| من مذكرآت صبآي |

[لواء العز]

المشاركة الأصلية كتبت بواسطة لواء العز   في يوم من الأيام كان عمري بين الخمسة سنوات أو ستة, صرت أروح مع جدي للغنم, وأحسن شيء لما يسمح لي أروح أراكض ورآها وأقول هش هششش هششش وأغني لها... ومرات يأخذني معه لراعي اباعر قريب مننا.

ههه . أعجبتكم هشش.

كانت روحتي للغنم أنجاز مهم وكنت أحس ذاك الوقت أني ارتقيت. وصرت كبير مثل جدي. كان الله يرحمه حنون علي كثير ودائم يستمع لي و يسولف معي. أول ما نزلت معه كنت خايف من ذا الوحوش هع. وكنت ألتفت لكل وحدة تتحرك وإذا تحركوا كلهم. أنادي في جدي خايف عليه منهم. لكن بعد شوية وقت تعودت وتعلمت وش الزين وأيش اللي مو زين, للذبح. ما كنت أسمع لها أصوات وضنيت أنها ما لها صوت. لكن بعد فترة كنت واقف مع جدتي في وسط الحوش, تحلب غنمها, شوي وإلا اللي جنبي (( بااءااء )). ههههه.ردة فعلي كانت. أنحششش يا ذيبان. بلا جدة بلا هشش خخخ. والحمد لله تيسرت معي وقوى قلبي. كانت البداية مخيفة لكن أدركت أنها بهائم لا حول لها ولا قوة. كان راعي الغنم اسمه بيتر خخخ امزح اسمه مارسيينغ. لما يرجع مع الغنم للشبك كنت أركض له عشان أساعده. وأسمع يقول هش هش. وأقلده وأخذ حصاي وأرجم للجهة الثانية عشان نحافظ على طريق سيرها ولا تتفرق. احم احم من قدي استراتيجيات ذا الغنم . لكن تو ما بعد غنيت لها. في يوم من الأيام رحت مع جدي لراعي اباعر. لون بشرته سمرا بالحيل وقصير. كنت مستانس عليه لأنو مو لازم أرفع نفسي يوم اسلم عليه. ههه >> موجعته وهو صغير. وكان يمد يده لي ويسلم سلام الرياجيل مو مثل أعمامي وخوالي يمسكون كتفي ويحبون راسي وأسئلتهم لي وش اسمك؟ من أبوك؟, ولا السؤال التعقيدي. أنت ولد أمك ولا أبوك؟>>لا ولد جدتي. يطفشون بعضهم أما هو يسألني شلونك كيف حالك وسكت عني. مرة من المرات جدي خلاني عند الرجال لحالي. يبي يورد الوايت ويرجع. جلست معه حوالي ساعتين. بعد ما راح جدي بفترة قصيرة. راح يناظر اباعره ويغني لها. ما فهمت وش يقول. المهم سكت ومليت من القعدة ودي أقوم وما أودي أقوم. كنت خايف من البعارين خوووووف أكبر بكثير من خوفي من الغنم قبل. واللي بغى يجيب لي جلطة قلبية ودماغية وكل أبو شي. يوم قربت عندنا. ههه جسمي صغير وهم بالنسبة لي فيلة ذاك اليوم. المهم قمت وجلست جنب الرجال. أبي أفك عمري من ذي والرجال لاحظ خوفي. لكن ما سوى شيء وهي تقرب مننا وتقرب مااش وصلت معاد بهي بعيد, قربت بسرعة ومدت راسها علي.شوي و ينقز ذا البزر من الفرشة وأطير طيران للخيمة. ههه الرجال يضحك وأنا ميت من الراعه. دخلت الخيمة لقيت بنت كبيرة وعجوز. سلام... وتنفسي سريع. أبي اجلس عادي؟.. البنت تقول أجلس تعال عندي. جلست والعجوز سؤال طوالي من هي أمك ولسان حالي يقول يا طير أبو لمبة خل نأخذ هواء شوي. سكت لأني ما أبي اعلم اسم أمي. ههه كان شعوري ساعتها مصايب. لكن البنت أعطتني مويا وهدت راعتي. وجلست معهم إلى أن جاء جدي. ويوم رجع. قلت له اللي صار وأخذني من يدي ورحنا للبيت. وفي يوم ثاني رحت للغنم معه ويوم وصلنا خلاني ألهو وحدي مع زقزقة العصافير>> يمديكم على الوصف خخخ. أنا أول ما شفت الغنم رحت اغني. احسبها بتجيني مثل ما جات الاباعر لراعيها هذاك لكن ما جات ورحت طوالي آخذ شعير وأنثره قدامي. إلا وتجي مسرعة لمي. وأهج كعادتي.

