~[ الاعضاء يوم كانوا بزران مقابله خاصه ]~

[بسمة سدير]

ما شااء الله ، طفولة ممتعة أخوي حمد < واللي بدا لي من هالرد إنه مب اسمك الحقيقي

المشاركة الأصلية كتبت بواسطة   17/ موقف صار لك ولحد الحين اذا ذكرته يضحكك ؟؟ فيه يوم كنا بالبطحاء أنا وولد عمي ،، وحانت صلاة المغرب ،، فلما توضينا كانت الصلاة انتهت ،، ودخلنا المسجد وصلينا وولد عمي الإمام ،، وتونا بادين بالصلاة ،، جا واحد وقدمه،، ثم جوا ثانين وصرنا صف طويل ،، ولما قرأ سورة الحمد وقال آمين ،، وردوا المصلين آآآآآآآآآآآآآآآمين ،، لحظتها ولد عمي عرف أنه وراه مصلين كثار،، وجته النفاضه ،، فلما سجدنا هرب وخلانا ساجدين ،، وطولنا بالسجود فرفع واحد من المصلين رأسه وما حصله وتقدم وصلى بنا ،، وبعدين سألته قال لما سجد ،، رفع رأسه والتفت وطالع المصلين لقيهم كثيرين فهرب ،،

[align=center]
أممما


< هذي منتشررة نكتة ، طلعتوا مصْدرها


شكــراً لك أخوي ،


..


بانْتظار الأخ فيصل المرشد ،


والخوْض في طفولته ،
[/align]

[قلم صريح]

هل كنت مشآآآآكس أوكنت على نياتك وهادئ؟؟
عشت يتيم الأب وحيد امي على 3 اخوات . كنت ادوّر الأخوة في أي صداقة واحسد اللي عنده إخوان لذا كنت نصوح اقف مع الضعيف لدرجة اني احياناً كثيرة اتحمّل الضرر

2/ كنت بزر قصدي طفل مميّز عند شخص ما؟؟ يعني كنت أغلا البزراآآن وإلا مصفوق على الرصيف؟
كنت اسئل امي الله يرحمها ليش كل من جاء يمسح راسي

3/موقف حصلّك وأنت صغير وللحين مأثر فيك؟؟
كان فيه واحد يطق الباب ولما يسمع صوت يروح ولما افتح الباب القى ارزاق محطوطه

4/ أكبر عيديّة آخذتها ..كم كآنت .. ومنْ من ؟؟؟ وش كان شعورك وقتها؟؟
معي ريال قعد في مخباتي سنه علشان عيال المدرسه اذا اكلوا في الفسحه وقالوا خذ كل اقول شوفوا الريال معي بس شبعان

5/ من أقرب طفلـ/ـة من الجماعة كانت أقربلك؟؟ يعني مايضربك آو تضربك ولا تهاآوشك ولآ يهآوشك؟؟
الجماعة كلن في حاله مشغول مع عياله ورزقهم

6/ كم فلقة في رآسك؟؟
ولا وحده .. حقيقة

7/ وش كانت عياآآرتك؟؟ ************************ هع هع وش هالسؤاآآل؟؟
فصيل

8/ وش اكثر حلاااوهـ كوونت تحبهاا في طفوولتك الرائعه ؟؟
حلقوم

9/ ماهو مستوى الرجه اللي كنت فيها " مرتفع / متوسط / سموول " ؟
كانت الوالدة الله يرحمها واموات المسلمين ا جمعين تقول يقولون ان الحرمة ماتطلع رجال ورهم انهم صادقين اذا انت منتب رجال

10/ ايش ترتيبك بين اخوانك ؟ وهل هذآ الشئ اثر في مسيرتك الطفوليه ؟؟
3 بعد اختين

11/ ايش اكثر مكان كنت تحب تروح له ؟؟ " ملاهي . حديقه ... الخ
حراج بن قاسم اشتري كتب قديمه في المتوسط

12/ ايش اكثر لعبه كنت تحب تلعب فيهاا ؟؟
الكورة

13/ هل كنت تضرب والا تنضرب والا لاتهش ولاتنش ؟؟

رائيس فريق الحارة
14/ هل كنت تبكي كثير ؟؟
ماعرفه .. يكفي اشوف امي

15/ ايش اكثر فلم كرتوون كنت تحب تشووفه ؟؟

مافيه تلفزيون .منين ياحسرة . تمثيليات الرادو
16/ من اكثر واحد من اخواانك كان قريب منك ؟؟ يعني اللي تحب تلعب معاه ؟؟
مافيه اخوان

17/ موقف صار لك ولحد الحين اذا ذكرته يضحكك ؟؟
مدرس نحط له الكرسي .. وقف مره متحمس يشرح ثمن تقدم شوي ومانتبه وجلس وطاح على الارض وقال انا مسويها علشان تضحكون

18/ كنت تحب الحليب والا تشربه بالغصب ؟؟

ماحد كان يغصبني على شئ ولا كنت اشربه
19/كنت شاطر بالمدرسة ولا ؟؟
متوسط

20/ كيف كانت طفولتك بأيامـ رمضان ؟ كنت تصوم قدام اهلك ومن وراهم تفطر ؟؟
كانت الوالده تقول .. مايوفقه ربي اللي يصوم علشان الناس

21/استايلك وانت صغير.. كيف كآن؟ يعني رسمي ولا انسان متلحط متعفش >>متعفش يعني ما تهتم بالملابس
ماكان عندي الا ثوب واحد للمدرسه

22/كلمه دآآيم على لسآنك!!

