[align=center]*
[align=left][/align]
*[/align]
أبوي !
أمي !!
أخوي !!!
ليه ضلمتوني !!!!
*
*
اليوم : الاثنين
المكان : غرفة أسماء ومنال
الساعة : 4:30 عصراً
< الأم > :
أسماء جاهزه يا بنيتي ! هذا صوت الجرس شكلهم وصلوا !
أنجزي وأنا أمك معد به وقت عسى الله يكتب لك الخير
ويجعله نصيبك أن شاء الله ويفتح الطريق لخواتك الست من عقبك
< أسماء > :
يوووه لها الدرجة قاعدة على قلوبكم وتبون الفكه !
طلعت الحين أنا الاشارة اللي موقفه الطريق ؟؟
وبعدين ! تونا بدري وشوله الاستعجال بس !
ترى بتصيحين يمه علي الين تشقق خدودك من دموعك علي فراقي !
< الأم > :
أقول أخلصي وبسك تميلح وانا أمك !
البنت مالها الا بيت زوجها وتحسبينك صغيره !
ترى عمرك 26 سنه يامال الصلاح واللي كبرك عندها اربع
بزور وحامل بالخامس !
< أسماء > :
وأذا 26 سنه !! يمه ترى الزمن تغير !
لاتحسبينه زي زمنكم تعرس الوحده وعمرها 12 سنه !!
يعني عادي لو توصل البنت 30 سنه وهي مابعد تزوجت !!
< الأم > :
30 سنه !! معد بقي الا هي ! تبين تنشبين بحلوقنا وتعنسين علينا بعد !
ماصدقنا يطق بابنا وأنا أمك ألحين الواحد يقول يالله الستر بس !
والبيوت مليانه مزاويج ولانبي نفرط في هالرجال !!
يالله بس أدحري بليس ودحدري لنا تحت الله يصلحتس
ولاتصيفين ثم ينهبل أبوك علينا !
< أسماء > :
شكواي لله ! طيب طيب أبشري يمه !
الحين لاحقتك دام هذا تفكيركم وهذي حدوده !!
*
*
< ابو عبدالله > : " في طلبات مستمره بينهم اوقات مختلفه !
- وين القهوه !
- وين الشاهي !!
- وين أسماء ! خلوها تجينا المقلط بالعصير !
- أبعدو البزران ولانسمع صوت !!
- وين الدخون !!
مع السلامه !! .... مع السلامه
*
*
غرفة : أسماء ومنال
البنات كلهم وأمهم متجمعين !
أسماء مستحيه ويالله تتكلم !
< أسماء > :
الله يقطع هاليوم ولايرده !! ياربيه وليش الزواج
مايصير بدون هالحركات البايخه !! بغيت اطيح على وجهي
وهو مبحلق بعيونه جعلهن !! او بلاش لايجيه شيء ولد الناس
< نوال > " أختها الصغيره " :
الله الله بدينا نخاف على عيون بعض الناس ولاندعي
عليه ههههههه دنيا والله ! سبحان مقلب الاحوال ! هذا ومابعد صار شي !!
< أسماء > :
نوالوه ماودك تنطمين !! بس من جد واضح انه طيب وشكله ماعليه !
بس كل هذا مايهمني !! أنا أبي أخلاقة ودينة وطبايعة تكون حلوه لو يصير
أشين مخلوق شكلاً بكيفة ! بس أهم شي يكون يخاف الله
< الأم > :
الله يوفقك يا بنيتي وأن شاء الله انه بيصير زي ماتبين
وهذا مو غريب هذا ولد عمك ومنك وفيك ! والدم واحد وأنا أمك !
ومنعم عليه الله وبيعيشك في سعادة ونعيم !
< أسماء > :
الله يسمع منك يمه ! وترى أهم شي الصلاة يمه تكفين
قولي لبوي يسألون عنه زين وعن أخلاقة وعن أصحابة وهل
هو راعي خراب وفساد وفجور ! تراني بذمتكم !
