|
(قصص شروك المقلعة من جديد) الأعضاء يشكلون فريق طرارة!!
أول شي بالدور
ثاني شي لا احد يساقط
ثالث شي لا تدف ( أدخل في الموضوع لا تنجلد خخخخ )
اول شي بالدور خخخخ
لا بصراحة انا اعتذر على الغيبات تعرفون دراسة واجتهاد ورانا شهادة هالسنة خخخ والانترنت مهوب ذاك الزود مرتن يشتغل وعشر يخرب ، فقلت في نفسي : هل يا ترورى الشباب نسوني والاش ، واثرهم ما عندك أحد ، لذلك فقد قرقرنا في مرسوم ÷ خ 145 ألخ ألخ ... ان ننزل قصتن بعنوان : ارفع رويسك فوووق وشفه خخخ علشان تتأدبون وتسألون عن عمكم شريك ثاني مره<< يبي ينجلد
3
...
2
..
1
.
ترم ترم ، ترم ترم << جوالي
أنا: هاه
هو: ألو شروووكي
أنا: لا ياخوي بيت عوايل مهب وكالة سيارات شروكي
هو: يا درج يا شريكوه ما عرفتاني ؟؟
أنا: لا والله ما عرفتانك
هو: جنون
أنا: ما شا الله عقبال الي في بالي وش تبي بي دق على شهار
هو: يا هوه وينك فيه ، أحد ينام لها الحزه؟؟
أنا: ايه أنا
هو: المهم اخلص تراني عازمك على الغداء
طااااااااخ بوووووم <<صوت خبط في السقف وطيحة على السرير ما صدق احد يعزمه خخخخ
شوي والا جنون موقف الشفر 88 عن باب قصرنا << هاي هاي تراني
واطلع لكم بذاك الثوب الي ما ودك الا تتمقل فيه ، واركب في الشفر وندز< يعني نروح
ونمشي بذا الموتر تقل جارن لك بيت يالله تفره ، وكل ما سولفنا شوي والا جنون افندي يهرج في سالفه ثانية!! وكل كلمتين : ياحليلك والله، هذي والله الساعة المباركه ، ساعتك أبرك لا لا ساعتي كاسيو << يا شين القراوى
المهم ونوقف لكم في ذاك المطعم إنما إيه اخلاااااق يعني ما هنا صراصير واجد تخوفها تنحاش مهب ذاك المطعم إلي رحت له أنا ووادي ذاك اليوم هشيته قام وطلع فوق الطاوله وسطر وادي تسطير لانه احول خخخخ
المهم اننا طلبنا ذاك الطلب الي مدري وش يبي : فتوش < يسميه جنون سلطه خبزخخخ ، ورز ولحم وعش بلبل وبتزا ووو يقالك سعودين خوالهم لبنانيين !! ونطق في الاكل تقل بزران راحت ثيابنا وطي ، ومير توني طالع من المطعم جلست على حوض الزهر الي قدام المطعم ، ومير شوي إلا ويشطفني واحد ويرمي 5 ريال يوووو خمسه ريال تسوي شي ، تجيب 3 مفرود و2 صامولي !! << تفكير شيبان
تجيب ببسي عايله ، تجيب صاروخ شاورما لسمسومه خخخ ، ونفس الحكاية مع جنون يوم جلس جنبي قام ورمى واحد عليه ريال << تجيب مفرود خخخخ
ما دققنا واجد في السالفه الا يوم وقفنا عند الاشاره ، ومير اشوف ذيك العجيز تفتر تطر عاد لا توصون جنون في القعط لززق أم السياره في مقفا الي قدامه ، اقوله يا ابن الحلال عطها الريال الي جاك ما له سنع ، يقول هو عطاني والا قالي عطها؟؟ اقنعني لكن تعرفون شريك كرييييم وشجااااع ووسييييم << وش دخلها ..
ومير واناديها واحط في يدها عشرة اريل بس للحق كانت مشقوقه خخخخ
ومير تنط الفكرة في راسي مثل نطت جنون الغبية في مطبات شارع سدير الي في الرياض يتميلح ما يتمشى الا في شوارع ديرته خخخ ، جنون قام يضحك لين طلع سن العقل المسوس ، عجزت تخش الفكرة في القدر الي حاطه في مخيخه الاوسط ، مير قلت ما بدهاش وارفع جوالي الدمعه << نصاااب بصمه وتخب وأدق على سمسومه واحط السبيكر
سمسومه: ايووووووه أرسل
أنا: "بغيت اقطع الخط توقعت اني داق على واحدن من الشباب" اهلين سمسومه ما عرفتيني
سمسومه: لأ " صوتها مدري وش يبي تحس تتمضمض وإلا تفك غطا ببسي
أنا: أنا شريكوه
سمسومه: مين؟
أنا: يؤ يؤ ماعرفتيني!
