السيدة الألمانيه والضب الأليف ....

[تأبط شرًا]

تصر سيدة ألمانية تعيش في السعودية منذ 13 عاماً، على أن الشباب السعودي يسئ معاملة الضب، ويقود حملة إبادة موسمية ضدها( هل يدخل هذا في قائمة الإرهاب حسب تصريحات الحكومة الامريكيه ؟) ، وتؤكد أنها تسعي حالياً لدي جهات حكومية لتمكينها من إنشاء جمعية لحماية الضب تستمد مواردها المالية من تبرعات الأفراد والهيئات ( إيه قابليني) .



وتتلذ السيدة انجلاء في تكرار حديثها عن إمكانية استئــناس الضبان وتربيتها في المنازل كحيوانات أليفه تفوق القطط ظرفاً ودلالاًًَ( والله إلي مسووها ربعنا). وتضيف أنها على امتداد أخر عشر سنوات ربت ضبا واحداً على الأقل مع أطفالها باستمرار. وتشير إلي أن حياتها في الرياض شحنت جمجمتها بتفاصيل حياة الضبان في جحور تتوسط صحراء شحيحة، وأقنعتها بالأخطار المحيطة بها نتيجة حقن غاز عادم السيارات أو الماء ( أسلحة الدمار الشامل) في جحورها لإخراجها ثم قتلها بأعداد كبيرة. تتحدث إنجلاء قليلاً عن زوجها الطبيب وأبنائه الثلاثة وكثيراً عن ضب وجدته وحيداً(يا حرام) في صحراء الرياض. يسكن حالياً معهم في المنزل ذاته وتسميه "ديـنـفــز" يبلغ من العمر ثمانية أعوام. تقول عنه " لا يزال شاباً مفعماً بالحيوية، وتؤكد أن هذه النوعية من الضبان تعيش أكثر من 25 سنة إذا نجت من حملات القتل الموسمي ، وتصفه بالذكي الوديع دوماً، مؤكدة أنه يتقبل التدريب ، ولا يستوحش من وجود أجهزة تقنية، كما أنه يستجيب للصغار إذا نادوه

"دينفز تعال ...."



المصدر: خالد الفاضلي / جريدة الاقتصادية

تاريخ : 14 سبتمبر 2002


هو وذالخشه أسمه دينفز

[تأبط شرًا]

الضب :

حيوان يشبه الورل وهو أحرش الذنب خشنة مفقرة ولونه إلى الصحمة وهي غبرة مشربة سوادا وإذا تيمن أصفر ولا يأكل إلا الجنادب و الدبي و العشب ولا يأكل الهوام وأما الورل فإنه يأكل العقارب والحيات . ( خوش تعريف )



طريقة وضع البيض:

إذا أرادت الضبة أن تخرج بيضها حفرت حفرة في الأرض ورمت فيها البيض وطمتها بالتراب وتتعاهدها كل يوم حتى يخرج وذلك في أربعين يوما وهي تبيض سبعين بيضة أو أكثر وبيضها يشبه بيض الحمام .

والضب يخرج من جحره كليل البصر فيجلوه بالتحديق للشمس ويتغذى بالنسيم ويعيش ببرد الهواء وذلك عند الهرم وفناء الرطوبات ونقص الحرارات.







جحر الضب :

من الكيس الضب أنه لا يتخذ جحره إلا في كدية ولذلك توجد براثنه ناقصة كليلة لأنه يحفر في الصلابة ويعمق الحفر كما قال الشاعر خالد بن الطيفان:

ترى الشر قد أفنى دوابر وجهه-كضب الكدى أذفنب براثنة الحفر


الموضوع الذي يختاره الضب لجحره :

الضب من طبعه النسيان وعدم الهداية ولذلك لا يحفر جحره إلا عند أكمة أو صخرة أو شجرة ليكون متى تباعد من جحره لطلب الطعم أو لبعض الخوف فالتفت وراء ه

أحسن الهداية إلى جحره و لأنه إذا لم يقيم علما فلعله أن يلج على ظربان أو ورل فلا يكون دون أكله له شيء .وقالت : كل ضب عند مردياته وأخدع من ضب والمرداة الصخرة يرمى بها ولذلك جاء المثل (أضل من ضب)





الضب حيوان غريب في مظهره وباطنه وقد خلق الله فيه من العجائب والغرائب الشيالضبء الكثير فمنها :

1-طول الذماء : وهو بقية النفس وشدة انعقاد الحياة والروح وبقائها بعد الذبح وهشم الرأس ومن أمثال العرب في بقاء الروح في الضب قولهم :( أحيا من ضب ) لأن من مصاده ربما ذبحه ثم يدعه فربما تحرك بعد ثلاثة أيام .؟!