لايغريكم المنصب ولا الفلوس ولا القرابه
وركزوا على كل اللي قلت لكم ! لان كل شيء بيزول ماعدى
اللي ذكرته ! دينه وأخلاقة
< الأم " فرط لسانها ! "> :
أساساً أبوك واعدهم يوم الخميس الجاي !
وراح تتملكين أن شاء الله ومبروك يابنيتي !
< أسماء > :
أيشششش !!! كذا من الباب للطاقه !!!
طيب متى يمديكم تسألون عنه ؟؟ متى يمديكم تعرفون
وشهوا من رجال !! ليش السرعة هذي كلها !! تكفين يمه قولي
لبوي يأجل الموضوع ألين يسألون عنه إمام مسجد حارتهم !
وأخوياه في العمل تكفين لايستعجل تكفيييين
< الأم > :
روحي لبوك وقولي له منيب فاضيه يصارخ علي !
*
*
جلست أسماء لوحدها بعد خروج الجميع من غرفتها ملقين عليها التهاني والتباريك ! وهي تسأل نفسها ! لماذا هذا الشعور الغريب بداخلي ! لماذا هذا الخوف !! هل هو شعور كل فتاة تريد أن تقدم على هذه الخطوه بحياتها ! أم هناك شيء يجعلني أشعر بعدم الأمان والخوف من الموضوع لسرعته !! وعدم أخذ الوقت الكافي في التفكير ! هل من حقي أن اقول نعم أو لا بهذا الزواج !! أذاً لماذا أبي لم يأتي هنا لكي يسألني عن رايي ؟ هل يومين كافية للسؤال عن أبن عمي ! وهل لي الحق أن أسأل أبي عن زوج المستقبل وقد تربيت على الحياء وعدم التحدث بهذه الأمور بتاتاً !!! أذاً لم يبقى لي سوى أخي " محمد " سوف أسأله فقد كانت له علاقة صداقة سابقة تجمعه مع " خالد (زوج المستقبل )" وسوف يفيدني عن ذالك أن شاء الله
*
*
اليوم : الاثنين
المكان : غرفة محمد
الساعة : 9:00 مساءً
< أسماء > :
محمد ممكن أدخل !!
< محمد > :
لاااا ضفي وجهك !! هههههه
تعالي تعالي أمزح معك أجل بالله تستأذنين
عشان تدخلين علي أنتي ووجهك !
< أسماء > :
ياشينك أحرجتني وطاح وجهي !
أسمع حمودي مابي أخذ من وقتك وأحط مقدمات !
أنا جايتك ابسألك عن " خالد " أيش رايك فيه !!
بحكم أنه كان صاحبك وتعرفه ! مدري ليش أبوي مستعجل
وهو ما سأل عنه !
< محمد > :
أني قايل هالأستئذان وراه شيء !
عموماً وش أنتي خايفة منه !! الرجال اللي أعرف عنه
أنه يدخن بس ! هذا اللي اشوفه وغيره مدري مادخلت معه !
< أسماء > وشو !! صادق أنت !
طيب وليش ساكت ماقلته لبوي !! وأذا يدخن أكيد فيه أشياء
أقوى من كذا ولا أبي اتورط في حياتي !! تكفى قل لبوي يا محمد
أخوي فيصل زي منت عارف مسافر ومهوب راجع الا بعد شهر
وأنت الوحيد اللي يقدر يساعدني !
< محمد > :
شوي شوي كليتيني ! أنا قلت لبوي
ويدري أنه يدخن وقال تتن ولا غيره ! وطيش شباب وبيتوب
أن شاء الله ! يعني بالعربي ابوي يدري ارتاحي !
< أسماء > :
من جدك انت ؟؟؟؟ طيب وأنت وشرايك ؟؟؟
عادي عندك ! وليش ماتروح تسأل
شلتك اللي كنت معهم عنه ! وتسأل عنه في عمله بعد !