سمسومه: ورا ما تنطم ما اكلمك اكلم السنبله تقول من البعير الي يكلمك
أنا: ايه والله منهو البعير << ويقولون عنه ذكي
المهم يا سمسومه فيه فكره تعجبس مادامس عاطله باطله ما وراس شغل في هالصبحية ما غير تقطيع جلود هالاوادم في المنتدى وإلا حش البشريه في جلسة الكراث الصبحية والمغربية
سمسومه: احترم نفسك نحن تنناقش في امور المجتمع لدينا وجود على الساحة السياسية <<يؤ الكلام ذا حق عبدالكريم سماره يا النصابه علطوووول قص لزق
أنا: المهم لا يكثر بس << اخلاااق يا نااس اخلاااق
لقيت لس فكرة تطلعين من وراها ذهب وتخليس تاكلين من كل الاكلات الي نفسس فيها<< مسكتها مع اليد الي تعورها خخخ
سمسومه: ايه والله يا وخيي شروك كنك تشووف الحال، والله اني على لحم بطني وياالله اكل على قدي رجلي مهددني ياخذ رشيقه وحارمني من الاكل
أنا : شوي واصيح بغيت اجيب لها شورما مسممه خخ ، إلا أن السنبله فضحتها يوم قالت : جيبي صحنك اعبيه رز ودجاج وكبه ، يقطع ام القلق لاخر العصر وهي لسه في الغداء؟؟ وانا اقووول وش فيه صوتها مقرقع تقل شفر جنون يوم يشغله اثر تاكل وتهرج ؟؟ ، المهم وصيتها انها تضبط أمورها وتشوف من وده يشتغل معانا
اليوم التالي:
ترم ترم
أنا: هااااه
سمسومه: قم قم جعلك ما تقوم؟؟!!
أنا: لا احووول الشر يمشي في دمها ، هاه وش تبين جعلس ما تبين خخخ يبي يقلد عفط أم السالفه
سمسومه: تراني جهزت الوضع
أنا: وش وضعه
سمسومه: كلمت الاعضاء علشان مشروعك الي امس
أنا: ما شالله بها السرعه فراري مهب ادميه << ماتت خلاص العين تمشي لها مليون
سمسومه: اذكر ربك بس
أنا : ألف من ذكره << يبي النظله بالي هيبه ، المهم ما قلتي لي من وافق
سمسومه: اولا مكلمتك ، السنبله، مسز سدير، وادي ، راعي الأوله، حالم ليل، هذولي اكيد معاك انت وجنون ، يمكن يزيد احد والا شي بعدين
أنا: خلاص اوكيه ، الوعد ان شالله في ذيك البرحه الي عند بيت راعي 4 العصر
سمسومه: قداااام بأجيك ماااغطه من بيتنا
طاااخ << السماعه
اليوم الساعة اربع العصر:
اشوف لك الشباب كلهم ثياب رثه << بالله عليكم مهب شكلي مثقف على رثه ؟؟
إلا وادي جاي بثوب مخصر وسبحه تقل رايح سووق <<نكب الرجااال
وجنون عااد على شكله بغيت اعطيه ريال ملصق خخخ بس احلا ما فيه انه صاك الغالوق << يعني القلابي خخخ
والحريم على شكلهم تقل 115 ( 5 = سمسومه خخخ ) جايتن بذاك البشت وكندره كعبها منكسر علشان تصير العرجة طبيعيه !!