متى اكبر
23/هل هناك شخص كنت دايم تتبلى عليه يعني تسوي المصيبة وهو ينضرب ؟؟
ابداً

24/جريمة او مصيبة لـ هذا اليوم تذكرها و مستحيل تنساهاا ؟؟
الحمدلله على نعمة النسيان

25/ما هو اقوى عقاب في حياتك ؟؟
عقاب بدون ذنب

26/نشيد كنت تحبه أيام الطفوله ؟؟
اليمامة والصياد

27/ماهي الموآقف اللي عرضت فيها اهلك للاحراج؟؟
مافيه اهل انا واختي وامي




* بحكم طفوله ان الواحد يكون برئ وحبيت اسال عن


28/اكثر موقف صدمك يوم انت صغير واثر عليك يوم كبرت ؟!..

الناس اللي حست في يتمي وتصدقوا على وانا ماعرفهم الا الحين
29/كيف كان اول يوم مدرسه لك بكيت ولا لا ..؟
اول يوم تقول امي اني رحت بلحالي

30/ ضعت في مكان؟ .. سوق او حديقه او كورنيش .. اذا اي قولنا السالفه ..؟...
أي سوق واي حديقة

31/وشهي اجمل هديهـ خذتها في طفولتك...ومانسيتها ابد...؟!

سيكل
32/بصراحهـ من كنت تحب بطفولتك اكثر امك ولا ابوكـ....؟!
امي وابوي .. امي

33/في انسان معين تحس انك كرهتهـ في طفولتك وذا اي ليهـ...؟!

مافيه.. لان ماكان عندي شئ اعطيه ولا كان لي نظرة اخذ
34/متى هي المرة من المرات اللي حقدت فيها على اهلك وانت صغير\يعني سوولك حركه قدام احد وانقهرت بقوة ؟؟
مافيه

35/لحقت تتابع/ين سبيستون ؟؟ ولا القناه الاولي بالصبح والعصريه ؟؟


36/هـل كنت تغلط في نطق الحروف ..؟
ماذكر

37/موقف سويته ..والى الحين مااحد يدري عنه ؟
وشوله عاد يدرون الحين

38/مين اعز صديق طفولة و الى الان متواصل معه>><؟
كثيرين

شكراً على الإستضافة واسف اللي ضيقت صدوركم بس هذه هي الحقيقة ..

[بسمة سدير]

[align=center]
الله يغفر لوالدك ويرْحمه .. ويسْكنه فسيح جنانه


ويجزا والدتك بالجنّة على صبْرها


ويجزا كلّ من حسّ بكم =) < كبر في عينها اللي يدقّ الباب ويروح =")


طفوولة بريئة ..


وحنا نشْهد إن الوالدة ربّت ما شاء الله


..


أخوي الفاضل .. بانتظار من استقرّ رايك عليه لشرشحة ماضيه ،
[/align]

[قلم صريح]

المشاركة الأصلية كتبت بواسطة بسمة سدير   [align=center] الله يغفر لوالدك ويرْحمه .. ويسْكنه فسيح جنانه ويجزا والدتك بالجنّة على صبْرها ويجزا كلّ من حسّ بكم =) < كبر في عينها اللي يدقّ الباب ويروح =") طفوولة بريئة .. وحنا نشْهد إن الوالدة ربّت ما شاء الله .. أخوي الفاضل .. بانتظار من استقرّ رايك عليه لشرشحة ماضيه ، [/align]

الله يبارك لك ويبارك فيك ويمتعنا وياكم مع طاعته وبطاعتة ويرحم ضعف الجميع امين.. اما بالنسبة للإختيار فأنا اتركه لشيخنا حمد ولد أبو حمد الله يمد في عمره بالصحة والسلامة..

[أبو حمـد]

السلام عليكم ورحمة الله وبركاته ،،


ويعطيك العافيه أخوي فيصل المرشد ،، والله يجزا الوالده كل خير ويخليها لكم إن شاءالله ويرزقك برها ،، والله يرحم الوالد ويغفره له وجميع أموات المسلمين ،،


وأشكرك أخوي فيصل ،، لإتاحة الفرصة لي في هذا المتصفح الجميل ،،


وبعد أذن الجميع ،، أرشح استضافة أخوي الأديب أبو إبراهيم الشويعر ،،


شكراً لكم ،،

[الجنوبي 2000]

تسلم اخوي حمد ههههههه

بس مسالة نحاش وانتم تصلون قوية ههه

لاهنت يا الغالي وشكرا لك

واشكر اخوي فيصل المرشد على الاجابات الطيبة

لكم الود

[أبوإبراهيم الشويعر]