2-وهو يشارك الحية والوزغ في طول الروح فإن الحية يقطع ثلث جسمها مع ذلك تعيش إن سلمت من النار.

3-ومن أعاجيبه وغرائبه طول العمر فقد قيل أنه يعيش سبعمائة سنة فهو يشارك الحيات في هذه الميزة .

4-ومن أعاجيبه أنه لا يشرب الماء وإنما يكتفي بالنسيم البارد والهواء الطلق وذلك عند الهرم وفناء الرطوبة ونقص الحرارة

5-ومن ذلك اتخاذ الجحر في الصلابة فوفي بعض الارتفاع خوفا من الانهدام ومجي السيل عليه وذلك يدل على ذكائه وحزمه.

6-ومن أعاجيبه أن له أيرين يعني ذكرين و الأنثى جرين يعني فرجين واسم ايره النزك.

7-قال أبو حية :الأصل واحد والفرع اثنان والأنثى مدخلان .

ومن عجائب وغرائبه أيضا:

8-أن بينه وبين العقارب مودة ومحبة لذلك يؤويها في جحره لتلسع المتحرش به إذا أدخل يده لأخذه وعلى من يريد أن يصيد ضبا أن يحترس.

9-ومن أعاجيبها أن تأكل أولادها ولذلك قيل : أعق من ضب .

ومنها أن بينه وبين الحية عداوة .

10-ومنها أن الضب ينبت له سنا منذ ولادته وينمو جسمه مع كبر عمره .





طريقة إخراج الضب وصيده ، وفوائد الضب .

هناك أمور تخرج الضب من جحره فمنها :

1-السيل إذا جاء سيل فإن الضب يخرج من جحره .

2-أو يصب بجحره ماء .

3-حفر جحر الضب مع الاحتراس مما في داخله من العقارب .

4-إفزاع الضب حتى يخرج من جحره .

5-مطاردته بالسيارة حتى يبتعد عن جحره .

6-استخدام المسدس وذلك بإطلاق النار عليه أو أي أداة حادة .

7-صيده بالشرك وهي طريقة يستخدمها الأعراب لصيد الضب .

8-وضع التمر أو روث الإبل أمام جحره حتى يخرج ومن ثم صيده.



فوائد الضب :

1-إن الأعراب ربما تداووا به من وجع الظهر.

2-إن خرا الضب صالح للبياض الذي يصير في العين .

3-يزعم بعض الناس أن أكل لحم الضب يزيد في العمر وهذا كما يزعمون أن أكل الكلية جيد للكلية وكذلك الكبد والطحال والرئة واللحم ينبت اللحم والشحم ينبت الشحم .

4-أكل قلب الضب يذهب عن الإنسان الحزن والخفقان .

5-من أكل طحاله يمنع عنه وجع الطحال ويأمن منه أبدا.

6-لحمه أي الضب يقوي البدن ويعين على الجماع .

7-من أكل منه لا عطش زمنا طويلا !!

8-من استصحب معه خصيتا الضب يحبه الخدم محبة شديدة؟!!

وهذا من الأساطير والخرافات

9-جلده يجعل منه خلاف للسيف يشج صاحبه عند القتال .

10-إذا دق بعره ووضع موضع الشوكة اجتذبها.



الخلاصة في حكم أكل الضب :

إن أكل الضب حلال وقد وردت الأخبار في الصحاح بنقول الإثباتات عنه بإذنه في أكل الضب وإباحته وقد أكل على مائدة الرسول .