الي مستغربه راعي وحالم وش عندهم ، ومير انشب في حلق راعي وش السالفه لين علمني لان ظروفه الماديه وبنته مدري وش تصير له ـ الي في التوقيع ـ تحتاج لوازم وتعرف الاسواق سعرها غاالي ولاهنا وظيفه
شوي واصيح ، لكن جواب حالم قوي يقول ان الموقع يحتاج دراهم واشتراكه ينتهي من كثرة مشاركات الشباب << يبي يفقش ما قدر
وتونا بندخل في السالفه الا وراء الكواليس ملبق سيارته يقول انه درى بالموضوع من مصادره الخاصه وينزل المحمول وبدينا في الاجتماع ، على فكره انا سالت وراء الكواليس ليش يطر يقول لان اسعار القطع والسيديات غاااليه << ما تلعب يالاصلي أشوى انك أنت الي تنسخ وتبيع تبيني أعلم بل قتس يعلم خويه العم بوش يجي يسنعكم في الفلوجه ( الفلوجه = غرب الرياض ) << ما يلعب السياسي يبي ينقفط يوووم خخخ
سنع المحمول ان فيه صور لمواقع حلوه وطرق جديده في الطرارة ، وكل هذا بتعاون الكابتن س ق م الله يمسيه بالخير<<حجازي يا بعدي !!!! ، عاااد س ق وم مهب خوينا الأولي الله يهديه ويرجع زي أول ويحااااسب نفسه زييين!!! ولا يفوت شغلات منا والا منا علينا !!!! ترا المنتديات أهم شارك في صنع القرار <<انتخابات على غفله خخخ
وبدا الاجتماع بان تحدد مواعيد صباحية ومسائيه ، فكان الحريم صباحي ومسائي لهم النصف والنصف الثاني لصندوق الطرارة الي حطيناه علشان مساعدة الاعضاء وقت الحاجة والا ندخلهم دورات تدريبية << ما يلعبوون شؤون اجتماعيه مهب صندوق
انتهى الاجتماع وتم توزيع المهام منذ اليوم
سمسومه: اشاره الدايري الغربي مخرج 26
مسز سدير: أشارة نفق الطالبات ـ السويدي سابقاً ـ
السنبلة : أسواق العليا مول في العليا<< أجل في البطحاء ؟؟
شريك : أشارة العليا مع التحلية
راعي: اشارة الدايري الشمالي مخرج 5
حالم ليل: عند مسجد الراجحي
وراء الكواليس: حراج الكمبيوتر
وادي: أشارة كبري البطحاء
وتم اعلان قسم اللجنه: أقسم بالله العظيم أن أحافظ على فلوس الشحاذه ، ولا أبددها منا وإلا منا ، وأن أعمل بسريه وأخلاص ولا أخلي سيارة والا واحدن عابر إلا ويهل الدمعه ، وإلي ياخذ دراهمن أن شا الله أن شالله يموت كل سنه !!
------
---
--
-
-
في الليل اجتمعنا في بيت راعي الساعه 12 وكل واحدن منهد حيله ما غير تمغط وتسدح في المجلس ، المهم خلينا كل واحد يلخص ما جاه خلال الساعات الماضيه
سمسومه: والله ما حصلت الا 26 وعشرين ريال ، بصراحه مادامني حالفه تراها 30 ريال بس الاربعه ريال شريت بها ببسي وشاورما ، انهد حيلي وانا واقفه ، قسمن بالله كل ما قربت اما يتقدم واحد ، والا واحدن ما جازت السواليف له مع حرمته الي يوم قربت ، ونص الحوادث بسبتي يبون يتقدمون علشان يفتكون قربعوا في بعض ، احسن الطمع ضيع ما جمع ، وش بيضره هالشين لو معطيني ريال متعفط مثل غيره!؟؟!
