قصيدة .. ممتعة .. مؤلمة ..

[ابراهيم بن عبدالله]

السلام عليكم و رحمة الله و بركاته



قصيدة جميلة ... ممتعة ومؤلمة ..



شاب على قد حاله راح يخطب بنت عمه المليونير

وشوف وش قاله :::


سبحان من يرزق بتوع الملاييـن------------------

------------------ الرازق اللي ما يخيب الرجـا بـه

لي عم عنده معـرضٍ للصواليـن-------------------

-------------------أموت واعرف بس من وين جابـه

وإذا سألته قـال بعـت الدكاكيـن--------------------

------------------ما يدري إني ما هضمت الإجابـه

الشاهد إني رحت له قبـل يوميـن -------------------

---------------------في قصره العامـر ودقيـت بابـه

قال ارحب ارحب عدّ ورد البساتين ----------------

---------------------يا مرحبا باللـي لفـا يـا هلابـه

قلت البقا عـدّ النفـل والرياحيـن--------------------

-----------------يا شيخ شمل اهل الكرم والذرابـه

قال اسلم الله يحفظك لي من العين -----------------

-----------------وآمر أوامر حضرتـك مستجابـه

قلت الصراحة طالبٍ قرب غاليـن------------------

-------------------ودي تزوجنـي كريمتـك يـابـه

ثنّى وقال اهليـن والله وسهليـن -------------------

----------------والكون ترخص لجل عينك رقابـه

لكن ترا عندي شـروط وقوانيـن------------------

----------------قلت اشرط اشرط يا حبيب الغلابـه

قال أولاً مهر العروسـة ثمانيـن------------------

----------------غير الرسوم وغير حق العصابـه

والثانية عمك يبي منـك سبعيـن------------------

------------------رسم الأبـوّة والنسـب والقرابـه

وام العروسة حقها منـك ستيـن ------------------

-----------------عشانها ست الحسـن والمهابـه

واخوانها كلن يبي منـك خمسيـن-----------------

------------------عداً ونقـداً تنـدرج فـي حسابـه

وخواتها الخمس اعطهن من ثلاثين--------------

-----------------عشان تتوثـق عـروق النسابـه

وتجيب طقم عيار واحد وعشريـن ---------------

---------------وخاتم من الماس المصفى ترابـه

واكياس متروسة كعوب وفساتيـن---------------

-----------------ألوانهـا واشكالهـا مـا تشابـه

وموتر بسواقـه وفيـلا بدوريـن ------------------

------------------أثاثهـا مـن بطرتـه ينحكـابـه

واحجز لنا قاعة بقصر السلاطيـن---------------

----------------واعزم أميـر المنطقـة بالنيابـه

هذي الشروط اللي على بالي الحين--------------

---------------وذكرني اللي ما حسبنـا حسابـه

قلت اذكر الله يا عـدو المساكيـن----------------

------------------واستغفـره لا يبتلـيـك بعـذابـه

الظاهر إنك منت عارف أنا ميـن -----------------

----------------أنا لو ارقا فـوق متـن السحابـه

ما جبت حتى نص درزن مواعيـن----------------

--------------واضحك بكيفك واعتبرهـا دعابـه

شروطكم هذي شـروط المجانيـن-----------------

---------------شروطكم شغـل ابتـزاز ونهابـه

شروطكم تقصم ظهـور البعاريـن-----------------

-----------------شروطكـم همّـن وغـم وكآبـه

شروطكم والله سيوف وسكاكيـن----------------

--------------تذبح بنات المجتمع مـع شبابـه

وين الرضا والعطف واليسر واللين--------------

----------------اللي ذكرهـا الله بمحكـم كتابـه

وين الصفات اللي أمرنا بها الديـن ---------------