المشاركة الأصلية كتبت بواسطة حمد ولد أبو حمد   السلام عليكم ورحمة الله وبركاته ،، ويعطيك العافيه أخوي فيصل المرشد ،، والله يجزا الوالده كل خير ويخليها لكم إن شاءالله ويرزقك برها ،، والله يرحم الوالد ويغفره له وجميع أموات المسلمين ،، وأشكرك أخوي فيصل ،، لإتاحة الفرصة لي في هذا المتصفح الجميل ،، وبعد أذن الجميع ،، أرشح استضافة أخوي الأديب أبو إبراهيم الشويعر ،، شكراً لكم ،،

من حبي لحمد ولد أبوحمد وعدته في الخاص بالموافقة وما علمت عن الموضوع إلا هذه اللحظة ... غفر الله له ... أسئلة كثيرة تحتاج وقتًا لعلي أعود عاجلاً ولكم أن تختاروا غيري إن أردتم .

[أبوإبراهيم الشويعر]

[align=center]
كل هالأسئلة يا مشاعر طفلة ... اختبار إنجليزي ما من سؤال إلا جبتِه ...
بسم الله وأستعنا على الشقاء بالله .
/ هل كنت مشآآآآكس أوكنت على نياتك وهادئ؟؟
والله أختي أم عبدالرحمن عسى ربي يطول في عمرها تقول : ولدك دحوم ما راح عنك بعيد ...
2/ كنت بزر قصدي طفل مميّز عند شخص ما؟؟ يعني كنت أغلا البزراآآن وإلا مصفوق على الرصيف؟
ما كان فيه أرصفة في جلاجل ذاك الوقت
3/موقف حصلّك وأنت صغير وللحين مأثر فيك؟؟
إلا من هو اللي مرسل لي في الخاص عن هالموضوع ... يا ربيه نسيت ... إيه إيه حمد ولد أبوحمد ... مشوار أتذكر طفولتي .
4/ أكبر عيديّة آخذتها ..كم كآنت .. ومنْ من ؟؟؟ وش كان شعورك وقتها؟؟
ياشين الذاكرة إذا جيِّمت ما تنتوظب .
5/ من أقرب طفلـ/ـة من الجماعة كانت أقربلك؟؟ يعني مايضربك آو تضربك ولا تهاآوشك ولآ يهآوشك؟؟
إما بقول اسم أختي ... تحلمون .
6/ كم فلقة في رآسك؟؟
هالحين ما فيه شيء ... طابن الفلاق .
7/ وش كانت عياآآرتك؟؟ ************************ هع هع وش هالسؤاآآل؟؟
جاوبتِ ... ( هع هع وش هالسؤاآآل؟؟
)
8/ وش اكثر حلاااوهـ كوونت تحبهاا في طفوولتك الرائعه ؟؟
حلاو مصاص أبو ولد يجي كأنه مثلث وحلاو صعو.
9/ ماهو مستوى الرجه اللي كنت فيها " مرتفع / متوسط / سموول " ؟
دراسات عليا
10/ ايش ترتيبك بين اخوانك ؟ وهل هذآ الشئ اثر في مسيرتك الطفوليه ؟؟
أصغرهم لأن مافيه ذكرغيري
مع ثلاث إناث
11/ ايش اكثر مكان كنت تحب تروح له ؟؟ " ملاهي . حديقه ... الخ ما كان فيه ملاهي ... فيه وظايم ومجابيب وجوابي .
12/ ايش اكثر لعبه كنت تحب تلعب فيهاا ؟؟
كرة القدم
13/ هل كنت تضرب والا تنضرب والا لاتهش ولاتنش ؟؟
ذروق ... بس عيار وراعي مناكح .
14/ هل كنت تبكي كثير ؟؟
وش دراني ما كنت أعد ...
15/ ايش اكثر فلم كرتوون كنت تحب تشووفه ؟؟
جرندايزر
16/ من اكثر واحد من اخواانك كان قريب منك ؟؟ يعني اللي تحب تلعب معاه ؟؟
كلهم بس هم عيال أختي لأن ما كان لي أخوان .
17/ موقف صار لك ولحد الحين اذا ذكرته يضحكك ؟؟
الذاكرة ماهناش .
18/ كنت تحب الحليب والا تشربه بالغصب ؟؟
حليب المعز ... شيء .
19/كنت شاطر بالمدرسة ولا ؟؟
من خامس إبتدائي إلى أن أنهيت الثانوية وأنا الأول على القمهورية ـ عفوًا ـ الصف .
20/ كيف كانت طفولتك بأيامـ رمضان ؟ كنت تصوم قدام اهلك ومن وراهم تفطر ؟؟
صيام الديك والدجاجة ووزوزة وشيء ورا الثلاجة .
21/استايلك وانت صغير.. كيف كآن؟ يعني رسمي ولا انسان متلحط متعفش >>متعفش يعني ما تهتم بالملابس
لا إلا الملابس ... عسى ربي يبارك في أخيتي ويغفر لابن سويلم زوجها .
22/كلمه دآآيم على لسآنك!!
طيب طيب .
23/هل هناك شخص كنت دايم تتبلى عليه يعني تسوي المصيبة وهو ينضرب ؟؟
نذالة ما تعودتها .
24/جريمة او مصيبة لـ هذا اليوم تذكرها و مستحيل تنساهاا ؟؟
وفاة إبراهيم بن سويلم ـ رحمه الله ـ ولم تكن في طفولتي بل منذ عشر سنوات تقريبًا .
25/ما هو اقوى عقاب في حياتك ؟؟
كتبت واجب القراءة عشر مرات .
26/نشيد كنت تحبه أيام الطفوله ؟؟
أرنب نط ... جبي لي خط ... من يقراه ؟ أنا اقراه ... سبع سنينٍ ما أنساه ( كني هيضت المكيظم ) .
27/ماهي الموآقف اللي عرضت فيها اهلك للاحراج؟؟
ما أذكر
28/اكثر موقف صدمك يوم انت صغير واثر عليك يوم كبرت ؟!..
الذاكرة خارج نطاق التغطية .
29/كيف كان اول يوم مدرسه لك بكيت ولا لا ..؟
لا ... ما أصيح عند الناس .
30/ ضعت في مكان؟ .. سوق او حديقه او كورنيش .. اذا اي قولنا السالفه ..؟...
في مكة المكرمة ضيعت المخيم وكنت وقتها في الثانوية وكل الليل ألوب وأدور إلى أن طحت في مخيم الكشافة وكان معهم أبوعلي المزروع وهو اللي رجعني لمخيمنا .
31/وشهي اجمل هديهـ خذتها في طفولتك...ومانسيتها ابد...؟!
من كثرهن ما أذكرهن .
32/بصراحهـ من كنت تحب بطفولتك اكثر امك ولا ابوكـ....؟!
أبي توفي وأنا في بطن أمي في شهرها السادس ... وأمي توفت بعده بأشهر ... رحمهما الله وأسكنهما فسيح جناته ...
33/في انسان معين تحس انك كرهتهـ في طفولتك وذا اي ليهـ...؟!
الله يعفو عنا وعنه رحل إلى ربه ...
34/متى هي المرة من المرات اللي حقدت فيها على اهلك وانت صغير\يعني سوولك حركه قدام احد وانقهرت بقوة ؟؟
الله لو إني مهبول أحقد على أهلي والصغير ما يعرف الحقد ... وما درينا عن الحقد إلا حين كبرنا .
35/لحقت تتابع/ين سبيستون ؟؟ ولا القناه الاولي بالصبح والعصريه ؟؟
الله يا جرندايزر وستيف أوستن والرجل الأخضر .
36/هـل كنت تغلط في نطق الحروف ..؟
بل فصيح ...
37/موقف سويته ..والى الحين مااحد يدري عنه ؟
تولموا أعلمكم ...
38/مين اعز صديق طفولة و الى الان متواصل معه>><؟
نهي ... نهي ... كلوه صديق بيبي أنا كويس كلوه أنا ما فيه ينسى .
[/align]
واوه قضينا ... شبَّصت أصابعي ...
والله لا يهينكم حضِّروا لنا هنا ( يكفيني شموخي ) ...