النكته الي مهب طبيعيه أن سمسومه ورتنا صعرورتن كبر راس والدها خخخخ عاد سالفتها سالفه، نشبت في واحدن يوم خربت الأخلاق ما عطاها أي واحد ريال قامت تقربع في قزازته وما عطاها وجه قامت خذت علبه ببسي مدعوسه وشغغغغ على بويه السياره مير ينزل عليها السواق ويرفع بها سابع سما ويخبطها في سابع أرض بوووم الخبله تحرشت ببطل الحزام الاسود توه طالع من بودي ماستر يعني ابطال الجسم الي في شارع سدير، خبله ما شافت العظلات بس حظها شافت الأرض عن قرب خخخخ
مسز سدير: منتفه ما معها إلا 5 ريال وعشرييين ألففف استك سياره ، ما غير تقطيع في ذيك الاشاره
طبعا مسز سدير من زود الملل بلغت الشرطه عن سيارة قاطعة الاشاره ايه لان المواطن رجل الامن الاول ، ومن زين الطبايع كل ما فتح الواحد القزازه جتها نغمه رسالة ، ويوم جت تظبط الأمور حطته عند الهزاز وكل ما قربت من السياره تهز عاد يخافون منها يحسبون زيران والا شي ، الا سبهه رمى لها خمسه ريال وذب عليها كلمة، مير بحركة سريعة تقضب الكندره الي كعبها 400 سم وبوووم في خشته لين عرف يقول ربي الله ، ومير ما يحتاج ذهينه أطلقت عصاقيلها ، لو أنها سمسومه قالت : لو فيك خير انزل؟ ، واذا نزل قالت : أمزززح صدقت بوووم على جبهتها خخخخ
السنبله: هي ملكتنا اليووم دراهم ودلع ما يحتاج ، مرتن تطر ويطلع لها دراهم ومن زود الذهانه سوت مثل شغل ابو هنوود حمالي حمالي ومتين ألف شغله ، تطر وتشيل واذا نشب فيها واحد قالت له: عطني دراهم اسكت والا أزاعق اخلي الشيخ أبو أنس يمسح فيك بلاط السوق؟؟ عاد كلش ولاالهيئة
شريك: اخ كلش الا شريك ، اليوم مهب يووومه ، قعدت ساعتين عند الاشاره ولا احد معبرك ، ويوم خربت الاخلاق تميلحت عند بي ام يوم نزل القزازه وقال: أنتا وش تبي ؟؟ ، قلت : انا مسكين ومحتاج ، ومطمن صوتي علشان ما يعرف وش الطبخه زي طرارين هالايام المهم ينشب في القزازه ويقول اول كلامه الله يعافيك ووو ، المهم ذا راعي البي ام صرفني ، مير ازعق في خشته: من حلاتك كاشخ في هالموتر المستاجر مدري المقسط ، مير تطير عيونه أشو أني كنست وفركت منه وألا التفله فيني فيني ، الدراهم الوحيده كانت 20 ريال من راعي سياره قالي اعطيك عشرين وترقص لي ، قلت لو اهز ياشيخ بس فيه دراهم ، مير أجيبه سامري قلطه عرضه شانت اخلاقه ونطل علي عشرين معفطه شكلها مخيسته لها شهر في بوكه !! ، مير لقطتها وخذ فيها كووب كابشتيو في قهوة مساء واتكي في المقهى شوي ويجي راعي المقهى معه ثلاثين ريال قالي : تكفى روح عن المحل طردت الزبائن ، قلت والكابشينو ، قال: حلال عليك بس روح، عاد انا احتراما له وما ودنا تصير مشاكل طلعت !!
وعلطوول لبيتنا يوم توني طاق الباب يطلع أخوي الكبير ويوم شاف الشكل قال : الله يعطيك ، يقطع ام الحاله << يقالك متقمص الشخصية خخخ
راعي: يقول: كنت واقفن عند اشارة الدايري ما علي شي معي حول مية ريال وشوي وتوقف سيارة مرور ويحجر لي ، طر بعيد، تراه ممنوع ، عاد أنا خربتها معاه قلت له: كم تبي طيب ، ناظرلي بعيين يحسبني متعود عليه، بس راعي خويكم ذهين قلب السالفه: يعني كم مخالفتها ، بدون ما يشاور : 100 ريال ، وتوني دافعها الا اشوف الي واقف في ذيك الجهة يطر قلت للعسكري ورا ما تكلم ذاك قالي : بلاه مشترك !!! يقطع ام الحالة
وتوني اطر من جديد ألأ واشوف القيصر مرسول أمي الحصي يقول أن الجهة تبعهم الي قاعد اطر فيها ، يا خوي منا والا منا مااافيييه ، عاد كبرت راسي وقعدت شوي والقى راعي الدوريه جاي لمي مشووت قعد يفتشني يدور ار بي جي لان القيصر مفتن عليّ " هين أوريك الوعد في المنتدى" ومير بعد ستمية حبه ونخوة ودخله وطلبه خلاني بس ما اتعودها ثاني مره لان فيها امن دوله !!!!