بعد هالكلام الطويل اللي مدري شلون ذاكرتي الضعيفة تذكرته لكن الأحداث تتابع مع تذكري ذيك الأيام. مرة كنت كاشت مع العائلة في البر. كنا نلعب كوره أنا وأخواني في البر ونحشة. لكن بعد شوية وقت انفصلت عنهم وابتعدت. شوي والمفاجئة العظمى في وجهي حية قدامي (ثعبان). أنا جمدت ما قدرت أتحرك وصرت أقول هشش هشش ههههه يالله. ماش ما راحت وكنت مصر على هشش. لكن الله أنجاني بأبوي. ولما كان يسألني وش بلاك وراك تقول هشش. معاد قلت شيء. وهشش هاذي خلتني أصمد وأحس أني أقاوم. وكالعادة أحنا يالعيال نقاوم وأبهتنا هم اللي ينقذونا ويعلمونا.

تحياتي.

[عذبة الصفات]

مشاءالله وش هالمتصفح الي يوسع الصدر والله كثرت الصفحات عقبي
يبغالي كوب شاهي منعنع عشان اقرا كل الصفحات

بس قبل لا اقراهم بقولكم موقف يخوف صار لي قبل تسم يوم وتعمدت أكتبه هنا عشان أنبه البنوتات

كنت رايحه أزور أهلي ولما دخلت قالوا لي خواتي الثنتين انهم بيروحون السوق يتجهزون للجامعه وقالوا لي تعالي معنا ورحنا مع أميمتي المهم لما دخلنا المول جلست افرفر في المحلات وأنا فاتحه فمي مدري وش أبدي كل المول دسكاونت وسحبت على خواتي وجلست أتقضى لنفسي
وخلصت طلعت من المحل وشوي أفترقت عن مامتي وفجأه أدور جوالي مالقيته قلت عادي شكلي حاطته مع أمي ورحت أكمل وشوي يأذن للصلاه واقابل ميمتي واقول يمآآآه عطيني جوالي!!
وتقول امي مامعي شئ وافتش وادور ولا القاه

انا مت من الخوف مو عشان الجوال بقريح الي روعني وأزم نفسيتي ان يوم زواجي قبل تجي المصوره خواتي صوروني بجوالي طبعا أنا ماعمري صورت نفسي بس ذاك اليوم كنت لاهيه ومب لمهم
طبعا امي ماتدري ان فيه صوري وانا كنت ناويه امسحهم بس كل يوم اقول بكره وأنسى
طبعا في السوق صرت كأني مجنونه من الخوف خايفه لو درت أمي ورجلي عن الجوال الي ضاع ان فيه صوري كان ينتفوني نتفه نتفه
واجلس ادعي ربي وكذآ واقول لسكيورتي جوالي انسرق هو سكت ووجه يقول ..
وش اسوي لك يعني

سبحان الله ربي الهمني اني ادور على المحلاات اللي دخلتها وارن من جوال امي
واجلس ادور و اتسمع نغمه جوالي
وتقريبا بالمحل الرابع اسمعه لاآ مو مصدقه وانادي امي والسكورتي
وهم بعد كذا ونحرن عن باب المحل حنا الثلاثه لين ماخلصو من الصلاه ويجي المصري
وانا ويفتح المحل قسم بالله اني داخله قبله وهو يقول في ايه في ايه


سبحان الله الحلال مايضيع صرت من ثوارتي حاطته على رف من رفوف الملابس ولا احد درى عنه ولا شئ باقي زي ماحطيته انا من زود الشفاحه على التخفيضات نسيته

بنات انتبهوا من التصوير اخر شئ كنت متوقعته ان جوالي يضيع بس سبحان الله كأنه تنبيه والحمدالله انه ماضاع

[قلم صريح]

أنيق في كلشي يالواء العز :
ماحلى ذكريات الطفولة إذا كانت بين الأهل و الأقارب
تمتعت بمغامراتك و تجاربك و تخيلتك بذاك الثوب الأزرق الصوف و الطاقية و الشعر القرعه و حافي وسط هالبر , و لاَّ ؟

[لواء العز]

أهلين صاحبي.
صدقتِ جميلة هي الذكريات, والأجمل لما يكون عندك ألبوم مجمع فيه صورك في المناسبات وأيش كانت.