------------ وين اختفى نهج النبي والصحابـه

يا عم جعل اللي خلقنا من الطيـن----------------

----------------يرد عقلك مـن خطـاه لصوابـه

ويجعل نصيبي عند غيرك قل آمين---------------

------------ويحسن عزا الصابر ويجزل ثوابه

قال انت لو فكرت تفكير صاحيـن ----------------

-------------ما شفت في مجمل شروطي غرابه

حنا بعصـر العولمـة والمزاييـن ------------------

------------ ماهوب عصر الفلسفة والخطابـه

الناس تسعى للرتـب والنياشيـن-----------------

---------------وانت اهتمامك بالشعـر والكتابـه

والشعر ما ينفعك لو هو دواويـن ---------------

----------------ما دام جيبك مثـل بيـت الخرابـه

يا بوك لا تسمع كلام المصاخيـن---------------

------------واسأل مجرب عاش في وسط غابه

قلت الله اكبر يا محـرر فلسطيـن -----------------

--------------من يسمعك يحسبك ذيـب الذيابـه

تراك شايب راس مالـك رياليـن -----------------

------------- والبنت ما تسوى جنـاح الذبابـه

قال انقلع مالت على وجهك الشين---------------

[بنت النور]

اف اف انقلبت مطاقة

والله لو انها حورية مادفع فيها كل ذا

[شموخ تـميميـه]

فعلا ممتعه ومؤلمه

مشكور اخوي

[ابراهيم بن عبدالله]

المشاركة الأصلية كتبت بواسطة بنت النور   اف اف انقلبت مطاقة والله لو انها حورية مادفع فيها كل ذا

حياك الله اختي الكريمة


وابوها وامثاله ... ودك تشوفه وهو رايح يخطب لولده

ونشوف بيدفع والا ... لا

[ابو كادي]

والله الوهقة



يخلي بته عنده لين تعشش عليها ام عشيش

[شيختهم تميميه]

شعره حلو بس كنه خربها بهالبيت

المشاركة الأصلية كتبت بواسطة   تراك شايب راس مالـك رياليـن ----------------- ------------- والبنت ما تسوى جنـاح الذبابـه

يا عميري البنيه وش ذنبها ؟؟ اكيد ودها بس ابوها هالشايب مغربل حياتها >>

[أمورة سدير]

تسلم اخوي على القصيده

[بسمة سدير]

[align=center]


والبلشة لا غدوا عياله كثار والله البلشة


الوالد يحب بنيته .. ويبيه تقعد عنده


فجابها من هالباب .. عشان لا يصير لهم أمل فيها


<< في راسها فكرة تفحط .. << [/align]

[ابراهيم بن عبدالله]

المشاركة الأصلية كتبت بواسطة مسـ بشويش ــرعه   فعلا ممتعه ومؤلمه مشكور اخوي

حياكم الله ,,,

[ابراهيم بن عبدالله]

المشاركة الأصلية كتبت بواسطة ابو كادي   والله الوهقة يخلي بته عنده لين تعشش عليها ام عشيش

صدقت والله بس وش ذنب البنية المسيكينة ,,,

[مشووته قواطي]

يعطيك العافيه

قصيده مؤلمه

بيذبحون الشباب و البنات بالطلبات


تحياتي

[امير الظــــلام]

[align=center]مشكووور خوووي والله يعافيك[/align]

[ابراهيم بن عبدالله]

المشاركة الأصلية كتبت بواسطة شيختهم تميميه   شعره حلو بس كنه خربها بهالبيت يا عميري البنيه وش ذنبها ؟؟ اكيد ودها بس ابوها هالشايب مغربل حياتها >>

اي والله وش ذنبها ..

حياك الله..

[ابراهيم بن عبدالله]

المشاركة الأصلية كتبت بواسطة اموره سدير   تسلم اخوي على القصيده

الله يسلمك ...

[ابراهيم بن عبدالله]

المشاركة الأصلية كتبت بواسطة بسمة سدير   [align=center] والبلشة لا غدوا عياله كثار والله البلشة الوالد يحب بنيته .. ويبيه تقعد عنده فجابها من هالباب .. عشان لا يصير لهم أمل فيها << في راسها فكرة تفحط .. << [/align]

تحليل منطقي .. بس لو كان ماعنده قروش ..

الله يعينه بس اذا دعت علية البنية ....
...