السلام عليكم ورحمة الله وبركاته
مبارك عليكم الشهر الفضيل 
<< وش اسوي لكم مالقيت مناسبة اقولها الا الحين 
اشكر مشرفين قسم الاستراحة لإتاحة الفرصة لابربر عليكم قليلاً كما يتخلل ذلك فقعت راس بس اللي مايبي من الحين يتوكل على الله ويكمل معي 
قبل ابدا الموضوع تراي ماسك بكم خط لاحد يقول ليه ماعلمتني !!
من حسن حظي ان يومي الرمضاني كان مغاااير جدا لجميع ايام رمضان هذه السنة
في يوم الخميس 16/9 << من ذاكرة التاريخ كانكم تذكرونه
كان يوافق اجتماعنا السنوي لإفطار مشرفي واعضاء منتديات سدير
اكيد راح يكون يوم غيييييير وننتظره على احر من الجمر
نبدا يومنا الرمضاني على بركة الله 
جت الساعه 12 صباحاً صدفه وانا مسير على ولد عمي في استراحته
اقولكم جت 12 وانا بالضبط عند باب الاستراحة بطلع امشي على رجلي انا وياه نطلق رجلينا
رحنا نمشي ونسولف وكل واحد يعطي الثاني نصبة وهذا يرد بنصبة اقوى يعني كل واحد يطير الوقت على الثاني
لين رجعنا تقريبا 12,45
المهم ونشب على الشاهي ونضبط الامور طبعا مابعد اجتمعوا الشباب انا وولد عمي لحالنا
ويبدا مسلسلنا الموقر بدون ذكر اسماء عشان ماسوي له دعاية ويجتمعون الشباب وجايبين عدة السحور لاننا نطبخ طبعا في الاستراحة
يوم جت 2 ويخلص ونشغل السوني وامسك اليد لاني متحمس شوي واصفي الاول ويجي اللي بعده واصفيه ويجي الثالث الخصم العنيد وانا متقدم عليه لين 88 بقي دقيقتين ويصفر الحكم ويسجل التعادل ونعلب اشواط اضافية ويفوز علي
المهم ويجي السحور ونتسحر وانا ماش صايق صدري وماكلت زين ماتعودت احد يفوز علي << ايه هين بس اشوى نص الصحن ضافه
يوم تسحرنا ولاها يمكن الساعه 3 ونص ونجلس نسولف شوي لين اذن رحنا نصلي ورحت للبيت
دخلت البيت كالعادة الساعه 5 تقريبا على طول مشغل الجهاز وداخل النت ,,
واقلب وانغبر واستبثر كالعاده ,, المهم انبسطت عشان شي معين واحط في عبر عن مودك صورة واحد طاير من الفرحة ,, يوم جت الساعه 8 كن ودي انام
قلت اصبر شوي خل اكملها لين 8 ونص وانام ,, يوم جت 8,28 بطفي الجهاز معد اشوف جت بنت اختي الصغيرة قالت خالي ,, ود خالتي اللي هي اختي للمستشفى حلقها يوجعها
قلت طيب خليها تجي وتجي واوديها للاسعاف عشان اللوز عندها ملتهب
ولا الشمس ساطعه قسم بالله شي يضيق الصدر ماحب ذا الوقت ابد
معي اني لابس نظاره شمسية بس ولو قلق
المهم وصلنا ولا ماعندهم احد و10 دقايق وراجعين
في تمام الساعه 9,17 وانا في الفراش جالس اتقلب يمين يسار كن النوم طار عاد يالله رح لاحقه
وانام اشوى مدري الساعه كم ,, واقوم الظهر واصلي وارجع انام واقوم لصلاة العصر وفيني النوم ودي ارجع
بس مالها داعي اسحب على الشباب لان الفطور اليوم
واروح لامي ولاها الله يجزاها خير جالسه تضبط وتشرف