حالم: يقول : أول ما جيت توقعت اني جالس في الحراج كلن جايب بسطة قاعد يبيع !، وعاد انا مسنتر في النص من زين اختيار الاماكن ، بس طلع لي انه قوي لان لو بقا ريال بعد الحساب أصير في خشة المشتري فيستحي انه يدخل ريال جيبه فيذبها علي، بس بصراحة بأصير مثل الراجحي راعي المسجد أول ما بدا بالصرافه لاني صرت أصرف لربعي البياعه ريالات خخخ ، وكنت مستانس إلا يوم شفت واحدن جاااي تقل الطائر السريع ببب ، وشوي ويمسك بتلابيبي<<وخروو عن المثقف الرواية بانزلها هاليومين
ومير يزاعق والله يهديه شكل دكتور الاسنان ما ضبط الجسر صاير نصف سعابيله في خشتي !! يقولي: أنت الي بعتني الطيب الخايس التقليد شف وجهي ووجه بزاريني جتهم حساسيه ، لو أني ساكت ما جاني شي بس قلت له: تكفى يالي وجهك الاول تقل جواد العلي ، وتوني قايلها إلا وياخذ عوود طويل مسواك الي ينباع بخمسه ريال وخذ ملاحق في الدايري حسبي الله عليهم ماحطوا جسر مشاه معترض !!! بس سلمني الله أني دخلت في زحمة اوادم وعلطول بلعت العافيه ودعست لبيتنا
وراء الكواليس: جاااي مستاااانس وقرر الانسحاب ، جاب من فلوس الطراره قيمة السيديات الي يبيها وبعض القطع، عاد قبست الحرب في المجلس لانه متعهد انه يستمر ، ويجيك راعي ويطلع نذالته المعهوده ويكسر السيدي قدامه << في امان الله اخر مشاركه خخخ
وتوهم بتلاحطون إلا أننا مسكناهم وسمينا عليهم بالرحمان اكيد عين وحده من الاحزاب المعارضه << يؤ انقلاب مهيب طراره
وادي: المسكين نومة الظالم عباده ، قام على طاق البشريه وهرج سالفته بدون ما يرفع رقبته من زود البلاوي فيه ، يقول: قردني الله اني ابيع في هالاشاره رغم اني ضاائع حسيت اني في بومباي ، الهنود الي معي يطرون والا يبيعون مويه يشترون منهم ربعهم وانا كل ما قربت من واحد قال: روح سعودي خربان!! ، عاد كنت خادر والا تعرفون وش اسوي<< نصاب كمل ولا يكثر بس
وشوي ويصفون معنا ناس من اجناس واشكال، واحد من الجنسيات العربية يبيع قات << يقالك ما نعرف جنسيته خخخ
وباكستانيه يبيعون حشيش وافيون يا حياة الشقى بس ، وشوي والا يحجر لي واحد أما تبيع معي والا انقلع ، قلت ما لها داعي انقلع وارجع لكم بدون دراهم ، عاد وش صرت ابيع ، سيديات المهم وشوي وتصير كبسة شرطة ويطقوني هالهنود يحسبوني منهم مير انحاش وهذاني جااايكم
قاله حالم: جاي منتف ما معك ولا ريال شف وش بندفع في علاجك
وادي: ترى معي بطاقة معلم عندك خبر 20 في الميه على الشاش والبندول !!!
ومير تونا بنكمل الهرج إلا الأخ العريف لواء متقاعد في المجاهدين I s z محاصر المكان وقابض علينا عن بكره ابينا، ذا الادمي ما يمدينا نسلم منه ابد..
ما خذ وقت واجد جاهزين له خاااادرين وتعباااانين
يوم سألنه وش السبب ناظر في وادي وقال: هالنصاب وادي بايع لي سيدي فاضي ابن اللذينا ما يدري ان من غشنا فليس منا
الله يهديك يا وادي تبيع شي فاضي تغش الأوادم!!!!!!!
ما يستفاد من الموضوع:
1- السمنه تذهب الفطنه ـ ما يقصد سمسومه ابدا ـ
2- حط مسافه بينك وبين الي قدامك علشان تتقدم لو جاك احد والله صادقين المرور يوم قالوا: حط مسافه قانونيه بينك وبين الذي قدامك
3- لا تروح للتحلية وشكلك ما يواجه
4- خل معك محمول في السياره احتياط علشان تجرب السيديات الي تشتريها
5- اعتدل مع العسكري يعتدل معاك واذا تليكعت جرررك من مقفاك
6- تراني أحب راعي الأوله في الله << يبي يكحلها خخخ
والزعل مرفووووض والعتب ممنوووع
التعديل الأخير تم بواسطة سمسومه ; 23-03-2005 الساعة 09:58 PM.
|
23-03-2005, 05:37 PM
العرض العادي
