اختراعات منتدى الصيد

[مفتون صيد]

مشكور المولع وابوعبدالله على المرور والرد ........
وانا مره جربت السفن اب لانه ما كان فيه مويه ولا كان فيه ليمون وماعليه يزبن ;)

---------
ابو عبدالله والله اخاف نسير عل المستشفى ......... لاكن ابقول شي ويمكن يضيق صدرك ترى ياشباب البلاستيك اضر شي مع الحراره ......... لكن اذا ازمة الامور مالك الاهو

[الصقر الحر]

هذا دافور ممتاز نازل قريب وحجمـــــــه صغيــر جدا
وتحصله عند محلات أغراض البر دافور ممتاز لطلعات البر وصغير بالحيل
والعين حقته تتصفط ويكون حجمه حجم كف اليد إذا كانت مضمومة الأصابع
ولا يأخذ مكان يذكر في عزبة البر وهذا ما يميزه
وجودته مهيب على حجمــــه بس عيبه الوحيــد إن سعره غالي شوي بـ 160 ريال وصناعته سويسرية
ويأتي معه غاز بعلبه تقريباً (1) لتر لكن يمكن أن تزيله وتركّب بدلاً منه برميل غاز 25 لتر
ويأتي معه كذلك مولد شرارة ( زند ، قداحه ) .



والنوع هو من نوع بريمس ووكيله با دحمان وهو نوعين
نوع بقداح وموصل بلي صغير وسعره كما قالنا 160
ونوع بدون يركب على الغاز مباشرة وسعره 60 بدون قداح وهوممتاز جدا
يستطيع غلى لتر من الماء خلال 3 دقائق
ويمكن استبدال الغاز الذي ياتي معة بالغاز الذى يتم تعبئتة
ولكن بعد تركيب توصيلة خاصة ( لايتم بيعها ) انتاج محلي

وهذي رابط موقع الشركه المصنعه بتفيدك اكثر

http://www.primus.se/konsument/as_e.htm

[المولع]

عز الله انك ما قصرت و بيض الله وجهك على الإفاده الجميله بخصوص هالدافور الزين و خصوصا حجمه ممتاز جدا و خاصه لتضبيط الشاهي الي انت خابر ;) ...

تقبل تحياتي >>>>>>>> المولـــــــــــع

[مفتون صيد]

هاذي بعض الافكار اللي اقدرافيدكم بها واتمنى انها تحوز على اعجابكم........
الفكره اللي ابقدمها هي كيفية تسوي توصيله طويله للكهرب من البطارية حقت السياره الى المحول او الى اللمبه مباشره
او الى كبس نور قوي .... الخطوات بسيطه وسهله وهي:

1- لابد انك توفر اسلاك كهرب بلونين مختلفين واحد للسالب وواحد للموجب







====
2- يجب عليك ان تشتري ولاّعه وهي متوفره في جميع محلات زينة السيارات ويتحسن ان تكون مثل اللي في الصوره
لانها اسهل في التركيب








====
3- توفير مساكات او قضابات بلونين مختلفين عن بعض لكي تميز بين الموجب والسالب ويكون حجمها متوسط مثل اللي في الصوره









====
4- تقوم بتشبيك الاسلاك في الولاّعه وكذلك القضابات وكل واحد على حده وهي واضحه في الصور الاولى






====

5- لاحظ المسافه التى ستخدمك من ناحية الطول وتقدر تشبك عليها اللمبه اللي في الخيمه حتى ولو كانت بعيده عنها وهذا يعتمد على
حسب الطول اللي يرغب فيه صاحب العزبه وحتى يمكنك تركيب عليه المحول اذا كان عندك اي جهاز في الخيمه وتريد ان تشغله مثل التلفاز









اتمنى انني اكون قد وفقت في نقل الصوره اليكم بالكامل ولي رجعه ان شاء الله بشيء جديد واتمنى ان الاخوه الباقين يكتوبون باللي يعرفونه
عن عدة واختراعات العزب ....... وتقبلوا اخلص التحيه

[المولع]

ايه هذا الشغل الزين ، ساع ما طلعت الافكار ;) .. الله يعطيك العافيه ....

