ماهي انطباعات اهل سدير عن مكتب العمل بمحافظة المجمعة

[محآيـد]

أنا استغرب من ناس ردودهآ سلبيه بالشكل هذا

الحين ليش تظلمون الموظفين وبين كل كلمه وثانيه الموظف والموظف
الموظف إنسان يؤدي عمل مطلوب منه يعني إنسان مسير وليس مخير
ماهو على كيف الموظف يردك إذا كانت اوراقك سليمه ... انا ابصم بالعشرهـ ان (ماراح ابالغ ) ربع الى يسبون مكتب العمل مخالفين وبالعربي يبغون يمشون امورهم وإذا ردهم الموظف قالو المكتب سئ !!! ...
وبعـدين يمكن سياسة المدير صعبـه صح انا معك وانا من الناس الى يراجع مكتب العمل وتعاملت مع موظفينهم ومع مديـرهم والى اشوفه أن الموظفين يـؤدون مايطلب منهم فـقـط و بالعكس جـدا ً متفهمين وبعدين للأخ الى فوق يقول ما تمشي إلا بواسطـه ! انا اقوله أنك معطي الأمور اكبر من حجمها إذا كان إنسان امورهـ كلها ماشيه صح واوراق سليمه وش تنفعك الواسطه فيه ؟ وبعدين انت بنفسك لو انت موظف ويجي احد تعرفه تفزع له ولا تخليه ؟ وإذا فزعت له صارت هذي واسطه الحين ؟ كلام غريب وعجيب حقيقه ...!! انا اأرى ان بعضكم هو الى متعصب ولا شدخل سدير بالموضوع ؟ الحين الموضوع حول انطباعاتك عن مكتب العمل وش جاب طاري العصبيه هذا من الديرهـ الفلانيه وهذا من الديرهـ الفلانيه ... لكن كل إناء بما فيه ينضح ...

[ويلاه]

السلام عليكم

ياجماعه والله مكتب العمل مو سيئ ولا امدحه لكن العيب كله في الاداره


ولي عوده وتعليق ...

تقبلوا تحيتي

[عاشق نفسه]

اهلا وسهلا بموظف المكتب ،، جابك الله

اول شيء كتابة الموضوع من القهر اللي اشوفه في مكتبكم ،،

واكيد ما احد يكتب شيء الا اذا كان في خاطره شيء

كان سب او مدح ،،

ثانيا ،، انت شفت كثر المواقف اللي حصلت في الردوود وانه
ما هو انا لحالي اللي يشتكي ولو كانت هذي ردة فعلي لحالي
اكون معك انا غلطان لكن من 15 رد ما فيه الا واحد اللي مدح

يعني ما يعادل 7 او 8 % بالمئة يعني تقريبا 93 % يتذمرون منكم

يعني كلهم غلط وانت الصح ،

اما المساواة بين المراجعين هذي غريبه لكن لوكان كلامك صحيح
وفيه مساواة ياليتها على سنع بنظام والشيء اللي يقهر

بعض الانظمة عندكم غير منصوووص عليها نظاما

ومثال ذلك اليماني والباكستاني في المنشأة جديده ،،

من اين لكم النظام . واحد من ربعي جاء يقدم عليكم على مؤسسة

وطلب يماني وباكستاني ورفضتووو ، وراح ياخذ مصريين وهو ما يبيهم

وجاكم واحد بعده واعرفه شخصيا وطلب يماني وباكستاني ورفضتو
وراح للامير يشتكي واعطيتوه الجنسيتين واتحداك تنكر هذا الموضوع

وتقول المدير عنده مساواة مع الجميع .

هذا النظام من وين مطلعينه انتم، مع احترامي الشديد بتقول المدير

وش دور الموظفين طيب كل ما قال شيء المدير قلتوو سم

هو استعبدكم وصار يتحكم فيكم حتى في الشيء الغير نظامي

توافقونه عليه . لازم ما توافقونه الا على شيء منصوص في النظام

وتعتمدون على تعاميم من الوزارة ماهو منه .

اما كلامك جميع الدوائر معقدة ، بس ماهو كثر تعقيدكم

مع احترامي الشديد لك


اما جميع الدوائر الحكومية محكومة بتعلميات وقوانين

فياليتكم تطبقون التعليمات بحذافيره بدون زياده ولا نقصان

كان صرنا بخير ،،،

[المغترب]

شكرا على التعقيب من الاخ :موظف مكتب العمل

للأسف ردك (ودفاعك رغم طوله وتفصيله لجميع ردود الاعضاء)
لكنه غير مفيد ولايعالج المشكله !!!