[The End]

أبوإبراهيم الشويعر
في مكة المكرمة ضيعت المخيم وكنت وقتها في الثانوية وكل الليل ألوب وأدور إلى أن طحت في مخيم الكشافة وكان معهم أبوعلي المزروع وهو اللي رجعني لمخيمنا

اللهـ يحفظهـ تاج سدير كلها


ننتظر يكفيني شموخي

[يكفيني شموخي]

أخــــــي ابا ابراهيم

طفولتك رحله فاقت حدود الجمال رسمت البسمةعلى وجوهنـــا

فكانت الروعه والإبداع كلمات حواها قاموسك في تلك الطفوله

طفوله بريئه

استمتعت بكل احداث طفولتك الرائعه

ولو كان فيها وقفات محزنـــه والمتني لكن !!

اعجبتني قوتك وتخطيك بتفائل امور الحياة

ورحم الله والديك وغفر لهم

اتمنى لك الحياة السعيدة ولكل منحولك "

لقد تركت بصمات لن تنمحـــي

آثارهـــا على مـــر الزمــان ...

لي الشرف لإختارك لمعرفه طفولتي
وثق باذن الله
بأنني سألازم هذه الصفحة قريبآ

[يكفيني شموخي]

/ هل كنت مشآآآآكس أوكنت على نياتك وهادئ؟؟

هادئه

2/ كنت بزر قصدي طفل مميّز عند شخص ما؟؟ يعني كنت أغلا البزراآآن وإلا مصفوق على الرصيف؟

لا والله كنت اغلاهم لاني اول فتاه في العائلة
3/موقف حصلّك وأنت صغير وللحين مأثر فيك؟؟

في يوم ما كنت قادمه من المدرسة بعد جـهـد وعـناء

وما إن دخلت غـرفة أمّي شاهـدت دمعـاتها تتساقطـ وهي تـصلي

فسقطت حـقيبتي من يدي دون شــعـور مع رهبة تـأمّل

وكنت حينها صغيره فسألتها بعـد انتهائها من الصّلاة :

لماذا تبكين أمّاه ؟ !

