ღ .:. مســـــــــابقة التحــــــــدي بين الشعــــراء والاعضــــــــــاء .:. ღ

[أبو ريان]

ههههههههههههههههههههه والله ضحكت من جد يعني هاذي المعجزة اجل استلم يا لكيع



ابكـتب رد لعـلي ابفـهم معـــنى أبصـايز &&& خنفوشاري ما يقـبل جهازي لو يترجمها

خرابـيـط بلا معنى ولا هــو للــشعر جايز &&& ولجلك يا زعيم باللـكــاعة قــلــت الحــنها

وانا من قبل ما تنظم بوقت كنت انا فايز &&& ولاني عاجز اكتب من بيوت الشعر واعلنها

وابعلنها على المكشوف للمعتاز والعايز &&& ولا من جتني الحاجة قدرت اشرح مضامنها

[( عابرة سبيل )]

:
:

صباحكم / خيــراتـ

المشاركة الأصلية كتبت بواسطة   ابكـتب رد لعـلي ابفـهم معـــنى أبصـايز &&& خنفوشاري ما يقـبل جهازي لو يترجمها خرابـيـط بلا معنى ولا هــو للــشعر جايز &&& ولجلك يا زعيم باللـكــاعة قــلــت الحــنها وانا من قبل ما تنظم بوقت كنت انا فايز &&& ولاني عاجز اكتب من بيوت الشعر واعلنها وابعلنها على المكشوف للمعتاز والعايز &&& ولا من جتني الحاجة قدرت اشرح مضامنها

:
:

قدهــــا وقـــــدود ياشاعــرنــــا
( أبــــــــو ريـــــــــــان ) ...

صح لسانكـ / ودان نبضـكـ

::
:

والفوز لكم
وبالتــوفيق ...

:

[سديراوي عسل]

أبو ريان شكلك متحمس من جد ....


طيب خذ



بندر قعيدان بداية الشطر الاول وكلمت نادي النصر في الشطر الثاني

[أبو ريان]

بصراحة أول مره أسمع بهالاسم بندر قعيدن والله يستر علينا وعليه ولا نجيب اعراض الناس بسوء بسبب مسابقة ولكن هاذي شروط المسابقة ومضمونها ولجنة التحكيم وضعت شروط يجب ان نتقيد بها وان لا نخرج عن نطاق المسابقة واستلم


بندر قعيدان منهو يوم انا اذكر في صفاتة &&& وهل صحـيح انه يمثل نادي النصر السعودي

يمكـن انه لاعـب وسط الـمـلاعب معجزاتة &&& والصـراحة ما عرفـتـه ليت عـصره ما يعودي

وكانه اسـم من خيالك نـاسجـة ماله ثباتة &&& لاتجيب بطاري أسمه وان حضر ماله وجودي

ولا نبي نـذكر بشخص ونتدخل في حياتة &&& يمكن انه لـك عــزيـز والـحـكـي به ما يفودي

ويا لكع لا تـلـكـع واتـرك هروج الشماتة &&& وعـطـنـي مـن فيـضـك كـلام نافع ولا يزودي

وخل فكـرك صاحـي ولا يكود في سباتة &&& وابـشـر بـرد يـسرك ولـو تـبـي عـشرة ردودي

وكان عندك رد ساخن سم بالرحمن هاتة &&& والله اني لا احـتـويـه مـن الـردود بـلا حـدودي

[سديراوي عسل]

هههههههههههههههههههههههههههههههههههههههههه





الصراحة إنك فلة بس ماني مستسلم زي الشباب ...

[جنون]

السلام عليكم..

رحت وجيت..
والشعراء مافيهم الا ابوريان..

ماشاء الله عليك..
والله انك منتب سهل..


ومثل ماقال السبعين لو نجمع اللي كتبت بيطلع لك ديوان..

ماشاء الله عليك..



اقول..
انا بصراحه مع اخوي السبعين في اقتراحه..
وان شاء الله نشوف الموضوع قريب..
صحيح ماعندي سالفه بس ابي اجرب حظي واشوف..


ابو ريان..
الله يعطيك الف عافيه على الابداع..
ودي اطلب منك طلب..
بس تراه تعجيزي شوي..
ويبي له جلسه..
واتوقع انها ماراح تصعب عليك..

ابيك تكتب لي كل قرى سدير في قصيده وماابيك تنسى اي ديره منها..
وان شاء الله تكون قدها وقدود..