قلت تبون شي ولاش علميني قالت ايه تكف جب ......... قلت ابشري
واقمز واجيب لها الاغراض اللي تبيها ,, قلت لاهنتي يمه بكري مالها داعي راعي الاوله يجلس يفطر عننا ثم اتهاوش انا وياه
المهم رحت تروشت ولبست ملابسي وجلست ادور الكبك ومسكت معي البس اللي في السيارة واطلع ويديني تومي يعني مفتوحه الزره
احس اني مسكت خط
واحرك من مدينة عودة سدير الموقرة الساعه 6 الا 7 دقايق
وامشي وامر البقالة واجيب موية باردة لاني قايل للشباب ان صرتوا مودبين بعطيكم موية واللي مايسمع الكلام نخليه يموت عطش
قلت بصور السلة اللي عطتني امي
عاد تعرفون السعودي مايحب يقضي اشغاله ويسوي اي شي الا والسيارة تمشي
عشان كذا جلسة البس الكبك وصورته عشان اللي يبي يشتري مثله اعمله من وين انا شاريه ههههههه
فاصل اوجعني ظهري وانا جالس اكتب الموضوع ,, اشوى اني منب اتكلم عشان ما اعطش في رمضان
نكمل ,, وين وصلنا عاد انقطع حبل الافكار 
<< شكل بعصكم يقول ليته منقطع من زمااان
ايه صح ,, المهم وجلست البس الشماغ هذي صورة عشان اكمل 3 صور هذي من شروطهم
واتعطر وانزل للشباب
طبعا كالعادة جابوا البخور وقاموا يرحبون ويهللون ومهب غريبة على الشباب لانهم يعرفون مكانتي العالية في المجتمع العربي
ومار كني قلت لراعي الاوله وقف السيارة في المواقف وهو اللي يكرشني وقال ورى ماتنطم وتجي لانفطر عنك قلت خلاص امزح اصبروا تراه مابعد اذن لاتسوون نفسكم معصبين وتاكلون قبل يذن
اطمروا الكلام اللي فوق احس ان ماله داعي << وش عقبه عقب ماقروه ههههههههه
وانزل واسلم على الشباب ياحبي لهم والله
مامداني اكمل اللفة الا ابو عبدالعزيز عضو مجلس الاداره قام يذن ونفطر وقدامي راعي الاوله يعني عز الله اللي ماراح افطر زين لحد يروح فكره ان نفسي انسدت لالالالا والف لا بس قصدي احترامي لسموه مايخليني اكل زين وجنبي ابو تركي الله يحفظه وجلست اقهويهم بس اشوى مايشربون كثير عشان ما ابلش بهم
افطرنا ووسعنا الصدر وصلينا المغرب ونرجع للشوط الثاني وانحاش عن راعي الاوله واروح انا مقبل وقمنا نسولف وفليناها وانبسطنا الحمد لله
شلنا السفره وسواليف وفله ,, كل واحد ماسك خويه جالس يقص له قصة حياته
جت الساعه 9 الا ربع وقمنا نصلي العشى والتراويح
خلصنا 9 ونص يمكن ,, قمنا نتقهوى شاهي ونسولف
لين 10 ونص وجاء العشى وتعشينا وكملنا سواليفنا << كل ذا اليوم راح في سواليف
يوم جت الساعه 11,40 وحدنا المجلس وتكلم ابو تركي ما اجملها من كلمة وبعده الاخ حمد
ثم القى ابو مازن قصيدة يسب فيها شركة الكهرب
يوم جت 12,30 جمعنا الاغراض وتكلنا على الله
تراي دخلت على اليوم اللي بعدي معليش كل واحد يصلح سيارته
وسلامتكم ومعليش على الاطالة 
28-08-2010, 07:33 AM
، بديت أحسّ إنّي ما قلْت شيء أبد في تقْريري على كذا 
.gif "A (1)")
العرض العادي
