحمة
انطلقنا بالقارب وجلسنا تقريبا ساعه في القارب
راشد متحمس وجالس يصور
هذي صورة حلوه حسيت ان ذا الكوري منحاش بالخيل
اثاري افلام كرتون صادقين يوم قربنا للجزيرة جت الطيور
وصلنا للجزيرة وطبعا فوهة البركان فوق الجبال يعني لازم تاخذ لك خيل وتمشي حول النص ساعه
والله نطق لنا 4 خيول ودز يالخيااال
بسم الله تونا ماسكين الخط بالخيل
والله مرينا اماكن حلوه وحنا في الطريق
وانت متحمس تدخل تحت شجر كنك في غابات الامزون مع اني ماقد شفتها
طبعا نسيت اقول لكم فيه حبل اصفر طوووويل مره عشان تدل طريق البركان
وانت تمشي تلاقي اصحاب المزارع كلن جالس يقطف
هذا واحد توه رايح يبي يخرف تمر
خلاص ابشركم وصلنا بعد جهد جهيد
هذي فوهة البركان صراحة يمكن الصور ماتظهر الطبيعة بالشكل اللي تراه العين
قربنا شوي من بركان تال
ماحبينا نقرب زيادة لان الدولة محذره من البركان والاقتراب منه في شهر 6
الخيال راشد يصل القمة << تصدق توي انتبه للي ورا الخيل لايكون جالس يدفك ياراشد ههههههههههه
يوم وصلنا فوق ولانا عطشانين بس اشوى لقينا فيه ناس تبيع موية ومشوربات غازية واقحن ياقاحن
صورنا لقطات تذكارية وقمنا نسولف معهم ونسألهم ثم جلسنا وريحنا تقريبا ربع ساعة
وحنا في الربع ساعه الانتظار شفنا لقطة حلوه خل نشوفها مع بعض << دعايات
الاخوان في الله مصيدين تيوس
لييييه يابو الشباب ,, قالوا هذي همل يعني موب لاحد ومانقدر نمسكها تنحاش في الجبال كنها غزلان يعني قلنا طيب وش تسوون بها قالوا نبيع منها وناكل عاد اللي أكد لنا انه صدق يوم يجون ولا معهم بنادقهم
وهذا احد التيوس اللي مصاب ومسكوه شكلهم بيربونه مع الغنم اللي عندهم
والله وملينا قلنا يالله خل نمشي ونتوكل على الله وننزل
الخيال محدثكم كالعادة في المقدمة
والله وندعس عاد نزله الخيل مافيه فرامل يعني تقدرون تقولون اننا وصلنا مصابين وكل واحد باصابه مختلفه
ملينا من التصوير << مليتاا ولا طاقتك ام الركب
قربنا للشاطئ
عاد فيه موقف صراحة لا احسد عليه لاني بغيت اجيب العيد وارجع للسعودية في اقرب طيارة عشان ادخل العانية المركزة << ماعندهم مستشفيات يعني طبعا امشي 13 مليون بالخيل ويجي بثر ابن مبثره خيل صغير جالس يلعب في الطريق مدري ان اللي معي امه ولا مدري وش سالفة ابوه ,,المهم متوجه لي يمشي مليون وانا امشي 13 يعني بغى يصير حادث بسرعة 14 مليون
مدري وش سويت لاحد يسالني المهم اني وخرت عنه بقدرت قادر ,, من هول الموقف قلت لازم اصورة عشان اذا جاني شي لاقدر الله يعرف المرور من اللي غلطان
العودة اسرع من الروحه لاننا في نزله
وصلنا بحمد الله وطاقني العطش واتوقع انها من الخوفه لاني شربت 9 كاكولا و3 بيبسي و2 مويه
جلسنا نسولف شوي معهم ,, والله شعب ينحب على طول ياحليلهم بس
اخر من حط ارجله في القارب محدثكم ورحنا من ديرة البركان
واخذنا بعض الصور للغيوم في العودة بعد تحسن الجو لان الان العصر وخفت الشمس
وحنا راجعين شفنا شبوك وسالنا خوينا راعي القارب وشو هذا
اللي فهمناه انها مزارع للسمك يعني يحط شبك في الموية ومليان سمك ويتكاثر السمك وهذا احد الاحواض
عدنا من الجزيرة لبلدة تقي تاي اللي انطلقنا منها
وابشركم استوت لحمتهم
بعدها توجهنا للسكن واحلى كبسة وبريق شاهي مخدر
يالبيه يالكاتم مانستغني عنك ابد
في الختام اتمنى اني قد وفقت في نقل الاحداث
وانتظرونا ان شاء الله في الجزء الثالث والاخير
تغطية محدثكم + راشد التمامي