منقول

[تأبط شرًا]

أنا رجّال حضري .. حيل ..
ما آكل الضب و لا عمري ذقته ..
لكن أمر الله شق الجربة ..
إذا قرصك الجوع تاكل حتى الحيايا .. ( يعني الحيّات )
يا معوّد الشباب أكلوا البرسيم ( الجت ).. بس مطبوخ ..
و في بعض الروايات .. أكلوا تبن .. ( بس أنا مو معاهم .. )
الضبان أهون يا معوّد ..
و الله طحنا في الضبان طيحة قشرة .. حتى الواحد صار يخاف تطلع له عكرة ..
لكن العهدة على الشباب الخبيرين .. يقولون هذا ضب ..
و اللي أشوفه صراحة إن شكله أقرب إلى الورل .. .. و أنتو بكيفكم ..
الشباب يقولون إن لحم الضب مثل لحم الدجاج .. هذا بالتواتر ..
و اللي شفته هناك إن لون لحمه و طعمه مثل لحم السمك بالضبط .. زفر ..
و بعدين الضب ما يسبح .. هذا أنا شايفه يسبح في الماي شوف عيني .. تقل تمساح ..
و بعدين .. هذا راسه مثل راس الورل ..
و له لسان مشقوق نصفين مثل لسان الحية بالضبط ..
لكن الصراحة .. بعيداً عن الرأس .. بقية الجسم مثل الضب
خاصة العكرة .. عكرة ضب ما فيها كلام
علاوة على أنه طامن ما هو دفرنسين مثل الورل ..
المهم .. ما كذبنا خبر .. لحم ببلاش .. صرنا نرسل فرق استطلاع
و فرق ترصد .. و فرق اقتحام .. لصيد الضبان ..
وش نسوي .. خاست بطوننا من هريسة أبو الجدايل .. أكلنا منها خياش خياش ..
و الطارش ما رجع .. ( أبو الخطاب راح لباكستان يجيب لنا ارزاق ) .. و هذا درب الضيف ..
و لا عندنا فلوس نشتري لحم .. الخروف بخمسة و أربعين ألف روبية ..
المهم .. أهم شي .. لا يدرون الأفغان إننا ناكل هذا المخلوق الزاحف ..
الأفغان .. كل شي عندهم حرام .. إلا بهيمة الأنعام .. ..
حتى كنا نصيد الوبر في كابل .. و نحطها في خياش .. و نسلخها بعيد
ثم نشويها و ناكلها .. و نقول لهم .. هذي طيور ..
حتى واحد منهم أكل معنا على أنها طيور .. ثم أخبرناه إنه وبر
قعد مدة طويلة يستغفر الله و يتوب إليه ..
المهم .. نرجع لسالفتنا ..
كنت أوصي الشباب أن يذبحون الضب و يسلخونه في الخفاء بين الشجر و يدفنون المخلفات ..
الأمور مشت على ما يرام .. ردحاً من الزمن ( لاحظ ردحاً .. ترى ما تلقاها في مواضيع فدغون )
إلى أن جاء أحد الأيام ..
زارنا الأفغان .. يشربون عندنا الشاي .. و حنا نتاغر زفر ..
و سالفة رايحة .. و سالفة جاية .. و ابتسامات صفراء .. و نظرات الشك و الاتهام ..
قال واحد منهم :
شفتكم أمس من فوق الجبل تلاحقون ضب .. ؟؟ ..

طن طن طرن .. صارت ..

اسقط في يدي .. ( و هذي بعد لو ينقز فدغون ما يجيبها )
قلت له .. لا أبد الشباب يلعبون .. .. تسلية يعني .. رياضة ..

قال : يعني ما تاكلونه ..

ضحكت باستغراب .. ههه .. ناكل ضب !! .. وع .. ( الله من الكذب .. عسى ربي لا يعاقبنا )
و يلتفت الرجال .. اثاريه شايف آثار الجريمة
و يؤشر على الجلد .. اللي نسى الشباب يدفنونه ..
قال .. أجل ليش تسلخونه ؟؟ ..

قلت له .. : إيــــــــــــــه .. احم ..