يالله يالشعراء اذا احد بيجيبها فانا اشهد انه مبدع..


وروني همتكم..


والله يستر لايكون خالفت شروط المسابقه..

[أبو ريان]

جنون غالي والطلب رخيص تامر أمر وما طلبت كثير



آلف أولــف واكـتـب الشـعـر بإيـجاز &&& واصــيغ آنا الآبــيات وادون الغــــاز
وان قـلتها بالـشـعـر في ناس اعزاز &&& ألـفــية واقـصـد بهـا ديــرتــي سـدير
وألـبا بـدون شـعـور وجـهـت عـاني &&& بعـد العــصـر للـصـاحـب اللي دعاني
ورفـيـقي اللي مـخــلص مــا يــداني &&& كــثـر الــحــجـج والمـتـبعـه بالـتعاذير
والـتاء تـوجـهــت بعــجـل يــم ثـادق &&& ومـصـفي الـنـيـة وبــشـعــور صـادق
وقــلت أتعــلـل عــنـدهـم فــي دقـايق &&& وانشد عن الـديرة وعـن مـقـدم الخير
والــثاء ثـوانـي بعـدهـا قـلـت ساري &&& بسري عــلى القـمرا وبـين الصحاري
وبـكـمـل الـمــشـوار بـيـن الـبـراري &&& وبـيـن الفـياض اللي زهـت بالـتـناوير
والجيم جاني من هوى سديرنسناس &&& يــوم وصـلت العــودة وديـرة دبــاس
وبعـد صـلاة الفـجر مع طـلعة الناس &&& لـقــيـت لـي عــودا يحـــب المـسايـــير
وقال الغـدا عـندي ولا تطـري اعـذار &&& وبـــسـبقـك آنا لــلدار وابــشعـل الـــنار
ومغــيـر آنا وإيـاك والــثالــث الـجار &&& وتـرى الغــدا جـاهــز ولا فـــيه تأخــيـر
والحاء حسبت الوقت وش منه باقي &&& ومـريـت بعـــشـيرة وشــفـت الــسواقي
واحـن لعـشـيرة إلى الـصـدر ضـاقي &&& وهــي ديــرة رجــال قــروم ومـناعــير
والخاء خـطر في بالي أروح لــتمـير &&& هي مــنبع للـخــير وهي مــسكن الـطـير
واريح الخـاطـر بـعــد هــا لمــشاوير &&& ووصـلت انا لـتـمـير في وقـت الاعـصير
والدال دعـوة من هل الطيب والجود &&& فــيـهـم كــرم وافــي ولا فــيه مــنـقــود
وذباحة الحـايل وريـح ازرق الـعـود &&& بـيــن الــتــمارى شــفــت كـل الـتـقـادير
والـــذال ذهــني شـــارد للـخــطـامة &&& آهــل الكــرم والجــود واهــل الــشهامة
وفيــها رجـال وصـفـهـم بالـنـشامة &&& هــي ديـــرة الـــوردي ونــاس مشاهــير
والراء ركبـت بموتري لدار الاخيار &&& دار ســـقــاهـا الله مــن خــيـر وامـــطار
ومعـروفـة بأسـم الجنـيـفي وعـطار &&& وهـم حـشمة للـضـيف مـن دون تقـصير
والـزاء زوال الشمس قـرب يغيـبي &&& ولــقـــيت بالعــطار مـــســك وطـيــبــي
ومن بـيـنهم ما فـيه شــي يعــيــبي &&& ويـعــجـز لــساني عــن كـثـير التعـابـير
والسين سـعـد اللي عــزومة قــوية &&& ويكــمـل الـمـشـوار عــقـــب ضـحـوية
ولاهـــل الجــنـوبــية الـيـن العشية &&& عـــشــية مــن بــعـدها يــكـمـل الــسـير
والشـيـن شـاقــتــني ديار فــسـيحة &&& من جـيت آنا الحـوطـة ونفـسي مريحة
ولقيت الكرم بأهل الوجيه السميحة &&& وطـبع الكـرم فــيهم تـساوى مع الغــير
وفي مقبلة شـفـت الـكرم والضيافة &&& واللي تعــنى لـــمـقـبـلة غـصـب شـافة
ولا نيب أجيد المدح واهوى احترافه &&& بـــس آن قــول الحـق ما يــزعـل الغير
والصاد صـوت للرعـد بـين الـمزون &&& يحـيي غـروس نابـعة وسـط الحصـون
وان جـاهـم الطـرقي تعــادوا يهـلون &&& وتسابـقـوا له واشعـلوا له مــباخــيـر