ههه. لا. كنت ألبس ثوب وكنادر أم 20ريال الله يكرمك ههه وكنت لما أرجع من الغنم أمر بحالة استنفار شديد بين الوالدة وخالتي. يغيرون هندامي كامل ما شاء الله ألقى الحمام الله يكرمك جاهز و مويته دافيه, والصابون الأخضر ذاك ههه ما قدرت أنساه. هاذي صورة لقيتها في شهادة مغبرة. خخخ. كأن عمري وقتها ست سنوات أو سبعة.

ههه>> إثبات أني مو قرعه وقتها

>> عذراً يا صحبة. أخشى أن أكون قد أخذت راحتي أكثر في المتصفح! لكم ما تبقى ولي عودة إن شاء الله.

[طيف الأمل]

ماشاء الله تبارك الرحمن ‏...‏ مغامرات عجيبه يالواء ومطامر بين البعارين والخرفان ‏

بعذر البنات يلتمون حولك بعد هالصوره وهالشعر المشط وهالأدب الواضح مالومهم بعد كذا ‏

بس أكثر شئ عجبني خلاك تلهو مع زقزقة العاصفير ‏...‏ الله يوسع صدرك بالعافيه ‏

‏******************‏

أستاذ ‏/‏ قلم صريح ‏

اشتقنا لأم صعرور وسوالفه وينها ماكملت لنا يالله عطنا مما أعطاك الله ‏

وأهم شئ وش صارت الآن هذا أهم نقطه في الموضوع ‏

‏***************‏

زخات وينك متصفحك أصبح عامر بالصور الزينه والمغامرات العجيبه ‏

ننتظرك ‏...‏ ‏

[قلم صريح]

لواء هالحركات قديمه , كنت أسويها قبلك , تطلع صورتك مو علشان صورتك لا , تبي تورينا إنك ناجح , بس و الله جنتل بحق .
أم صعرور مقهورة من سالفة لواء و دها تقابله ذاك الوقت و تغير هالتسريحه إلى حوسه .
و سالفتها ماتنتهي

[طيف الأمل]

إلا صدق ياأستاذ قلم عندك صوره لأم صعرور وهي صغيره ‏

تنافس فيها صورة الأخو ‏/‏ لواء وتغطي عليه ‏...‏ ههههه

[لواء العز]

المشاركة الأصلية كتبت بواسطة طيف الأمل   ماشاء الله تبارك الرحمن ‏...‏ مغامرات عجيبه يالواء ومطامر بين البعارين والخرفان ‏ بعذر البنات يلتمون حولك بعد هالصوره وهالشعر المشط وهالأدب الواضح مالومهم بعد كذا ‏ بس أكثر شئ عجبني خلاك تلهو مع زقزقة العاصفير ‏...‏ الله يوسع صدرك بالعافيه ‏ ‏******************‏ أستاذ ‏/‏ قلم صريح ‏ اشتقنا لأم صعرور وسوالفه وينها ماكملت لنا يالله عطنا مما أعطاك الله ‏ وأهم شئ وش صارت الآن هذا أهم نقطه في الموضوع ‏ ‏***************‏ زخات وينك متصفحك أصبح عامر بالصور الزينه والمغامرات العجيبه ‏ ننتظرك ‏...‏ ‏

حياك الله أختي طيف الأمل. ههه ليت لي من العربية الفصحى نصيب. ثم أخيتي إننا نشتاق أن نقرأ لكم والجميع عن ذكريات طفولتكم. فهل تفاعلتم معنا. ^_^

[لواء العز]

المشاركة الأصلية كتبت بواسطة قلم صريح   لواء هالحركات قديمه , كنت أسويها قبلك , تطلع صورتك مو علشان صورتك لا , تبي تورينا إنك ناجح , بس و الله جنتل بحق . أم صعرور مقهورة من سالفة لواء و دها تقابله ذاك الوقت و تغير هالتسريحه إلى حوسه . و سالفتها ماتنتهي

ههه تدري بجيب الحصالة و أدور عليكم تنجحوني خخخ. و يويل اللي يحط أقل من عشرة ريال هع هع. أزاعله ترى .

عطونا من علومكم وزيدونا. وجزاها الله خير أختنا زخات المطر على هذا المتصفح السعيد. جميعنا نحتاج مثل هذه اللحظات ^_^. متشكرين

[طيف الأمل]

أنا في الأبتدائي كنت عاقله ومؤدبه شيطيني ماطلعت إلا بالمتوسط ‏

كنا نسوي إجرام بالمدرسه حتى إن مديرتنا ملت من شوفتنا وعمايلنا وقالتها لنا بالفم المليان ‏...