هذا طال عمرك .. حنا نصيد الضبان و نسلخهم
علشان ناخذ جلدهم .. ( و أشرت إلى رجلي )
نــــســــوي فــيــه نــــــــعـــــــل ..
حشا .. قحطة مو همّام ..
المهم الرجّال بلعها و سكت ..

كاتبها كويتي

منقول
~~~~~~~~~~~~~
بعض القصص الأخرى هنـــــا

[تأبط شرًا]

هذي مجموعة معلومات عن الضب من حد الراس الين آخر شوكه في العكرة يعني تشريح كامل متكامل واتمنى اني اكون وفقت في تقديم هالمعلومات المفيده عن هالحيوان الزاحف




اسم الضب

يسمى ذكر الضب عير وخاصه اذا كان سافط العداد في الكبر والأنثى اسمها ضبه ، ومكون ، وولدهم الصغير اسمه سحيلي يعني الابو ينادونه ربعة ابو سحل اما البنت فاسمها ضبيبة لكن صعب جدا في علم الضببه انك تعرف الذكر من الانث وخاصه اذا كانت الضببة توها في مقتبل العمر الا عاد اذا بغيت تخربها وتسوي حركات وسخه فهذا شي ثاني

وهذي صورة للسحيلي



راس الضب باللي فيه

دايم العير يكون في راسه ورقبته حدود سود وبعضهم يحسبها لحية من بعيد وهذي ميزة الذكر الشايب ، وسنون الضب قوية مع انها صغيره لكن اذا قرطك وانت تبيثر عليه فاحسن حل انك تنخج خشته بعود او تكب عليه فلفل الين يعطس وتطلع يدك منه ، ودايم تلاحظ الضب يشرب هواء ثم يبخه بقوه وخاصه اذا كان مطرود ومقفله معه ، اما عيونه فهي غالبا ما تكون حمر وصبياته عسليه وله اذان على شكل خياشيم وسمعه احيانا يكون الله بالخير لأنك ترمي عليه بالشوزن وتسف من عنده وما جاب خبرك بس عنده حاسه قويه بمجرد انه يلمح قرطاسه تدربى يجحر وما تشوف الا عكرته سابقته


بطن وأحشاء الضب

آآآآآآه هنا مربط الضب هنا لندن قصدي هنا كلش المكينه والقير ونبدا بالمصارين اللي مالها داعي انك تخليها فيه بعد الذبح اكتم نفسك واقطعها وانطلها بعيد واهم شي في البطن هو السلايق هي بمثابة الكنز الثمين في احشاءه واذا كنت محظوظ بضب مربع ومزغدد من الربيع فتبي تلقى سلايقه حول ما تطلع مع اذانه من كبرهن وطولهن وفيه شي لازم تنتبه له في بطنه اللي هو المراره وهي عباره عن تفيفيخه صغيره لكن اذا انفقعت في البطن فسدت اللي فيه اقطعها بشويش واغسل البطن عقبها


عكرة الضب

هنا الزبده وهنا مطلب الضب وهالعكره تتكون من واحد وعشرين عقدة تقريبا وتعتبر سلاحه في وقت الزنقه وضربة العكره تسمى لسبه مشتقه من لسب يلسب لسبا اي رصعه و فيه طريقة ممتازه لتحريك الضب اذا شصب مكانه وهي انك تحرش عكرته وتدغدها مع جوانبها وبكذا يبي يمشي طبلونه في أي اتجاه تبيه ، بالاضافه الى ان العكره تعتبر اطعم مافي الضب لدرجة ان بعضهم اذا صاده يقطع عكرته ويطلقه الين يطلع شكله كنه موتر بدون نسافه




جلد الضب

جلده طبعا احرش وخشن ويستخدمون جلده في تزيين النعال والشنط وابواك الفلوس ، وميزة جلده انه ما يتأثر بالماء هذا غير تحمله للحرارة




بيض الضبه

يقولون ان الضبه تبيض حول سبعين بيضة او اكثر ويكون بيضها في حجم حلاو الصعو للي يعرفها او كبر المصاقيل وطبعا الضبه ما ترجن على بيضها لكنها تدفنه في مكان معين او مثلث الين يفقس ويبي له حول الاربعين يوم عشان يفقس يعني نفاسية بالضبط مثل حريمنا ويقال ان الأم تاكل عيالها اذا طلعوا من البيضه الا اللي وفق وعط قبل ما تطيح فيه