وتسأل كل من يعرفه تكفى !
وتشوف وشبعد الزمن مخبي لي من مصايب !
< محمد > :
اقول روقينا وفكيني يرحم والديك
مارحت اداوم عشان اروح اسأل لك عنه بدوامه !!
لاتدخليني بمشاكلكم وروحي شوفي غيري يرحم والديك
وبعدين الرجال مسلم وسعودي خلاص كافي !
لاتقعدين توجعين راسك أبوي بيوافق لو يدخل مجلسنا وهو سكران !!!
*
*
خرجت أسماء والدنيا بعيونها سودا !! تتذكر كلام أخوها " محمد " !! وتفكر بمصيرها مع شخص مدخن ! فيقطع حبل أفكارها صوت أمها بداخلها عندما قالت لها أخر مره (( عبارة الرعب ))وهي تغادر الغرفة " يابنيتي ! ولد عمك شباب خذيه أحسن لك !ولا شايب(ن) عايب يحطك أبوك عنده وتنشبين بروحك لانه مستحيل بيخليك عانس عنده في البيت " فقد تقدم لها قبل " خالد " صاحب الأب الثري الغني والذي يبلغ من العمر 58 سنه ولم يرد على طلبه حتى اليوم !!! ومن هنا ! بدءت المقارنة ! وبدء الخوف يمتلك مشاعر أسماء وكان طريق ينتهي بخالد وسجائره أفضل من طريق كبير السن المعقد ! وكانت تقنع نفسها بإن الدخان أخف من غيره ! وأنها سوف تستطيع أن تقنعه بتركه وسوف تغير من طبعه أن كان هناك مايعيب شخصه
*
*
< أسماء > :
أبوي ! يعلم الله أني ترددت كثير عشان أجي
وأكلمك بموضوع زواجي وأدري عيب !!
بس الله يخليك من أشكي له ! تعبت من التفكير وأبيك
ياوالدي العزيز تسأل عنه وعن أخلاقة وحرصه على الدين !
< أبوعبدالله > :
يعني أنتي أحرص منا عليك !! قومي لغرفتس
بس وخلي شغل الرجال علينا ! هذا ولد أخوي ومافيه شي
يعيبه رجال من ظهر رجال وأذا على التتن وعدني بيتركه !
وبيحطك في عيونه ومهوب أنا اللي انشد عن عيالي لان " خالد "
في مقام عيالي توكلي على الله بس ولعد اشوفتس فاتحتن هالموضوع
< أسماء > :
يبه ! تكفى لاتضلمني وتشيل ذنبي كل عمرك !!
أنتبه يبه تراني أمانه بذمتك وأنت اللي فصلت وخليتني ألبس على
كيفك وأخترت على كيفك وحتى السؤال ماسألت عنه !
أبي بس أعرف هو محافظ على الصلاة !! يخاف الله !
راعي سفر وخرابيط ! في الخارج ! هل سألتم عنه في الجوازات
وين سافر وكم قعد و و و و !! ومع كل هذا !
ماراح تشوف مني الا أللي يرضيك طاعتك وأجبه واوامرك ملباه
وحتى لو يكون اللي يكون رضاك بالدنيا يابوي
< أبوعبدالله > :
تخافين نزوجك مسيحي يعني !
وحتى لو أنه راعي سفر وراعي خرابيط أكيد بيعقل
أذا تزوج وحس بالمسؤولية وكلن له سوابق محدن
معصوم من الخطأ وانا ابوتس ! يالله
روحي ولعد اسمع لك حس بها الموضوع !
*
*
ملكه ! يوم الخميس !
زواج !! بعد شهرين !
سفر المعاريس للخارج !!
7
7
7
أعتذر من كل قلبي على الأطاله !!
تحياتي للجميع
سيناريو وحوار : ملكة سدير
أنتهى