والضـاد ضــو تـشـتعــل ضــيـها بان &&& ولقــيت بالـروضـة شـباب وشـيــبان
وعـز الله انـي عــندهـم كـنت ربحان &&& فـي مـعـرفـة نـاس دعـوني بـتـقـدير
والطـاء طـلعـت وقــلت با ريـح البال &&& وبـلفي عـلى ديار وهي خـير مـنـزال
وجـيت الـتويم وقلت يا نسل الابطال &&& يا مركـييـن الـسـيف في وجه المغـير
وسـيوفـكم تـصـمد عـلى كــل غازي &&& ما قـلت أجامل وافـتخـر بأعــتـزازي
واللي عــناكــم بالــتــقــاديـر فـازي &&& وأمسى يـقول أبــيات شعـر وتصوير
والـظاء ظـلام الـلـيل قــرب يـزولي &&& وامـسـيت بجلاجـل وفـكري يجـولي
و ريحـت بالي من كـثـير الحـمولي &&& وامرحت بجلاجـل وحالي غدت غـير
ولقـيـت بجــلاجل ضيافــة بـلا حـد &&& ولا نـيـب اجـامـل بالــمدح واتعـمد
والعـصر وجهت اتمـشى على السد &&& واخـذت لي جـوله بـعد وقـت الاخـير
والعـيـن عقب العصر قلت السلامة &&& مـن بـعـد مـا ودعـت ربـع نــشـامـة
وربـع تحـفـوا بـي بـعــز وكــرامـة &&& واشهـد شـهادة حق ما شفـت تــنفـير
وجــيت المـعــشـبة نـاوي بالزيارة &&& اسـتـرجع الـذكـرى بـوقـت الحـضارة
وسـط الـنخــيل اللـي تــدلـى ثمارة &&& واطــالـع عــذوق عــلـتها عـصـافـيـر
والغـيـن غرد بالسماء طيرالافراح &&& طـــيـر ويــصـدح كـل مـا بـارق لاح
والمجـمعة تـزيــنت بأجـمل وشاح &&& ومااخـطيت آنالا قلت هي نجمة سـدير
والفاء فـتـني منـظر جـوي بالـليل &&& بـيـن الغــروس وبـين كـل الـمحاصيل
ويالله يا مـنـشي سـحاب ومخاييل &&& تحـفـظ ديـار سـديـر مـن شـي يــضـير
والقـاف قـرب ينـتهي بي مـسيري &&& مــن جـــيت آنا حـرمه بجـوا مـطـيري
وجـوا يـرد الروح ولا هو يضيري &&& وأمـسيت في حرمه بعـدها الـمسـايـير
والكاف كـونت بـمـسيري عـلاقات &&& والحــمد لله مـا صــدفـت الــصعـوبات
ولـقـيـت مــطـلوبي بكـل الزيارات &&& وبزيـارتي لـسـديــر خــير عـلى خـيـر
واللام لمـت شـمـل كـل الجـماعة &&& مــتـكـاتــفـيـن وكــلهـم فـي ســنــاعـة
ومن لا يـجيد الشعريكفي سماعة &&& وانا كـتــبت الــشعـر مـن دون تـبهـيـر
و ا لميم من شعـري كتـبت القصيدة &&& قــصـيـدة فــيـهـا الـــمـعــاني عــديــدة
وهوايتي بالـشعـر ما هي جديدة &&& بــس ان حــب ســديـر خـلانـي احــيـر
والنون نجم سهـيل لا شع نورة &&& عـلى ريـاض ســـدير وفــيـاض نـــورة
ووراط والـشـوكي تـفـتح زهورة &&& يحـلى لي المـكـشـات مـن دون تـعـكير
والواو وعـد قاطـعـة ما نــسـيـته &&& ولـو كان حـب سـدير يـشـرى شـريته
ومهوب ودي بس غـصب هويته &&& غــصـب عــلي وكــل شـــي بــتـقــديـر
والهاء هـمومي زالت من البداية &&& وقـول الـشعـر والـمـدح ما هـو كـفـاية
وبكتب وبـمدح دون مقصد وغاية &&& وهـاذي حـقـيـقـة لا تـغـــزلــت بــسـدير
ويا سدير عـشقي فيك ماله مثايل &&& ما قــلـت فــي جـــده وابــهــا وحـــايـــل
وقمت اتغـنـى بـيـن ذيـك الحمايل &&& واجـر صـوت كـلـيـب مع ســالـم الــزيـر
والياء ياربي تحـفظ سدير من سو &&& وتعــمهــا بالخـــيـر وبـــطــيــبة الــجـو
وصلاة ربي عـد ما الJخـلق صـلو &&& عــلــى نـــبي مـــرســـل بالــتـــبــاشــير