حياته واطباعة

يقولون ( ايه لزقها في يقولون ) ان عمر الضب ياصل 300 سنه ؟ او اكثر والضب معروف عند الناس بطول العمر، هذا غير انه يبطي في موته لدرجة ما نتصورها واغلبية اللي ذبحوه وقطعوه وفي القدر سقطوه لقو بعض اجزاءه تتحرك ؟ وقالوا الاولين في احد امثلتهم (لزق المثل في الاولين ) يموت الضب وعكرته تلسب ، كنايه عن صعوبة موته ، ومن أطباعه انه ضعيف الذاكره وعشان كذا تلقاه ما يبعد عن جحره لكن اذا داخ مع الربيع وخربها بعيد عن الجحر وطردته فهو يبي يسحب السيفون على جحره وارض الله واسعه، ومن اطباعه انه ما يتواطن مع الورر وقبلهم هواش ولعنة خيّر مع انهم يتشابهون شوي في الشكل لكن الضب يفضل العقرب على هالحيوان الزاحف المعصقل وبينه وبين العقرب صداقه ومصالح فهو يسكنها جحره مقابل انها تقرص كل من حاول يدخل يده يتلمس عكره، ومن اطباعه ايضا انه فيه شوفة نفس وكبر وخاصه وقت الخضره والعشب وتشوفه يختال في مشية يسحب عكرته ويمشي بشكل متغنج ، ايضا له قدره عجيبه في صبره عن الاكل فتلقاه يجلس في الجحر كم شهر بدون اكل ، ، هذا غير انه ما يحتاج للماء لأن جلده خالي تماما من الكحول قصدي من المسام




طرق صيدة

له كم طريقة واولها انك تجيب المسحاة والعتله وتبدا تحفر جحره لكن مشكلة جحره انه يكون طويل وعميق ومتعرج وهالطريقة انقرضت هالحين لكثرة العجازين في هالوقت ، والطريقة الثانيه هي انك (تغرّه ) بالماء الين يطلع وبعض الضببه هالحين تنبه للطريقه هذي وحط له خزان تصريف في جحره يعني يبي يقضي الماء ما طلع ، والطريقة الثالثه انك تشكمنه والمعروف انها مضره للضب وتفسد لحمه ، وفيه طريقه (المكناس ) وهو عصى تشبه وراعيه اذا شاف الضب خارط الريوس في جحره يختل له بشويش ويمشي على اطراف اصابعه و يطعنه طعنة غدر .

هذا مقطع من قصيدة ساخره :

الحب مواجهة كبرى

ابحار ضد العجان

صلب وعذاب ودموع

ورحيل بين الضبان






منقول

[اتيكا]

الله يعطيك الف عافيه أخوي تأبط شرًا
عزالله انك كفيت ووفيت
وجزاك الله كل خير
وكثر الله من امثالك
كلامك كله نظيف لا غبار عليه
والموضوع أكثر من رائع
وكتب بإسلوب راق
ومليء بالمعلومات الجديدة
الحقيقة ان الموضوع متكامل من جميع النواحي ومعلوماته وفيره وجمه ، وتعتبر مرجعا في تخصصه

تسلم الأيادي ألي نزلت الموضوع

[تأبط شرًا]

الله يعافيك أخوي أتيكا . وهذا أقل مايجب أن نقدمه لمنتدياتنا بصفه عامه ولك أنت شخصيًا بصفة خاصه لأنك دائم التواجد دائم المشاركات وكل مشاركة منك أكثر فائدة من التي قبلها وأكثرها إن لم يكن كلها موثق بالصور وفي الحقيقة فأنت تعتبر مرجع لنا في هذا المنتدى بما يخص الرحلات والصيد وأقول لك وبدون أي مجامله أو نفاق أنت مكسب لمنتديات سدير عامه والرحلات والصيد خاصه وشهادتك لي أعتبرها وسام على صدري من إنسان ذو خبره ولو كان عندي أكثر لما بخلت به على منتدانا وشكرًا لك .