أذكر وأنا بسادس ابتدائي كنت أرجع من المدرسه مشي أنا وبنت جيرانا وطبعا نخلي الطريق بدال ماهو عشر

دقايق نص ساعه شوي عند البقاله وشوي نغير الطريق ونلفلف يمين ويسار حركات ‏

المهم ذاك اليوم من شفاحتنا مرينا على عماره توها على وشك تخلص بناها ‏

[طيف الأمل]

أكمل السالفه ‏...‏ ‏
قعدنا نتفرج عليها كأننا ماشاء الله بنصير مهندسات ** ‏

المهم ماحسينا باللي يراقبنا من ورا ويترصد لنا وحنا غافلات المهم بطرف عيني ‏

لمحته وبلعت ريقي وهو والله نشف من شوفته ** كلب ** أعزكم الله ‏

شكله سلوقي بعدين قعدنا ناظر بعض ومشينا ومشى ورانا ونسرع ويسرع

قلت مافي إلا نحط رجلينا ونشمر ونركض بلا مياعة بنات وفعلا ركضنا بأقوى سرعه ‏

بنت جيرانا حظها حلو دخلت بيتهم وأنا توهقت وصار بيتنا بعيد شوي وقعد الفلف فيه على بالي

بضيعه لكن وراي الين رجعت مره ثانيه للعماره نفسها وهو قعد حارس على العماره

وحبسني فيها وأنا اتنافض من الخوف والتعب والصياح وجميع كل أبو شئ ‏

وبعدها أطل من فوق أبغى أحد يمر ينقذني مافي لاعمال ولانقطة رجال وقعدت

حوالي ساعه كذا الين جاء ابو جيرانا وسمع صوتي وحاول يبعده عن طريقي وأنا

أركض وأطيح من الخوف وأنا راجعه للبيت ‏...‏ ‏

وطبعا شكلي مبهذل وحالتي حاله والشنطه بجهه والعبايه متعلقه وشوشتي طايره ‏

طبعا ماقلت لهم أني لاحقني أي شئ سويت لهم فيلم وأنا البطله فيهم وكأني أنا االلي لاحقه

الكلب ‏...‏ من الشجاعه اللي فيني ‏...

[وَدْقْ ,]

ماشاء الله وش هالحركات وش هالتطورات

معليش انشغلت بس اعجبكم قلبي معه < برا

لواء سبقني قلم كنت بقول بتعلمنا انك ناجح وحصالة اجل ظف شهادتك وحصالتك ترى الزكاة تحل لنا ههههههههههه

وعلى طاري صورتك ذكرتني بملامحي الطفولية وشعري الكارية والفرقة الي غصب تصير مثل فرقة امي تماما ههههه ماتسمح الصورة انزلها ماتواجه لان فيها لمسات الموقة والتصنع لذا اهي مزورة وشكرا

منور المتصفح لاتطول نزل نزل لك مساحتك ,

الا قلم صريح الحمدلله على السلامة قصرت وانا اقولك كمل قصة ام صعرور الفاتنة ههههه

عذبة الصفات انتبهي النوبةالثانية على طاري التصوير مو عادتي اصور بس عندي جوال واحد اصور فيه صحيح امسحهم ولااصور واجد بس احاول مااخذه معاي للسوق على انه اهو الرئيسي بس كلش ولا صوري المحذوفه ههه

طيف الامل انا لله وانا اليه راجعون ياشين الكلب لااستقعد ؛ ماشاء الله وش هالشجاعة وش هالبطولة ماشاء الله عليتس لايكون بس حولتي قصص شجاعتك عدد حلقات برزينت بريك ههههههه الحمدلله على السلامة كلش ولا الكلاب احسهم مايحبوني < من جد احتسي تراي

لاتبطون ولاببطي < تهديد

.