فقالت والدموع تــُبلــّل وجنتيها :

قد مات عمكــ
موقف لازال عـالـقـًا بالذاكرة ما حـييت
لانه قبل وفاته ذهبت لزيارته وكانت اول زياره لما أره منذ
ان خلقت وبعدها باايام معدوده سمعت خبر وفاته رغم سعادتي
وفرحتي برؤيته الان الله أخذ منيته
_رحمه الله وأسكنه فسيح جناته_:
4/ أكبر عيديّة آخذتها ..كم كآنت .. ومنْ من ؟؟؟ وش كان شعورك وقتها؟؟
فالهدايا منها ما يــُكسر ومنها ما يقـصـر ومنها ما يُـمَـلُّ ويـُهدَر

إلا أنّ الـحـبّ باقٍ ما بقيت القلوب !


5/ من أقرب طفلـ/ـة من الجماعة كانت أقربلك؟؟ يعني مايضربك آو تضربك ولا تهاآوشك ولآ يهآوشك؟؟

لا والله ماكان احد ياذيني دائم في حظن اميمتي الله يحفظها

6/ كم فلقة في رآسك؟؟
ولا فلقه

7/ وش كانت عياآآرتك؟؟ ************************ هع هع وش هالسؤاآآل؟؟



المايقة





8/ وش اكثر حلاااوهـ كوونت تحبهاا في طفوولتك الرائعه ؟؟



حلاو... عادي نستقبل أي حاجه



9/ ماهو مستوى الرجه اللي كنت فيها " مرتفع / متوسط / سموول " ؟



سمول مرتفــع جـــدآ جدآ جــدآ جــدآ مع مرتبه شرف



10/ ايش ترتيبك بين اخوانك ؟ وهل هذآ الشئ اثر في مسيرتك الطفوليه ؟؟
نو .. أنا الثالثه يسبقني اثنين من اخوتي


11/ ايش اكثر مكان كنت تحب تروح له ؟؟ " ملاهي . حديقه ... الخ


في أي مكان يجمعني بحبتي

12/ ايش اكثر لعبه كنت تحب تلعب فيهاا ؟؟
لعبــــه ضيعت حتى اسمــها لكن ! اضن انها الغميمه
شخص يغمض عيونه ويعد للعشره والبقيه تروح وتختفي
وبعد العشره تبدأ المغامره تسمع صوت فلان ينمسك وصوت اخر يركض
يبغى يفرك لكن الاقرب للهدف يلمسه ويفوز بس.. و اهم شي ويمسكه
13/ هل كنت تضرب والا تنضرب والا لاتهش ولاتنش ؟؟
ولاوحده
14/ هل كنت تبكي كثير ؟؟
على حسب الموقف

ايش اكثر فلم كرتوون كنت تحب تشووفه ؟؟

عدنان ولينا وهــــاييدي
16/ من اكثر واحد من اخواانك كان قريب منك ؟؟ يعني اللي تحب تلعب معاه ؟؟



اخوي هو عزوتي وسندي وكل شي بحاتي
مازال صديقي حتى الان
الله يحفظه يا ربّ


17/ موقف صار لك ولحد الحين اذا ذكرته يضحكك ؟؟



يا كثررها

من ضمنها اخوي الكبير شال اخوي الصغير وهو نايم وحطه في كيس زباله
واهلي يفتخون يدورونه مادرو عنه الا بعد كم ساعه من صياحه


18/ كنت تحب الحليب والا تشربه بالغصب ؟؟

لااشرب حليب السعوديه

19/كنت شاطر بالمدرسة ولا ؟؟


كان مستوى ممتاز والحمد لله

20/ كيف كانت طفولتك بأيامـ رمضان ؟ كنت تصوم قدام اهلك ومن وراهم تفطر ؟؟

كنت اصوم بس اهلي يفطروني بالقوة يقولون توك صغيره
21/استايلك وانت صغير.. كيف كآن؟ يعني رسمي ولا انسان متلحط متعفش >>متعفش يعني ما تهتم بالملابس

مرتبة الله يخلي لي اميمتي ويطول بعمرها

22/كلمه دآآيم على لسآنك!!

كثييييييييير
23/هل هناك شخص كنت دايم تتبلى عليه يعني تسوي المصيبة وهو ينضرب ؟؟
مسااااالمه بسم الله علي ماكنت اتبلى على احد

24/جريمة او مصيبة لـ هذا اليوم تذكرها و مستحيل تنساهاا ؟؟

اقول انا مسالمه ماعندي جرائيم
25/ما هو اقوى عقاب في حياتك ؟؟

من الوكيله فلانه ضربتني عشاني ماحضرت الطابور متأخره
26/نشيد كنت تحبه أيام الطفوله ؟؟
ماسمع نشيد اسمع قصايد من جديدتي

27/ماهي الموآقف اللي عرضت فيها اهلك للاحراج؟؟

لا الحمدالله مافيه

28/اكثر موقف صدمك يوم انت صغير واثر عليك يوم كبرت ؟!..