[سديراوي عسل]

يعطيك العافية ...... أستاذي وشاعرنا أبو ريااااااااااااااان كفوا



قدها وقدود

[روح سدير]

يعطيك ألف ألف عافية

أخوي أبو ريان

[مثل النخيل خلقت]

والضـاد ضــو تـشـتعــل ضــيـها بان &&& ولقــيت بالـروضـة شـباب وشـيــبان
وعـز الله انـي عــندهـم كـنت ربحان &&& فـي مـعـرفـة نـاس دعـوني بـتـقـدير



صح لسانك اخوي او ريان ..

[جنون]

ماشاء الله تبارك الله..

صح لسانك ياشاعرنا الغالي..
والله ابحفظ قصيدتك عندي..
من جد ابدااااااااااع..
ومايعجز عليك شي..
صح لسانك مليوووووون..
وعسى الله لايحرمنا منك ياغالي..
بصراحه..
خلاص عقب هالقصيده مانيب متحديك ابد..




عسى الله لايحرم المنتدى من شاعرنا الغالي ابو ريان..



والشـيـن شـاقــتــني ديار فــسـيحة &&& من جـيت آنا الحـوطـة ونفـسي مريحة
ولقيت الكرم بأهل الوجيه السميحة &&& وطـبع الكـرم فــيهم تـساوى مع الغــير



صح لسانك ياغالي..

[( عابرة سبيل )]

:::
/:


شاعرنـــــــــــــا العظيـــــــــم ( ابو ريـــــــــان ) ...
أبدعــــــــــــــــــــــــت ... مشاءاللـــــــه عليـــــــــك ...

::
:

الفوز ... للشعراء بـ قيادة ابو ريان ...

:
:

دمتم سالمين ...
::

افكاركم جميله ... يبيلها قعده وتكتكه

::
:

سترون الجديد باذن الله

[أبو ريان]

[frame="7 80"]عندي قـصيدة شعـر مضمونها ابيات &&& أبيـات ادونـها بـبعـض القـصيدي
واختم بها المشوار وانهي المسافات &&& وارفع جـزيـل الشكر للمـستفيدي
اقـصـد بها مـن شارك بـكـل ما فات &&& وللـي حــضـر مــستـمع بالنشيدي
واخـص دمـعـه ألـم تـشـكـر وبالـذات &&& يوم طـرحـت موضـوع جزل مفيدي
واقول هـاتـي مـن جــمـيع المـلـفات &&& ومن نهجك السابق عطينا الجديدي[/frame]

[أمير سدير]

ماشاء الله

جهد طيب

بارك الله فيكم

[( عابرة سبيل )]

المشاركة الأصلية كتبت بواسطة   [frame="7 80"]عندي قـصيدة شعـر مضمونها ابيات &&& أبيـات ادونـها بـبعـض القـصيدي واختم بها المشوار وانهي المسافات &&& وارفع جـزيـل الشكر للمـستفيدي اقـصـد بها مـن شارك بـكـل ما فات &&& وللـي حــضـر مــستـمع بالنشيدي واخـص دمـعـه ألـم تـشـكـر وبالـذات &&& يوم طـرحـت موضـوع جزل مفيدي واقول هـاتـي مـن جــمـيع المـلـفات &&& ومن نهجك السابق عطينا الجديدي[/frame]

::
:

شاعرنـــا القديـــر ( ابو ريـــان ) ,..
اخجلتنــــي بـ طيبة عطائــــك ..
واتمنى لـــك التوفيق ... والاستمرار في العطـــاء
...
:
:
اشكر الجميع على المشاركه والمتابعه ...
واشكر كل من تفاعل .,. معنـــا ..
فبكم .. المسابقه تقام ...
والكم فقط ...

:
:

شكـــــرا جزيــــلا