والسبب:

أنك تتعذر بأن:
(لكل موظف اختصاص وعمل محدد لا يزيد عليه )
(نظام الادارة صعب ومعقد وش ذنب الموظفين
ما في يديهم شيء نظام مفروض عليهم 1 + 1 = 2 )


واقول : انا لااطلب الموظف بان يقوم بعمل غير عمله المناط به
ولكن اطلب منه الاستقبال الجيد للمراجع وتوجيهه للموظف المختص
اظهار القليل من الاهتمام للمراجع الواقف امام الشباك

وبعدين كل الموظفين في غرفه واحده كبيره والمفروض يتعاونون في تخليص اجراءات المراجعين

لكن افهم من كلامك وتركيزك على نقطة ان لكل واحد عمله المختص فيه
ان جو العمل في المكتب غير مريح لكم كموظفين وغالبا يكون السبب من المدير
فيكون الموظف مشحون ومتضايق ويؤدي عمله وبس ولايهتم باللي يصير عند غيره
لأنه يشتغل من غير نفس وهذ اللي لاحظته.


وبعدين:
وترى كل الدوائر الحكومية عندها موظفين ولكل موظف له عمله المختص به وعندهم نظام صعب ومعقد مثلكم لكنهم يستقبلون الموظفين بنفس زينه وشوي اهتمام.
انا لما اقول هالكلام ما اطالب الموظف بتجاوز النظام بالعكس احنا نعين ونعاون
بس المطلوب شوي اهتمام بالمراجعين فقط

هذي وجهة نظري وتعقيبي
ويمكن اكون غلطان
ودمتم

[ماجد بن إبراهيم]

السلام عليكم

والله الشباب ماكذبوا...حدث عن مكتب العمل ولا حرج...
أنا راجعت مكتب العمل مرة ووقفت عند الشباك أنتظر أحد من الموظفين يرد علي .. وفيه موظفين داخل يناظروني ويرجعون يسولفون ماكأنهم يشوفون .. إلين جاء موظف مكتبه قريب للباب وهو اللي استقبلني وأخذ أوراقي ووجهني أروح للحاسب وطلعت لموظف الحاسب فوق .. واستقبلني أحسن استقبال وجاب لي شاهي وماطلعت إلا خالص .. الله يجزاه خير...

المشاركة الأصلية كتبت بواسطة المغترب   شكرا على التعقيب من الاخ :موظف مكتب العمل للأسف ردك (ودفاعك رغم طوله وتفصيله لجميع ردود الاعضاء) لكنه غير مفيد ولايعالج المشكله !!! والسبب: أنك تتعذر بأن: (لكل موظف اختصاص وعمل محدد لا يزيد عليه ) (نظام الادارة صعب ومعقد وش ذنب الموظفين ما في يديهم شيء نظام مفروض عليهم 1 + 1 = 2 ) واقول : انا لااطلب الموظف بان يقوم بعمل غير عمله المناط به ولكن اطلب منه الاستقبال الجيد للمراجع وتوجيهه للموظف المختص اظهار القليل من الاهتمام للمراجع الواقف امام الشباك وبعدين كل الموظفين في غرفه واحده كبيره والمفروض يتعاونون في تخليص اجراءات المراجعين لكن افهم من كلامك وتركيزك على نقطة ان لكل واحد عمله المختص فيه ان جو العمل في المكتب غير مريح لكم كموظفين وغالبا يكون السبب من المدير فيكون الموظف مشحون ومتضايق ويؤدي عمله وبس ولايهتم باللي يصير عند غيره لأنه يشتغل من غير نفس وهذ اللي لاحظته. وبعدين: وترى كل الدوائر الحكومية عندها موظفين ولكل موظف له عمله المختص به وعندهم نظام صعب ومعقد مثلكم لكنهم يستقبلون الموظفين بنفس زينه وشوي اهتمام. انا لما اقول هالكلام ما اطالب الموظف بتجاوز النظام بالعكس احنا نعين ونعاون بس المطلوب شوي اهتمام بالمراجعين فقط هذي وجهة نظري وتعقيبي ويمكن اكون غلطان ودمتم

بارك الله فيك..