لا الحمدالله ليس لدي مواقف
29/كيف كان اول يوم مدرسه لك بكيت ولا لا ..؟
انواع الصياح مو بس اول يوم السنه كلها

30/ ضعت في مكان؟ .. سوق او حديقه او كورنيش .. اذا اي قولنا السالفه ..؟...


لا ماعمري ضعت لاني خوافه مافارق اهلي


31/وشهي اجمل هديهـ خذتها في طفولتك...ومانسيتها ابد...؟!


مع أنَّ الهدايَا كثيرة

إلا أنّ أثمن الهدايا لدي لم تكن عـينيّة !

بل كانت مشاعـرًا حـسيّة حـيـَّة

الحب والامان اغلى هديه من اسرتي


32/بصراحهـ من كنت تحب بطفولتك اكثر امك ولا ابوكـ....؟!
عيوني مافرق بينهم

33/في انسان معين تحس انك كرهتهـ في طفولتك وذا اي ليهـ...؟!


لم يكن الـكـُره لدى الأطفال أبدًا

ولكن قد يُولــد الكــُره الآني ( الوقتي ) من رَحِـم القهر !

وإليكم شيء منه . . .


كانت هناك معلمه تسكن بـج ـوارنا وكانت شديدة بمع ـنى الكلمة

ولو خ ـيّروني بالوقوف أمامها أوأمام أسـَد ضارٍ

لوقفت أمام الأسد

فيكفي الأسد ابتسامته رغـم أنيابه البارزة

أما هي ؛ فلم أشاهدها في حـياتي مُبتسمة أبدًا

34/متى هي المرة من المرات اللي حقدت فيها على اهلك وانت صغير\يعني سوولك حركه قدام احد وانقهرت بقوة ؟؟

ولا مررررره يمكن اتضايق بس احقد مستحيل


35/لحقت تتابع/ين سبيستون ؟؟ ولا القناه الاولي بالصبح والعصريه ؟؟
لا لحقت اتابع طيور الجنة خخخ تلفزيون بأنتل ونحمدالله انه كان موجود


36/هـل كنت تغلط في نطق الحروف ..؟

لا الحمدالله


37/موقف سويته ..والى الحين مااحد يدري عنه ؟
مااذكر

38/مين اعز صديق طفولة و الى الان متواصل معه>><؟
اخوي الله لا يحرمني منه

وش ذا عاد مابغينا نخلص تكسرت اصابعي

في نهاية طفولتي عـبر الاجوبة التي أتمنـّى ألا تكون مُمِـلــّة

لا يسعـني إلا أن أقدّم شـكـري لمشآعر طـفـلة

وموصولاً لكلّ من طالب بإعـادتي لشريطـ الذكريات البريئة

ولكلّ من تابع أو من سيتابع لاحقــًا . . . !

فــبـمـُجـرد وجـود أعـين تـقرؤني لــهـُو الشرف المُطرّز بالورود

:

سبـحـانك اللهمّ وبـحـمدك أشهد أن لا إله إلا أنت أستـغـفركـ وأتوب إليك

[يكفيني شموخي]

عذرآ ذات خجـل على تأخـري في اخـتيار خـليفتي

لكن كل تأخـيرة فيها خـِـيرة

وسوف يحلّ الخـير بـحـضور من كانت الأسطر له تــُفرَش وتبتسِـم
الاخ الفاضل/ القيصر
:
لم يكن اختياره عـشوائِـيـًّاوسدًّا لِـفـراغ

لم يكن كذلك فـحــسب

بل لو نطقت الأسطر لقالت له :

أمطرني سيّدي طفولتك وبراءتك

أمطرني صفـاءًونقـاءً

أمطرني رذاذًا

فإني من الانتظار والشوق أجـدَبت

:

يله عاد هيت لنا بقلمك وانثر لنا
طفولتك

أخي القصير اتمنى بأني احسنت الاختيارفيك أخي لاتخذلني

ننتظر قدومك الرائع

[القيصـــر]

1/ هل كنت مشآآآآكس أوكنت على نياتك وهادئ؟؟

الحمد لله على كلام الوالده واخواني الأكبر مني يقولون اني هادي مره حتى من يوم ولادتي

2/ كنت بزر قصدي طفل مميّز عند شخص ما؟؟ يعني كنت أغلا البزراآآن وإلا مصفوق على الرصيف؟

الحمد لله كنت ماخذ حقي من الوالد الله يطول بعمره لدرجة انه وين مايروح انا معه وبعد ( أم إبراهيم ) أخيتي الله يحفظها كنت أنا قريب لها مره أيام طفولتي وأعتبرها بعد والديّ من ربّاني ..