[قلم صريح]

المفروض تحطون " أم صعرور " فلم مُرعب , مو روايه .
الحاصل :
ثبت عليهم الإعتداء و خذوا ديه لأننا شفنا معها سيكل من نفس محل الحضرمي خذوه مقايضه للفلقه , تطورت وصارت بدل ما تتعلق بالونيتات , صارت تمسك الصحن حق الونيت وهو يجرها و هي فوق السيكل.
صارت تأجره الدوره بقرشين على العيال , و ستاجره " حويلان " و ركب معه "الأصقه " علشانه مشترك معه في الحمام , عندهم عشة حمام في سطح " صقيه " , و ذولا ذرقان مايتعلقون في ونيتات, يتعلقون في عربانة راعي القاز , اللي يجرها حمار . و إذا إنتبه اليماني نزل عليهم و رجمهم بالحصى , و الا ينفلق الا صقيه لأن سمعه ضعيف و راكب ورا مايشوف اليماني إذا نزل , يجدع حويلان السيكل و ينحاش و ذا مايدري وش السالفه , مسكه ابو يمن و كمخه تكميخ و خذ السيكل معه و رجعوا بدون السيكل ,, يؤ ...

[نورالشمس]

مساءكم خير ومطر ...
وحنين الى ايام الطفوله والبراءه ...

سأجرب حظي اليوم هنا وأشارككم بعض من مقالب الطفوله لكن اسمحوا لي ربما سيكون هناك اندماج بالكتابه ما بين اللغه العربيه ولهجتي ..حتى يسهل فهمها ..اوك؟ طبعا من بعد إذنكم ؟!

كنت عم بدرس تقريبا من قبل شي ساعتين ، وآل يعني تعبت شوي من الدراسه قلت بدخل المنتدى ازهزه عن نفسي شوي ...وتنقلت في القسم الادبي بداية وكالعاده ..فجيت لهون حتى اشوف الاضافات الجديدة من مقالب طفولتكم ..
فخطر ببالي اشارك بعد ما قرأت عن مقالب مدرسيه هنا ...

في يوم
أجت معلمة علوم جديدة على مدرستنا ..كنا في الصف الثامن= الثاني الإعدادي
كانت خريجة جديدة يعني صبيه صغيرة ...وكان في ذاك الوقت صف الثامن أسوأ صف في المشاغبه بحكم سن المراهقه ..والكل بيعاني منه ... وحتى تقدر تسيطر علينا وتكسب ثقتنا المسكينه قالت لنا انا ما حتعامل معكم معلمه وطالبات حنكون خوات وبس ....وطبعا اي معلم جديد بيكون تحت الإختبار من قبل الطلاب يعني بيختبروا شخصيته شوي شوي ..وبما انها قالت هيك وكأنه صدر عليها حكم الإعدام مسبقاً وبقرار منها !!
لما بتزكر كيف كانت توقف قدامنا وتحاول تسيطر علينا ..عنجد بحزن عليها كتير المسكينه !
كانوا البنات لما يزهئوا ( يضجرن ) من الحصة يطلبوا مني أوقف حتى أسألها سؤال لحتى تضيع الحصه ....

كيف؟
انا طريقة كلامي أحياناً سريعه جدا ..متل قرائتي برضو ،أحياناً !
فكنت أوقف لحتى أسألها ..كنت ابدأ سؤالي ببطء في البداية يعني شوي شوي ..بعد شي كم كلمة كنت أدمج كل الكلمات مع بعض مرة واحده فتطلع الحروف متشابكه ..وهات حلها يا زكي ، او ترجم يا مترجم !!

مس عفاف المسكينه كانت تقولي نور الشمس حبيتي شوي شوي حتى افهم وافهمك ..وأنا ببراءة أقولها اوك آسفه مس ..وأبدأ من جديد ..ونفس الشي أكمل ...والبنات مو قادرين يمسكوا نفسهم من الضحك
وهيك كنا نضيع شي تلت ساعه أو أكتر من الحصة !!

فلما تخرجت وأصبحت مدرسه ..كلللللل الآفلام اللي ممكن يعملوها الطلاب ما بتمرء علي !!

وبنفس الوقت ما بلومهم لما بتزكر حالي، وبعطيهم العذر .... ولازم نتحمل شقاوتهم وبمحبه، إلا طبعاً
بعض المواقف المخله كتير بالأدب وفوق المحتمل .

بتمنى أكون ما تئلت عليكم بكلامي ..بس قصصكم شجعتني اشارك اليوم ....ومتل كل الطلاب سواء كانوا صغار او كبار بيحبوا يتهربوا من الدراسه لبعض الوقت ..فأنا عملت متلهم هلأ!

وكالعادة بتمنالكم
نهار سعيد

[قلم صريح]

بالنيابة عن صاحبة الموضوع و إصالةً عن نفسي " أنا المشرف لا تقولون وش هالملقوف تراي متعقد منهالكلمة " أرحب فيك و في لهجتك و بسواليفك.
كنتِ في الموعد , حياك الرب الكريم أختنا الفاضلة نور الشمس .