[اتيكا]

ماشاء الله طلعت الكاميرى وطلعت الإختراعات

الله يعطيك العافيه أخوي مفتون على هذة الطريقه وعلى هذة الشرح الوافي


وتقبل التحيه

[مفتون صيد]

اشكرك المولع واتيكا وما قصرتوا على المرور ولكن كنت اطمح ان الموضوع يلعلع بالمشاركين ولكن ربك ييسر

وعلى العموم انتم ابشروا باللي تبون وعسى ربي يقدرني على خدمتكم وخدمة اعضاء هذه المنتديات باللي اقدر عليه


وتقبلوا سلامي عليكم

[اتيكا]

هي عبارة عن مجموعه من القصبات متداخله في بعضها البعض وبمقاسات مختلفه وأطوال مختلفه





وهي مصممه أصلاً لصيد السمك ولكن يمكن تحويلها والتعديل فيها لتصبح أداة لتنزيل الدخل الناشب من الطلح

[المولع]

وفعلا هالسناره اختصرت الجهد ، و خصوصا بتريح الواحد من تسلق الأشجار و تعريض نفسه للسقوط ، او ربما يقوم برمي الحصى على الدخل الناشب في الطلح علشان يطيح و يمكن يفلق نفسه والا اخوياه من غير قصد ;) ..

مشكوووووور و ما قصرت ...

[مفتون صيد]

صدقت اخوي المولع واله انها تريح من الفلق وكسر قزاز السياره

مشكور اخوي اتيكا وطول عمروانت تفاجأنا بالافكار الحلوه

[ابو صالح]

الله يعطيك العافيه 0
ابشر بالخير انشاء الله

[اتيكا]

تصدقون ياأخوان أن السنارات أنقطعن من السوق

اليوم أن موجود عند محل رمايه في تمير أصلح عندة لي غرض

ويمن سئلته عن السنارات ألي في المحل قال لي خلصن

تصدقون أنه في أقل من أسبوع خلصن من السوق

ويقول العامل عليها أقبال كبير مدري وش السبب

بلا والله مادري أن ألحن مسوين عليها دعايه بالمجان في المنتدى

وأصحاب المحالات يربحون (الله يرزقهم) وألحن قاعدين نتفرج عليهم

[المولع]

شف وانا اخوك (( الدال على الخير كفاعله )) ونحن انشاء الله نحتسب الأجر و التوفيق من الله على ما نقدمه في المنتدى ، ومن يدري لعلك تكسب دعوة صالحه و من قلب مخلص ، و قد تكون فاتحة لباب الخير عليك ، و تتوفق في الصيد ;) ..

[أبوجاسر]

الله يعطيك العافية اخوى اتيكا على هذا الموضوع الزين.
يوجد شىء اخر احسن واقوى وارخص وعملى اكثر من السنارة وهو خطاف الحبال والعوامات الذى يستخدمه اصحاب القوارب وصيادين السمك وهو مصنوع من الالمنيوم القوى وهو يكون على شكل سكوب اى يتداخل فى بعضه البعض ويصبح من السهل وضعه فى السيارة وممكن التحكم فى طول الخطاف ليصل الى 4 امتار وهناك اطوال اخرى تصل الى 6 امتار واكثر وهو له استعمالات عديدة ومفيدة لاصحاب البر مثل انه يصل الى اغصان الشجر العالى وقادر على هزها او احضار اى شىء بينك وبينه عائق مائى اوطينى ....الخ لان فى نهايته يوجد خطاف. وكذلك استعماله للدفاع عن النفس من الحيوانات البرية والزواحف الخطرة .وهو موجود عند محلات بيع ادوات الصيد البحرية عندنا فى الكويت واكيد موجود فى السعودية فى المدن الساحلية.

ابو جاسر

[المولع]

مشكور على هذه الاضافه الرائعه و المفيدة ..

تقبل تحياتي ،،،،
المولــــــــــع