3/موقف حصلّك وأنت صغير وللحين مأثر فيك؟؟

حادث وكان عمري وقتها 7 سنوات وكيف أنا نجيت منه والحمد لله والشكر ولحد الان مأثر فيني هالموقف والحمد لله على السلامة

4/ أكبر عيديّة آخذتها ..كم كآنت .. ومنْ من ؟؟؟ وش كان شعورك وقتها؟؟

أكبر عيدية من جدي الله يرحمه ( 600 ريال ) وقتها كان عمري 9 سنوات ولحد الان ما أنساها لأن جدي الله يغفر له كان يجبني موووت الله يحلله ويبيحه يارب

5/ من أقرب طفلـ/ـة من الجماعة كانت أقربلك؟؟ يعني مايضربك آو تضربك ولا تهاآوشك ولآ يهآوشك؟؟

واحد من عيال خالتي كان الأقرب لي وقت طفولتي ماعمرنا تهاوشنا


6/ كم فلقة في رآسك؟؟

3 فلقات من واحد الله يذكره بالخير كان مشهور ( بالترجيم ) الله يحلله ويبيحه والان من اعز الاصدقاء

7/ وش كانت عياآآرتك؟؟ ************************ هع هع وش هالسؤاآآل؟؟

اسمي ( بندر ) ومايحتاج الباقي عليكم

8/ وش اكثر حلاااوهـ كوونت تحبهاا في طفوولتك الرائعه ؟؟

( حلاو مصاص ) الأحمر يازينه خصوصاً من يد جدتي الله يرحمها

9/ ماهو مستوى الرجه اللي كنت فيها " مرتفع / متوسط / سموول " ؟

هاااااادي ولله الحمد

10/ ايش ترتيبك بين اخوانك ؟ وهل هذآ الشئ اثر في مسيرتك الطفوليه ؟؟

6 .. أعطاني اكثر حنيه منهم ولله الحمد

11/ ايش اكثر مكان كنت تحب تروح له ؟؟ " ملاهي . حديقه ... الخ

الملاهي .. وخصوصاً ( العاب الطفل ) بالمروج اذا رحنا الرياض

12/ ايش اكثر لعبه كنت تحب تلعب فيهاا ؟؟

( خطة ) اولاً .. و ( كرة القدم )

13/ هل كنت تضرب والا تنضرب والا لاتهش ولاتنش ؟؟

( انضرب ) دايم ..

14/ هل كنت تبكي كثير ؟؟

لا .. لأني الحمد لله طلباتي مجابة من اللي حوالي

15/ ايش اكثر فلم كرتوون كنت تحب تشووفه ؟؟

بنك بانثر .. و سانشيرو البطل المغواااار هههههههههه

16/ من اكثر واحد من اخواانك كان قريب منك ؟؟ يعني اللي تحب تلعب معاه ؟؟

من اخواني بصراحه ماحد حولي بالنسبة للأعمار .. لكن اللي ارتاح له ( ابو حمد ) اخوي عبدالعزيز

17/ موقف صار لك ولحد الحين اذا ذكرته يضحكك ؟؟

مره في بيت جدي الله يرحمه كان فيه ( دوووشق ) في غرفة جدتي ... وكان مشقوق مادري وش هاللقافة فيني ورحت ودخلت في الدوووشق .ز المهم ابي أطلع ابي أطلع عجزت وقعدت اصوت جاء واحد من عيال عمتي وطلعني هالموقف كلما ذكرته مت من الضحك حتى ولد عمتي لحد الان يذكرني فيه ونضحك سوا وكان وقتها اكبر مني الله يذكره بالخير .

18/ كنت تحب الحليب والا تشربه بالغصب ؟؟

لا احبه الحمد لله

19/كنت شاطر بالمدرسة ولا ؟؟

الحمد لله والإبتدائية كلها ولله الحمد ( ممتاز )

20/ كيف كانت طفولتك بأيامـ رمضان ؟ كنت تصوم قدام اهلك ومن وراهم تفطر ؟؟

والله من ثالث ابتدائي وكان الوالد حريص اني اتعود الصوم .. وبصراحه ( الله من مره ) أفطرت من وراهم ههههههههه الله لايعاقبنا يارب

21/استايلك وانت صغير.. كيف كآن؟ يعني رسمي ولا انسان متلحط متعفش >>متعفش يعني ما تهتم بالملابس

بالعكس الحمد لله كنت مرتب مره ودايم اذا ضيعوني اهلي يلقوني بالمطبخ قدام مراية الفرن أشخص ههههههههه

22/كلمه دآآيم على لسآنك!!

للأمانه ماتذكر

23/هل هناك شخص كنت دايم تتبلى عليه يعني تسوي المصيبة وهو ينضرب ؟؟
لا ماكان فيه احد الحمد لله

24/جريمة او مصيبة لـ هذا اليوم تذكرها و مستحيل تنساهاا ؟؟
قطو .. نشبت له نشبه عشان مايدخل بيتنا .. كلما شفته قعدت ارجمه ومره صقعت واحد مع راسه مابغى الا هي .. الله لايعاقبنا بما فعلنا يااارب هالموقف مانساه ابد بس كان القط ناشب لأمي دااايم وانتقمت منه ... كان مووووذي مره ..

25/ما هو اقوى عقاب في حياتك ؟؟
اقوى عقاب اذا خذا الوالد ( السيكل ) حقي .. أحس خلاص ماعاد أتحمل

26/نشيد كنت تحبه أيام الطفوله ؟؟
النشيد الوطني كنت أردده دايم سبحان الله .. وتذكرت هالشي في حفل تخرجي بالكلية الحربية يوم رددنا النشيد الوطني

27/ماهي الموآقف اللي عرضت فيها اهلك للاحراج؟؟
بصراحه ماتذكر ..



28/اكثر موقف صدمك يوم انت صغير واثر عليك يوم كبرت ؟!..
عملية جراحية للوالد ... مانساها أثرت عليه الله يطول بعمره ولحد الان اتذكر هالموقف ويضيق صدري

29/كيف كان اول يوم مدرسه لك بكيت ولا لا ..؟
لا الحمد لله بحكم ان ابوي هو اللي يدرسنا كان اغلب الحصص عندنا

30/ ضعت في مكان؟ .. سوق او حديقه او كورنيش .. اذا اي قولنا السالفه ..؟...
ضعت مره في الحرم كان عمري 11 سنه في صلاة الظهر طالع مع واحد من اخواني اكبر مني وضيعني المهم مالقوني الا في صلاة العصر عند مكتب التايهين الله لايبلانا والله هالموقف مستحيل انساه .

31/وشهي اجمل هديهـ خذتها في طفولتك...ومانسيتها ابد...؟!
هدية من الوالد ( سيكل ) على عز السياكل ولحد الان راسخه في ذهني

32/بصراحهـ من كنت تحب بطفولتك اكثر امك ولا ابوكـ....؟!
والله كلهم ..

33/في انسان معين تحس انك كرهتهـ في طفولتك وذا اي ليهـ...؟!
مافيه والله

34/متى هي المرة من المرات اللي حقدت فيها على اهلك وانت صغير\يعني سوولك حركه قدام احد وانقهرت بقوة ؟؟

واحد من اخواني كنا نطلع نتمشى بالسياكل .. بالاجازه وكانت الساعه 10 بالليل جاء قدام اخوياي بالسيارة شال السيكل وركبه بالصندوق وركبني معه ووداني البيت وقتها حقدت عليه من جد هههههههههههه

35/لحقت تتابع/ين سبيستون ؟؟ ولا القناه الاولي بالصبح والعصريه ؟؟

القناة الأولى العصرية .. وفي رمضان برنامج حروف من تقديم ماجد الشبل وبعد كذا غالب كامل

36/هـل كنت تغلط في نطق الحروف ..؟
والله ماتذكر لكن الحمد لله النطق عندي مية المية

37/موقف سويته ..والى الحين مااحد يدري عنه ؟
مره افطرت في نهار رمضان شربت موية بس حسيت نفسي عطشان .. ولحد الان ماحد درى عني .. الله لايعاقبنا

38/مين اعز صديق طفولة و الى الان متواصل معه>><؟
واحد من عيال خالتي لحد الان متواصلين الله لايفرقنا


كل الشكر الصادق .. ليكفيني شموخي على المقدمة اللطيفة والجميلة
وعلى هذا الإطراء الذي أتمنى أن أستحق بعضاً منه
بكل أمانه أخجلتني هذه الحروف .. واتمنى دوماً أن أكون عند حسن الظن
شكراً لكِ على استضافتكِ وشكراً على كرم حرفكِ
وأتمنى أن وفقت في هذه المقابلة اللذيذه
دمتم جميعاً بخير

[أبوإبراهيم الشويعر]

المشاركة الأصلية كتبت بواسطة القيصـــر   37/موقف سويته ..والى الحين مااحد يدري عنه ؟ مره افطرت في نهار رمضان شربت موية بس حسيت نفسي عطشان .. ولحد الان ماحد درى عني .. الله لايعاقبنا

أفلقني كانه إلى الآن مادرى أحد ... قرينا جوابك ودرينا خخخخخخخخخخخخ ... المكيظم ـ لاهنت ـ شف شغلك مع هاللي مفطرٍ نهار رمضان .

[القيصـــر]

المشاركة الأصلية كتبت بواسطة أبوإبراهيم الشويعر   أفلقني كانه إلى الآن مادرى أحد ... قرينا جوابك ودرينا خخخخخخخخخخخخ ... المكيظم ـ لاهنت ـ شف شغلك مع هاللي مفطرٍ نهار رمضان .

هلا وغلا .. قصدي الله يسلمك من أهلي <<<<<<< بيرقعها
لا الا المكيظم .. وترى وقتها توني صغنون مابعد وجب الصوم بس اتعود <<<< خاااف من الهيئة ههههههههههه .. الله يحييييك ابو ابراهيم .. مشكور على تعليقك اللطيف ..

وأترك الإختيار للأخت يكفيني شموخ ...